Septiembre

Ika ichikaualis Dios, Jesús kiixpolos nochi ouijkayomej tein tikpiaj. Onkakej ouijkayomej tein tejuan amo keman uelis tikixpoloskej. Sayoj ke ika milagros tein kichiuak Jesús, kinextij ke yejua kemaj ueli. Kipia chikaualis para kiixpolos nochi tein kichiua maj tikokolispeuakan uan maj timomikilikan: kemej tajtajkol tein techpanoltilijkej (Mat. 9:​1-6; Rom. 5:​12, 18, 19). Milagros tein kichiuak kinextia ke yejua ueli ‘kinpajtia nochin akin kipiaj tataman kokolis’ uan hasta ueli kichiua maj oksepa nemikan akin momikilijkejya (Mat. 4:23; Juan 11:​43, 44). No ueli kitamatilia chikaujkaejekat uan kintani amokuali ejekamej (Mar. 4:​37-39; Luc. 8:2). ¿Melauj ke semi techyolseuia tikmatiskej ke Jehová kichiuak maj iKonetsin semi chikauak? Tein kichiuas iTaixyekanalis Dios. Milagros tein Jesús kichiuak keman yetoya nikan taltikpak, sayoj tepitsin kinextij nochi tein kichiuas keman yeski Tekiuaj itech iTaixyekanalis Dios. w23.04 3 § 5-7

Komo itech monechikol onkakej miakej tanojnotsanij uan tikonmachilia ke miakpa amo ueli tiontanankilia, amo xionmosenkaua. Kuali xionmomachti. Ijkon, komo amo ueli tiontanankilia itech yekinika párrafos, uelis tiontanankilis itech párrafos tein kisentoka. Keman tionmomachtis amaix Tanejmachtijkej, xikonita keniuj sejse párrafo kimelaua itokay tamachtilis, ijkon nochipa tikonmatis toni tiontanankilis. No uelis tionmomachtis párrafos kampa ika tajtouaj tamachtilismej tein ouijkej. Kemej okachi ouij se kimelauas nejon párrafos, amo miakej momaajokuij. Sayoj ke, ¿toni uelis tikonchiuas komo kisentoka amo ueli tiontanankilia? Uelis tikoniluis tokniuj akin kiixyekana tamachtilis itech katiyejua párrafo tikonuelitaskia tiontanankilis. w23.04 21, 22 § 9, 10

José mokauaya maj Jehová kiixyekana uan nejon kipaleuiaya maj mochiua okachi kuali tetakauj. Kemej expa Jehová kinauatij toni monekia kichiuas para kinyekpias ichankauan. Uan niman kichiuak maski ouij kikisak (Mat. 1:20; 2:​13-15, 19-21). Kemej kitakamatik Jehová, José uelik kiyekpiak María para maj amo teyi kipanouani. Xa nejon kichiuak maj María okachi kitasojtani uan maj kipoujkaitani. Namejuan tetakauan, no uelis nankichiuaskej kemej José uan nankitemoskej tayolmajxitilismej itech Biblia tein namechpaleuis xikinyekpiakan namochankauan. Komo nankichiuaj nejin maski monekis nankipataskej seki taman, nankinextiskej ke nankitasojtaj namosiuatsin uan okachi kuali namouikaskej. Se tokniuj siuat akin kayot Vanuatu uan panoua 20 xiujmejya ke monamiktij, kijtoua: “Keman nikita ke notakatsin kitemoua maj kiixyekana Jehová uan kichiua tein yejuatsin tanauatia, okachi nikpoujkaita. Kuali nimomachilia uan nitakuaujtamati itech tein kiixtalia kichiuas”. w23.05 21 § 5

Judíos akin mokepaskiaj monekiaj yeskij “se xolal chipauak” iixpan ininDios (Deut. 7:6). Sayoj ke amo nochin akin kisayaj de Babilonia kichiujtoyaj tein kuali, uan monekia mopataskej para kiyolpaktiskej Jehová. Miakej judíos yolkaj ompa Babilonia, uan nesi ke no peuak tanemiliaj uan nemiaj ijkon kemej babilonios. 69 xiujmej satepan ke judíos mokepkej Israel, tekiuaj Nehemías semi kimoujkaitak maj ininkoneuan nejon judíos amo tajtouanij hebreo (Deut. 6:​6, 7; Neh. 13:​23, 24). ¿Keniuj kitasojtaskiaj Jehová uan kiueyichiuaskiaj komo amo kiajsikamatiaj tajtol hebreo tein ika moijkuiloj iTajtol Dios? (Esd. 10:​3, 44). Yejua ika judíos monekia kipataskej miak taman, sayoj ke okachi amo ouij kinkisaskia keman yetoskiaj Israel, kampa oksepa kiueyichiujtoyaj Jehová kemej yejuatsin kiyolpaktiaya (Neh. 8:​8, 9). w23.05 15 § 6, 7

Tein melauj, maski tiknejnekiskej tikchiuaskej tein tikixtalijkej, uelis panos teisa tein techtsakuilis. Xa techpanos ‘tein amo tikchiaj’ yejua ika amo tikpiaskejok tiempo para tikchiuaskej tein tikixtalijkaj (Ecl. 9:11). Oso tikpiaskej ouijkayomej uan amo tiknekiskejok tikchiuaskej tein tikixtalijkaj uan amo tiueliskejok (Prov. 24:10). Uan no, kemej titajtakolejkej timopolouaj, uan nejon xa uelis kichiuas maj okachi ouij techkisa tikchiuaskej tein tikixtalijkej (Rom. 7:23). Oso xa sayoj tisioujtokej (Mat. 26:43). ¿Toni techpaleuis maj amo timosenkauakan? Xikonelnamiki ke komo ayamo tikonchiua teisa, amo kijtosneki ke amo tionuelisok. Biblia kijtoua ke xa ipa tikpanoskej miak taman ouijkayomej. Sayoj ke no techiluia maj tiuelikan tikchiuakan tein tikixtalijtokej. Keman tiksentokaj tikchiuaj tein tikixtalijkej maski tikpiaj ouijkayomej, tiknextiliaj Jehová ke tiknekij tikyolpaktiskej. Yejuatsin semi yolpaki keman mitsonita ke tionmochikaua tikonchiuas tein tikonixtalijtok. w23.05 30 § 14, 15

Komo timochiua precursor, tikmatis keniuj titekitis iniuan miakej akin tatamamej uan no tikmatis tikuis motomin (Filip. 4:​11-13). Nejon kinpaleuiani miakej maj mochiuakan precursores regulares. Keman tikchiuasya nejon tekit mitspaleuis maj mitsmakakan okseki tekimej, xa satepan uelis titapaleuis maj mochijchiuakan kalmej kampa titaueyichiuaj oso xitekiti Betel. Nochin tokniuan takamej moneki motekitiliskej para mochiuaskej tayekananij itech nechikol. Biblia kijtoua ke tokniuj takat akin kineki kinpaleuis tokniuan itech nechikol “kineki kichiuas se kuali tekit” (1 Tim. 3:1). Achto moneki yeski tapaleuijkej. Tapaleuianij itech nechikol semi kinpaleuiaj tayekananij maj kinyekpiakan tokniuan. Tayekananij uan tapaleuianij semi yolyemankej uan yolpakij keman tanojnotsaj. w23.12 28 § 14-16

Keman tekiuaj Josías kipiaya 16 xiujmej peuak kitemoua Jehová. Kinekia okachi kiixmatis Jehová uan kiyolpaktis. Sayoj ke Josías semi ouij kikisaya yeski tekiuaj porin itech nejon tonalmej miakej kinueyichiuayaj tatadiosmej. Yejua ika monekik moyolchikauas para kintakaualtis maj amo kinueyichiuanijok. ¡Uan tel kuali kichiuak! Ayamo kipiaya 20 xiujmej keman itech nochi altepet peuak kinajchiua nochi tatadiosmej uan tein ika kinueyichiuayaj (2 Crón. 34:​1, 2). Maski semi titelpoch, uelis tikixtalis tikchiuas kemej Josías komo tiktemoua Jehová uan timomachtia toni kualtsitsin taman kinextia. Nejon kichiuas iuan ximotemakti. ¿Uan keniuj mitspaleuis komo iuan timotemaktia? Luke, akin moauij keman kipiaya 14 xiujmej, kijtoj: “Desde axkan niktayekanaltis niktekitilis Jehová, uan nimochikauas nikyolpaktis” (Mar. 12:30). Jehová semi mitstatiochiuis komo no ijkon tikchiua. w23.09 11 § 12, 13

Keman tatitanil Pablo kintajkuilouilij tokniuan de Tesalónica, ayamo kiajxitiaya nion se xiuit ke mochiujka nejon nechikol. Xa tokniuan tayekananij ayamo kimatiaj miak taman uan mopolouayaj, sayoj ke monekia kinpoujkaitaskej. Ijkon kemej motokijtiuj tonal keman mochiuas tetsaujkatajyouilis, xa monekis maj okachi timokauakan maj techixyekanakan tayekananij itech nechikol, porin xa amo uelis titanotsaskejok itech ueyi kali kampa techixyekanaj uan Betel, uan amo uelisok techixyekanaskej. Yejua ika, axkan moneki maj tikintasojtakan uan tikinpoujkaitakan tayekananij itech nechikol. Maski tein yeski panos, maj amo tikitakan keman mopolouaj, ta tein kuali tein kichiuaj, uan maj amo tikelkauakan ke Jehová kikaua maj Cristo kinixyekana nejin takamej akin amo kikauaj. Ijkon kemej teposkuatsakuiloni kiyekpiaya itsontekon soldado, keman tiknemiliaj keniuj Dios techmakixtis no techpaleuia maj kuali titanemilikan. Tejuan tikitaj ke nochi tein onkak nikan taltikpak nion tepitsin techpaleuia (Filip. 3:8). No techpaleuia maj tiyolseujtokan uan maj kuali tietokan. w23.06 11, 12 § 11, 12

Nochin akin kitenkakij “siuat akin amo tanemilia” moneki kiixtaliskej ox kiseliskej keman kinyoleua oso amo. Onkak miak taman tein kinextia keyej amo moneki tiauilnemiskej. Amatajkuilol Proverbios, kimelaua ke “siuat akin amo tanemilia” kijtoua: “Timokuilis teisa tein amo moaxka kemej yeskia titayiskia tsopekat” (Prov. 9:17). ¿Toni kijtosneki “timokuilis [...] tein amo moaxka”? Biblia kijtoua ke keman se takat uan se siuat akin monamiktijkejya yolpakij keman mosentekaj, kemej yeskia tayiskiaj at tein teamikseuia (Prov. 5:​15-18). Takat uan siuat akin monamiktijkejya ininixpan tekiuanij uelis yolpakiskej keman mosentekaskej kemej kinamiki. Sayoj ke semi taman keman se mokuilia teisa tein amo se iaxka, nejin xa kijtosneki auilnemilis. Miakpa, akin auilnemij ichtaka kichiuaj para maj oksekin amo kimatikan, ijkon kemej se tachtekkej akin ichtaka kineki mokuilis tein amo iaxka. Akin ‘mokuiliaj tein amo ininaxka’ uelis kimachiliskej kemej yeskia tayitoskiaj tsopekat porin kinemiliaj ke amo akin kinmatilis tein kichiujtokej. Sayoj ke mokajkayaujtokej, Jehová kiita tein kichiuaj uan amo ueli kikajkayauaj. Amo se mouikasok iuan Jehová amo se kimachilia ke tsopek, ta chichik (1 Cor. 6:​9, 10). w23.06 22 § 7, 9

¿Toni uelis tikonchiuas komo tikonita ke tein tikoniluia Jehová amo yejua tein tikonmachilia oso ke amo semi mitsonyolpaktiaok tiontanojnotsas? Amo xikonnemili ke Jehová amo mitsonpaleuijtok. Kemej titajtakolejkej, kemansa uelis amo semiok tiknekiskej titekitiskej kemej achto. Komo tikonita ke amo semi tionyolpakiok, itech xiontanemili tein kichiuak tatitanil Pablo. Maski semi mochikauaya kichiuas kemej Jesús, kimatia ke kemansa amo semi kinekiskia kichiuas tein kuali. Pablo kiixtalijkaya nochipa kitekitilis Jehová maski kemansa amo kuali momachiliaya. Amo xikonixtali tikonchiuas teisa keman amo kuali tionmomachilijtos. Xikonixtali tikonchiuas tein kuali hasta keman amo tikonnekis tikonchiuas. Komo tikonsentoka tikonchiua tein kuali, satepan uelis mopatas tein tikonmachilia (1 Cor. 9:16). w24.03 11, 12 § 12, 13

Tejuan no uelis tikinnextiliskej ke tikintasojtaj tokniuan keman kuali tikinseliskej uan kuali timouikaskej iniuan. Ijkon yejuan no kuali mouikaskej touan (2 Cor. 6:​11-13). Kampa timonechikouaj moajsij tokniuan akin semi tatamamej uan tataman tein kinpanouani. ¿Toni techpaleuis maj okachi tikintasojtakan? Komo tikitaj tein kuali tein kichiuaj. ¿Keniuj uelis tiknextiskej ke tikintasojtaj tokniuan? Maj timochikauakan tikinitaskej kemej Jehová kinita. Keman mochiuas tetsaujkatajyouilis, semi monekis maj tikintasojtakan tokniuan. ¿Keniuj techpaleuis Jehová keman peuas tetsaujkatajyouilis? Maj tiknemilikan toni Jehová kinnauatijka israelitas para ueliskiaj makisaskej keman kiixnamikiskiaj altepet Babilonia: “Xikalaki, noxolal, itech mocuartos tein moajsij taijtik uan ximotatsakui. Ximotati tepitsin hasta maj pano kualanyot” (Is. 26:20). Tejuan xa no monekis tiktakamatiskej nejin tanauatil keman mochiujtos tetsaujkatajyouilis. w23.07 6, 7 § 14-16

Maj timotajtanikan: “¿Kiitaj oksekin ke nikinajsikamati uan nikpoujkaita tein kinemiliaj? ¿Oso nechixmatij ke amo niteajsikamati uan ke sayoj nikneki maj mochiua tein nejua niknemilia? ¿Nochipa niktemoua maj kichiuakan teisa kemej nejua niknemilia ke kuali yetok?. Komo okachi titeajsikamatij okachi tikchiujtoskej kemej Jehová uan Jesús. Moneki maj tikajsikamatikan keman mopatas kemej tinemij. Tein mopatas uelis kichiuas maj amo tikmatikan toni tikchiuaskej. Xa keman tikokoxkakuij, amo tikpiajok tomin, oso tekiuanij kichiuaj maj titajyouikan (Ecl. 9:11). Xa no ouij techkisas komo inechikol Jehová techiluia maj titapaleuitij okseko oso maj tikchiuakan okse taman tekit. Uelis titaxikoskej komo tikchiuaj nejin naui taman: 1) maj tikajsikamatikan ke mopatak kemej tinemiaj, 2) maj tiknemilikan toni tikchiuaskej axkan uan amo tein achto tikchiuayaj, 3) maj tiknemilikan tein tikseliskej uan 4) maj tikinpaleuikan oksekin. w23.07 21, 22 § 7, 8

Tanauatijkej Daniel katka telpochok keman tateuianij babilonios kiuikakej Babilonia uejka de Jerusalén. Sayoj ke maski katka telpoch uejueyi chiuanimej babilonios kimojkaitayaj. Yejuan ‘kiitayaj tein nesia ininixpan’: ‘se telpoch akin kuali paktok uan kuakualtsin’ akin ichankauan kintelixmatiaj (1 Sam. 16:7). Yejua ika kimachtijkej para maj tekiti kampa nemia tekiuaj (Dan. 1:​3, 4, 6). Jehová kitasojtaya Daniel porin kiixtalijka kichiuas tein kuali. Uan tikmatij nejin porin keman Daniel kipiaya kemej 20 xiujmej Jehová kijtoj ke tamatia kemej Noé uan Job. Yejua ika Jehová kiitaya ke katka semi yolmelauak kemej yejuan, akin nochipa kitekitilijkej uan amo keman kikaujkej (Gén. 5:32; 6:​9, 10; Job 42:​16, 17; Ezeq. 14:14). Daniel nemik miak xiujmej, kipanok miak taman tein kuali uan Jehová nochipa kitasojtak (Dan. 10:​11, 19). w23.08 2 § 1, 2

Keman tikonneki tionmokouilis se motocicleta, xa achto ke tikonixtauaskia kuali tikonitaskia ox amo uejueliujtok. No ijkon moneki tikchiuaskej keman tikixtajtoltiaj uan timomachtiaj Biblia. Komo ijsiujka tikixtajtoltiaj sayoj timomachtiskej tein amo ouij, ‘tein yekinika timomachtijkej itech itajtol Dios’ (Heb. 5:12). Ijkon kemej kuali tikonita maj kualtia motor uan nochi tein kipia motocicleta, no ijkon moneki kuali tionmomachtis tein kijtoua Biblia para tikonajsikamatis keniuj nochi tein kijtoua sayoj ika tajtoua se taman. Amo moneki sayoj tikmatiskej toni tikneltokaj, ta no moneki tikmatiskej keyej. Para tikajsikamatiskej tein ika tajtoua Biblia, seki taman moneki okachi kuali timomachtiskej. Tatitanil Pablo kinyolchikauak nochi tokniuan maj kuali momachtikan iTajtol Dios para kiajsikamatiskej “keniuj patauak, ueyak, uejkapan uan uejkatan tamachtilis tein melauak”. Nejon kinpaleuiskia maj takuaujtamatikan uan maj kuali ‘motakitskilijtokan itech tatsineualoni, ijkon kemej inaluayo se kouit tein kuali toktok’ (Efes. 3:​14-19). Tejuan no moneki ijkon tikchiuaskej. w23.10 18 § 1-3

Biblia no ininka tajtoua miakej akin amo yolijsiujkej. Uelis mitsonpaleuis komo tionmomachtia tein kichiujkej. Kemej tein kipanok David, yejua katka semi telpoch keman kiixpejpenkej maj kinixyekanani israelitas, sayoj ke monekik mochias miak xiujmej para uelis taixyekanas. Simeón uan Ana amo keman kikaujkej Jehová keman kichixtoyaj maj ejko Mesías akin moijtojka ke ualaskia (Luc. 2:​25, 36-38). Keman tionmomachtijtos tein kichiujkej, xionmotajtani: “¿Toni kipaleuij maj amo yolijsiui? ¿Keniuj kipaleuij maj amo yolijsiui? ¿Keniuj no uelis ijkon nikchiuas?”. No semi mitsonpaleuis keman tionmomachtis tein kichiujkej akin yolijsiujkej (1 Sam. 13:​8-14). Uelis tionmotajtanis: “¿Keyej yolijsiujkej? ¿Toni tein amo kuali kinpanok porin yolijsiujkej?”. w23.08 25 § 15

Tatitanil Pedro amo kikauak maj nion teyi kitsakuiliani maj kitojtoka Jesús. Yejua kinextij ke amo tekauaya keman Jesús kijtoj se taman tein imomachtijkauan amo kiajsikamatkej (Juan 6:68). Miakej kikaujteujkej Jesús uan amo kikaujkej maj kinmelauiliani nion kitajtanijkej toni kijtosnekia tein kijtojka. Sayoj ke Pedro amo ijkon kichiuak. Yejua kijtoj ininixpan nochin ke sayoj tein tamachtiaya Jesús “kichiua maj se nemi nochipaya”. Jesús ipa kimatiaya ke Pedro uan okseki itatitaniluan kikaujteuaskiaj. Maski ijkon, Jesús kiluij Pedro ke kimattoya ke oksepa mokepaskia uan kisentokaskia kitekitiliskia Jehová (Luc. 22:​31, 32). Jesús kimatia ke kinekia kichiuas ‘tein kuali, sayoj ke inakayo tein tajtakolej, amo chikauak’ katka (Mar. 14:38). Yejua ika, maski Pedro kijtojka ke amo kiixmatia Jesús, yejua amo kinemilij ke Pedro amo mopataskiaok. Satepan ke Jesús oksepa nemik, monextij iixpan Pedro, xa keman iselti yetoya (Mar. 16:7; Luc. 24:34; 1 Cor. 15:5). Xa nejin semi kiyolchikauak Pedro porin semi kitayokoltiaya tein kichiujka. w23.09 22 § 9, 10

Jehová senkis kintapojpoluia inintajtakoluan nochin akin iuan takuaujtamatij, kinelkauilia nochi tein kichiujkej (Sal. 32:​1, 2). Yejuatsin kiita ke yolmelaujkej uan yolchipaujkej porin takuaujtamatij. Maski Abrahán, David uan okseki itekitikauan Jehová katkaj yolmelaujkej, ipa katkaj tajtakolejkej uan mopolouayaj. Sayoj ke kemej iuan takuaujtamatiaj Dios, yejuatsin kinitak ke katkaj yolchipaujkej, okachiok keman kinitaya akin amo kiueyichiuayaj (Efes. 2:12). Keman tatitanil Pablo kintajkuilouilij akin yetoyaj Roma, kijtoj ke semi moneki maj titakuaujtamatikan para kuali timouikaskej iuan Jehová. Abrahán uan David kuali mouikakej iuan Jehová porin iuan takuaujtamatiaj, uan tejuan no uelis kuali iuan timouikaskej komo titakuaujtamatij. w23.12 3 § 6, 7

Tinochin akin tiktekitiliaj Jehová ueli tikmakaj totiempo, tochikaualis uan tein tikpiaj para tikpaleuiskej iTaixyekanalis. Ueli tiknextiaj ke tikpatiuitaj tiktekitiliskej Jehová keman tikuij totiempo, tochikaualis uan tein tikpiaj. Tatitanil Pablo kijtoj seki taman tein moneki nochipa tikchiuaskej para tikueyichiuaskej Jehová (Heb. 10:​22-25). Kijtoua ke semi moneki maj tiktataujtikan Jehová, maj ika tikinnojnotsakan oksekin tein tikchiaj maj mochiua, maj timosentilikan iniuan tokniuan uan maj timosenyolchikauakan, “okachiok porin tikitaj ke motokia” itonal Jehová. Itech capítulos tein ika tami amatajkuilol Apocalipsis, iángel Jehová kijtoua: “¡Xikueyichiua Dios!”. Ojpa kijtoj para kinextis ke nejin semi moneki (Apoc. 19:10; 22:9). Maj amo keman tikelkauakan nochi tein timomachtijkej de itemplo Jehová uan ke tikpiaj se ueyi tatiochiualis maj ueli tikueyichiuakan. w23.10 29 § 17, 18

Tinochin tiknekij tiktakamatiskej nejin tanauatil: “Maj tiksentokakan timotasojtakan se iuan okse”. Sayoj ke amo moneki tikelkauaskej tein tanejmachtij Jesús: “Okachi miakej amo tetasojtaskejok” (Mat. 24:12). Jesús amo kinekia kijtos ke miakej imomachtijkauan amo motasojtaskiajok, sayoj ke kemej tinemij kampa miakej amo motasojtaj, moneki timoyekpiaskej para maj amo no ijkon tikchiuakan. Yejua ika semi moneki maj tiknankilikan nejin netajtanil: ¿keniuj uelis tikmatiskej ox tiksentokaj semi tikintasojtaj tokniuan? Tein tikchiuaj keman tikpiaj kuejmolmej, kinextis ox semi tikintasojtaj tokniuan oso amo (2 Cor. 8:8). Se taman yejua tein kijtoj tatitanil Pedro: “Okachi tayekantok semi ximotasojtakan se iuan okse, porin akin tetasojta nochipa tetapojpoluia” (1 Ped. 4:8). Yejua ika, tein tikchiuaj keman tokniuan mopolouaj oso techyolkokouaj kinextis ox yekmelauj tikintasojtaj. w23.11 10, 11 § 12, 13

Komo sayoj tikintasojtaj sekin tokniuan itech nechikol, amo tiknextijtoskiaj ke tiktakamatij Jesús keman tanauatij maj timotasojtakan. Uan tein melauj, xa ipa okachi timouikaskej iniuan okseki tokniuan, ijkon kemej kipanok Jesús iuan imomachtijkauan (Juan 13:23; 20:2). Sayoj ke Pedro techelnamiktia ke moneki ‘tikintasojtaskej nochin tokniuan kemej yeskia tiiknimej’ ijkon kemej tiktasojtaj sejse tochankauj (1 Ped. 2:17). Pedro tayolmajxitij nejin: “Semi ximotasojtakan se iuan okse ika nochi namoyolo” (1 Ped. 1:22). Keman Pedro kijtoj “semi ximotasojtakan” no kijtosneki ke moneki tikintasojtaskej hasta akin amo tikintasojtaskiaj. ¿Toni xa tikchiuaskiaj komo se tokniuj techchiuiliskia teisa tein amo kuali oso techyolkokoskia? Xa amo tiktasojtaskiaj, ta timomakepaskiaj. Sayoj ke Jesús kimachtij Pedro ke nejon amo kiyolpaktiskia Jehová (Juan 18:​10, 11). Tatitanil kijkuiloj: “Amo ximomakepakan nion xikinuijuikaltikan akin namechuijuikaltiaj, ta xikinnejnekilikan tein kuali” (1 Ped. 3:9). Komo semi tiontetasojta, yeski tionkualtakat uan tionteajsikamatis. w23.09 28, 29 § 9-11

¿Melauj ke se kimojkaita keniuj konemej niman moskaltiaj? Moita ke yejuan amo moneki kichiuaskej teisa para moskaltiskej. Sayoj ke tejuan moneki tikchiuaskej teisa komo tiknekij tikchiuaskej kemej Jesús (1 Cor. 13:11; Heb. 6:1). Para okachi kuali tiktekitiliskej Jehová moneki kuali iuan timouikaskej. No moneki maj techpaleui ichikaualis para tiknextiskej tein kuali, titekitiskej uan timomachtiskej seki taman tein techpaleuis satepan (Prov. 1:5). Jehová kichijchiuak takat uan siuat (Gén. 1:27). Takat uan siuat tataman kemej chijchiujtokej, sayoj ke no tatamamej itech okseki taman. Jehová kinmakani takamej uan siuamej tataman tekimej, uan para kichiuaskej moneki ueliskej seki taman uan kinextiskej tein kuali (Gén. 2:18). w23.12 18 § 1, 2

¿Kinekia Jesús maj itokay iTajtsin no kikuinij oksekin? Kemaj. Xa sekin taixyekananij itech taneltokalis kinemiliayaj ke kemej itokay Dios semi yektik, amo monekia kijtoskej. Sayoj ke kemej nejon tamachtilis amo ualeuaya itech iTajtol Dios, Jesús kisentokak kikuik itokay iTajtsin. Maj itech titanemilikan keman Jesús kipajtij se takat akin nemia itech tal tein pouia Gerasa, yejua kipiaya amokuali ejekamej. Miakej akin ompa nemiaj semi momoujtijkej uan kitataujtijkej Jesús maj yani okseko (Mar. 5:​16, 17). Sayoj ke Jesús kinekia maj nochin kiixmatikan itokay Jehová. Yejua ika, achto ke yas kiluij nejon takat maj kintapouiani oksekin keniuj kipaleuijka Jehová, uan amo tein yejua kichiujka (Mar. 5:19). ToTekiuaj Jesús, kineki maj no ijkon tikchiuakan, maj tikinnextilikan oksekin ke Dios monotsa Jehová (Mat. 24:14; 28:20). Keman ijkon tikchiuaj tikyolpaktiaj Jesús. w24.02 10 § 10

¡Semi kualtsin maj tipouikan itech inechikol Jehová! Maski itech nejin tonalmej okachi mochiua tein amo kuali uan ouij techkisa tiyolpakiskej, Jehová kichiua maj tokniuan techpaleuikan (Sal. 133:1). Kemej Jehová techyekana, techpaleuia maj tiyolpakikan tejuan uan tochankauan (Efes. 5:​33–6:1). No techpaleuia maj timochiuakan titamatinij para amo semi timotekipachoskej uan tiyolpakiskej. Sayoj ke moneki senkis tikixtaliskej tiksentokaskej tiktekitiliskej Jehová maski yeski ouij. ¿Keyej? Xa porin techyolxokolis tein oksekin kichiuaskej oso kijtoskej. No tiknekiskej timosenkauaskej keman timopolouaj, okachiok komo miakpa. Nejin tamachtilis techpaleuis maj tiksentokakan tiktekitilikan Jehová keman panos nejin: 1) keman se tokniuj techyolxokolis, 2) keman tosiuatsin oso totakatsin techyolxokolia uan 3) keman tiknekij timosenkauaskej porin timopolouaj. w24.03 14 § 1, 2

Kemansa tikonkakis ke seki tokniuan kiixtalijkej okachi kitekitiliskej Jehová. Xa kiselijkej Tamachtilis para akin kiteixmatiltiaj iTaixyekanalis Dios oso tapaleuitoj okseko kampa monekij tanojnotsanij. Komo tionueli, xikonixtali no ijkon tikonchiuas. Itekitikauan Jehová nochipa kitemouaj keniuj okachi kitekitiliskej Dios (Hech. 16:9). Sayoj ke, komo ayamo ueli tikonchiua, amo xikonnemili ke amo ueli tiontapaleuia kemej oksekin, porin keman tiktekitiliaj Jehová semi moneki maj se taxiko uan yejua nejon tein okachi moneki (Mat. 10:22). Amo xikonelkaua ke tikonyolpaktia Jehová keman tikonchiua nochi tein tionueli. Ijkon uelis tikonsentokas tikontojtokas Jesús satepan ke tionmoauis (Sal. 26:1). w24.03 10 § 11

ToTajtsin kijtoua ke techtapojpoluis komo timoyolpataj (Sal. 86:5). Yejua ika, komo yekmelauj timoyolpatakejya, uelis tikneltokaskej ke Jehová techtapojpoluijya. Maj tikelnamikikan ke amo keman techtajtania tein amo ueli tikmakaj. Yeski miak oso tepitsin tein ueli tikchiuaj, yejua semi kitasojkamati. No maj ininka titanemilikan akin kuali kitekitilijkej Jehová. Kemej tein kipanok Pablo. Yejua semi tekitik uan miak xiujmej uejka yajtinemik uan tapaleuij maj mochiuanij miak nechikolmej. Satepan kitsakkej, uan amo uelikok tanojnotsak kemej achto. ¿Amo kiyolpaktiayaok Jehová nejon? Kemaj kiyolpaktiaya. Pablo kisentokak kichiuak tein uelia uan Jehová kisentokak kitatiochiuij (Hech. 28:​30, 31). No ijkon tejuan amo nochipa uelis tiktekitiliskej Jehová kemej tiknekiskiaj, sayoj ke Dios kiita keyej tikchiuaj. w24.03 27 § 7, 9

Keman Jesús yetoya nikan taltikpak semi motataujtiaya, ijkon kinnextilij imomachtijkauan ke yejuan no monekia ijkon kichiuaskej. Monekik kixelos tiempo porin nochipa kichiujtoya teisa uan porin oksekin nochipa iuan yetoyaj (Mar. 6:​31, 45, 46). Kualkan meuaya para yetos iselti uan tajtos iuan iTajtsin. Uan keman monekik kiixpejpenas teisa tein motelneki kitataujtij Jehová nochi youal (Luc. 6:​12, 13). Se youak achto ke Jesús momikiliskia, miakpa kitataujtij Jehová. Kimatia ke tein yaya kichiuati yejua tein okachi ouij katka, tein ika tamiskia tekit tein kichiuako nikan taltikpak (Mat. 26:​39, 42, 44). Tein kichiuak Jesús technextilia ke maski tikpiaskej miak taman tein moneki tikchiuaskej, moneki tikxeloskej tiempo para tiktataujtiskej Jehová. Xa monekis tikixtaliskej kemanian timotataujtiskej ijkon kemej Jesús kichiuak: ueliskia timeuaskej okachi kualkan oso tikochiskej okachi youak. Ijkon tiknextiliskej Jehová ke semi timotasojkamatij maj ueli tiktataujtikan. w23.05 3 § 4, 5

Nejin versículo kiteajsikamatiltia ke Jehová semi kintasojta taijitalmej. Se amaix kijtoua ke semi kintasojta kemej at tein chikauak motaloua. ¡Tel kualtsin kemej Jehová kinextia keniuj semi kintasojta tokniuan taijitalmej! Yejuan kimatij ke ‘Dios kintasojta’ (Jud. 1). Tatitanil Juan kijtoj tein kimachiliaya keman kijkuiloj: “¡Xikitakan keniuj semi techtasojta toTajtsin Dios porin hasta techiluia ke tiikoneuan!” (1 Juan 3:1). ¿Kintasojta Jehová sayoj taijitalmej? Amo, ta kemej tikitaskej, Jehová kintasojta nochin itekitikauan. ¿Keniuj Jehová kinextiani ke semi techtasojta? Yejuatsin kitemakak iKonetsin maj toka momikili. Tein kichiuak kinextia ke sayoj yejuatsin okachi techtasojta (Juan 3:16; Rom. 5:8). w24.01 28 § 9, 10

Nejin versículo kinextia okse taman tein kichiuak David keman mouia maj kimiktikan: itech tanemilij tein Jehová kichiuaskia satepan. David kimatia ke Jehová kimakixtiskia keman monekiskia porin yejuatsin motenkaujka ke mochiuaskia tekiuaj ompa Israel (1 Sam. 16:​1, 13). David no kimatia ke ipa mochiuaskia porin Jehová motenkaujka. ¿Toni motenkauani Jehová touan? Yejuatsin amo motenkauani ke axkan amo tikpiaskej ouijkayomej. Sayoj ke maski axkan tikpiaskej tein yeski ouijkayot, Jehová motenkaua ke itech yankuik taltikpak kiixpolos nochi nejon (Is. 25:​7-9). Uelis tikneltokaskej ke kipia chikaualis para techpajtis, para kinixpolos akin techtauelitaj uan para kichiuas maj oksepa nemikan akin momikilijkejya (1 Juan 4:4). w24.01 6 § 12, 13

Maj tiknemilikan keyej timotemaktijkej uan timoauijkej. Tikchiujkej nejin porin tiknekiaj tiktekitiliskej Jehová. Xikonelnamiki toni mitsonpaleuij xikonneltoka ke yejua nejin tein melauak. Peuak tikonixmati Jehová, uan peuak tikonpoujkaita uan tikontasojta kemej moTajtsin. Okachi peuak tiontakuaujtamati uan tionmoyolpatak. Peuak amo tikonchiuaok tein Jehová kitauelita uan tikonchiua tein kiyolpaktia. Kuali tionmomachilij keman tikonitak ke Dios mitsontapojpoluijtoya (Sal. 32:2). Tikonixtalij tionyas nechikolmej uan tikontapouis oksekin tein tionmomachtiaya. Kemej tionmotemaktijya iuan Dios uan tionmoauijya, kinextia ke tikonchiujtokya tein mitsonpaleuis xionnemi nochipa uan ke tikonixtalijya ijkon tikonsentokas (Mat. 7:​13, 14). Maj tiksentokakan tiyekijkatokan uan maj amo timotsinkixtikan, maj nochipa tikixtalikan tiktasojtaskej Jehová uan maj tiktakamatikan itanauatiluan. w23.07 17 § 14; 19 § 19

Komo itech titanemiliaj ke timotenkaujkej tikchiuaskej tein Jehová kineki, techpaleuis maj tikixtopeuakan tein amo kuali. Maj tiknemilikan nejin: ¿tiknextiskiaj ke tikueuelitaj akin amo tonamik? ¡Amo! Tejuan timotenkaujkejya iuan Jehová, yejua ika nion tiknemiliaj tikchiuaskej nejon. Komo amo tikixualtiaj nejon amo kuali tanejnekilis, satepan amo monekis tiktemoskej timokixtiliskej nejon taman. Nion tepitsin tiknekij tikchiuaskej tein kichiuaj “akin amo yolkualmej” (Prov. 4:​14, 15). Tein kichiuak Jesús uelis techpaleuis. Yejua kinekia kiyolpaktis iTajtsin, uan tejuan no niman tikixtopeuaskej tein tikmatij ke amo kiyolpaktia Dios akin iuan timotemaktijkej (Mat. 4:10; Juan 8:29). Komo titaxikouaj keman tikpiaj ouijkayomej uan tikixtopeuaj tajtakol, kinextia ke tikixtalijkejya tiksentokaskej tiktojtokaskej Jesús. Uan tikmatij ke Jehová techpaleuis maj ijkon tikchiuakan. w24.03 9, 10 § 8-10