¿Tikilnamiki?
¿Kuali timomachtijtok tlen kistok ipan pilamochtsi Tlen Tematiltia? Xikita tlaj tiuelis tijnankilis ni tlajtlanili:
Kema toTeotsij itlanechikol kiijtoua mochiuas se tlenijki, ¿tlake moneki kichiuasej katli tepaxalouaj uan ueuejtlakamej?
Moneki nimantsi kichiuasej tlen kiniljuiaj. Uelis motlajtlanisej: “¿Nikinpaleuia toikniuaj amo ma kitlauelkauakaj Jehová? ¿Nimantsi nijneltoka uan nijchiua tlen nechiljuiaj?” (w16.11, iamayo 14).
¿Kema Cristo itokilijkauaj kejuak kintsajkej ipan Babilonia?
Se kentsi teipa kema mijkej apóstoles. Se keskij tlakamej pejkej tlayakanaj. Iglesia uan tekichiuanij pejkej tlamachtiaj tlen amo melauak uan amo kinkajkej katli nelia eliyayaj Cristo itokilijkauaj (trigo) ma tlamachtikaj tlen melauak. Kema nechka asiskia xiuitl 1914, katli kintlapejpenijtoyaj yasej iluikak pejkej kisaj tlen Ueyi Babilonia (w16.11, iamayo 24-26).
¿Kenke tlauel ipati tlen kichijki Lefèvre d’Étaples?
Teipa tlen xiuitl 1520, Lefèvre kitlajtolkuepki Biblia ipan tlajtoli francés pampa kinekiyaya nochi ma kipiakaj se. Kej kiixtonki se keski textos kinpaleuik Martín Lutero, William Tyndale uan Juan Calvino (wp16.6-S, iamayo 10-12).
¿Tlake kiijtosneki “timoseniljuiaj [ipan] totlajtlakolchijkanakayo” uan ipan “itonal toTeko”? (Rom. 8:6)
Katli moseniljuia ipan itlajtlakolchijkanakayo san mosentlalia kichiuas tlen kineki uan nochipa kiijtojtok tlen nopa tlamantli. Uan katli moseniljuia ipan toTeko itonal, mosentlalia kichiuas tlen toTeotsij kineki uan kichiua kampeka moiljuis kej ya. Kikaua toTeotsij itonal ma kiyakana itlalnamikilis. Tlaj timoseniljuiaj ipan totlajtlakolchijkanakayo kiijtosneki mikilistli: uan ipan toTeotsij itonal kiijtosneki nemilistli uan tlaseuilistli (w16.12, iamayo 11-14).
¿Tlake tlamantli mitspaleuis amo tlauel ximotekipacho?
Achtoui xijchiua san tlen tlauel ipati, xikilnamiki amo nochi tiuelis tijchiuas, mojmostla xijkixti se kentsi tonali uan ximosiajketsa, ximoyolpakilti ipan tlen Jehová kichijchijtok, nochipa xiyolpakto, xijchiua ejercicio uan kualka uan kuali xikochi (w16.12, iamayo 18, 19).
¿Kenijkatsa Enoc ‘amo kiitak kenijkatsa mijki’? (Heb. 11:5, TNM)
Uelis toTeotsij kichijki Enoc yolik ma miki, kiampa amo tlaijiyouiskia tlaj kimiktiskiaj (wp17.1-S, iamayo 12, 13).
¿Kenke tlauel ipati timoechkapantlalisej?
Tlaj timoechkapantlaliaj, amo timoiljuisej san tojuantij tlauel topati uan tikilnamiktosej onka se keski tlamantli tlen amo kinamiki o amo uelis tijchiuasej. Moneki tikilnamiktosej tlen tijchiuasej ueliskia kichiuas sekinok ma moyolkokokaj o ayokmo ma techtlepanitakaj (w17.01, iamayo 16).
¿Kenijkatsa tijmatij toTeotsij kiyakanki cuerpo gobernante ipan achtoui siglo kej nojkia kiyakana ipan ni tonali?
ToTeotsij itonal kinpaleuik ma kikuamachilikaj tlen Biblia tlamachtia, iluikaeuanij kinpaleuijkej ipan tlajtolmoyaualistli uan motemachijkej ipan toTeotsij iTlajtol. Ipan ni tonali nojkia kiampa pano (w17.02, iamayo 24-26).
¿Tlake techpaleuis tlauel ma tijtlaskamatikaj nopa tlaxtlauili?
Naui tlamantli: ajkia temakak, kenke temakak, techmakak tlen monekiyaya uan tlake monejki kichiuas. Moneki kuali timoyoliljuisej ipan ni tlamantli (wp17.1, iamayo 4-6).
¿Uelis se Cristo itokilijka kipatlas tlen kitlapejpenijtoya kichiuas?
Maske moneki tijchiuasej tlen tikijtojkej, kemantika kualtiaskia tijpatlasej. Kema toTeotsij kiitak níniveeuanij moyolkuepkej, Jehová kipatlak tlen kiijtojtoya uan ayokmo kintsontlamiltik. Tlaj mopatla kej tiitstokej o techiljuiaj se tlamantli tlen amo tijmatiyayaj, uelis monekis tijpatlasej tlen tijtlapejpenijtoyaj tijchiuasej (w17.03, iamayo 13).
¿Kenke amo kuali se teijilnamikis?
Pampa ueliskia kichiuas se kuesoli nojua ma moueyili. Tlaj nelia techchiuilijtokej tlen amo kuali o amo, amo kinamiki tikinijilnamikisej sekinok pampa nopa amo kisenkauas se kuesoli (w17.04, iamayo 18).