Septiembre

Komo kuali titajtouaj, oksekin kiitaskej ke semi taman “se akin kitekitilia Dios uan se akin amo kitekitilia” (Mal. 3:18). Tein kijtosneki ke senkis moitas ke tejuan tiktekitiliaj Jiova. Maj tikitakan tein kipanok se tokniuj siuat akin monotsa Kimberly. Keman yejua uan se ichpoch akin iuan momachtiaya kisenchiujkej se tekit tein kinkauilijka tamachtijkej, akin iuan momachtiaya kiitak ke Kimberly semi taman katka. Amo kinijijtouaya oksekin, katka kualtakat uan amo keman kikuia pitsotik tajtolmej. Akin iuan momachtiaya kinekik kimatis keyej ijkon katka, uan satepan peuak momachtia Biblia iuan Kimberly. ¡Jiova semi yolpaki keman kiita ke oksekin kinekij kiixmatiskej porin kikakij keniuj titajtouaj! Tinochin tiknekij tikueyitaliskej Jiova ika tein tikijtouaj. w22.04 5, 6 § 5-7

Jesús kipaleuij María Magdalena keman kikixtilij nejon amokuali ejekamej. Yejua ika mochiuak imomachtijkauj Jesús uan kikuik tein kipiaya para kipaleuis (Luc. 8:​1-3). Maski María semi kitasojkamatia maj Jesús kipaleuiani, xa amo senkis kiajsikamatia tein Jesús yaya kichiuati satepan. ToTekotsin yaya motemaktiti para kimakixtis “akin itech takuaujtamatis” uan ijkon nemis nochipaya (Juan 3:16). Maski ijkon, María amo keman kikauak Jesús uan ijkon kinextij ke semi motasojkamatia. Keman Jesús kipilojkej itech kouit, María mokauak ompa inakastan kampa kipilojkaj para kiyolchikauas yejua uan oksekin akin no ompa yetoyaj (Juan 19:25). Uan, keman Jesús yetoya itech miketekoch, María uan okseki ome siuamej kiuikakej se taman tein ajuiyak para kitaliliskej Jesús itech inakayo (Mar. 16:​1, 2). ¡Keman Jesús oksepa nemik mosentilij iuan María uan iuan monojnotsak! Nejin se tatiochiualis tein amo nochin akin kitojtokakej Cristo kipiakej (Juan 20:​11-18). w23.01 27 § 4

Amo moneki tiknemiliskej ke kemej tiktekitilijkejya Jiova achto, amo monekiok tiktekitiliskej axkan. Xa amo ueli tikchiuajok tein achto tikchiuayaj, sayoj ke moneki semi tiktekitilijtoskej Dios uan tiksentokaskej titachixtoskej hasta keman ixpoliuis nochi tein amo kuali (1 Cor. 15:58; Mat. 24:13; Mar. 13:33). Maj tikueyichiuakan Jiova ika yolpakilis uan ika nochi toyolo. Tein Jesús kiniluij tokniuan akin nemiaj Laodicea, kinextia ke kinpanotoya okse taman. Amo semi kinyolpaktiayaok kitekitiliskej Jiova. Jesús kijtoj ke katkaj ‘tekneltijkej’. Yejua ika, monekia kichiuaskej tein kinpaleuiskia maj oksepa kinyolpaktiani kiueyichiuaskej Jiova (Apoc. 3:​16, 17, 19). ¿Toni techmachtia tejuan? Komo amo semi techyolpaktiaok tiktekitiliskej Jiova, moneki itech titanemiliskej tein yejuatsin uan inechikol kichiuanij (Apoc. 3:18). Maj amo techtapololti tiknekiskej kuali tinemiskej. Tiknekij tiktayekanaltiskej itech tonemilis tikueyichiuaskej Jiova. w22.05 3, 4 § 7, 8

Miak xiujmejya Jehová peuak kijkuiloua se amatajkuilol tein semi kualtsin. Ompa ijkuiliujtok inintokay miakej, ika peua Abel akin yekinika kitekitilij Jehová uan amo kikauak (Luc. 11:​50, 51). Ijkon kemej panouanij xiujmej, Jehová kinijkuilouani millones. Itech Biblia moijtoua ke nejin “se amatajkuilol tein ika moelnamikij akin kimojkatokaj Jehová”, oso “amatajkuilol kampa ixnesij akin nemiskej” (Apoc. 3:5; 17:8). Itech nejin amatajkuilol ijkuiliujtokej nochin akin kiueyichiuaj Jehová, kimojkatokaj uan kipatiuitaj itokay. Sekin kichiaj nemiskej nochipaya ompa iluikak uan oksekin nikan taltikpak. Tejuan no uelis ompa tiijkuiliujtoskej komo timochikauaj kuali timouikaskej iuan Jehová, uan nejin ueli tikchiuaj porin Jesús toka momikilij (Juan 3:​16, 36). Tinochin tiknekij maj totokay ijkuiliujto itech nejin amatajkuilol. w22.09 14 § 1, 2

Amatajkuilol Apocalipsis ika tajtoua “se ueyi kouat tamouilil, chichiltik kemej tit” (Apoc. 12:​3, TNM). Nejin ueyi kouat moteuia iuan Jesús uan iángeles (Apoc. 12:​7-9). Uan no, kiixnamiki ixolal Dios uan kinmaka tanauatil koujtajtapialmej oso tekiuajyomej (Apoc. 12:17; 13:4). ¿Akoni nejin “ueyi kouat tamouilil”? Yejua ne kouat akin “kitokaytijke in amokuali, uan no kitokaytijke Satanás” (Apoc. 12:9; 20:2). Yejua akin kinixyekana nochin akin kiixnamikij Jiova. ¿Toni kipanos “ueyi kouat tamouilil”? Apocalipsis 20:​1-3 kijtoua ke se ángel kipantamotas Satanás itech se ueyi ostok oso tekoch uan ompa tsaktos mil xiujmej, uan amo oksepa kinkajkayauas taltikpakneminij hasta maj panokan mil xiujmej. Uan satepan, Satanás uan iamokuali ejekauan kinpantamotaskej “kampa kuakualakatok tit”. Nejin kijtosneki ke senkis kinixpoloskej. ¡Semi kualtsin tinemiskej keman Satanás uan iamokuali ejekauan amo nemiskejok! w22.05 14 § 19, 20

Jesús semi kiuelitaya tekitis. Keman katka telpoch, katka koujxijxinkej (Mar. 6:3). Kemej ikalijtik semi miakej katkaj, itatuan xa semi kitasojkamatiaj maj kinpaleuiani. Kemej amo tajtakolej katka, kuali kikisaya nochi tein kichijchiuaya, yejua ika xa semi kitakouiayaj. Jesús xa semi kiyolpaktiaya tekitis. Uan maski semi kuali tekitia, kixelouaya tiempo para kitekitilis Jiova (Juan 7:15). Uan keman tanojnotsaya miak tonalmej, tayolmajxitij: “Amo ximotekitiltikan san sayo ika in takualis ten panoa san. Ta, ximotekitiltikan de ika ne takualis ten namechuejkauas, [...] ten namechmakas ne yek nemilis nachipa” (Juan 6:27). Uan keman tamachtij itech se tepet kijtoj: “Xiksentilikan namoricojyo tech ne eluiyaktsinko” (Mat. 6:20). Tamatilis tein Jiova techmaka techpaleuia maj tikitakan tekit kemej moneki. Akin tikchiuaj kemej Cristo techyolmajxitiaj maj chikauak titekitikan uan maj tikchiuakan “se kuali tekit”. w22.05 22 § 9, 10

Ika tein kichiuak Eunice kuali kimachtij Timoteo. Yejua xa kiitak ke ika tein kichiuaya imomaj kinextiaya ke semi kitasojtaya Jiova uan kiitak ke kitekitilis Jiova kiyolpaktiaya. No ijkon, miakej tokniuan siuamej kinpaleuianij ininchankauan maj kitekitilikan Jiova sayoj ika tein kichiuaj (1 Ped. 3:​1, 2). Tejuatsin no uelis ijkon tikonchiuas. ¿Keniuj? Xikontayekanalti kuali tionmouikas iuan Jiova (Deut. 6:​5, 6). Ijkon kemej kichiuaj miakej siuamej akin kipiaj ininkoneuan, tejuatsin xa tionmochikaua tikonyekpias mokoneuan maski moneki tikonkauas miak taman. Kemej neskayot, xa tikonkui motiempo, motomin uan amo tionmoseuia maski tikonnekiskia tikonchiuas. Sayoj ke maski moneki tikonchiuas miak taman, moneki tikontayekanaltis kuali tionmouikas iuan Jiova. Yejua ika, xikonxelo tiempo tionmotataujtis, tionmomachtis Biblia moselti uan tionyas nechikolmej. Komo ijkon tikonchiua okachi kuali tionmouikas iuan Jiova. Uan no, tein tikonchiua uelis kinpaleuis mochankauan uan oksekin. w22.04 16 § 1; 19 § 12, 13

Techyolseuia tikmatiskej ke amo tejuan moneki tikixtaliskej toni kiseliskej oksekin. Kemej Jiova yejua akin okachi kuali tamelaua, yejuatsin kiixtalis nejon (Rom. 14:​10-12). Jiova kimati toni tein kuali uan tein amo kuali, yejua ika uelis tikneltokaskej ke kuali kiixtalis tein kinnamiki kiseliskej sejsemej (Gén. 18:25). Yejuatsin amo keman kichiuas teisa tein amo kuali. Kemej titajtakouanij tikpanouaj miak taman tein amo kuali, yejua ika semi tiknekij maj ejkoya tonal keman Jiova kiyektalis nochi. Yejuatsin kichiuas maj tipaktokan uan maj amo teyi techyolkokook (Sal. 72:​12-14; Apoc. 21:3, 4). Tein melauj, amo keman tikelnamikiskejok nochi nejon. Maj tiksentokakan tikchiakan maj ejko nejon tonal, uan axkan maj tiktasojkamatikan porin Jiova techkaua maj tikchiuakan kemej yejuatsin uan maj titetapojpoluikan. w22.06 13 § 18, 19

Se tamelaujkej moneki kuali kiixmatis nochi tanauatilmej. Yejua moneki kuali kimatis toni kuali uan toni amo kuali. ¿Toni no moneki kichiuas se tamelaujkej? Achto ke kiixtalis keniuj kitatsakuiltiskej aksa, moneki kimatis nochi tein panok. Yejua ika, amo akin okachi kuali tamelaua ke Jiova. Jiova amo tamelaua kemej kichiuaj tamelauanij nikan taltikpak. Yejuatsin kuali kimati keyej panoua teisa (Gén. 18:​20, 21; Sal. 90:8). Amo tamelaua sayoj ika tein kiitaj uan kikakij taltikpakneminij. Jiova kimati ke onkak miak taman tein kiolinia aksa maj kichiua teisa, uelis yeski tein kimachtijkej, kemej moskaltij, kampa nemia oso xa kipia se kokolis tein kichiua maj amo yektanemili uan maj amo kuali momachili. Amo uelis tiktatiliskej Jiova nion teyi, yejuatsin nochi kiita (Heb. 4:13). Yejua ika, Jiova kitapojpoluia aksa porin kimati nochi tein kipanoua. w22.06 4 § 8, 9

Moneki kuali tikitaskej tein Satanás kichiuilij Job, porin no yejua tein kichiua axkan. Satanás kijtosnekik ke amo yekmelauj tiktasojtaj Jiova uan ke tikauaskej komo tikitaj ke uelis timomikiliskej. No kijtoua ke Jiova amo techtasojta uan ke amo kipatiuita nochi tein tikchiuaj. Kemej titakuaujtamatij iuan Jiova, Satanás amo techkajkayaua porin tikmatijya tein kichiua. Keman tikpanouaj ouijkayomej techpaleuia maj tikmatikan toni moneki tikpataskej. Kemej neskayot, ouijkayomej tein Job kipanok kipaleuij maj kiitani ke monekia yeski okachi yolyemanik (Job 42:3). Tejuan no techpaleuis maj tikitakan ox moneki tikpataskej teisa. Keman tikitajya ke teisa amo tikyekchiujtokej, ueli tikpataj. w22.06 23 § 13, 14

Jehová motenkaua ke techpaleuis. Achto ke kijtoskia: “Namejuan nannotaixpantijkauan”, yejuatsin kijtoj: “Keman tikpanauis at, nietos mouan uan keman tikinpanauis amej, amo tiatsonpoliuis. Keman tikpanauis tit amo timotajtatis uan amo tichichinauis” (Is. 43:2). Kemansa keman titanojnotsaj tikixnamikij ouijkayomej tein kemej yeskia at uan tit. Sayoj ke tiksentokaj titanojnotsaj porin Jehová techpaleuia (Is. 41:13). Miakej amo kinekij techkakiskej. Sayoj ke tikmatij ke nejin amo kijtosneki ke amo kuali titanojnotsaj. Techyolchikaua tikmatiskej ke Jehová semi yolpaki keman tiksentokaj titanojnotsaj. Tatitanil Pablo kijtoj: “Sejse Dios kitatiochiuis ijkon kemej tekitis” (1 Cor. 3:8; 4:​1, 2). w22.11 4 § 5, 6

Axkan tikitaj ke mochiujtok tein achtook moijtojka porin miakej akin tajtouaj tataman tajtolmej momachtijtokej “tajtol tein chipauak” (Zac. 8:23; Sof. 3:9). Itech inechikol Jiova moajsij panoua 8 millones tokniuan itech 240 altepemej uan xolalmej. ¡Uan xijxiujtika moauiaj miles! Sayoj ke nejin amo yejua tein okachi moneki, ta kualneskayomej tein kinextiaj porin kipataj tein achto kichiuayaj uan kichiuaj tein Dios kineki (Col. 3:​8-10). Miakej amo auilnemijok, amo tateuiajok, amo techikotasojtajok uan amo ika moueyichiuajok ininaltepeuj. Moyekita ke mochiujtok tein kijtoua Isaías 2:4 porin amo tateuiajok. Kemej amo tikchiuajok tein achto tikchiuayaj, taltikpakneminij techitaj uan yejua ika kinekij momachtiskej Biblia uan no tiknextiaj ke tiktojtokaj Jesucristo, akin techixyekana (Juan 13:35). Uan nochi nejin ueli mochiua porin Jesús techpaleuijtok. w22.07 9 § 7, 8

Keman tiktataujtiskej Jiova maj tiknextikan ke semi tikpoujkaitaj. Maj itech titanemilikan tein Jiova kichiuak maj kiitakan Isaías, Ezequiel, Daniel uan Juan. Isaías kiitak ke Jiova “tokotsyetok itech itrono tein uejkapan yetok” (Is. 6:​1-3). Ezequiel kiitak ke tokotsyetok itech icarro tein “kiyoualouaya se tanex tein moitaya kemej se arcoíris” (Ezeq. 1:​26-28). Daniel kiitak “Akin xiuejya itech Tonalmej” ika itaken istak uan tokotsyetok itech itrono kampa kisaya tit (Dan. 7:​9, 10). Uan Juan kiitak ke Jiova tokotsyetok itech itrono uan kiyoualouaya se arcoíris tein milinia kemej “ne tetsitsin ten kiliaj esmeralda” (Apoc. 4:​2-4). Keman itech titanemiliaj ke Jiova semi ueyichiujkej, techelnamiktia ke se ueyi tatiochiualis maj ueli tiktataujtikan uan ke semi moneki maj tikchiuakan ika miak poujkaitalis. w22.07 20 § 3

Telpoch uan ichpoch, Satanás amo kineki xiksentoka xiktekitili Jiova uan kitemoua nejon keman kichiua ximotajtani ox melauak tein timomachtiani itech Biblia. Xa miakej kinekiskej xikneltoka ke Dios amo tachijchiuak ta ke iselti mochiuak nochi, nejin kichiua maj amo kuali kiitakanok Dios. Xa achto amo semi itech titanemiliaya nejin. Sayoj ke itech kaltamachtiloyan xa mitsmachtiskej ke amo akin tachijchiuak uan xa mokakis ke melauak nejon. Sayoj ke yejuan amo momachtianij tein kinextia ke yekmelauj moajsi se Tachijchiujkej. Xikelnamiki tein kijtoua Proverbios 18:17: “Akin yekinika tajtoua kinextia ke melauj tein kijtoua, sayoj ke okse ejko uan kichiuilia netajtanilmej para kinextis tein melauj”. ¿Toni techmachtia nejin? Ke amo moneki tikneltokas nochi tein mitsiluiaj kaltamachtiloyan, ta moneki kuali timomachtis iTajtol Dios uan toamaixuan. w22.08 2 § 2; 4 § 8

Tiknekij tikajsikamatiskej tein tikixtajtoltiaj itech Biblia, porin komo amo tikchiuaj, amo uelis techpaleuis. Maj itech titanemilikan keman Jesús iuan monojnotsak “se takat akin kuali kiixmatia iTanauatil Moisés” (Luc. 10:​25-29). Nejin takat kinekia kimatis toni monekia kichiuas para nemiskia nochipaya, uan keman Jesús kinankilij kichiuak maj itech tanemiliani iTajtol Dios. Kiluij: “¿Toni ijkuiliujtok itech iTanauatil Moisés? ¿Keniuj tikajsikamati?”. Takat kuali kinankilij, kijtoj tein kijtouaya Tajkuilolamatsin, ke monekia kitasojtas Dios uan no oksekin (Lev. 19:18; Deut. 6:5). Sayoj ke satepan kitajtanij: “Uan ¿akoni moneki niktasojtas?”. Ika nejin kinextij ke amo kiyekajsikamatia tein kiixtajtoltijka uan yejua ika amo kimatia keniuj kiyekchiuas. Amo uelis tikajsikamatiskej komo Jehová amo techpaleuia, yejua ika moneki tiktajtaniskej ichikaualis para maj amo teyi techtapololti, uan para maj techpaleui maj tikchiuakan tein tikixtajtoltijkej. w23.02 9 § 4, 5

“¿Keniuj peuak tionmomachtia Biblia?”. Xa miakpa techtajtanianij nejin, okachiok keman tikinixmatij okseki tokniuan. Semi tikuelitaj tikakiskej keniuj tokniuan kiixmatkej Jiova uan peuak kitasojtaj, uan no tikuelitaj tikiniluiskej keyej semi techyolpaktia tiktekitiliskej Jiova (Rom. 1:11). Keman ika titajtouaj nejin techelnamiktia ke se ueyi tatiochiualis tiyeskij tiitaixpantijkauan Jiova. No techpaleuia maj tiknekikan tiksentokaskej itech tamachtilis tein melauak, tein kijtosneki maj tikchiuakan tein kiyolpaktis Jiova uan tein tapaleuis maj techtatiochiui. Onkak miak taman keyej tikpatiuitaj tamachtilis tein melauak. Tein okachi tayekantok yejua ke tiktasojtaj Jiova, akin techmachtia tein melauak. Itech iTajtol, Biblia, timomachtianij ke yejuatsin semi chikauak uan kichijchiuak nochi tein onkak itech iluikak uan taltikpak. Uan no timomachtianij ke yejuatsin toTajtsin akin semi techtasojta uan toka motekipachoua (1 Ped. 5:7). w22.08 14 § 1, 3

Tatitanil Pablo kinpaleuij tokniuan maj monextilianij ke motasojtayaj ika tein kichiuayaj (Heb. 10:24). Yejua amo sayoj kinpaleuij ika tein kijtoj, ta no ika tein kichiuak. Kemej neskayot, keman tokniuan akin nemiaj Judea amo kipiayaj toni kikuaskej, Pablo katka semej akin kinuikiliaya tein kikuaskej (Hech. 11:​27-30). Maski miak tiempo tanojnotsaya uan tamachtiaya, nochipa kitemoj keniuj kinpaleuis tokniuan akin katkaj pobres. Ijkon kinpaleuij tokniuan maj takuaujtamatinij ke Jiova nochipa kinyekpiaskia. Tejuan no uelis tikinpaleuiskej tokniuan maj okachi takuaujtamatikan keman tikuij totiempo, tochikaualis uan tein ueli tikchiuaj para titapaleuiskej keman mochiua se tetsauit. Uan no keman nochipa titapaleuiaj ika totomin. Ika nejin uan okseki taman tikinpaleuiaj tokniuan maj takuaujtamatikan ke Jiova amo keman kinkauas. w22.08 24 § 14

Miak taman tein Biblia kijtojka ke mochiuaskia, mochiuakya uan seki moijtojka tel miak xiujmej achto. Uan tein panouani kinextia ke yekmelauj mochiuak tein moijtojka. Amo tikmoujkaitaj maj ijkon mochiuani porin yejua Jehová akin kitematiltij nejon. Maj titanemilikan itech tein kipanok ueyi xolal Babilonia. Kemej itech xiuit 778 uan 732 achto ke ualaskia Cristo, Jehová kichiuak maj tanauatijkej Isaías kijtouani ke Babilonia moaxkatiliskiaj. Hasta kijtoj ke akin moaxkatiliskia Babilonia motokaytiskia Ciro uan no kijtoj keniuj kichiuaskia (Is. 44:​27–45:2). No kijtojka ke Babilonia ixpoliuiskia uan ke amo akin ompa nemiskiaok (Is. 13:​19, 20). Medos uan persas moaxkatilijkej ueyi xolal Babilonia itech xiuit 539 achto ke ualaskia Cristo, uan axkan amo akin ompa nemiok. w23.01 4 § 10

Jehová techmakani tatiochiualis maj tipouikan iniuan miakej tokniuan itech nochi taltikpak akin kemej yeskiaj tochankauan. Uan yejua ika tikseliaj miak taman tein kuali (Mar. 10:​29, 30). Itech nochi taltikpak moajsij tokniuan akin kitasojtaj Jehová ijkon kemej tejuan uan mochikauaj kitakamatiskej. Maski tataman kemej titajtouaj, timotakentiaj uan tataman tein timomattokej tikchiuaskej, keman timoixmatij iniuan tokniuan niman peua timotasojtaj. Uan okachi tikuelitaj porin tiksenueyichiuaj toTajtsin Jehová akin semi techtasojta, uan maj kuali timouikakan iniuan tokniuan (Sal. 133:1). Kemansa yejuan techpaleuiaj keman tikpiaj ouijkayomej (Rom. 15:1; Gál. 6:2). No techyolchikauaj maj tiksentokakan tiktekitilikan Jehová uan maj tiksentokakan iuan titakuaujtamatikan (Heb. 10:​23-25). Komo tokniuan amo techpaleuiskiaj, semi ouij techkisaskia tikixnamikiskej Satanás uan nochin akin kichiuaj kemej yejua. w22.09 2, 3 § 3, 4

Redes sociales uelis kichiuas maj tiknextikan ox yekmelauj ueli timotsakuiliaj. Komo amo timoyekpiaj ueliskia tikinmatiltiskej miakej teisa tein amo moneki momatis. Uan keman tiktematiltiajya teisa amo teyi ueli tikchiuajok. Komo ueli timotsakuiliaj no techpaleuis maj amo teyi tikijtokan komo akin techixnamikij kitemouaj techkajkayauaskej para maj tikiniluikan teisa tein uelis kinijtakos tokniuan. Nejin uelis panos komo policías techtatajtaniaj itech se altepet kampa tekiuanij amo kinkauaj maj itaixpantijkauan Jehová taueyichiuakan. Komo tikpanouaj nejin oso okse taman uelis techpaleuis komo tikchiuaj nejin: “Amo teyi nikijtos” (Sal. 39:1). Moneki tiknextiskej ke titakuaujtamachmej iniuan tochankauan, totasojikniuan, tokniuan uan akin yeski. Uelis tikchiuaskej nejin komo tikmatij timotsakuiliskej. w22.09 13 § 16

Uelis yekmelauj tiyolpakiskej komo tikixtajtoltiaj uan timomachtiaj Biblia. Sayoj tejuan ueli tikixtajtoltiaj iTajtol Dios uan moneki tikchiuaskej. Jesús kijtoj: “Amo sayoj ika takual moneki se yoltos, ta ika nochi tein kijtoua Jehová” (Mat. 4:4). Yejua ika moneki mojmostaj tikixtajtoltiskej Biblia. Kemej Jehová techtasojta techiluia itech Biblia keniuj uelis tiyolpakiskej. Kemej neskayot, techiluia keyej techchijchiuak, keniuj uelis kuali timouikaskej iuan uan toni moneki tikchiuaskej para techtapojpoluis totajtakoluan. No techiluia ke techmakas miak taman tein kualtsin satepan (Jer. 29:11). Keman timomachtiaj nochi nejin, tiyolpakij. Yejua ika, komo timotekipachojtokej porin tikpiaj kuejmolmej, maj okachi tikixtajtoltikan Biblia uan maj itech titanemilikan. w22.10 7 § 4-6

Yejua ika Biblia techiluia maj amo tikchiuakanok kemej akin amo teyi kimatij. Komo tikchiuaj tein Biblia tayolmajxitia, uelis timochiuaskej titamatinij. Keman tikchiuaj nejon, tikitaj ke kuali titaixpejpenaj uan amo timokuejmolkalakiaj. Semi kuali komo tikitaj tein tikchiuanijya. Kemej neskayot, komo uejkaujya tionmomachtia Biblia uan tionyoui nechikolmej, sayoj ke ayamo tionmotemaktia iuan Jehová nion tionmoauia, ueli tionmotajtanis keyej. Uan komo tionmoauijya, ¿okachi kuali tiontanojnotsa uan tiontamachtia ika Biblia? ¿Tikonnextia ika tein tikonchiua ke tionmoyekana ika tein Biblia kijtoua? ¿Tikonita oksekin kemej Jesús kichiuaskia? Komo tikitaj ke uelis okachi kuali tikchiuaskej teisa, maj tikchiuakan tein Jehová technauatia porin nejon kichiua maj “tamatkej akin amo teyi kimati” (Sal. 19:7). w22.10 20 § 8

Ezequiel kiitak keniuj ichikaualis Dios semi tapaleuia. Jehová kichiuak maj kiitani keniuj ichikaualis kinpaleuiaya ángeles akin semi chikaujkej. Uan no, keniuj kinoliniaya uejueyi ruedas tein kipia icarro (Ezeq. 1:21). Ezequiel techiluia keniuj momachilij keman kiitak nejon: “Keman nikitak, nimoixtokak”. Kemej semi kimojkaitak moixpiloj hasta talpan (Ezeq. 1:28). Keman itech tanemiliaya tein kiitaka, xa okachi kineltokaya ke Jehová ika ichikaualis kipaleuiskia maj tanojnotsa. Jehová kinauatij Ezequiel: “Ximoketsa uan maj mouan nitajto”. Tein kiluij uan ichikaualis yejuatsin kipaleuij Ezequiel maj ueli moketsa (Ezeq. 2:​1, 2). Uan keman tanojnotstinemiaya, Jehová kipaleuij ika ichikaualis (Ezeq. 3:22; 8:1; 33:22; 37:1; 40:1). w22.11 4 § 7, 8

Tanauatijkej Isaías kinextia ke Jehová kemej yeskia se tamachtijkej akin youi ininikampa akin kinmachtia uan kiniluijtiuj kanikauin moneki yaskej. ¿Uan axkan keniuj tikakij ke Dios technojnotsa taikampa? Keman tikixtajtoltiaj Biblia. Ompa moijkuiloj ne uejkauj tein yejuatsin kinemilia. Yejua ika, keman tikixtajtoltiaj Biblia kemej yeskia tikakij ke Jehová technojnotsa taikampa oso desde ne uejkauj (Is. 51:4). ¿Keniuj uelis okachi techpaleuis tein Jehová techiluia? Isaías kijtoua ome taman. Yekinika kijtoua “Yejua nejin ojti”, uan ojpatika “Itech xinentinemi”. Yejua ika amo sayoj moneki tikixmatiskej ojti, ta moneki ompa tiaskej. Jehová techmachtia ika iTajtol uan inechikol, ijkon ueli tikmatij toni kineki maj tikchiuakan uan keniuj uelis tikchiuaskej. Moneki tikchiuaskej nejin ome taman para uelis tiksentokaskej tiktekitiliskej Jehová ika yolpakilis. Sayoj ijkon uelis titakuaujtamatiskej ke yejuatsin techtatiochiuis. w22.11 11 § 10, 11

Satepan ke momikilijkej miakej tatitanilmej, sekin akin kijtouayaj ke kichiuayaj kemej Cristo, peujkej tamachtiaj tein amo melauak itech nechikol (Mat. 13:​24-27, 37-39). Kijtouayaj “tein kejkeptok para kintanejnektiskej tokniuan uan kinuikaskej iniuan” (Hech. 20:30). Semej tamachtilis “tein kejkeptok” tein peujkej tamachtiaj, yejua ke Jesús amo “sayoj sepa motemaktij para kinkixtilis inintajtakoluan miakej”. Tamachtiayaj ke Jesús miakpa monekia motemaktis uan nejon se taman tein Biblia amo tamachtia (Heb. 9:​27, 28). Miakej akin kinekij kiixmatiskej Dios, no kineltokaj nejon, youij tiopan chijchikueyitika oso mojmostaj para kichiuaskej tein moixmati kemej el sacrificio de la misa. No moajsij okseki taneltokalismej tein amo semi kielnamikij imikilis Cristo, uan miakej akin ompa pouij amo kiyekajsikamatij tein kijtosneki. w23.01 21 § 5

Itech Mil Xiujmej keman Jesús taixyekantos, kichiuas maj oksepa nemikan akin momikilijkejya uan kinpaleuis akin tatakamatiskej maj senkis amo tajtakolejkejok. Akin senkis kinextiskej ke amo kikauaj Jehová, yejuatsin kinitas ke yolmelaujkej, “ininaxkatis taltikpak uan ompa nemiskej nochipaya” (Sal. 37:​10, 11, 29). Uan “mikilis no ixpoliuis” (1 Cor. 15:26). ¡Semi tiyolpakiskej! Uelis tikneltokaskej ke tinemiskej nochipaya porin Biblia senkis ijkon kinextia. Tikchiaskej tinemiskej nochipaya techpaleuia maj amo tikauakan Jehová uan Jesús itech nejin tonalmej tein semi ouijkej. Sayoj ke, komo tiknekij tikyolpaktiskej Jehová, amo sayoj moneki tikintakamatiskej porin tiknekij tinemiskej nochipaya, ta porin tikintasojtaj (2 Cor. 5:​14, 15). Kemej tiktasojtaj Jehová uan Jesús, tiknekij tikchiuaskej kemej yejuan uan no tikintapouiskej oksekin tein tikchiaj tikseliskej (Rom. 10:​13-15). Komo timochikauaj okachi tikinpaleuiskej oksekin uan amo sayoj totech titanemiliskej, Jehová okachi kinekis mouikas touan nochipaya. w22.12 6, 7 § 15, 16

Keman techixnamikij xa ouij techkisa tikchiuaskej seki taman tein techpaleuia maj tiyolseujtokan uan maj tiyolpakikan. Uelis timoteltekipachoskej uan tiknemiliskej toni panos satepan. Taixejekol maj ijkon timomachilikan. Sayoj ke maj amo tikauakan maj nejon kichiua maj amo titakuaujtamatikanok iuan Jehová, ijkon kemej Jesús kinnejmachtij itatojtokakauan (Juan 16:​1, 2). Jesús ipa kijtoj ke techtajyouiltiskiaj, sayoj ke no kijtoj ke ueliskia titaxikoskej uan amo tikauaskej Jehová (Juan 15:20; 16:33). Keman tekiuanij amo techkauaj maj tikueyichiuakan Jehová kemej ipa tikchiuaj, tokniuan itech kali Betel oso tayekananij uelis techiluiskej maj tikchiuakan seki taman para timoyekpiaskej, para tiksentokaskej tikseliskej tamachtilis uan tiksentokaskej titanojnotsaskej hasta kampa uelis. Komo ijkon panoua, maj tiktakamatikan tein techiluiskej (Sant. 3:17). Uan maj amo keman tikinmatiltikan akin amo moneki kimatiskej teisa (Ecl. 3:7). w22.12 20, 21 § 14-16

Axkan Jesús kisentoka kinixyekana imomachtijkauan para maj tanojnotsakan itech nochi taltikpak ijkon kemej kijtojka ke kichiuaskia. Jesús kikui inechikol Jehová para techmachtis keniuj tikteixmatiltiskej kuali tanauatilmej uan techmaka tein techpaleuia maj kuali titanojnotsakan (Mat. 28:​18-20). Yejua ika, axkan ke tikchixtokej tonal keman Jehová kiixpolos nochi tein amo kuali, moneki timochikauaskej titanojnotsaskej uan kuali titamachtiskej uan tiksentokaskej titachixtoskej. Titaxikoskej “hasta keman tatamis” komo tikchiuaj tein kijtoua Hebreos 6:​11, 12. Jehová kiixtalijya kemanian kiixpolos nochi tein Satanás kiixyekana. Keman ejkos nejon tonal, kichiuas nochi tein Biblia kijtojka ke panoskia. Uan maski xa tiknemiliskej ke amo niman kiixpoloua nochi tein amo kuali, itonal Jehová “amo motajkajtilis” (Hab. 2:3). Yejua ika, maj tikixtalikan tikchiuaskej tein kijtoua Miqueas 7:7: “Niksentokas nitachixtos itech Jehová. Nikchias Dios akin nechmakixtia”. w23.02 19 § 15, 16

Akin peua tejko itech se tepet kineki ajsis hasta takuapan, sayoj ke ijkon kemej pankistiuj, uelis motsakuilis uan kiitas nochi tein kualtsin tein onkak ompakauin. No ijkon, kemansa uelis tikxeloskej tiempo uan tiknemiliskej keniuj Jehová techpaleuijtok maj tikxikokan se ouijkayot. Keman tamis se tonal, maj timotajtanikan: “¿Keniuj nechtatiochiuij Jehová axkan? Maski niksentoka nitajyouia, ¿keniuj nechpaleuijtok Jehová maj nitaxiko?”. Maj mojmostaj tikitakan se taman kemej Jehová techpaleuijtok. Xa tikontataujtijtok Jehová maj mitsonajchiuili se ouijkayot, uan nejon kuali yetok (Filip. 4:6). Sayoj ke no moneki tikitaskej keniuj techtatiochiuijtok. Jehová motenkaua ke techyolchikauas uan techpaleuis maj titaxikokan. Yejua ika maj nochipa tiktasojkamatilikan. Komo tikchiuaj, tikitaskej ke Jehová nochipa techpaleuia hasta keman titajyouiaj (Gén. 41:​51, 52). w23.01 19 § 17, 18

Yejua ika maj timotajtanikan: “¿Niknextia ika tein nikchiua ke nikajsikamati ke amo uejkaua ixpoliuis tein amo kuali? ¿Kinextia tein nikixpejpena ke niktayekanaltia niktekitilis Jehová uan amo tekit oso nemachtil? ¿Nikneltoka ke Jehová kinyekpias nochankauan uan nejua?”. Jehová semi yolpaki keman kiita ke timochikauaj tikchiuaskej tein yejuatsin kineki (Mat. 6:​25-27, 33; Filip. 4:​12, 13). Moneki maj nochipa tikitakan keniuj titanemiliaj uan komo teisa moneki tikpataskej maj niman tikchiuakan. Pablo kiniluij tokniuan akin nemiaj Corinto: “Xiksentokakan ximoyekitakan para nankimatiskej ox yekmelauj nantakuaujtamatij. Xiksentokakan xiknextikan keniuj yekmelauj nantamatij” (2 Cor. 13:5). Moneki tiksentokaskej tikpataskej kemej titanemiliaj, yejua ika moneki tikixtajtoltiskej Biblia, titanemiliskej kemej Jehová tanemilia uan tikpataskej tein monekis para tikyolpaktiskej (1 Cor. 2:​14-16). w23.01 9 § 5, 6