Titetlasojtlaj: se kuali tlamantli tlen tijnextiaj ika tlen tikijtouaj uan tijchiuaj

NOCHI tijtlaskamatij kema sekinok kintekipachoua uan kikuamachiliaj tlen tijyolmatij. Uan, ¿kenijkatsa tojuantij uelis kiampa tijchiuasej ika sekinok?

Ipan Biblia nopa tlajtoli titetlasojtlaj kiijtosneki kema se akajya motekipachoua ika sekinok uan kineki kuali ma itstokaj, uan nopa kinextia ika tlen kiijtoua uan ika tlen kichiua. Kema titeikneliaj uan tijkuamachiliaj tlen sekinok kiyolmatij techyololinia ma tijnextikaj ni kuali tlamantli. ToTeotsij itonal kichiua ma tijnextikaj ni kuali tlamantli, yeka nochi toTeotsij itekipanojkauaj moneki tijchiuasej kampeka tijnextisej (Gál. 5:22, 23). Nama, ma tikitakaj kenijkatsa Jehová uan Jesús kinextiaj ni kuali tlamantli uan kenijkatsa uelis tijchiuasej kej inijuantij.

JEHOVÁ KIKUAMACHILIA TLEN TIJYOLMATIJ

Titetlasojtlas nojkia kiijtosneki tijpias kuali moyoloa. Jehová kinextia ni kuali tlamantli ika nochi maseualmej maske sekij “axkuajkualmej o axmotlaskamatij” (Luc. 6:35). Jehová “kichiua tonati ma tlaui ipan tlen axkuajkualmej uan ipan tlen kuajkualmej. Uan yajaya kichiua ma uetsi atl ipan ininmil tlen itstokej xitlauakej iixtla uan ipan ininmil tlen axitstokej xitlauakej iixtla” (Mat. 5:45). Kej tikitaj, maske sekij maseualmej amo kineltokaj Jehová kinchijchijtok, kena kinpaleuia nochi tlamantli tlen kichijchijtok pampa kichiua nojua ma yoltokaj uan nojkia ma yolpakikaj.

Ma tikitakaj kenijkatsa Jehová kinextik ni kuali tlamantli ika Adán uan Eva. Kema ya tlaixpanotoyaj, “kiijtsonkej ixiuiyo nopa kuauitl tlen itoka higuera [...] uan ika ya nopa motsajkej”. Jehová kitelchijki nopa tlali uan moskaltik “uitstli uan sauamekatl”, uajka Jehová kimatiyaya inijuantij monekiyaya kipiasej seyok ininyoyo pampa ayokmo itstoskiaj ipan xochimili. Yeka, kinchiuilik “ininyoyo ika ininkuetlaxo tlapialmej”, nopa kinextia Jehová kiitak tlake kinpolouayaya (Gén. 3:7, 17, 18, 21).

Maske Jehová kintlasojtla tlen axkuajkualmej uan tlen kuajkualmej, ya nojua tlauel kineki kintlasojtlas itekipanojkauaj. Kema itstoya Zacarías, se iluikaejketl motekipachouayaya pampa ayokmo kikualchijchiuayayaj nopa teokali tlen eltoya ipan Jerusalén. ToTeotsij kitlakakilik uan “kiiljuik tlajtoli tlen kuali uan tlen teyolchikaua” (Zac. 1:12, 13). Jehová nojkia kitlasojtlak tlajtolpanextijketl Elías. Kema tlauel motekipachojtoya, kiiljuik Jehová ma kimikti. ToTeotsij kikuamachilik tlen kiyolmatiyaya, uan yeka kititlanki se iluikaejketl ma kiyolchikauati. Nojkia kiiljuik amo itstoya iselti. Pampa Jehová kipaleuik uan kiyolchikajki ika tlen kiiljuik, Elías kichijki tlen kinauatijkej (1 Rey. 19:1-18). Uan, ¿ajkia kichijki kej toTeotsij uan kinchiuilik tlen kuali sekinok?

TLEN JESÚS KICHIJKI

Kema Jesús itstoya ipan Tlaltipaktli, miakej kiixmatkej kej se akajya katli kikuamachiliyaya tlen kiyolmatiyayaj sekinok uan kuali teseliyaya. Ya amo kema kinyolkokok uan nochipa kintlepanitak. Jesús kikuamachiliyaya tlen kinpanoyaya sekinok, uan yeka kiijtok: “Xiualakaj kampa na nochi inmojuantij tlen intlaxikouaj uan intlamamaluikaj etik, uan na niinmechkixtilis inmotlamamal para ximoseuikaj uan ximosiyajkauakaj”. Nojkia kiijtok: “Axouij nopa tekitl tlen niinmechmakas” (Mat. 11:28-30). Yeka, maseualmej kitokiliyayaj kampa yauiyaya. Jesús kintlasojtlayaya, yeka kintlamak, kinchikajki uan “pejki kinmachtia miak tlamantli” tlen iTata (Mar. 6:34; Mat. 14:14; 15:32-38).

Jesús kikuamachiliyaya tlen kinpanoyaya sekinok uan kimatki tlake kichiuas. Maske kemantika kinekiyaya mosiajkauas, ya nochipa kuali kinseliyaya katli kitemoyayaj (Luc. 9:10, 11). Se tonali, kinechkauik se siuatl katli doce xiuitl tlauel esotemoyaya uan kiitskilik iyoyo pampa kinekiyaya mochikauas. Nopa siuatl amo ueliskia kichiuas nopa pampa nopa Tlanauatili kiijtouayaya eliyaya “axtlapajpaktik” (Lev. 15:25-28). Jesús amo kiajuak. Ya kitlasojtlak nopa siuatl katli majmauiyaya, uan kiiljuik: “Nane, timochikajki pampa tinechneltokatok. Xia ika pakilistli pampa ayok tijpia mokokolis” (Mar. 5:25-34). ¡Nelia Jesús tlauel tetlasojtlayaya!

MONEKI TIJNEXTISEJ IKA TLEN TIJCHIUASEJ

Ni tlamantli tlen tikitstokej kinextia kema se akajya tetlasojtla moneki kinextis ika tlen kichiua. Jesús kinejki kinextis tlauel ipati kiampa ma tijchiuakaj, yeka kiijtok nopa tlapoualistli tlen se kuali tlakatl samariaejketl. Maske samariaeuanij uan judíos amo kuali mouikayayaj, ipan nopa tlapoualistli nopa samariaejketl kitlasojtlak se judío katli kitlachtekilijtoyaj, kimakilijtoyaj uan nechka kimiktiskiaj. Ya kipajtilik kampa kokojtoya, kiuikak ipan se kali kampa kochij paxalouanij uan kiiljuik se tlakatl ma kimokuitlaui uan kitlaxtlauik. Nojkia kiiljuik ya tlaxtlauaskia sekinok tlamantli tlen monekiskia (Luc. 10:29-37).

Uajka, kema se akajya tetlasojtla, kinextia ika tlen kichiua, uan nojkia kiijtoua tlajtoli tlen ika kinyolchikaua sekinok. Biblia kiijtoua “tlen moyolkuesoua nelia tlaijiyouia, pero se kuali tlajtoli kimakas pakilistli ipan iyolo” (Prov. 12:25). Tlaj titetlasojtlaj uan tlaj tijpiaj kuali toyolo, kichiuas ma tikinyolchikauakaj sekinok ika kuali tlajtoli tlen kichiuas ma yolpakikaj uan kiitasej nelia techtekipachoua tlen kinpano. Nopa kinpaleuis nojua ma kiijiyouikaj kuesoli tlen teipa kiixnamikisej (Prov. 16:24).

¿TLAKE TECHPALEUIS MA TITETLASOJTLAKAJ?

Tojuantij techchijchijkej kej “itlachialis toTeko”, yeka nochi uelis tijnextisej ni kuali tlamantli (Gén. 1:27). Ma tikitakaj tlen Biblia kiijtoua. Kema apóstol Pablo yajki Roma, kimokuitlauijtiajki “se tlayakanketl tlen soldados tlen itoka eliyaya Julio”. Ni tlakatl “kitlasojtlak Pablo uan kikauilik ma kinpaxaloti iuampoyouaj uan para inijuantij ma kimakakaj nochi tlen moneki para ika panos” ipan altepetl Sidón (Hech. 27:3). Teipa, kema Pablo uan sekinok maseualmej nechka misauiskiaj, maseualmej tlen Malta kinselijkej ika pakilistli uan tlipitskej pampa kinekiyayaj ma mototonilikaj uan kichijkej sekinok tlamantli tlen ika kinpaleuijkej (Hech. 28:1, 2). Nelia tlauel kuali tlen kichijkej. Uajka, tijnextis titetlasojtla amo san kiijtosneki titepaleuis san kemantika, moneki tijchiuas sekinok tlamantli.

Tlaj tijnekij tijchiuasej tlen Jehová kipaktia, moneki nochipa tijnextisej ni kuali tlamantli uan tijchiuasej ipan tonemilis. Yeka, Jehová kiijtoua: “Xikintlasojtlakaj uan xikinchiuilikaj sekinok tlen kuali” (Col. 3:12). Kemantika, uelis ouij tijmatisej tikinchiuilisej tlen kuali sekinok. ¿Kenke? Uelis pampa techkualankaitaj, tipinauaj o pampa nojua ouij tijmatij timoiljuisej kenijkatsa tikinpaleuisej sekinok. Maske ouij tijmatij, tlaj tikiljuisej Jehová ma techmaka itonal uan tlaj tijchiuasej kej ya, techpaleuis ma tijnextikaj ni kuali tlamantli (1 Cor. 2:12).

¿Tlake tlamantli techpoloua tijchiuasej uan kiampa nojua tikinchiuilisej tlen kuali sekinok? Ueliskia timotlajtlanisej: “¿Kuali nikintlakakilia sekinok? ¿Nikita tlake kinpoloua? ¿Kema nijpaleuik se akajya katli amo eli se tlen nochampoyouaj o amo eli nouampo?”. Uelis nojua timosentlalisej tijchiuasej sekinok tlamantli, kej kuali tikinixmatisej sekinok, uan nojua tlauel moneki tikinixmatisej toikniuaj tlen tlanechikoli. Kiampa tijmatisej kenijkatsa itstokej uan tlake kinpoloua. Teipa ma tijchiuakaj tlen techpaktiskia ma kichiuakaj ika tojuantij (Mat. 7:12). Uan nojkia ma tikiljuikaj Jehová ma techpaleui, uan ya kiteochiuas tlen tijchiuasej (Luc. 11:13).

SE KUALI TLAMANTLI TLEN KINPAKTIA SEKINOK

Kema apóstol Pablo kiijtok nopa kuajkuali tlamantli tlen moneki kinextis se toTeotsij itekipanojka, nojkia kiijtok moneki tikinchiuilisej sekinok tlen kuali o tijpiasej kuali toyolo, uan ya nojkia kinextiyaya nopa (2 Cor. 6:3-6). Maseualmej kinpaktiyaya itstosej iuaya Pablo pampa kitekipachouayaya tlen kinpanoyaya uan nopa kinextiyaya ika tlen kiijtouayaya uan ika tlen kichiuayaya (Hech. 28:30, 31). Tlaj tojuantij nojkia kuali timonejnemiltisej, uelis kichiuas sekinok ma kinekikaj kiixmatisej Jehová. Tlaj tikinchiuiliaj tlen kuali nochi maseualmej uan nojkia katli techkualankaitaj, uajka uelis tijchiuasej ma kipatlakaj tlen moiljuiaj uan ayokmo ma techkualankaitakaj (Rom. 12:20). Teipa, uelis inijuantij nojkia kinekisej kiixmatisej Jehová.

Ipan Xochimili tlauel miakej maseualmej moyolkuisej uan tlauel kuali kiyolmatisej kema tijnextisej tijkuamachiliaj tlen kiyolmatij pampa uelis amo kema kiampa kinnextilijkej. Tlauel yolpakisej uan nojkia kinekisej kinchiuilisej tlen kuali sekinok. Jehová kinkauas ma itstokaj nochipa katli kinextisej teikneliaj uan tetlasojtlaj. Uan ayokmo itstosej katli amo kinekisej kinextisej nopa kuali tlamantli (Sal. 37:9-11). Kema toTeotsij iTlanauatijkayo tekichiuas ipan Tlaltipaktli tiitstosej ika tlaseuilistli uan amo aka majmauis. Uan ipan ni tonali, ¿kenijkatsa techpaleuia tijnextisej titetlasojtlaj?

¿KENIJKATSA TECHPALEUIS TLAJ TIJNEXTISEJ TITETLASOTLAJ?

Biblia kiijtoua: “Se tlakatl tlen tetlasojtla mochiuilia tlen kuali pampa moyolpaktia” (Prov. 11:17). Maseualmej kinpaktia itstosej ininuaya uan nojkia kinekij kichiuasej kej inijuantij. Jesús kiijtok: “Sekinok inmechchiuilisej keja inkinchiuiliaj” (Luc. 6:38). Maseualmej katli kiampa elij, nima mouampojchiuaj ininuaya sekinok.

Apóstol Pablo kintlajtolmak Cristo itokilijkauaj tlen Éfeso, kiniljuik: “Más kuali ximochiuilikaj tlen kuali se ika seyok. Ximotlasojtlakaj uan ximotlapojpoljuikaj se ika seyok” (Efes. 4:32). Toikniuaj tlen tlanechikoli tlauel kinpaleuia kema sekinok kinextiaj kikuamachiliaj tlen kiyolmatij uan kichiuaj kampeka kinpaleuisej. Yeka, amo kiijtouaj tlen uelis kinyolkokos o kinpinaualtis sekinok uan nojkia amo kinijilnamiktinemij (Prov. 12:18). Pampa amo kichiuaj nopa, ipan tlanechikoli nochi toikniuaj kuali kitekipanouaj Jehová uan kichiuaj ika pakilistli.

Kej ya tikitakej, titetlasojtlas kiijtosneki tijnextis ika tlen tikijtos uan ika tlen tijchiuas. Kema tikinchiuiliaj sekinok tlen kuali, tijnextiaj kenijkatsa Jehová tlauel teiknelia uan temaka tlen kipia (Efes. 5:1). Nojkia, ipan tlanechikoli toikniuaj nojua kuali tlaneltokaj uan yolpakij, uan sekinok maseualmej nojkia kinekij kiixmatisej Jehová. Yeka, ma tijchiuakaj kampeka tijnextisej ni kuali tlamantli.