Junio

Job kualtsin nemia porin kuali mouikaya iuan Jiova, ichankauan miakej katkaj uan yolpakiaj uan no semi tominpiaya (Job 1:​1-5). Sayoj ke itech se tonal kipoloj nochi. Yekinika itapialuan (Job 1:​13-17). Satepan, nochin ikoneuan akin semi kintasojtaya momikilijkej. Maj tiknemilikan tein kipanotoya Job. Tetatmej semi tajyouiaj keman momikilia se ininkonetsin, axkan maj tiknemilikan keniuj momachilijkej Job uan isiuatsin. Semi tajyouijkej uan kinyolkokoj keman kimatkej ke majtakti ininkoneuan momikilijkej. ¡Yejua ika Job hasta kitsayanak itaken uan moixpiloj hasta talpan uan ika kinextij ke semi motayokoltijtoya! (Job 1:​18-20). Satepan, Satanás kichiuak maj Job kokolispeua. Nejon semi kitajyouiltij uan kipinaujtij (Job 2:​6-8). Job semi kipoujkaitayaj uan sekin hasta yayaj kiitatij para maj kinyolmajxiti (Job 31:18). Sayoj ke ika tein kipanotoya, amo kinekiajok kiitaskej. Iikniuan, akin kuali iniuan mouikaya uan hasta itakeualuan kiixtopeuayaj (Job 19:​13, 14, 16). w22.06 21 § 5, 6

Keman aksa moauia moneki kichiuas tein tatitanil Pablo kinyolmajxitij tokniuan akin nemiaj Éfeso. Kinyolchikauak ‘maj moskaltikan kemej se akin ueyiya’ (Efes. 4:​13, TNM). Nejin kijtosneki ke monekia kisentokaskej kitekitiliskej Jiova. Maski axkan tiktasojta Jiova, uelis okachi tiktasojtas, ¿keniuj? Tatitanil Pablo kijtoj se taman itech Filipenses 1:9 itech Traducción del Nuevo Mundo. Pablo kitataujtij Jiova maj tokniuan akin nemiaj Filipos okachi tetasojtanij. Nejin kijtosneki ke uelis okachi tiktasojtaskej Dios maski tiktasojtajya, uelis tikchiuaskej nejin komo ‘kuali tikixmatij uan kuali titaixejekouaj’. Keman okachi tikixmatij Jiova okachi tiktasojtaj uan okachi tikuelitaj kemej tamati uan kemej kichiua teisa. Okachi tiknekij tiktakamatiskej uan tiknekij tikyolpaktiskej. Timochikauaj tikmatiskej toni kineki maj tikchiuakan uan ijkon tikchiuaj. w22.08 2, 3 § 3, 4

Nejin amatajkuilol Apocalipsis amo ijkuiliujtok para nochin ta sayoj para tejuan, tiitekitikauan Dios. Yejua ika, amo tikmoujkaitaj maj tejuan no tikchiuakan tein ompa kijtoua. Tatitanil Juan ika tajtoj nejon tonalmej keman mochiuaskia tein ompa ijkuiliujtok. Yejua kijtoj: “Dios ika ichikaualis nechajxitij hasta itonal toTekotsin” (Apoc. 1:​10, TNM). Juan kijkuiloj nejin tajtolmej kemej itech xiuit 96 itech totonaluan. Ijkuak, miak xiujmej poliuiaok para ejkos “itonal toTekotsin” (Mat. 25:​14, 19; Luc. 19:12). Sayoj ke, tein Biblia achto kijtojka kinextia ke nejon tonal peuak itech xiuit 1914, keman Jesús peuak tekiuajti ompa iluikak. Itech nejon xiuit peuak mochiua tein moijtojka itech Apocalipsis tein ika tajtoua ixolal Dios. Nejin kijtosneki ke tejuan tinentokej itech “itonal toTekotsin” (Apoc. 1:3). w22.05 2 § 2, 3

Keman yoltoyaok koujtajtapial uan no tanauatijkej tein amo melauak, nochin omen kinpantamotak yoltokej kampa kuakualakatok tit. Yejua ika, keman taixyekantoskejok, tekiuanij akin kiixnamikij Dios senkis kinixpoloskej. Tein techmachtia. Akin tikchiuaj kemej Cristo moneki tiktakamatiskej Dios uan tikpaleuiskej iTekiuajyo (Juan 18:36). Nejin tikchiuaskej komo amo tikinpaleuiaj nion tikinixnamikij tekiuanij. Sayoj ke nejin uelis yeski ouij porin tekiuanij kinekij maj tikinpaleuikan ika tein tikijtouaj uan ika tein tikchiuaj. Akin kinpaleuiaj kemej yeskia mokauaj maj kintalilikan se “neskayot” tein kinextia ke kinpaleuiaj tekiuanij (Apoc. 13:​16, 17). Uan akin kipiaj nejon “neskayot” amo ueli kiyolpaktiajok Dios uan amo uelisok nemiskej nochipaya (Apoc. 14:​9, 10; 20:4). Yejua ika moneki maj amo tikinpaleuikan nion tikinixnamikikan tekiuanij maski yejuan techchikaujkauiskej maj tikinpaleuikan. w22.05 10, 11 § 12, 13

No uelis tikixtaliskej tiueliskej okse taman. Komo tikixtaliaj timomachtiskej okseki taman, uelis okachi tiktekitiliskej Jiova. Kemej neskayot, itech xiontanemili tokniuan akin tapaleuiaj keman mochijchiuaj sucursales, Kalmej kampa mochiuaj Uejueyi nechikolmej uan Kalmej kampa tiMosentiliaj. Miakej ueli kichiuaj se tekit porin kinmachtijkej tokniuan akin okachi uelijya. Axkan, tokniuan takamej uan siuamej momachtijtokej keniuj uelis se kiyekpias Kalmej kampa mochiuaj Uejueyi nechikolmej uan Kalmej kampa tiMosentiliaj. Ika nejin uan okseki taman, Jiova “Totayekankau […] sen nachipa”, uan Jesús “Tayekankatsin inpan nochi tayekanani”, kichiuaj miak taman inintechkopa nejin tokniuan (1 Tim. 1:17; 6:15). Moneki chikauak titekitiskej uan ika tein tiuelij tikchiuaj maj tikueyitalikan Jiova uan amo tejuan (Juan 8:54). w22.04 24 § 7; 25 § 11

Salomón kipiaya miak tomin uan semi takualtsinkan katka kampa nemia (1 Rey. 10:​7, 14, 15). Sayoj ke Jesús amo kipiaya miak taman uan nion kipiaya ichan (Mat. 8:20). Maski ijkon, Salomón uan Jesús kiitayaj tomin kemej moneki, porin nochin omen kipiayaj tamatilis tein Jiova kitemaka. Salomón kiitak ke tomin “tapaleuia”. Tomin techpaleuia maj timoixpanoltikan uan kemansa hasta ueli timokouiliaj tein tikuelitaj. Sayoj ke, maski Salomón kipiaya miak tomin, kiajsikamatik ke onkaya okseki taman tein okachi moneki. Kemej neskayot, kijkuiloj: “Okachi kuali maj kuali toka tajtokan ke tikpiaskej miak tomin” (Prov. 22:1). No kiitak ke akin kitasojtaj tomin, amo nochipa yolpakij ika tein kipiaj (Ecl. 5:​10, 12). Uan no kijtoj ke maj amo tiknemilikan ke tomin yejua tein okachi moneki, porin axkan uelis tikpiaskej uan satepan amook (Prov. 23:​4, 5). w22.05 21 § 4, 5

Keman itech titanemiliaj tein kuali tein Dios techmaka axkan, techpaleuia maj okachi kuali timouikakan iuan. Uan keman itech titanemiliaj tein kuali tein techmakas satepan, techpaleuia maj tikneltokakan ke uelis tiktekitiliskej nochipaya. Nochi nejin kichiuas maj okachi tiyolpakikan keman tiktekitiliskej Jehová. Jehová senkis techpaleuis keman kiixpolos nochi tein amo kuali. Kemej yejuatsin “se Dios akin kichiua tein kuali yetok”, senkis tikneltokaj ke kiixtalijya kemanian kiixpolos Satanás uan nochi tein kiixyekana, uan amo kikauas maj pano nion se tonal (Is. 25:9). Jehová uan tejuan amo tiyolijsiuij uan tiksentokaj tikchiaj maj ejko tonal keman senkis techmakixtis. Kemej nejon tonal ayamo ejko, senkis tikixtaliaj nochipa tiktataujtiskej Jehová porin tikpiaj nejon tatiochiualis. No senkis tikixtaliaj timomachtiskej iTajtol, tikchiuaskej tein ompa kijtoua uan itech titanemiliskej tein kuali tein techmakani axkan uan tein techmakas satepan. Komo tiksentokaj tikchiuaj nochi nejin, Jehová techpaleuis maj titaxikokan uan maj tiyolpakikan keman tiktekitiliaj. w22.11 13 § 18, 19

Maski Biblia amo ika tajtoua keman Timoteo moauij, nejon tonal imomaj, Eunice, xa semi yolpakik (Prov. 23:25). Uelik kipaleuij Timoteo maj kitasojta Jiova uan iKonetsin, Jesucristo. Itatuan Timoteo kipiayaj tataman taneltokalis. Ipopaj katka griego, imomaj uan iueyinan katkaj judías (Hech. 16:1). Nesi ke Timoteo katka telpoch keman Eunice uan Loida mochiujkej itatojtokakauan Cristo. Sayoj ke ipopaj kisentokak itech itaneltokalis. Timoteo ueliaya iselti kiixpejpenaya toni kichiuaskia. ¿Toni kiixpejpenaskia? Ijkon kemej Eunice, tokniuan siuamej akin kipiaj ininkoneuan kintasojtaj ininchankauan. Mochikauaj kinpaleuiskej ininkoneuan maj kuali mouikakan iuan Jiova. Uan yejuatsin semi kipatiuita nochi tein kichiuaj (Prov. 1:9). Uan Jiova kinpaleuiani miakej tokniuan siuamej maj kinpaleuikan ininkoneuan maj kitasojtakan uan maj kitekitilikan. w22.04 16 § 1-3

Sayoj ke, amo uejkaua Jiova kinyoltanemililtis nejon tekiuanij maj kichiuakan tein yejuatsin kiixtalijtok. Nejon “majtakti tayekanani” oso tekiuajyomej kinixpoloskej nochin taneltokalismej tein amo melaujkej (Apoc. 17:​1, 2, 16). ¿Keniuj tikmatij ke amo uejkaua ixpoliuis Ueyi Babilonia? Komo tikelnamikij keniuj katka xolal ne uejkauj techpaleuis maj tikmatikan. Nejin xolal kiyoualouaya ueyiat Éufrates uan nejon katka se taman tein kipaleuiaya. Apocalipsis kijtoua ke nochin millones akin kipaleuiaj Ueyi Babilonia kemej yeskiaj miak “ame” (Apoc. 17:15). Sayoj ke no kijtoua ke nejon amej uakiskiaj, tein kijtosneki ke miakej amo kinpaleuiskiajok taneltokalismej tein amo melaujkej (Apoc. 16:12). Nochi nejon mochiujtokya axkan porin miakej kikauanij inintaneltokalis uan kitemouaj okseko tein kinpaleuis maj kiixnamikikan ininkuejmoluan. w22.07 5, 6 § 14, 15

Keman titetapojpoluiaj, tiknextiaj ke tiktasojkamatij maj Jiova techikneli. Se tonal, Jesús kijtoj ke Jiova kemej yeskia se takat akin kiluij se itakeual maj amo kikepilianiok tomin tein kitauikiliaya. Sayoj ke nejon takeual amo kiiknelij se itakeualikniuj akin amo miak kitauikiliaya (Mat. 18:​23-35). ¿Toni kinekia tamachtis Jesús? Ke komo yekmelauj tiktasojkamatij maj Jiova techikneli, tiknekiskej titetapojpoluiskej (Sal. 103:9). Seki xiujmej achto, amaix La Atalaya kijtoj ke maski miakpa titetapojpoluiskej amo keman uelis “titetapojpoluiskej nion titeikneliskej kemej Jiova, akin kichiua nejin porin Cristo toka momikilij”. Komo titetapojpoluiaj, Jiova techtapojpoluis. Yejuatsin kiniknelia akin teikneliaj (Mat. 5:7). Jesús kinextij ke melauj nejin keman kinmachtij itatojtokakauan keniuj motataujtiskej (Mat. 6:​14, 15). w22.06 10 § 8, 9

Jesús ualaj nikan taltikpak kemej se takat uan ika tein kichiuak kinextij keniuj tamati iPopaj (Juan 14:9). Ika ineskayo techpaleuia maj tikixmatikan uan maj tiktasojtakan Jiova. No techpaleuiani ika tein tamachtij uan kemej kiixyekana inechikol Dios axkan. No techmachtiani maj tikchiuakan tein kiyolpaktis Jiova. Uan hasta keman kikotskejtsonkej oso kimiktijkej no techpaleuia. Keman oksepa nemik kitemakak iesyo kemej se nemaktil tein “techchipautinemi de nochi totajtakol” (1 Juan 1:7). Axkan tekiuajtitokya ompa iluikak uan amo keman momikilisok. Amo uejkaua Jesús kikuaxamanis kouat (Gén. 3:15). Itekitikauan Dios semi yolpakiskej keman kiixpoloskej Satanás. Uelis senkis titakuaujtamatiskej iuan Jiova, yejua ika axkan maj tiksentokakan tiktekitilikan. Itechkopa “ikonetsin” siuat, kiseliskej miak tatiochiualismej “nochi altepemej tein moajsij itech taltikpak”. w22.07 18 § 13; 19 § 19

Maj tikpatakan tein tikixtaliaj komo moneki. ¿Keyej? Porin amo ueli tiktsakuiliaj nochi tein mochiua. Kemej neskayot, tatitanil Pablo tapaleuij maj mochiuani nechikol ompa Tesalónica. Sayoj ke akin kitauelitayaj kichiujkej maj cholouani (Hech. 17:​1-5, 10). Komo mokauaskia ompa, xa no kinchiuiliskiaj tein amo kuali tokniuan itech nejon nechikol. Sayoj ke Pablo amo mosenkauak, ta kipatak tein kiixtalijka kichiuas. Uan satepan kititanik Timoteo maj kinyolchikauati tokniuan (1 Tes. 3:​1, 2). Yejuan xa semi yolpakkej. ¿Toni techmachtia tein kichiuak Pablo uan tein kipanok ompa Tesalónica? Xa tikixtalijkaj se taman kemej tiktekitiliskej Jiova, sayoj ke mopata teisa itech tonemilis uan amo ueli tikchiuajok (Ecl. 9:11). ¿Toni tikchiuaskej? Maj tiknemilikan okse taman tein uelis tikchiuaskej. w22.04 25, 26 § 14, 15

Jiova techyolchikaua porin techiluia ke uelis tikchiaskej tein kuali. Maj tikitakan seki taman tein kijtoua Biblia tein techyolchikaua keman tikpanouaj ouijkayomej. Itech Biblia Jiova techyekiluia ke nion teyi, nion ouijkayomej, “uelis kichiuas maj Dios amo techtasojta” (Rom. 8:​38, 39, TNM). No techiluia ke “amo uejka moajsi iniuan nochin akin kinotsaj”, tein kijtosneki ke kikaki keman kitataujtiaj (Sal. 145:18). Jiova techiluia ke komo iuan titakuaujtamatij, uelis tikxikoskej tein yeski ouijkayot uan uelis tiyolpakiskej (1 Cor. 10:13; Sant. 1:2). Uan no, iTajtol Dios techelnamiktia ke ouijkayomej tein tikpiaj panotikisaj, sayoj ke tein Jiova techmakas amo keman tamis porin tinemiskej nochipaya (2 Cor. 4:​16-18). Jiova techyekiluia ke kiixpolos Satanás uan nochin akin kichiuaj kemej yejua, porin yejuan kichiuaj maj tikpiakan ouijkayomej (Sal. 37:10). ¿Tikonmatiya uan tionueliya seki textos tein mitsonpaleuiskej keman tikonpanos ouijkayomej? w22.08 11 § 11

¿Uan komo tiknemiliaj ke amo nochipa uelis tikchiuaskej tein Jiova technauatia? Ompa kijtoj ke keman tikchiuaj tein yejuatsin kijtoua ke kuali yetok, kemej yeskia “olas itech ueyiat” (Is. 48:18). Maj tiknemilikan ke tietokej ueyiatenoj uan tikitaj ke olas uiuitsej tatenoj. Ijkuak, amo tiknemiliaj ke se tonal tamiskej olas, porin tikmattokej ke ijkon kisentokaskej. Keman nochipa tikchiuaj tein Jiova kijtoua ke kuali yetok uelis yeski kemej olas itech ueyiat. ¿Keniuj? Keman monekis tikixpejpenaskej teisa, maj achto tiknemilikan toni kineki Jiova uan satepan maj tikchiuakan. Maski semi ouij tein tikixpejpenaskej, toTajtsin akin semi techtasojta nochipa techpaleuis maj tiksentokakan tiktakamatikan tein yejuatsin technauatia (Is. 40:​29-31). w22.08 30 § 15-17

Keman tamis mil xiujmej kikajkauaskej uan kitemos kinkajkayauas itekitikauan Jehová akin amo tajtakolejkejok yeskij. Ijkuak, nochin uelis kinextiskej ke kiitaj ke semi moneki maj mochipaua itokay Jehová uan ke sayoj yejuatsin kinamiki taixyekanas (Apoc. 20:​8-10). Ika tein kichiuaskej moitas ox moijkuilos inintokay itech amatajkuilol kampa ixnesij akin nemiskej kemej amo ixpoliuisok. Maski amo tikmatij kanachimej, sekin kichiuaskej kemej Adán uan Eva uan amo mokauaskej maj Jehová kinixyekana. ¿Toni kinpanos? Apocalipsis 20:15 kijtoua: “Akin amo ijkuiliujtoyaj itech amatajkuilol kampa ixnesij akin nemiskej, kinpantamotkej kampa kuakualakatok tit”. Akin amo tatakamatiskej senkis kinixpoloskej, sayoj ke okachi miakej yeskij akin amo kikauaskej Jehová. w22.09 23, 24 § 15, 16

Seki tokniuan itech yekinika siglo, kinemiliayaj ke takamej akin amo katkaj judíos uan mochiuayaj itatojtokakauan Cristo monekia kintekiskej oso kinchiuiliskej circuncisión, xa porin ijkon oksekin amo kinijijtoskiaj (Gál. 6:12). Maski tatitanil Pablo amo ijkon kiitaya, amo kitemoj maj oksekin tanemilianij kemej yejua. Yejua kinextij ke katka yolyemanik porin kinixpantilito tein panotoya tayekananij uan tatitanilmej akin yetoyaj Jerusalén (Hech. 15:​1, 2). Tein kichiuak tapaleuij maj nochin tokniuan kuali mouikanij uan maj yolpakinij (Hech. 15:​30, 31). Komo kemansa peua motakuejmolchiua porin tataman kemej tikitaj teisa, uelis tikiniluiskej tokniuan tayekananij maj techpaleuikan. No uelis techpaleuis tein Biblia kijtoua, yejua ika maj tikitakan tein moixtaliani itech inechikol Jiova uan tein kijtouaj toamaixuan. Komo tikchiuaj tein ompa moijtoua uan amo tiktemouaj maj mochiua tein tejuan tiknekij, titapaleuiskej maj tinochin kuali timouikakan. w22.08 22 § 8, 9

Timiakej tikmachiliaj ke moneki tiktapouiskej aksa akin kuali iuan timouikaj tein tikpanouaj. Sayoj ke nejon uelis yeski ouij, porin xa amo timomattokej tikchiuaskej. Uan keman tikiluiajya aksa keniuj timomachiliaj uan satepan tikmatij ke kiniluijya oksekin, semi techyolkokoua. Sayoj ke semi tiktasojkamatij keman tikiluiaj aksa tein tikpanouaj uan amo kijtoua. Komo tayekananij amo kijtouaj tein aksa kintapouia, tokniuan kinitaskej kemej kampa uelis “se motatis keman taejeka” (Is. 32:2). Tikmatij ke uelis tikintapouiskej tein yeski uan amo akin kiluiskej. Amo tikinchikaujkauiaj maj techiluikan teisa tein amo moneki kijtoskej, uan no semi tiktasojkamatij maj ininsiuatsin tayekananij amo kintajtanikan teisa tein amo moneki kijtoskej. Semi tapaleuia keman tayekananij amo kiniluiaj ininsiuatsin tein kipanouaj tokniuan. w22.09 11 § 10, 11

Tikyekmatij ke Jehová kinmakixtis itekitikauan akin amo kikauaj keman mochiuas “tetsaujkatajyouilis” (Mat. 24:21; Dan. 12:1). Nejin kichiuas keman oloch altepemej, oso Gog akin ualeua Magog, semi kinixnamikis itekitikauan Jehová itech nochi taltikpak. Uan maski taixnamikiskiaj 193 altepemej tein pouij itech Naciones Unidas, amo uelis kitaniskej Jehová akin okachi Ueyichiujkej uan iangeluan. Yejuatsin motenkaua: “Nejua nimoueyitalis, niknextis ke niyektik uan nimoteixmatiltis ininixpan miakej altepemej; uan kimatiskej ke nejua niJehová” (Ezeq. 38:​14-16, 23). Keman Gog taixnamikis peuas neteuilis tein ika tatamis oso Armagedón. Ijkuak, Jehová kinixpolos “akin tekiuajtij itech nochi taltikpak” (Apoc. 16:​14, 16; 19:​19-21). Sayoj ke, “sayoj akin yolmelaujkej nemiskej itech taltikpak uan sayoj akin nochipa kitakamatij Dios mokauaskej ompa” (Prov. 2:​21, nota). w22.10 16, 17 § 16, 17

Amo tikmatij tein kinemiliaj porin sayoj “Jiova kiita keyej tikchiuaj teisa” (Prov. 16:2). Jiova kintasojta nochin maski seseko kayomej uan tataman tein momattokej kichiuaskej. Yejuatsin technauatia: “Okachi xitetasojtakan” (2 Cor. 6:​13, TNM). Tiknekij tikintasojtaskej nochin tokniuan uan amo tikinijijtoskej. Amo no tikinijijtouaj akin amo tokniuan. Kemej neskayot, amo tikinijijtouaj tochankauan akin amo itaixpantijkauan Jiova uan amo tiknemiliaj ke amo keman kitekitiliskej. Komo tikchiuaskiaj, tiknextijtoskiaj ke timoueyimatij uan ke tiknemiliaj ke okachi tiyolkualmej ke oksekin. Jiova kikaujtokok maj nochin moyolpatakan (Hech. 17:30). Maj amo keman tikelkauakan ke Jiova amo kuali kiita maj aksa kinemili ke okachi yolkuali ke oksekin. Komo tikchiuaj tein Jiova kijtoua ke kuali yetok, tiyolpakiskej uan kinpaleuis akin techitaskej. Nejon kichiuas maj okachi techtasojtakan uan no maj okachi kitasojtakan Jiova. w22.08 31 § 20-22

Amo tikmojkaitaj maj techixnamikikan keman titanojnotsaj uan satepan xa okachi techixnamikiskej (Dan. 11:44; 2 Tim. 3:12; Apoc. 16:21). Sayoj ke senkis tikmatij ke Jehová techpaleuis. Uan tikmatij nejin porin nochipa kinpaleuiani itekitikauan maj kichiuakan tekit tein kinmakani maski semi ouij. Maj tikitakan seki taman tein kipanok tanauatijkej Ezequiel, akin monekik kinnojnotsas Judíos akin kinuikakej Babilonia. ¿Keniuj tamatiaj akin Ezequiel monekia kinnojnotsas? Jehová kijtoj ke nejin judíos “taixnamikiaj”, “amo tatakamatiaj” uan “katkaj yoltakuaujkej”. Tetajyouiltiayaj kemej uitsti uan katkaj tamouililmej kemej alacranes. Yejua ika Jehová miakpa kiluij Ezequiel: “Amo ximoui” (Ezeq. 2:​3-6). Ezequiel uelik tanojnotsak porin 1) yejua Jehová akin kititanik, 2) ichikaualis Dios kipaleuij uan 3) kuali kiselij tein Jehová kiluij. w22.11 2 § 1, 2

Jehová kichijchiuak miak taman tein yoltok uan de nochi tein kichijchiuak sayoj taltikpakneminij amo keman mikiskiaj. Jehová no techchijchiuak kemej tiknekiskej tiksentokaskej tinemiskej. Kemej Biblia kijtoua, Dios “kitalij itech ininyolo taltikpakneminij maj kinekikan nemiskej nochipaya” (Ecl. 3:11). Yejua nejin se taman tein kichiua maj tikitakan ke mikilis se taman tein tel amo kuali (1 Cor. 15:26). Maj itech titanemilikan nejin. ¿Toni tikchiuaj keman tikokolispeuaj? Amo ijkon timokauaj, ta tiktemouaj keniuj timopaleuiskej. Tiouij tikitatij tapajtijkej uan tikuaj pajti tein techmakaj. Tikchiuaj nochi tein uelis para amo timomikiliskej. Uan keman momikilia aksa akin tiktasojtaj, maski xiuejya oso amo, semi timoyolkokouaj uan uejkaua ijkon timomachiliaj (Juan 11:​32, 33). Tikmatij ke toTachijchiujkauj semi techtasojta, yejua ika amo techchijchiuaskia kemej tiknekiskiaj tinemiskej nochipaya komo amo ijkon kiixtalijtoskia. w22.12 3 § 5; 4 § 7

Miakej tokniuan xa kipiaj se kokolis, moujkayetokej oso moajsij ininselti itech nejin tonalmej tein ouijkej. Maj timochikauakan tiksentokaskej titajtoskej iniuan tokniuan. Se ueyi kokolis uelis kichiuas maj amo ueli tietokanok iniuan oksekin, hasta iniuan tokniuan. Komo ijkon panoua, xa uelis timomachiliskej kemej tatitanil Juan, akin semi kinekia kiitas itasojikniuj Gayo uan iuan tajtos (3 Juan 13, 14). Sayoj ke Juan kimatia ke amo ueliskia niman kiitas. Yejua ika, okachi kuali kijkuilouilij se amat uan kititanilij. Komo amo ueli tikinitaj tokniuan, xa ueliskia okse taman kemej tikinnotsaskej. Komo tiksentokaj titajtouaj iniuan tokniuan techpaleuia maj amo timomachilikan toselti uan maj okachi tiyolseujtokan. Uan komo semi timotekipachouaj, maj titajtokan iniuan tayekananij uan maj timokauakan maj techyolchikauakan (Is. 32:​1, 2). w22.12 17, 18 § 6, 7

Biblia kijtoua ke seki tonalmej José kimetsilpijkej ika teposmej uan kikechilpijkej ika cadena (Sal. 105:​17, 18). Axkan okachi ouij tein kipanouaya, porin amo itech takuaujtamatiajok. ¿Tikpanouanij se ouijkayot tein semi techtekipachouaya uan okachi titajyouiayaj maski semi timotataujtiayaj? Nejon uelis techpanos. Jehová amo techajchiuilia ouijkayomej tein tikpiaj itech nejin taltikpak kampa taixyekantok Satanás (1 Juan 5:19). Sayoj ke, kuali tikmatij ke toTajtsin kiita nochi tein techpanoua uan ke toka motekipachoua (Mat. 10:​29-31; 1 Ped. 5:​6, 7). Uan no, yejuatsin motenkaua nejin: “Amo keman nimitskauas uan nochipa nimitspaleuis” (Heb. 13:5). Jehová techpaleuis maj tikxikokan tein yeski ouijkayot maski moitas ke amo uelis moyektalis. w23.01 16 § 7, 8

Biblia techyekiluia ke Dios amo keman techkauas maski timopoloskej. Israelitas miakpa tajtakolchiuayaj, sayoj ke keman yekmelauj moyolpatayaj Jehová kintapojpoluiaya. Tokniuan itech yekinika siglo no kimatiaj ke Jehová semi kintasojtaya. Kinnextilij nejin, keman kichiuak maj tatitanil Pablo kinyolchikauani tokniuan maj kitapojpoluianij uan maj kiyolseuianij se takat akin achto auilnemia, sayoj ke satepan moyolpataka (1 Cor. 5:​1-5; 2 Cor. 2:​6, 7). Tikmojkaitaj maj Jehová amo kinixtopeuani itekitikauan maski mopolouayaj, ta kemej semi kintasojtaya, kinpaleuiaya, kinmelauaya uan kiniluiaya maj iuan mokepakan. Uan motenkaua ke no ijkon kichiuas iuan akin axkan tajtakolchiua sayoj ke moyolpata (Sant. 4:​8-10). Biblia kinextia ke Dios semi tamatkej, kichiua nochi tein kuali yetok uan ke semi techtasojta. Uan no, Biblia kinextia ke Jehová kineki maj tikixmatikan uan maj kuali iuan timouikakan. w23.02 7 § 16, 17

Keman tikitaj tein mochiujtok itech taltikpak, tiknekij tikmatiskej keniuj mochiujtokya tein Biblia kijtojka. ¿Keyej? Yekinika porin Jesús kijtoj toni techpaleuiskia maj tikmatikan ke amo uejkaua ixpoliuisya nochi tein Satanás kiixyekana (Mateo 24:​3-14). Ojpatika porin tatitanil Pedro no techyolmajxitij maj tikitakan keniuj mochiujtokya tein Biblia kijtojka para maj nochipa titakuaujtamatikan (2 Ped. 1:​20, 21). Yejua kineki maj tikitakan keyej moneki timomachtiskej tein Biblia kijtojka ke panoskia. Techyolmajxitia maj ‘semi tikchixtokan maj ejko itonal Jehová’ (2 Ped. 3:​11-13). ¿Keyej? Amo porin tiknekij tikmatiskej “tonal uan hora” keman Jehová kiualkuis Armagedón, ta porin tiknekij tikuiskej tiempo tein mokauaok para ‘tichipaujkanemiskej uan tikchiuaskej tein kinextis ke tikueyichiuaj Dios ika nochi toyolo’ (Mat. 24:36; Luc. 12:40). Tiknekij kuali timonejnemiltiskej uan tikitaskej ox tiktekitiliaj Jehová porin semi tiktasojtaj, ijkon tikchiuaskej komo timoyekpiaj tisejsemej. w23.02 16 § 4, 6

Sayoj ke “okseki ichkamej” moneki kichiuaskej axkan seki taman para uelis nemiskej itech xochital. Moneki tiknextiskej ke tiktasojtaj Jesús keman tikinpaleuiaj iikniuan taijitalmej. Jesús kijtoj ke nejon tapaleuiskia maj moita akonimej ichkamej uan akonimej amo (Mat. 25:​31-40). Tikinpaleuiaj keman titanojnotsaj maj mochiuakan itatojtokakauan Cristo (Mat. 28:​18-20). Amo moneki timochiaskej hasta tinemiskej itech xochital para timonejnemiltiskej kemej Jehová kineki. Axkanya moneki timochikauaskej amo titakajkayauaskej, tikchiuaskej tein kuali uan tiktayekanaltiskej tein okachi moneki. Uan no, moneki amo tikauaskej Jehová, totakatsin oso tosiuatsin uan tokniuan. Komo axkan timochikauaj tiktakamatiskej itanauatiluan Jehová maski tinemij itech nejin taltikpak kampa mochiua tein amo kuali, okachi amo ouij techkisas titatakamatiskej keman tinemiskej itech xochital. Uan no, para tiknextiskej ke tiknekij ompa tinemiskej, axkan uelis timomachtiskej tikchiuaskej seki taman uan tiknextiskej kualneskayomej. w22.12 11, 12 § 14-16

Semi tikuelitaj maj Jesús toTekiuaj porin kuali taixyekana. Jehová kimachtij uan kiixtalij maj taixyekana (Is. 50:​4, 5). Xikonnemili keniuj Jesús kinextij ke semi techtasojta (Juan 13:1). Kemej Jesús yejua toTekiuaj, kinamiki maj tiktasojtakan. Yejua kijtoj ke akin yekmelauj kitasojtaj, kitakamatij tein tanauatij (Juan 14:15; 15:​14, 15). ¡Se ueyi tatiochiualis maj kuali timouikakan iuan iKonetsin Jehová! Tikonmati ke Jesús yolyemanik uan kichiua kemej iTajtsin. Tionmomachtiani ke kintamakak akin mayamikiaj, kinyolchikauak akin tayokoyayaj uan hasta kinpajtij akin mokokouayaj (Mat. 14:​14-21). No tikonitani ke yejua kiixyekana inechikol Dios itech nejin tonalmej (Mat. 23:10). Uan tikonmati ke kemej yejua Tekiuaj itech iTaixyekanalis Dios, amo uejkaua techmakas miak taman tein kuali. ¿Keniuj uelis tikonnextis ke tikontasojta Jesús? Komo tikonchiua kemej yejua. Uan uelis peuas tikonchiuas komo tionmotemaktia iuan Jehová uan tionmoauia. w23.03 4 § 8, 10

Jehová kichijchiuak miak taman ompa iluikak, itech taltikpak uan ueyiat, uan uelis techmachtis miak taman (Sal. 104:24). No xikonnemili keniuj techchijchiuak Dios. Techchijchiuak kemej uelis tiyolpakiskej keman tikitaskej nochi tein kualtsin. Uan no kemej uelis tikitaskej, tikakiskej, tikyekoskej, tikijnekuiskej uan tikmatokaskej tein kichijchiuak. Okse taman tein Biblia kinextia ke moneki tikitaskej tein Jehová kichijchiuak yejua porin techpaleuia maj okachi tikixmatikan yejuatsin (Rom. 1:20). Xikonnemili nejin, kemej kualtsin chijchiujtok nochi tein onkak kinextia ke Dios semi tamatkej, uan miak taman takual tein ueli tikyekouaj kinextia ke techtasojta. Keman tikitaj keniuj tamati Dios ika tein kichijchiuak, techpaleuia maj okachi tikixmatikan uan maj iuan timotokikan. w23.03 16 § 4, 5

Itech taltikpak okachi motaouijkantalia uan nejon uelis kichiuas maj ouij techkisa titakuaujtamatiskej itech inechikol Dios. Sekin xa kichiuaskej seki taman para maj amo tikneltokakan tein Biblia kijtoua uan maj amo no tikneltokakan ke Jehová kiixtalij takeual takuaujtamach uan tamatkej para maj techixyekana. Sayoj ke, komo yekmelauj tikneltokaj ke iTajtol Dios nochipa kijtoua tein melauak, amo tikauaskej maj techkajkayauakan. Uan tikixtaliskej tiktakamatiskej tein Jehová technauatia “nochipaya” (Sal. 119:112). Amo tipinauaskej tikinixmatiltiskej oksekin tein Biblia tamachtia uan tikinyolchikauaskej maj kichiuakan tein kijtoua (Sal. 119:46). Uan no, titaxikoskej ‘ika nejmachkayot uan tiyolpakiskej’ keman techtajyouiltiskej uan tikpanoskej uejueyi ouijkayomej (Col. 1:11; Sal. 119:​143, 157). Tein Biblia tamachtia techpaleuia maj amo semi timotekipachokan, maj tiyolpakikan uan maj kuali tinemikan. Techiluia ke iTaixyekanalis Dios kichiuas maj kualtsin tinemikan satepan. w23.01 7 § 16, 17

Youak achto ke momikiliskia, Jesús uejkauak ininka motataujtij itatojtokakauan uan kiluij Jiova maj kinyekpiani den Amokuali (Juan 17:15). Ika nejin, Jesús senkis kinextij ke kintasojtaya porin maski yaya kipanoti se ueyi ouijkayot, kinekia maj itatitaniluan kuali yetonij. Ijkon kemej Jesús, tejuan amo sayoj itech titanemiliaj tein techpoloua, ta no ininka timotataujtiaj tokniuan. Ijkon tikchiuaj tein kijtoj Jesús, ke moneki timotasojtaskej uan ika nejon no tiknextiliaj Jiova ke tikintasojtaj tokniuan. Uelis kinpaleuis tokniuan keman ininka timotataujtiaj, porin Biblia kijtoua ke “semi tapaleuia keman chikauak motataujtia akin yolmelauak” (Sant. 5:​16, TNM). Moneki maj ininka timotataujtikan tokniuan porin kiixnamikij miak ouijkayomej. w22.07 23, 24 § 13-15