Kichijchijkej se torre ipan Babel

Kema ya panotoya se keski xiuitl kema tlauel uetski atl, ikoneuaj Noé kinpixkej miakej ininkoneuaj. Tlauel momiakilijkej uan kampa ueli mochantitoj, kej Jehová kinnauatijtoya.

Sekij amo kichijkej tlen Jehová kinnauatijtoya. Kiijtojkej: “Nikaj ma timokauakaj, ma tijchijchiuakaj se ueyi altepetl uan se torre tlen asis ipan iluikak. Kiampa nochi techixmatisej”.

Jehová amo kipaktik tlen kichiuayayaj, yeka ayokmo kinkauilik ma tekitikaj. ¿Tijmati tlake kichijki? Kichijki ma kamanaltikaj ipan sekinok tlajtoli. Inijuantij ayokmo kikuamachiliyayaj tlen sekinok kiniljuiyayaj, yeka ayokmo uelkej tekitij. Maseualmej kitokaxtijkej Babel nopa altepetl, tlen kiijtosneki “Kampa axuelkej momachiliaj”. Teipa, nopa maseualmej kampa ueli mochantitoj. Uan kampa mochantitoj nojua kichiuayayaj tlen amo kuali. ¿Timoiljuia nojua itstoya se akajya katli kiikneliyaya Jehová? Nopa tikitasej ipan seyok tlamachtili.