A5
Itoka Dios ipan iTlajkuilol Dios Ika Griego
Nopa ixtlamatinij kimatij itoka Dios nesi nechka 7 mil imiakpa ipan iTlajkuilol Dios Ika Hebreo tlen achtoui moijkuilok, tlen ijkuilijtok ika naui letras tlen nopa Tetragrámaton (יהוה). Pero miakej kiijtouaj itoka Dios amo nesiyaya ipan iTlajkuilol Dios Ika Griego tlen achtoui moijkuilok. Yeka, ipan miak biblias tlen kichijchijtokej ipan ni tonali amo nesi nopa tokajyotl Jehová ipan iTlajkuilol Dios Ika Griego, tlen nojkia kiiljuiaj Nuevo Testamento. Uan maske ipan iTlajkuilol Dios Ika Griego nojkia kiijtoua tlen uala ipan iTlajkuilol Dios Ika Hebreo kampa nesi nopa Tetragrámaton, miakej katli kitlajtolkueptokej Biblia san kiijkuilojtokej toTeko uan amo itoka Dios.
Ipan Biblia Tlen Yankuik Tlaltipaktli amo mochijtok nopa, yeka nopa tokajyotl Jehová nesi 237 imiakpa ipan iTlajkuilol Dios Ika Griego. ¿Kenke kiampa kichijkej katli kitlajtolkuepkej? Pampa kimatiyayaj ni ome tlamantli: 1) Nopa tlajkuiloli tlen san kimaijkuilojkej ika griego tlen tijpixtokej ipan ni tonali, nojkia san kiixkopintokej uan amo eli tlen achtouia moijkuilok. Uan tlauel miak tlen nama onka kiixkopinkej teipa kema ya panotoya se 200 xiuitl kema kiijkuilojkej. 2) Ipan nopa tonali, katli kiixkopinkej Biblia kipatlayayaj nopa Tetragrámaton ika Kýrios, ika griego ni kiijtosneki ‘toTeko’, o kiixkopinayayaj kampa ya kipatlatoyaj.
Nopa Comité tlen nopa Biblia Tlen Yankuik Tlaltipaktli kiitak onkayaya se keski tlamantli tlen kinextiyaya nopa Tetragrámaton kena nesiyaya ipan nopa tlajkuiloli tlen achtoui moijkuilok ika griego. Ma tikitakaj se keski:
Kema itstoyaj Jesús uan iapóstoles, ipan nopa tlajkuiloli tlen iTlajkuilol Dios Ika Hebreo nesiyaya nopa Tetragrámaton kampa achtouia ijkuilijtoya. Ni tlamantli uejkajkia miakej kineltokayayaj, uan más neski nelia kiampa eliyaya kema ipan Qumrán kiasikej nopa tlajkuiloli tlen iTlajkuilol Dios Ika Hebreo, tlen kiijkuilojkej ipan nopa achtoui siglo kema ya ualajtoya Jesús.
Kema itstoyaj Jesús uan iapóstoles, nopa Tetragrámaton nojkia nesiyaya ipan iTlajkuilol Dios Ika Hebreo tlen kitlajtolkueptoyaj ika griego. Ipan miak xiuitl nopa ixtlamatinij moiljuiyayaj nopa Tetragrámaton amo nesiyaya ipan iTlajkuilol Dios Ika Hebreo tlen kitlajtolkueptoyaj ika griego, tlen motokaxtiyaya Septuaginta. Pero nechka xiuitl 1950 kiasikej se keski pedazos tlen nopa Septuaginta tlen tlauel uejkajkia moijkuilok uan kitekiuiyayaj kema itstoya Jesús. Ipan nopa pedazos nesi itoka Dios ika letras hebreas. Nopa kinextia kema itstoya Jesús kena nesiyaya itoka Dios ipan iTlajkuilol Dios Ika Hebreo tlen motlajtolkueptoya ika griego. Uan ipan nopa tlajkuiloli tlen tlauel kitekiuiyayaj tlen nopa Septuaginta, kej nopa Códice vaticano o nopa Códice sinaítico, tlen moijkuilok ipan siglo cuarto amo nesi itoka Dios ipan Génesis hasta Malaquías (ipan nopa tlajkuiloli tlen achtoui moijkuilok kena nesiyaya). Yeka, ipan nopa tlajkuiloli tlen eltoya ipan nopa tonali nojkia amo nesiyaya itoka Dios ipan tlen kiiljuiaj Nuevo Testamento, tlen moijkuilok ika tlajtoli griego.
Kema momaijtok, Jesús kiiljuik iTata: “Nikinnextilijtok motoka maseualmej katli tinechmakak ipan Tlaltipaktli”. Uan nojkia kiijtok: “Uan nojua nikinnextilijtos”
Ipan iTlajkuilol Dios Ika Griego nesi Jesús miakpa kiijtok itoka Dios uan kinnextilik sekinok. Kema momaijtok, Jesús kiiljuik iTata: “Nikinnextilijtok motoka maseualmej katli tinechmakak ipan Tlaltipaktli”. Uan nojkia kiijtok: “Nikinnextilijtok motoka, uan nojua nikinnextilijtos” (Juan 17:6, 11, 12, 26).
Kema tlanki moijkuiloua iTlajkuilol Dios Ika Hebreo, pejki moijkuiloua iTlajkuilol Dios Ika Griego tlen nojkia Dios kichijki ma moijkuilo, yeka amo kinamiki kiixpolosej itoka Dios ipan nopa tlajkuiloli. Nechka xiuitl 49 kema ya ualajtoya Jesús, Santiago kiniljuik nopa ueuejtlakamej tlen Jerusalén: “Symeón techpouilijtok nochi kenijkatsa Dios pejki mosentlalia ipan maseualmej katli euaj ipan sekinok altepemej para kinkixtis se keskij tlen inijuantij para ma kiuikakaj itoka” (Hechos 15:14). Tlaj ipan achtoui siglo amo aka kimatiyaya yon kitekiuiyaya itoka Dios, uajka Santiago amo kiijtojtoskia ni tlamantli.
Ipan iTlajkuilol Dios Ika Griego nesi itoka Dios san ika se keski letras. Itoka Dios nesi ipan tlajtoli aleluya, tlen uala ipan Apocalipsis 19:1, 3, 4 uan 6. Ni tlajtoli kistok tlen se tlajtoli ika hebreo tlen kiijtosneki ‘xijueyichiuakaj Jah’. Kena, Jah eli se tokajyotl kototsi tlen Jehová. Nojkia, miak tokajyotl tlen nesi ipan iTlajkuilol Dios Ika Griego mokixtijtok tlen itoka Dios. Uan kiampa panotok, ipan se keski libros tlen kitekiuiaj para momachtisej, kiijtoua Jesús itoka kiijtosneki ‘Jehová techmanauia’.
Ipan tlajkuiloli tlen kichijkej judíos kinextia Cristo itokilijkauaj katli eliyayaj judíos kitekiuiyayaj itoka Dios kema tlajkuilouayayaj. Nopa Tosefta, eliyaya se tlajkuiloli tlen kipixtoya miak tlanauatili tlen achtouia amo moijkuilojtoya uan teipa kena kiijkuilojkej uan kitlamiltijkej nechka xiuitl 300. Nopaya kiniljuiyaya judíos tlake monekiyaya kichiuasej ika tlen kiijkuilojtoyaj Cristo itokilijkauaj tlaj kitlatiskiaj ipan sábado: “Nopa gilionim [uelis eliyaya nopa naui libros Mateo, Marcos, Lucas uan Juan] uan nopa libros tlen kiijkuilojkej apóstatas [uelis eliyayaj judíos tlen mochijtoyaj Cristo itokilijkauaj] kiijtouayaya amo ma kikixtikaj kampa tlalelemekatoya uan ma kikauakaj ma tlatla nopa amatl kampa nesi itoka Dios”. Nojkia ipan nopa Tosefta, nopa rabí Yose tlen eua Galilea, katli itstoya kema pejki nopa siglo segundo, kiijtok tlake kichiuaskiaj ika nopa tlajkuiloli tlen kiijkuilojkej Cristo itokilijkauaj tlaj tlalemeniskia ipan semana: “Xijtejtekikaj kampa nesi itoka Dios uan xikajokuikaj kampa kitlaliaj amatl tlen ayokmo motekiuia tlen kiiljuiaj genizá, uan nopa sekinok iamayo, ma tlatla”.
Se keski katli tlauel momachtiaj Biblia kimatij uelis itoka Dios nesiyaya ipan se keski textos tlen iTlajkuilol Dios Ika Griego tlen mokixtijtok ipan iTlajkuilol Dios Ika Hebreo. Se diccionario (The Anchor Bible Dictionary, se tlamachtili tlen itoka “El Tetragrámaton en el Nuevo Testamento”), kiijtoua: “Onka tlamantli tlen kinextia ipan iTlajkuilol Dios Ika Griego nesiyaya nopa Tetragrámaton, itoka Dios Yahweh, ipan se keski textos o ipan nochi textos tlen mokixtiyaya ipan iTlajkuilol Dios Ika Hebreo”. Uan George Howard, katli tlauel momachtijtok Biblia, kiijtoua: “Pampa nopa Tetragrámaton nojua moijkuilouayaya kema kiixkopinayayaj Biblia ika griego [Septuaginta], tlen kitekiuiyayaj Cristo itokilijkauaj tlen achtoui siglo, kinamiki tijneltokasej katli kiijkuilojkej iTlajkuilol Dios Ika Griego, nojkia kiijkuilojkej nopa Tetragrámaton ipan Biblia”.
Katli kitlajtolkueptokej Biblia uan tlauel kinixmatij kitekiuijtokej itoka Dios ipan iTlajkuilol Dios Ika Griego. Ma tikitakaj tlen kichijkej nopa tlajtolkuepanij. Sekij kitlajtolkuepkej Biblia kema ayamo kichiuayayaj nopa Biblia Tlen Yankuik Tlaltipaktli: ika alemán, Dominikus von Brentano (Die heilige Schrift des neuen Testaments, 1791); ika francés, André Chouraqui (Bible de Chouraqui, 1985); ika inglés, Benjamin Wilson (The Emphatic Diaglott, 1864), uan ika portugués, Manuel Fernandes de Santanna (O Evangelho Segundo S. Mattheus, 1909). Ika español, Pablo Besson kitekiuik tokajyotl Jehová ipan Lucas 2:15 uan ipan Judas 14 (El Nuevo Testamento, 1919). Ya nojkia kiijkuilok itoka Dios ipan kipano cien notas, kiampa kinextik kanke uelis nesiyaya achtouia. Nojkia onka se chikuasej biblias ika español tlen iTlajkuilol Dios Ika Griego kampa kitekiuiaj itoka Dios kej Yahvé, Yahweh uan YHWH. Kej nopa Evangelio: mensaje de felicidad (1969) uan Los Hechos, las Cartas y el Apocalipsis (1973), ni ome kiijkuilok Hermenegildo Zanuso, uan nopa Biblia Peshitta en Español (2006), tlen nopa Instituto Cultural Álef y Tau.
Itoka Dios ipan Hechos 2:34, ipan Biblia The Emphatic Diaglott (1864), tlen kichijki Benjamin Wilson.
Onka biblias ipan kipano 100 tlajtoli kampa nesi itoka Dios ipan iTlajkuilol Dios Ika Griego. Miak tlajtoli tlen África, América, Asia, Europa uan islas del Pacífico ajachika kitekiuiaj itoka Dios (xikita iamayo 610 uan 611). Katli kitlajtolkuepkej iTlajkuilol Dios Ika Griego ipan nopa tlajtoli kitekiuijkej itoka Dios pampa nojkia kimatiyayaj nopa tlamantli tlen tikixtonkej. Se keski tlen nopa biblias namanok motlajtolkueptok. Ipan 1999 mochijki nopa Biblia ika rotumano, tlen kitekiuia Jihova 51 imiakpa ipan 48 versículos. Uan ipan 1989 mochijki se Biblia ika batako toba se tlajtoli tlen kamanaltij Indonesia tlen kitekiuia Jahowa 110 imiakpa.
Itoka Dios ipan Marcos 12:29 uan 30, ipan Biblia ika tlajtoli hawaiano.
Kej ya tikitakej onka miak tlamantli tlen kinextia itoka Dios, Jehová, kinamiki nesis ipan iTlajkuilol Dios Ika Griego. Uan ya nopa kichijkej katli kitlajtolkuepkej Biblia Tlen Yankuik Tlaltipaktli. Inijuantij tlauel kitlepanitaj itoka Dios uan amo kinekij kiixpolosej se tlamantli tlen uala ipan nopa tlajkuiloli tlen achtoui moijkuilok (Apocalipsis 22:18, 19).