Noviembre

Se tokniuj amo keman monekiskia kijtos pitsotik tajtolmej. Sayoj ke maski amo tikmatiskej ueliskia tikinyolxokoliskej oksekin, yejua ika moneki kuali tiknemiliskej tein tikijtouaj. Kemej neskayot, amo monekiskia tikinijtouiliskej teisa akin okseko kayomej oso taman kemej nemij. Uan amo no tiknekij tikijtoskej teisa tein kichiuas maj oksekin amo kuali momachilikan. Xikonijto tein teyolchikauas. Amo xikonijijto oksekin, ta xionmochikaua tikoniluis tein kuali tein kichiuaj. Amo tiknekij tikchiuaskej kemej israelitas. Maski yejuan kipiayaj miak taman tein ika motasojkamatiskej, nochipa kijtojtinemiaj tein amo kiuelitayaj, uan keman aksa ijkon kichiua, oksekin no kichiuaj. Tein kijtojkej majtakti tapijpianij kichiuak maj “nochin israelitas kijtouani tein amo kiuelitiliayaj Moisés” (Núm. 13:​31–14:4). Sayoj ke, keman tikiniluiaj oksekin tein kuali tein kichiuaj semi kinpaleuia. Nochipa keman uelis, xikonilui oksekin tein kuali tein kichiuaj. w22.04 8 § 16, 17

Biblia kinextia ke Jiova kinpaleuiani miakej telpochmej uan ichpochmej maj kuali mouikakan iuan. Yejua ika no uelis kinpaleuis mokoneuan maj kuali mouikakan iuan, komo yejuan kinekij (1 Cor. 3:​6, 7). Maski moitas ke mokoneuan amo semi kinekijok kitekitiliskej Jiova, yejuatsin kisentokas kintasojtas (Sal. 11:4). Uan niman keman tepitsin kinextiskej ke “kiyolnejnekij kiseliskej tein melauak” yejuatsin kinpaleuis (Hech. 13:​48, TNM; 2 Crón. 16:9). Jiova no uelis mitsonpaleuis xikonilui mokoneuan tein kinyolchikauas keman okachi monekis (Prov. 15:23). Oso no uelis kichiuas maj se tokniuj itech nechikol kinpaleui ika netasojtalis. Hasta keman uejueykejya yeskij, Jiova uelis kichiuas maj kielnamikikan teisa tein tejuatsin tikonmachtij (Juan 14:26). Komo tikonsentoka tikonmachtia mokoneuan ika tein tikonijtoua uan tikonchiua, Jiova mitsontatiochiuis. w22.04 21 § 18

Kemej Satanás amo ueliok youi iluikak, semi kualani iniuan tokniuan taixpejpenalmej, yejuan kiixnextiaj iTekiuajyo Dios nikan taltikpak uan “tanojnotstinemij de [...] Jesucristo” (2 Cor. 5:20; Efes. 6:​19, 20). Itech xiuit 1918, chikueyi tokniuan akin kiixyekanayaj inechikol Dios kintakajkayauilijkej uan miak xiujmej kintsakkej. Miakej kinemiliayaj ke motsakuilij tekit tein kichiuayaj (Apoc. 11:​3, 7-11). Sayoj ke itech metsti marzo xiuit 1919, nejin tokniuan taixpejpenalmej kinkixtijkej uan satepan amo teyi ika kinteluilijkejok. Tokniuan niman oksepa peuak tamachtiaj uan kiteixmatiltiaj iTekiuajyo Dios. Sayoj ke Satanás kisentokak kitemoj kintsakuilis. Ijkuak, Satanás semi peuak kintajyouiltia itekitikauan Dios (Apoc. 12:15). Yejua ika, tinochin moneki titaxikoskej uan titakuaujtamatiskej (Apoc. 13:10). w22.05 5, 6 § 14-16

Jiova kichiuak maj tatitanil Juan kinita tel miakej taltikpakneminij akin kipaleuiaj itaixyekanalis, akin nemiskej nochipaya uan kiseliaj okseki tatiochiualismej. Yekinika moajsij 144,000. Yejuan kayomej nikan taltikpak, uan youij iluikak porin tekiuajtiskej iuan Jesús. Yejuan sentaixyekanaskej nikan taltikpak (Apoc. 5:​9, 10; 14:​3, 4). Juan kiita ke ijkatokej iuan Jesús itech tepet Sion ompa iluikak (Apoc. 14:1). Keman nemiajok itatitaniluan Jesús peuak kinixpejpenaj akin pouiskej iniuan 144,000 (Luc. 12:32; Rom. 8:17). Sayoj ke Juan kimatiltiaj ke itech itamian tonalmej amo miakejok yetoskiaj nikan taltikpak (Apoc. 12:17). Ompa, itech okachi ueyi tajyouilis, nejin tokniuan kinuikaskej iluikak uan mosentiliskej iniuan akin no pouij itech 144,000 akin amo keman kikaujkej Jiova. Yejuan taixyekanaskej iuan Jesús itech iTekiuajyo Dios (Mat. 24:31; Apoc. 5:​9, 10). w22.05 16 § 4, 5

Jesús kinnextilij imomachtijkauan ke monekia moitaskej kemej moneki. Kiniluij: “Totajtsin Dios kinpoua namotsonuan” (Mat. 10:30). Semi techyolchikaua nejin tajtolmej, okachiok komo tikmachiliaj ke amo teyi tichiuanimej. Techelnamiktia ke Jiova semi toka motekipachoua uan ke semi techpatiuita. Komo Jiova kiitak ke technamiki maj tiktekitilikan uan maj tinemikan nochipaya itech yankuik taltikpak, amo moneki tiknemiliskej ke amo kuali tein kiixtalia. Kemej 15 xiujmej achto, amaix La Atalaya techyolchikauak maj timoitakan kemej moneki. Kijtoj: “Amo tiknekij semi timopatiuitaskej hasta timoueyimatiskej. Sayoj ke amo no moneki tiknemiliskej ke amo teyi tichiuanimej. Ta, okachi kuali maj timoitakan kemej moneki, yejua ika maj tikitakan tein ueli tikchiuaj uan tein amo ueli tikchiuaj”. w22.05 24, 25 § 14-16

¿Keniuj uelis titapaleuiskej tisejsemej maj nochin tokniuan okachi kuali mouikakan? Moneki timochikauaskej kuali timouikaskej iniuan (Mat. 5:9; Rom. 12:18). Keman tejuan yekinika tiktemouaj kuali timouikaskej iniuan oksekin, titapaleuiaj maj nejin xochital okachi kualtsin moita. Tikelnamikij ke nochin tokniuan akin moajsij itech nechikol, Jehová kichiuak maj iuan motokikan (Juan 6:44). Maj tiknemilikan keniuj Jehová semi yolpaki keman kiita ke timochikauaj titapaleuiskej maj nochin tokniuan okachi kuali mouikakan, porin yejuatsin semi kinpatiuita (Is. 26:3; Ageo 2:7). ¿Keniuj uelis okachi techpaleuis nochi tein kuali tein Jehová techmaka? Maj itech titanemilikan tein timomachtiaj itech Biblia. Komo ijkon tikchiuaj, tiknextiskej kualneskayomej tein techpaleuiskej maj okachi tikintasojtakan tokniuan (Rom. 12:10). w22.11 12, 13 § 16-18

Keman tikneltokaj ke Jiova techtapojpoluijya tiyolseuij, nejin kijtosneki ke amo techkuejmolouaok totanemilil. Amo ijkon timomachiliaj keman aksa techtapojpoluia, ta sayoj keman Jiova kichiua (Hech. 3:19). Keman yejuatsin techtapojpoluia oksepa kuali timouikaj iuan, kemej yeskia amo keman titajtakolchiuaskiaj. Keman Jiova kitapojpoluia aksa amo kitatsakuiltiaok nion kielnamikiliaok tein kichiuak (Is. 43:25). Jiova kemej yeskia uejka kitalia itajtakoluan “ijkon kemej ueuejka moajsij tonalkisayampa uan tonalkalakyampa” (Sal. 103:12). Jiova senkis tetapojpoluia uan keman itech titanemiliaj nejon, kichiua maj timotasojkamatikan uan maj tikueyichiuakan (Sal. 130:4). Keman Jiova techtapojpoluia amo kiita ox ueyi tajtakol tein tikchiujkej oso amo. Keman Jiova kiita ox kitapojpoluis aksa moyekana ika nochi tein kimati porin yejuatsin toTachijchiujkauj, toTamelaujkauj uan techmaka tanauatilmej. w22.06 5 § 12-14

Jiova techiluia ke nochin akin tiktasojtaj uelis tikchiaskej tein kuali. Yejuatsin kichiuas maj amo akin kokolispeuaok, maj amo akin tayokoyaok nion maj momikiliok (Apoc. 21:​3, 4). Kinpaleuis akin yolkualmej akin iuan takuaujtamatij maj kichiuakan se xochital nikan taltikpak (Sal. 37:​9-11). Kichiuas maj semi kualtsin timouikakan iuan okachi ke axkan. ¡Semi kualtsin tein tikchiaj! Sayoj ke, ¿keniuj tikmatij ke Jiova kichiuas tein motenkaua? Porin yejuatsin nochipa kichiua tein kijtoua. Miak taman kichiua maj timochiakan uan maj titakuaujtamatikan iuan Jiova (Sal. 27:14). Tiknextiaj ke tikchiuaj nejin keman amo tiyolijsiuij uan tiyolpakij keman tikchiaj maj Dios kichiua tein motenkauak (Is. 55:​10, 11). Maj amo keman tikauakan Jiova uan maj titakuaujtamatikan ke yejuatsin kintatiochiuis akin kitemouaj kiueyichiuaskej. w22.06 20 § 1; 25 § 18

Tejuan senkis tikmatij ke Jiova kichiuas tein kiniluia maj kichiuakan itech 1 Timoteo 5:8 akin kinixyekanaj ininchankauan. Komo tikneltokaj ke Jiova techtasojta tejuan uan tochankauan, titakuaujtamatiskej ke yejuatsin techmakas tein monekis (Mat. 6:​31-33). Jiova kineki techmakas tein moneki uan techmaka semi miak. Keman kichijchiuak taltikpak, amo sayoj kichijchiuak tein ika tiyoltoskiaj, ta kichijchiuak miak taman tein kualtsin tein ika tiyolpakiskiaj (Gén. 2:9). Uan maski kemansa sayoj tikpiaskej tein ika timoixpanoltiskej nejon tonal, maj tiktasojkamatilikan Jiova porin yejuatsin techmaka (Mat. 6:11). Maj tikelnamikikan ke Jiova uelis techmakas axkan okachi ke tein tikauaj, uan satepan kichiuas maj tinemikan nochipaya (Is. 65:​21, 22). w22.06 15 § 7, 8

Tinochin moneki tiksentokaskej kuali tikixmatiskej Jiova uan tein tamachtia Biblia, amo sayoj akin yankuixtok peuak momachtiaj. Tatitanil Pablo kijkuiloj ke komo tikchiuaj tein timomachtiaj techpaleuis maj tikmatikan “toni kuali uan toni amo”. Kemej axkan miakej amo chipaujkanemij xa ouij techkisas tiktakamatiskej tein Jiova tanauatia. Sayoj ke Jesús, itechkopa “takeual takuaujtamach uan tamatkej” techmaka tamachtilis tein kisa itech Biblia. Ijkon kemej kichiuak Jesús, tejuan tikueyitalianij itokay Dios kemej kinamiki (Juan 17:​6, 26). Kemej neskayot, itech xiuit 1931 peuak tikuij tokayit itaixpantijkauan Jiova tein mokixtia itech Biblia. Ika nejon tiknextijkej ke tiknekiaj maj techixmatikan ika itokay Dios porin tikitaj ke semi moneki (Is. 43:​10-12). Uan no, itech Biblia Traducción del Nuevo Mundo oksepa kitalilianij itokay Dios kampa moneki yas. w22.07 11 § 11, 12

Kuali tanauatilmej tein ika tajtoua iTaixyekanalis Dios no poui itech tamachtilis tein melauak. Jesús kijtoj ke nejin kemej yeskia teisa tein tel patiyoj tein toktok. Kijtoj: “ITaixyekanalis Dios tein moajsi iluikak tamati kemej se teisa tein tel patiyoj tein toktoya kampa tatokaj uan tein se takat kiajsik. Nejon takat oksepa kitalpachoj, uan kemej semi yolpakia, yajki uan kinamakak nochi tein kipiaya uan kikouak nejon tal” (Mat. 13:​44, TNM). Kemej tikitaj, nejin takat amo kitemojtinemia nejon tein tel patiyoj, sayoj ke keman kiajsik, kinamakak nochi tein kipiaya para ueliskia kipias. Tejuatsin xa no semi tikonpatiuita tamachtilis tein melauak. Tikmatij ke nion teyi tein onkak itech taltikpak kipia okachi ipatiuj ke tiktekitiliskej Jiova axkan, uan tikchiaskej tinemiskej nochipaya keman taixyekantos iTaixyekanalis Dios. Amo nenkaj nochi tein tikauaj porin tiknekij kuali timouikaskej iuan Jiova uan nejon se ueyi tatiochiualis. Semi tiyolpakij tikchiuaskej nochi tein Jiova kineki (Col. 1:10). w22.08 15 § 8, 9; 17 § 12

José kimatia ke Dios kiitaya ke se ueyi tajtakol maj aksa auilnemi. Sayoj ke tanauatil “amo xiauilnemi”, Dios kinmakak israelitas hasta 200 xiujmej satepan (Éx. 20:14). Sayoj ke kemej José kimatia seki taman tein kichiujka Jiova, kipaleuij maj kimatini keniuj kiitaya auilnemilis. Kemej neskayot, kimatia ke Jiova kiixtalij maj monamiktianij se takat uan se siuat. No kimatia keniuj Jiova ojpa kipaleuij iueyinan Sara keman ome tekiuanij kinekiaj iuan motekaskej (Gén. 2:24; 12:​14-20; 20:​2-7). Keman José itech tanemilij nochi nejin, kiajsikamatik toni tein kuali uan tein amo kuali kemej Jiova kiita. Uan kemej semi kitasojtaya, senkis kiixtalij kitakamatis itanauatiluan. w22.08 26 § 1, 2

Nejin tein achtook moijtojka kijtoua ke sekin oksepa nemiskej. Sayoj ke nejin amo kiixnextia teisa uan amo no ininka tajtojtok akin yaskej iluikak itech itamian tonalmej kemej achto tikajsikamatiaj, ta ininka tajtojtok akin oksepa nemiskej itech xochital. ¿Keniuj tikmatij? Itech Job 17:16 no mokui tajtol “talnex”, uan ompa ika motajtoua “miketekoch”. Nejin kinextia ke Daniel 12:2 ika tajtojtok keman mikemej oksepa nemiskej satepan ke tamis itamian tonalmej uan keman panosya Armagedón. Keman itech Daniel 12:2 ininka tajtoua akin oksepa nemiskej, kijtoua ke sekin “nemiskej nochipaya”. ¿Toni kijtosneki nejon? Kijtosneki ke akin oksepa nemiskej uan peuas kiixmatiskej Jehová uan Jesús oso kisentokaskej kinixmatiskej uan tatakamatiskej itech mil xiujmej, nemiskej nochipaya (Juan 17:3). w22.09 21 § 6, 7

Jehová kineki maj titakuaujtamatikan iniuan tokniuan porin yejuan kinextianij ke uelis ijkon tikchiuaskej. Ijkon kemej moneki tiempo para tikinpoujkaitaskej oksekin, no moneki tiempo para titakuaujtamatiskej iniuan oksekin. ¿Toni techpaleuis maj okachi titakuaujtamatikan iniuan tokniuan? Maj kuali tikinixmatikan, maj titajtokan iniuan itech nechikolmej, maj tisentanojnotsakan, maj amo tiyolijsiuikan uan maj tikauakan maj kinextikan ox takuaujtamachmej. Keman amo semi tikixmatij aksa xa amo tiktapouiaj miak taman. Sayoj ke, ijkon kemej okachi tikixmatij okachi kuali timomachiliaj iuan uan xa tikiluiaj keniuj timomachiliaj (Luc. 16:10). Uan komo se tokniuj kichiuak teisa tein techyolkokoj, maj amo niman tikixtalikan amo iuan timouikaskejok, ta maj tikauakan maj pano tiempo. Tein kichiuas aksa maj amo techtsakuili maj titakuaujtamatikan iniuan oksekin. w22.09 4 § 7, 8

Se tokniuj tayekankej akin itokay Miqueas, kimachilij ke seki tokniuan tayekananij kichiuilijkaj tein amo kuali. Maski yejua kipanok nejon, kisentokak kinextij ke yektalnamikia uan mochikauak yolseujtos. Kitataujtiaya Jehová maj kimaka ichikaualis para taxikos. Uan no, kitemoj momachtis itech toamaixuan tein kipaleuiskia. ¿Toni techmachtia nejin? Komo tikmachiliaj ke se tokniuj techchiuilij teisa tein amo kuali maj timochikauakan tiyolseujtoskej maski amo kuali timomachiliskej. Xa kipanok teisa tein kichiuak maj kijto oso maj kichiua teisa tein techyolkokoj. Yejua ika, maj tiktapouikan Jehová keniuj timomachiliaj uan maj tiktajtanikan maj techpaleui maj tikajsikamatikan nejon tokniuj. Maj amo tiknemilikan ke kinekia techyolkokos uan maj tiktapojpoluikan (Prov. 19:11). Maj tikelnamikikan ke Jehová kiita nochi tein panoua uan ke techmakas chikaualis para titaxikoskej (Ecl. 5:8). w22.11 21 § 5

Xiktemo timouikas iniuan akin kitasojtaj Jiova. Akin kuali iniuan timouika mitspaleuiskej kuali xiktekitili Jiova (Prov. 13:20). Se tokniuj takat akin itokay Julien akin axkan tayekankej, kijtoua: “Keman katka nitelpoch nikinajsik akin kuali iniuan nimouikas keman nitanojnotsaya iniuan, yejuan semi yolpakiaj uan nechpaleuijkej maj nikita ke uelis semi teyolpaktis se tanojnotsas. [...] Sayoj ke satepan nikitak ke kemej sayoj nimouikaya iniuan akin nouampoyuan, amo nimouikaya iniuan oksekin akin ueliskia semi nechpaleuiskej”. Komo tikita ke aksa itech nechikol amo mitspaleuis kuali ximouika iuan Jiova, ¿toni uelis tikchiuas? Itech yekinika siglo, tatitanil Pablo kimatia ke itech nechikol amo nochin kichiuayaj tein Cristo tamachtij. Yejua ika kiluij Timoteo maj kuali kinixpejpenani akin iniuan mouikaskia (2 Tim. 2:​20-22). Miak xiujmejya timochikauanij timotokiskej iuan Jiova, yejua ika amo tiknekij maj nion teyi kichiua maj amo kuali timouikakanok iuan. w22.08 5, 6 § 13-15

Tejuan amo tikchiuaj kemej akin kiixtopeuaj itanauatiluan Dios, ta tikpatiuitaj kemej tanemilia uan nochi itanauatiluan. Uelis okachi tikpatiuitaskej komo tikitaj tein panoua keman aksa tatakamati uan keman amo. Maj itech titanemilikan nochi kuejmolmej tein kipiaj akin amo kinekij kichiuaskej tein Jehová tanauatia. Uan maj tiknemilikan keniuj tejuan kuali tinemij porin tiktakamatij Dios (Sal. 32:​8, 10). Jehová kineki maj nochin kikakikan tein tayolmajxitia, sayoj ke amo akin kichikaujkauia maj kichiua. Maski ijkon, kemaj kijtoua tein kinpanos akin amo kikakiskej (Prov. 1:​29-32). Yejuan kinpanos tein amo kuali ika tein kichiuaj. Tein kiixpejpenaj kichiuas maj motekipachokan uan maj kipiakan kuejmolmej, uan satepan ixpoliuiskej. Sayoj ke Jehová kiniluia nejin akin kikakij tein yejuatsin tayolmajxitia uan kichiuaj: “Akin nechkaki yolseujkanemis uan amo kinemilijtos ke kipanos tein amo kuali” (Prov. 1:33). w22.10 21 § 11-13

Tikmojkatokaskej Jehová kijtosneki semi tikpoujkaitaskej uan amo tiknekiskej tikchiuaskej teisa tein amo kiuelita (Prov. 16:6). Yejua ika, timochikauaj tiktakamatiskej tein moijtoua itech Biblia. Ompa Jehová kijtoua toni tein kuali uan tein amo kuali (2 Cor. 7:1). Komo tikchiuaj tein yejuatsin kiyolpaktia uan tikixtopeuaj tein kitauelita, okachi tiyolpakiskej (Sal. 37:27; 97:10; Rom. 12:9). Aksa xa kimattok ke Jehová kinamiki kiixtalis toni tein kuali uan tein amo kuali. Sayoj ke amo sayoj moneki kimatis nejon, ta no moneki kitakamatis itanauatiluan (Rom. 12:2). No ijkon, tein tikchiuaj kinextis ox yekmelauj tikitaj ke tein Jehová technauatia yejua tein okachi kuali (Prov. 12:28). David ijkon kiitaya, porin kiluij Jehová: “Tinechixmatiltia ojti tein teajxitia kampa se nemi. Moixpan semi se yolpaki; moyekmakopa onkas yolpakilis nochipaya” (Sal. 16:11). w22.10 8 § 9, 10

Jesús moitaya kemej monekia uan amo moueyimatik. Achto ke ualaskia nikan taltikpak, kichiuak miak taman tein ika kitekitilij Jiova. Colosenses 1:​16, itech Traducción del Nuevo Mundo kijtoua ke “itechkopa, Dios kichijchiuak nochi okseki taman ne iluikak uan nikan taltikpak”. Keman Jesús moauij, xa kielnamikik seki taman tein kichiujka iluikak iuan iTajtsin (Mat. 3:16; Juan 17:5). Sayoj ke maski kielnamikik nochi nejon, amo moueyimatik. Uan amo keman kinextij ke okachi ueyichiujkej katka ke oksekin. Jesús kiniluij imomachtijkauan: “Amo niuala para ma aksame nechtekitilikan. Ta, niuala sayo para ma nitetekitilis, uan para ma niktemakas nonemilis para nikixtauas in tajtakol, uan para nikinmakixtis nijin taltikpakuani” (Mat. 20:28). Jesús kijtoj ke tein kichiuaya amo iselti kinemiliaya. ¡Jesús amo moueyimatia! ¿Melauj ke tiknekij tikchiuaskej kemej yejua? w22.05 24 § 13

Keman Jiova kiita ox aksa kitapojpoluis, yejuatsin kiita ox akin tajtakolchiuak kimattoya ke amo kuali tein kichiujtoya. Yejua nejon tein kijtoj Jesús itech Lucas 12:​47, 48. Keman aksa kiixtalia kichiuas teisa tein kimattok ke amo kuali yetok, ueyi tajtakoua. Uan nejon uelis kichiuas maj Jiova amo kitapojpolui (Mar. 3:29; Juan 9:41). Komo ijkon techpanoua, ¿uelis techtapojpoluis Jiova? Kemaj, porin Jiova kiita ox akin tajtakolchiua yekmelauj moyolnonotsa. Se moyolnonotsas kijtosneki se kipatas kemej se tanemilia uan tein se kichiua. Uan no, akin moyolnonotsa semi motayokoltia porin kichiuak tein amo kuali oso porin amo kichiuak tein monekia. Amo sayoj amo kuali momachilia ika tein kichiuak, ta no porin amo kuali mouikayaok iuan Jiova uan yejua ika tajtakolchiuak. w22.06 5, 6 § 15-17

Akin techtauelitaj kintakajkayauiliaj tokniuan akin techixyekanaj (Sal. 31:13). Seki tokniuan kintsakuanij uan kinteluilianij ke kichiujkej tein amo kuali. Itech yekinika siglo no ijkon panok. Tatitanil Pablo kitakajkayauilijkej uan kitsakkej. Keman Pablo tsaktoya Roma, seki tokniuan kikaujkej (2 Tim. 1:​8, 15; 2:​8, 9). Xikonnemili keniuj Pablo xa semi amo kuali momachilij. Yejua uejkauak taxikojkaya uan semi kinpaleuijka nejin tokniuan maski ueliskia kimiktiskej (Hech. 20:​18-21; 2 Cor. 1:8). Maj amo keman tikchiuakan kemej nejon tokniuan akin kikaujkej Pablo. Yejua ika amo moneki tikmojkaitaskej maj kintajyouiltikan tokniuan akin techixyekanaj. Satanás kineki maj yejuan kikauakan Jehová uan maj tejuan timomoujtikan (1 Ped. 5:8). Xikonsentoka xikonpaleui tokniuan uan amo xikonkaua (2 Tim. 1:​16-18). w22.11 16, 17 § 8-11

Nejon tachtekkej akin moyolpatak uan pilkatoya inakastan Jesús xa katka judío. Judíos kiueyichiuayaj sayoj se Dios, sayoj ke akin okseko kayomej katkaj kinueyichiuayaj miakej dioses (Éx. 20:​2, 3; 1 Cor. 8:​5, 6). Komo nejin tachtekinij amo yeskiaj judíos, kemej kijtoua tajkuilol tein axkan timomachtiaj takat tajtaniskia nejin: “¿Nion tepitsin tikinmojkatoka dioses?”. Uan no, kemej Jesús kiualtitankej maj kinpaleui “sayoj israelitas, akin kemej yeskia ichkamej tein poliujtokej”, amo semi kinnojnotsaya akin okseko kayomej katkaj (Mat. 15:24). Uan Dios kiniluijka israelitas ke kichiuaskia maj mikemej oksepa nemikan. Tachtekkej akin moyolpataka xa kimatia nejin, uan ika tein kijtoj kinextij ke kineltokaya ke Jehová kichiuaskia maj Jesús oksepa nemi para taixyekanas itech iTaixyekanalis Dios. Nesi ke nejin takat no kichiaya maj Dios kichiuani maj oksepa nemi. Komo nejon tachtekkej katka judío, kimatia ke Jehová kichijchiujka se xochital uan kichiujka maj Adán uan Eva ompa nemikan. Yejua ika keman Jesús ika tajtoj xochital, takat xa itech tanemilij ke nikan taltikpak yeskia semi takualtsinkan (Gén. 2:15). w22.12 8, 9 § 2, 3

Tejuan amo no ueliskia titanojnotsaskej komo amo techpaleuiskia ichikaualis Dios. ¿Keyej? Porin Satanás semi techixnamiki uan amo kineki maj titanojnotsakan (Apoc. 12:17). Miakej kinemiliaj ke Satanás tel chikauak uan amo uelis tiktaniskej. Sayoj ke nejon amo melauak porin keman titanojnotsaj tiktanij (Apoc. 12:​9-11). Keman titanojnotsaj tiknextiaj ke Satanás amo techmojmoujtia uan senkis tikixnamikij. Yejua ika, tiknextiaj ke ichikaualis Dios techpaleuia uan ke Jehová kiyolpaktia tein tikchiuaj (Mat. 5:​10-12; 1 Ped. 4:14). Techmachtia ke ichikaualis Dios techpaleuis maj tikixnamikikan tein yeski ouijkayot tein tikpiaskej keman titanojnotsaskej (2 Cor. 4:​7-9). Yejua ika, ¿toni uelis tikchiuaskej para tiksentokaskej tikseliskej ichikaualis Dios? Maj tiksentokakan tiktataujtikan maj techmaka uan maj titakuaujtamatikan ke yejuatsin techkakis. w22.11 5 § 10, 11

Tiknextiaj ke tikintasojtaj tokniuan komo timochikauaj kuali iniuan timouikaskej. Timochikauaj titetapojpoluiskej kemej Jehová kichiua. Maj titanemilikan itech nejin: komo Jehová kikauak maj iKonetsin momikiliani para kiixtauas totajtakoluan, ¿amo monekiskia niman tikintapojpoluiskej tokniuan keman techyolkokouaj? Amo tiknekij tikchiuaskej kemej takeual amo yolkuali akin ika tajtoj Jesús. Iteko kitapojpoluij semi miak tomin tein kitauikiliaya, uan nejin takeual amo kinekik kitapojpoluis itakeualikniuj akin amo miak tomin kitauikiliaya (Mat. 18:​23-35). Yejua ika, komo tejuatsin tionmokualantij iuan se tokniuj, ¿ueliskia tikontemos tikonmelauas kuejmol achto ke timosentiliskej para tikelnamikiskej imikilis Cristo? (Mat. 5:​23, 24). Komo ijkon tikonchiua tikonnextis ke semi tikontasojta Jehová uan Jesús. w23.01 29 § 8, 9

Tayekananij uelis kinpaleuiskej tokniuan komo amo kintajtaniaj teisa tein uelis kinpinaujtis (Prov. 20:5). ¿Kipiaj tein ika moixpanoltiskej oso tein ika mopajtiskej? ¿Ueliskia kipoloskej inintekiuj oso ininchan? ¿Moneki maj tikinpaleuikan para maj no kiselikan tein tekiuaj ika tapaleuia? Sayoj ke Jehová kineki maj tinochin tikinyolchikauakan uan maj tikinpaleuikan oksekin (Gál. 6:10). Keman tiknextiaj ke tiktasojtaj aksa akin mokokoua, maski amo tikchiuaskej teisa tein ueyi, uelis semi kiyolchikauas. Konemej uelis kijkuiloskej se tarjeta oso kichijchiuaskej se dibujo uan kimakaskej se tokniuj. Oso sekin uelis kitakualchiuiskej aksa akin mokokoua uan kikauilitiuij ichan. Seki tokniuan kinijkuilouiliaj tayekananij teisa tein ika kintasojkamatiliaj tein kichiuaj, porin keman onkak se ueyi kokolis okachi kipiaj tekit. Semi kuali maj tinochin timochikauakan tikchiuaskej tein kijtoua nejin texto: “Xiksentokakan ximoyolchikauakan uan ximopaleuijtiakan se iuan okse” (1 Tes. 5:11). w22.12 22 § 2; 23 § 5, 6

Maski saduceos kuali kiixmatiaj yekinika makuil amatajkuilolmej tein kipia Escrituras Hebreas, amo kitakamatiaj tamachtilismej tein okachi monekiaj tein Dios kichiujka maj moijkuilo. Xikonnemili tein Jesús kinnankilij saduceos keman kitajtanijkej ox oksepa nemiskiaj mikemej keman kinekiaj kiixnamikiskej. Yejua kintajtanij: “¿Amo nankiitakej itech iamatajkuilol Moisés tein Dios kiluij itech kouit tein uitsyoj: ‘Nejua niiDios Abrahán, niiDios Isaac uan niiDios Jacob’?”. Xa saduceos miakpa kixtajtoltijkaj nejon tamachtilis, sayoj ke tein Jesús kintajtanij kinextij ke amo kinekiaj kineltokaskej tein iTajtol Dios tamachtia: ke mikemej oksepa nemiskej (Luc. 20:38). ¿Toni techmachtia tein ika monojnotskej? Ke keman tikixtajtoltiaj Biblia, moneki kuali tikitaskej toni techmachtia se versículo oso se taman tein panok. Amo sayoj moneki maj tikajsikamatikan tein amo ouij, ta no maj tikajsikamatikan tamachtilismej uan tayolmajxitilismej tein techpaleuiskej, nejin kemej yeskia teisa tein kitelpia ipatiuj porin amo niman se kiajsi. w23.02 11 § 9, 10

Nochin itaixpantijkauan Jiova tein ika tajtoua tajkuilol tein axkan timomachtiaj kipanokej uejueyi ouijkayomej, amo keman kikaujkej Jiova (Heb. 11:​36-40). ¿Tapaleuij tein kichiujkej? Kemaj. Maski amo kiitakej maj mochiua nochi tein Jiova motenkaujka, kisentokakej iuan takuaujtamatkej. Kemej senkis kimatiaj ke kiyolpaktiayaj Jiova, kineltokayaj ke kiitaskiaj keman Jiova kichiuaskia tein motenkaujka (Heb. 11:​4, 5). Keman itech titanemiliaj tein kichiujkej, techpaleuia maj nochipa titakuaujtamatikan iuan Jiova. Axkan okachi mochiua tein amo kuali (2 Tim. 3:13). Uan Satanás kisentoka kitemoua maj tikauakan Jiova. Maski satepan tikpanoskej ouijkayomej, maj tiksentokakan tiktekitilikan Jiova ika nochi toyolo, porin tikmatij ke titakuaujtamatij iuan se Dios akin nochipa yoltok (1 Tim. 4:10). w22.06 25 § 17, 18

Se taman tein kichiua maj tiknekikan tipaktoskej yejua porin tiknekij okachi kuali tiktekitiliskej Jehová (Mar. 12:30). Amo tikchiuaj nion teyi tein tikmatij ke uelis techkokolispeualtis (Rom. 12:1). Sayoj ke, tikmatij ke se tonal ipa tikokolispeuaskej maski timoyekpiaskej. Maski ijkon, nochipa timoyekpiaj porin tiknekij tipaktoskej para maj toTajtsin kiita ke tikpatiuitaj tonemilis tein techmakani. Komo tixiuejkejya oso timokokouaj, xa amo ueliok tikchiuaj miak taman tein achto tikchiuayaj, uan nejon xa kichiua maj amo kuali timomachilikan uan maj timotayokoltikan. Maski ijkon, moneki tiksentokaskej timoyekpiaskej para amo tikokolispeuaskej. ¿Keyej? Porin maski tixiuejkejya oso timokokouaj uelis tikueyichiuaskejok Jehová, ijkon kemej tekiuaj David. ¡Uan semi techyolseuia maj toDios techtasojta uan techpatiuita maski titajtakolejkej! (Mat. 10:​29-31). Tein melauj, kinextia ke semi techpatiuita porin motenkaua ke komo timomikiliaj, oksepa kichiuas maj tinemikan (Job 14:​14, 15). Uan semi kuali komo tikchiuaj tein techpaleuis maj tipaktokan uan maj tiyoltokan. w23.02 20, 21 § 3-5

¿Ijkuiliujtokya inintokay itech amatajkuilol kampa ixnesij akin nemiskej? Kemaj. ¿Kisentokas ijkuiliujtos inintokay satepan ke panos Armagedón? Kemaj (Apoc. 7:14). Jesús kijtoj ke yejuan, akin kemej yeskia ichkamej, “nemiskej nochipaya” (Mat. 25:46). Sayoj ke akin makisaskej itech Armagedón amo niman moixtalis ox nemiskej nochipaya. Keman Jesús taixyekantos Mil Xiujmej, “kinajxitis kampa mextok at tein kichiua maj se nemi”. Akin kitakamatiskej Cristo uan amo keman kikauaskej Jehová, amo ixpoliuisok inintokay itech amatajkuilol kampa ixnesij akin nemiskej (Apoc. 7:​16, 17). Sayoj ke, akin kemej yeskiaj chivos ixpoliuiskej itech Armagedón. Jesús kijtoj ke “ixpoliuiskej uan amo kemanok nesiskej” (Mat. 25:46). Uan tatitanil Pablo no kijtoj ke kintatsakuiltiskej, “ixpoliuiskej uan amo kemanok nesiskej” (2 Tes. 1:9; 2 Ped. 2:9). w22.09 16 § 7, 8

Tein Jehová kichijchiuak ueli kinpaleuia kalyetonij maj kuali momachilikan, maj moixpetanikan uan maj okachi kuali mouikakan. Jehová kichijchiuak kampa takualtsinkan para uelis tikchiuaskej tein tikuelitaj. Miakej kalyetonij kiuelitaj moixpetanitiuij koujtaj, itech se tepet oso ueyiat. Itech yankuik taltikpak, tetatmej uan konemej semi yolpakiskej ika tein Jehová kichijchiuak. Amo tikinmouiliskejok tapialmej nion yejuan techmouiliskej (Is. 11:​6-9). Tikpiaskej miak tiempo para tiyolpakiskej ika tein Jehová kichijchiuak (Sal. 22:26). Tetatmej, amo ximochiakan hasta maj ejko nejon tonal para nankinpaleuiskej namokoneuan maj kiitakan tein Dios kichijchiuak. Komo desde axkan ika nankinmachtiaj keniuj tamati yejuatsin, xa momachiliskej kemej tekiuaj David, akin kijtoj: “Amo akin kemej tejua, Jehová, uan amo akin tachijchiuani kemej tejua” (Sal. 86:8). w23.03 25 § 16, 17