Tlaneltokili techmaka chikaualistli

TOTLANELTOKILIS techmaka miak chikaualistli. Maske Satanás kineki ayokmo kuali ma timouikakaj iuaya Jehová, totlaneltokilis uelis ‘kiketsas nochi lemenkakuatlamintli tlen Axkualtlakatl techmajkauilis’ (Efes. 6:16). Nojkia, totlaneltokilis techpaleuis ma tikixnamikikaj uejueyi kuesoli, maske eliskia kejuak uejueyi tepetl. Jesús kiniljuik itokilijkauaj: “Intla inmotlaneltokilis moskaltiskia keja kichiua se ipilxinacho mostaza, uelis inkinauatisej ni tepetl: ‘Ximoijkuini uan xia nepa’ uan nopa tepetl moijkuinis” (Mat. 17:20). Uajka, totlaneltokilis techpaleuia nojua tlauel kuali ma timouikakaj iuaya Jehová, yeka kualtiaskia ma tijnankilikaj ni tlajtlanili: ¿Tlake kiijtosneki tlaneltokili? ¿Tlake kinamiki tijpiasej ipan toyolo uan kiampa tijnextisej totlaneltokilis? ¿Tlake techpaleuis nojua kuali ma titlaneltokakaj? Uan, ¿ajkia kinamiki tijnextilisej totlaneltokilis? (Rom. 4:3).

¿TLAKE KIIJTOSNEKI TLANELTOKILI?

Tlaneltokili amo san kiijtosneki tijneltokasej nelia melauak tlen tlamachtia Biblia, pampa nopaya kiijtoua amo kuali ajakamej nojkia kineltokaj toTeotsij itstok uan kimakasij (Sant. 2:19). Uajka, ¿tlake kiijtosneki nopa tlaneltokili?

Kema Biblia kiixtoma tlake eli nopa tlaneltokili, kiijtoua kiijtosneki ome tlamantli. Se, kiijtosneki “tijneltokaj para temachtli panos nopa tlamantli tlen toTeko techtenkauilijtok” (Heb. 11:1). Kema tijpiaj tlaneltokili, tijneltokaj nelia melauak nochi tlen Jehová kiijtoua uan tijneltokaj nelia moaxitis. Se tonali, toTeotsij kiniljuik israeleuanij: “Keja axaka uelis kixoleuas nopa tlajtoli tlen nijchijki ika tonali uan youali para ma ayok tlatlanesis, niyon ayok tsintlayouias, nojkia axaka uelis kixoleuas nopa tlajtolsenkauali tlen nijchijtok ika notlatekipanojka David” (Jer. 33:20, 21). ¿Timoiljuijtokej se tonali ayokmo kisas tonati o ayokmo kalakis, uan ayokmo tlanesis o tlayouias? Amo, pampa tijmatij toTeotsij kitlalijtok se tlanauatili tlen kichiua Tlaltipaktli ma momalakachojto kej kinamiki uan nochipa ma kiyaualojtinemi Tonati kampa kinamiki, uan amo kema timoiljuiaj se tonali tlamis nopa tlanauatili. Uajka, ¿kinamiki timoiljuisej toTeotsij amo kichiuas tlen kitenkajtok? Amo (Is. 55:10, 11; Mat. 5:18).

Ome, tlaneltokili kiijtosneki “senkistok tijmatij para temachtli ya eltok nopa tlamantli tlen ama niyon kentsi aya ueli tikinitaj”, ni kiijtosneki maske se tlenijki amo tiuelij tikitaj, tijmatij temachtli eltok o yoltok (Heb. 11:1). Ma timoiljuikaj ipan se neskayotl. Se okichpil techtlajtlania kenijkatsa tijmatij nelia eltok ajakatl. Maske ajakatl amo kema tikitstokej, amo ouij tijmatij tikixtomilisej nopa okichpil ajakatl kena eltok pampa tiuelij tikijiyotilanaj, tikitaj kenijkatsa ajaka uan sekinok tlamantli. Kema tijnextiliaj nochi nopa tlamantli, nopa okichpil kineltoka nelia eltok se tlenijki maske amo tikitaj. Nojkia kiampa pano ika tlaneltokili, maske amo tiuelij tikitaj se tlenijki, tijneltokaj nelia eltok o yoltok (Rom. 1:20).

MONEKI TIJPATIITASEJ TLEN MELAUAK TLAJ TIJNEKIJ TITLANELTOKASEJ

Totlaneltokilis motlatskilia ipan miak tlamantli tlen tijneltokaj, yeka tlauel moneki achtoui tijmatisej “tlen nelia melauak” (1 Tim. 2:4). Uan amo san ya nopa kinamiki tijchiuasej. Apóstol Pablo kiijtok: “Ipan toyolo tijneltokaj” (Rom. 10:10). Moneki tijpatiitasej tlen melauak uan amo san tijneltokasej nelia eli melauak. Tlaj tijpatiitasej, uajka uelis tijnextisej totlaneltokilis, ni kiijtosneki timonejnemiltisej kej toTeotsij kipaktia (Sant. 2:20). Katli amo kipatiita tlen melauak ika nochi iyolo, uelis teipa ayokmo tlaneltokas ipan se keski tlamantli uan tlauel motochonchiuas, pampa san kineltokas tlen ya moiljuia uan san motechtis pampa kinekis kichiuas tlen amo kuali (2 Ped. 3:3, 4; Jud. 18). Kiampa kinpanok sekij maseualmej katli uejkajkia itstoyaj, maske kiitakej uejueyi tlamantli, amo kipixkej tlaneltokili (Núm. 14:11; Juan 12:37). ToTeotsij itonal kinpaleuia ma kipiakaj tlaneltokili san maseualmej katli kipatiitaj tlen melauak uan katli amo kinpaktia istlakatisej (Gál. 5:22; 2 Tes. 2:10, 11).

¿TLAKE KIPALEUIK DAVID TLAUEL KUALI MA TLANELTOKA?

David elki se toTeotsij itekipanojka katli nelia tlauel kuali tlaneltokak (Heb. 11:32, 33). Maske ya kiampa kichijki, amo nochi ichampoyouaj kuali tlaneltokakej. Se tonali, iikni Eliab, kinextik amo kuali tlaneltoka kema kiajuak David pampa kinekiyaya kimatis kenijkatsa Goliat tlauel kinijixnamiktoya (1 Sam. 17:26-28). Amo aka kipia tlaneltokili kema tlakati yon tetajmej uelis kinmakasej ininkoneuaj inintlaneltokilis. Uajka, David kipixki itlaneltokilis pampa tlauel kuali mouikak iuaya toTeotsij.

Ipan Salmo 27, David kiijtok tlake kipaleuik kuali ma tlaneltoka (versículo 1). Ya monejneuiliyaya ipan nochi tlen kipanotoya uan kenijkatsa Jehová kintlatsakuiltijtoya ikualankaitakauaj (versículos 2, 3). Tlauel kipatiitayaya Jehová itabernáculo (versículo 4) uan nopaya kiueyichiuayaya ika sekinok israeleuanij (versículo 6). Nochipa momaijtouayaya uan kiiljuiyaya Jehová ma kiyakana (versículos 7, 8). Uan nojkia kinekiyaya Jehová ma kinextili kenijkatsa monejnemiltiskia (versículo 11). Ya tlauel kipatiitayaya itlaneltokilis, uan yeka moiljuiyaya tlake kipanotoskia tlaj amo tlaneltokatoskia (versículo 13).

¿TLAKE TECHPALEUIS NOJUA KUALI MA TITLANELTOKAKAJ?

Kej David, tojuantij nojkia uelis kuali titlaneltokasej tlaj timoyoliljuisej uan timomatisej tijchiuasej kej kiijtoua Salmo 27. Totlaneltokilis motlatskilia ipan nochi tlen tijmatij tlen melauak, yeka tlaj nojua timomachtisej Biblia uan pilamochtsitsij, amo ouij tijmatisej tijnextisej ni kuali tlamantli uan toTeotsij itonal kichiuas nojua ma moskalti (Sal. 1:2, 3). Kema timomachtisej, moneki tijkixtisej tonali uan timoyoliljuisej ipan tlen timomachtiaj, pampa ni techpaleuis nojua tlauel ma titetlaskamatilikaj. Uajka, tlaj nojua tlauel tijtlaskamatilisej Jehová, tijnextisej totlaneltokilis kema tijueyichiuasej ipan tlanechikoli uan kema tikiniljuisej sekinok tlen tijchiaj tijselisej (Heb. 10:23-25). Nojkia tijnextisej totlaneltokilis tlaj ‘tijsenuikilisej timomaijtosej ika toTeko hasta yajaya techmakas tlen tijtlajtlaniaj’ (Luc. 18:1-8). Uajka, nochipa ma timomaijtojtinemikaj uan ma timotemachijtokaj Jehová kitekipachoua tlen techpano (1 Tes. 5:17; 1 Ped. 5:7). Totlaneltokilis kichiua ma tijnekikaj tijchiuasej se keski tlamantli, uan tlen tijchiuaj, techpaleuia nojua kuali ma titlaneltokakaj (Sant. 2:22).

MA TITLANELTOKAKAJ IPAN JESÚS

Se youali achtoui kema Jesús kimiktiskiaj, kiniljuik itokilijkauaj: “Xijneltokakaj toTeko uan xinechneltokakaj nojkia” (Juan 14:1). Uajka nojkia moneki titlaneltokasej ipan Jesús uan amo san ipan Jehová. ¿Kenijkatsa uelis titlaneltokasej ipan Jesús? Ma tikitakaj eyi tlamantli.

Se, ma tikitakaj nopa tlaxtlauili kej se tlamantli tlen toTeotsij techmakatok sejse tlen tojuantij. Apóstol Pablo kiijtok: “Ni yolistli tlen ama nijpia uala pampa nijneltoka iKone toTeko tlen nechiknelik uan motemaktilik uan mijki nopampa na” (Gál. 2:20). Kema titlaneltokaj ipan Jesús, temachtli tijmatij nopa tlaxtlauili temakakej topampa, pampa ika nopa tlaxtlauili toTeotsij ueli techtlapojpoljuia, uelis techmakas nopa nemilistli tlen axkema tlamis uan technextilia san ika nopa tlamantli kinextik tlauel techiknelia (Rom. 8:32, 38, 39; Efes. 1:7). Tlaj nelia tijneltokas nopa tlaxtlauili mitspaleuia, uajka amo timoyolkokos yon timoiljuis amo tleno mopati (2 Tes. 2:16, 17).

Ome, timonechkauiaj ika Jehová kema timomaijtouaj ika Jesús itoka. Pampa temakakej nopa tlaxtlauili, nama tiuelij timomaijtouaj ika Jehová uan tijmatij “temachtli techtlasojtlas uan techpaleuis ipan tlen ueli tlalochtli kema más moneki pampa ueyi iyolo ika tojuantij” (Heb. 4:15, 16; 10:19-22). Kema timomaijtouaj techpaleuia amo ma tijnekikaj tijchiuasej tlen amo kuali (Luc. 22:40).

Eyi, ma tijchiuakaj tlen Jesús tlanauatia. Apóstol Juan kiijkuilok: “Tlaj se tlakatl kineltoka iKone toTeko, yajaya kipia yolistli para nochipa. Pero tlaj se axkineltoka iKone toTeko, axkipias nopa yolistli uan temachtli toTeko kitlatsakuiltis” (Juan 3:36). Juan kinextik kenijkatsa se akajya katli tlaneltoka amo eli sanse ika se akajya katli amo kineki kichiuas tlen kinauatiaj. Uajka, kema tijchiuaj tlen Jesús tlanauatia, tijnextiaj tijpiaj totlaneltokilis. Yeka, tijchiuaj nochi “tlen Cristo technauatijtok” uan tlen tlamachtik (Gál. 6:2). Nojkia tijnextiaj tijchiuaj tlen technauatia kema tijkauaj ma techyakana nopa “tlalnamijkatlatekipanojketl tlen nelia temachtli” (Mat. 24:45). Tlaj tijchiuaj tlen Jesús technauatia, tijpiasej nopa chikaualistli tlen techpaleuis ma tikixnamikikaj tlen ueli tlaouijkayotl ipan tonemilis (Mat. 7:24, 25).

NOJUA KUALI MA TITLANELTOKATOKAJ

Se tonali, se tlakatl kiiljuik Jesús: “¡Nijneltoka! ¡Xinechpaleui para más ma nijneltokas!” (Mar. 9:24). Maske nopa tlakatl ya tlaneltokayaya, amo moueyimatki uan kiijtok nojua kipolouayaya kuali tlaneltokas. Kej nopa tlakatl, se tonali tojuantij nojkia monekis nojua kuali titlaneltokasej. Nochi tojuantij uelis nama tikiskaltisej totlaneltokilis. Kej tikitstokej, uelis tijchiuasej ni tlaj timomachtisej toTeotsij iTlajtol uan tlaj timoyoliljuiaj ipan tlen timomachtiaj, uan ni techpaleuis nojua tlauel ma tijtlaskamatilikaj Jehová. Totlaneltokilis nojkia moskaltia kema titlaueyichiuaj ininuaya toikniuaj, kema tikiniljuiaj sekinok tlen tijchiaj tijselisej uan kema nochipa timomaijtojtokej. Tlaj tikiskaltiaj totlaneltokilis ika nochi ni, uajka tijselisej se ueyi tlateochiualistli: toTeotsij nochipa techiknelijtos (Jud. 20, 21).