Xijkualchijchiua moyolo

Kema timomachtiaj Biblia tijnekij ma techpaleui tlen tijyekouaj, ma asi ipan toyolo, ma kipatla totlalnamikilis, ma techpaleui kuali tijyolmatisej uan ma tijnekikaj tijchiuasej tlen kuali. Yeka ma tijchiuakaj sanse kej Esdras, ya achtoui kikualchijchijki iyolo para momachtis “itlanauatiljuaj” Jehová (Esd. 7:10). ¿Kenijkatsa uelis tijchiuasej kej ya?

Ximomaijto. Kema timomachtis, achtoui xikiljui Jehová ma mitspaleui tijkuamachilis tlen tijpouas uan ma mitspaleui tijchiuas ipan monemilis (Sal. 119:18, 34).

Amo ximoueyimati. Dios amo kinkaua ma kikuamachilikaj tlen melauak katli moueyimatij uan motemachiaj san ipan inintlalnamikilis (Luc. 10:21). Amo ximomachti san pampa tijneki sekinok ma kiitakaj tijmati miak tlamantli. Uan tlaj kema tijpouas se tlamachtili tikitas moneki tijpatlas se tlamantli, amo ximoueyimati uan xijchiua tlen moneki.

Xijkaki se uikatl tlen ika titlaueyichiuaj. Uikatl kejuak techyoltlapoua uan techpaleuia ma timokualchijchiuakaj para tijueyichiuasej Jehová. Tlaj kema timomachtisej achtoui tijkakij se uikatl, techpaleuis ma timosentlalikaj ipan Jehová uan ma asi ipan toyolo tlen timomachtisej.