¿Kipaktia Jehová kej nimonejnemiltia?
1. ¿Kenke Biblia kejuak eliskia se teskatl?
1 Miakej mojmostla motlachiliaj ipan teskatl pampa kej nopa kiitaj kanke moneki mokualchijchiuasej. ¿Nojkia timotlachilia nochipa ipan teskatl? Biblia kejuak eliskia se teskatl. Tlaj tijpouasej techpaleuis tikitasej tlake tijpiaj ipan toyolo kej Jehová kichiua (1 Sam. 16:7; Sant. 1:22-24). Biblia “kipannextia intla kuali o axkuali tlen timoyoliljuiaj uan kipannextia tlen tijnekij tijchiuasej” (Heb. 4:12). ¿Kenijkatsa uelis techpaleuis kuali titlajtolmoyauasej tlaj mojmostla tijpouasej Biblia uan ipan timoyoliljuisej? (Sal. 1:1-3.)
2. ¿Kenijkatsa uelis techpaleuis Biblia ma tikitakaj kenijkatsa timonejnemiltiaj?
2 Xijtekiui Biblia kej se teskatl. Kema tijpouaj ipan Biblia tlen toTeotsij itekipanojkauaj tijmatij tlake kuajkuali tlamantli kipaktia Jehová ma tijnextikaj ipan tonemilis. David tlauel kitlepanitak toTeotsij itoka (1 Sam. 17:45, 46). Isaías amo majmajki kema kinejki tlajtolmoyauati kampa amo kinekiyayaj tlaneltokasej (Is. 6:8, 9). Pampa Jesús tlauel kiikneliyaya iTata, kema tlajtolmoyajki amo kiitak kej se tekitl ouij, ya kiitak kej se tlamantli tlen kiyolchikauayaya uan kichiuayaya ma yolpaki (Juan 4:34). Uan achtoui Cristo itokilijkauaj tlajtolmoyajkej ika nochi ininyolo, motemachijkej ipan Jehová uan mosentlalijkej amo kema kitlauelkauaskiaj (Hech. 5:41, 42; 2 Cor. 4:1; 2 Tim. 4:17). Tlaj timoyoliljuisej kenijkatsa sekij kitekipanojkej toTeotsij, techpaleuis kuali tijtekipanosej toTeotsij.
3. ¿Kenke moneki nimantsi ma tijpatlakaj tlen amo kuali ipan tonemilis?
3 Techtlalnamiktia kema timokuapolouaj. Tlaj timotlachiliskiaj ipan se teskatl uan amo tijpatlaskiaj tlen amo kuali nesi, amo techpaleuiskia. Yeka, moneki tijtlajtlanisej Jehová ma techpaleui kuali timotlachilisej uan ma tijpatlakaj tlen moneki (Sal. 139:23, 24; Luc. 11:13). Uan pampa nechka asis itlamia tonali uan ueliskia tipoliuisej, moneki nimantsi ma tijpatlakaj tlen amo kuali ipan tonemilis (1 Cor. 7:29; 1 Tim. 4:16).
4. ¿Tlake kichiua se akajya kema kejuak motlachilia ipan Biblia uan teipa kipatla tlen amo kuali?
4 Jehová kipatiita tlen se maseuali kipia ipan iyolo uan amo san tlen nesi (1 Ped. 3:3, 4). ¿Tlake kichiua se akajya kema kejuak motlachilia ipan Biblia uan teipa kipatla tlen amo kuali? Ya ‘kitlachilijtinemi toTeko itlanauatiljuaj uan axkiilkaua, mojmostla kichijtinemi tlen kiijtoua, yeka toTeko kiteochiuas’ (Sant. 1:25). Tojuantij tlauel tiyolpakisej uan kuali titlajtolmoyauasej pampa “tiitstokej keja teskatl tlen ipan tlauia [Jehová] itlatlanex” (2 Cor. 3:18).