Tlen maseualmej kinekij kimatisej

¿Kenke kema nechka mikiskia Jesús kiijtok tlen ijkuilijtok ipan Salmo 22:1?

Kej kiijtoua Mateo 27:46, Jesús kiijtok ni kema nechka mikiskia: “NoTeko, noTeko, ¿para tlen tinechtlauelkajtok?”. Kiampa moaxitik tlen kiijkuilok David ipan Salmo 22:1 (Mar. 15:34). Jesús amo kiijtok ni tlajtoli pampa moiljuiyaya Jehová amo kiikneliyaya o amo kuali tlaneltokayaya. Ya kimatiyaya kenke monekiyaya mikis uan kinekiyaya motemaktilis (Mat. 16:21; 20:28). Nojkia ipan nopa tonali Jehová ‘amo kimokuitlauiskia iyolis’ (Job 1:10). Jehová kikajki ma miki iKone maske tlauel ouij eliskia pampa kimatiyaya amo kema kitlauelkauaskia (Mar. 14:35, 36).

Uajka, ¿kenke Jesús kiijtok ni tlajtoli? Maske amo tijmatij kenke kiijtok ni tlajtoli, ma tikitakaj se keski tlamantli tlen techpaleuis.a

Uelis Jesús kinekiyaya kiijtos Jehová amo kipaleuiskia kema kimiktiskiaj. Ya monekiyaya motemaktilis uan Jehová amo kipaleuiskia. Jesús eliyaya se maseuali uan monekiyaya mikis “topampa tojuantij” (Heb. 2:9).

Uelis Jesús kiijtok ni tlajtoli tlen Salmo 22 pampa kinekiyaya katli nopaya itstoyaj ma kiilnamikikaj nochi nopa salmo. Uejkajkia, judíos momajtoyaj kitsontekontlalisej miak salmos. Tlaj kinilnamikiliyayaj se texto, uajka kiilnamikiyayaj nochi nopa salmo. Jesús kinekiyaya kinpaleuis judíos ma kiilnamikikaj nopa miak tlajtolpanextili tlen eltok ipan nopa salmo kampa kiijtoua tlake panoskia kema mikiskia (Sal. 22:7, 8, 15, 16, 18, 24). Nojkia, kampa tlami ni salmo kiijtoua san Jehová kinamiki tlanauatis ipan nochi Tlaltipaktli (Sal. 22:27-31).

Uelis Jesús kiijtok ni tlajtoli pampa kinekiyaya momanauis. Kema nechka kimiktiskiaj, kiijiyouik ma kitlaijiljuikaj uan ma kitlajtolsenkauakaj (Mat. 26:65, 66). Ika tlayoua kitlajtolsenkajkej maske amo kiampa kinamikiyaya kichiuasej (Mat. 26:59; Mar. 14:56-59). Uelis ika tlen Jesús kiijtok kema nechka kimiktiskiaj, kinejki kiijtos amo kinamikiyaya kiampa kichiuilisej pampa amo tleno kichijtoya.

Uelis Jesús kinilnamikiliyaya sekinok maske David nojkia tlaijiyouiyaya, amo kiijtosnekiyaya Jehová ayokmo kuali kiitayaya. Ni amo kiijtosneki David ayokmo kuali tlaneltokayaya pampa teipa kiijtok Jehová kinmanauia itokilijkauaj uan nojua kiteochijki (Sal. 22:23, 24, 27). Nojkia, maske Jesús, ‘iteipaixui tlanauatijketl David’ tlaijiyouijtoya kema kikuapilojtoyaj, amo kiijtosnekiyaya Jehová ayokmo kuali kiitayaya (Mat. 21:9).

Uelis Jesús kiampa kiijtojtoya pampa kiyolkokouayaya kimatis Jehová amo kimanauiskia uan kiampa kinextiskia amo kitlauelkauaskia. Kema Adán uan Eva kiijixnamijkej toTeotsij, Jesús monejki tlaijiyouis uan mikis. Tlen kichiuaskia, amo eliyaya tlen Jehová mosentlalijtoya kichiuas. Maske Jesús amo kichijtoya tlen amo kuali, ya monekiyaya tlaijiyouis uan mikis, kiampa kinextiskia Satanás san istlakati uan techmakixtiskia tlen tlajtlakoli uan mikilistli (Mar. 8:31; 1 Ped. 2:21-24). Nopa ueliskia panos tlaj Jehová kikauaskia ma tlaijiyoui.

Uelis Jesús nojkia kinekiyaya kinpaleuis itokilijkauaj ma mosentlalikaj kenke Jehová kikajki kej nopa ma kimiktikaj.b Jesús kimatiyaya miakej ayokmo kuali tlaneltokaskiaj pampa kimiktiskiaj kej se akajya katli kichijtoya tlen amo kuali (1 Cor. 1:23). Tlaj itokilijkauaj mosentlaliskiaj ipan imikilis, kuali kikuamachiliskiaj kenke kiampa kichijki (Gál. 3:13, 14). Uajka amo kiitaskiaj kej se akajya katli kichijtoya tlen amo kuali, kiitaskiaj kej katli techmanauiko.

Maske amo tijmatij kenke kiijtok ni tlajtoli, kimatiyaya tlaj mikiskia kichiuaskia Jehová ipakilis. Teipa kiijtok: “Tlanki noteki” (Juan 19:30; Luc. 22:37). Jehová amo kimanauik ipan nopa tonali pampa kiampa kiaxitiskia tlen kiiljuijtoyaj ma kichiuaki. Nojkia kiampa moaxitik tlen ijkuilijtok ipan “iTlanauatiljuaj Moisés, uan ipan Salmos, uan ipan ininama nopa teokamanalouanij” (Luc. 24:44).