Noviembre

Komo tikonpia konemej, xikonmachti keniuj tanankiliskej kemej amo ouij kinkisas. Kemansa itech seki nechikolmej ika motajtouaj seki taman tein motelneki, kemej kuejmolmej tein kipiaj akin monamiktijkejya oso keniuj moneki se chipaujkanemis. Maski ijkon, xa ipa onkas se oso ome párrafos kampa konemej uelis tanankiliskej. No uelis tikonmelauilis mokoneuan keyej amo nochipa kinmakaskej se tanankilil keman momaajokuiskej. Komo ijkon tikonchiua, yejuan amo tayokoyaskej keman kinmakaskej tanankilil oksekin uan amo yejuan (1 Tim. 6:18). Tinochin uelis kuali timomachtiskej para titanankiliskej uan ika tikueyitaliskej Jehová uan tikinyolchikauaskej tokniuan (Prov. 25:11). Maski kemansa uelis tikijtoskej se taman tein techpanok, amo moneki semi toka titajtoskej (Prov. 27:2; 2 Cor. 10:18). Okachi kuali maj ika titajtokan Jehová, iTajtol uan nochin akin kitekitiliaj (Apoc. 4:11). w23.04 24, 25 § 17, 18

Komo titetasojtaj techpaleuis maj titachixtokan uan maj kuali titanemilikan (Mat. 22:​37-39). Kemej tiktasojtaj Dios techpaleuia maj tiksentokakan titanojnotsakan maski kemansa ouij yeski (2 Tim. 1:​7, 8). Kemej no tikintasojtaj, timochikauaj tikinpaleuiskej ika teléfono oso ika carta maj kiixmatikan yejuatsin. Amo tiknemiliaj ke amo keman uelis kichiuaskej tein kuali, ta tikchiaj maj mopatakan uan maj kichiuakan tein kuali (Ezeq. 18:​27, 28). Tejuan no tikintasojtaj tokniuan uan tiknextiaj keman timosenyolchikauaj uan timosenpaleuiaj (1 Tes. 5:11). Soldados akin sentateuiaj mosenpaleuiaj. Tejuan amo keman tikinyokoliskiaj tikinyolkokoskej tokniuan uan amo timomakepaskiaj komo techchiuiliskiaj teisa tein amo kuali (1 Tes. 5:​13, 15). Okse taman kemej tiknextiskej ke tikintasojtaj tokniuan yejua keman tikinpoujkaitaj akin taixyekanaj itech nechikol (1 Tes. 5:12). w23.06 10 § 6; 11 § 10, 11

Okse taman tein uelis techpaleuis maj okachi titakuaujtamatikan yejua komo itech titanemiliaj inemilis Jesús tein kitemakak. Nejon techpaleuis maj tikneltokakan ke tein Dios motenkaua yekmelauj kichiuas. Semi moneki maj tikxelokan tiempo para itech titanemiliskej keyej monekik momikilis Jesús uan nochi tein monekik kichiuas Jehová. Ijkon okachi titakuaujtamatiskej ke yejuatsin kichiuas se xochital kampa uelis tinemiskej nochipaya. ¿Keyej ijkon tikijtouaj? Maj tiknemilikan nochi tein mochiuak para maj Jesús kitemakani inemilis. Jehová monekik kiualtitanis iyojtsin iKonetsin akin semi kitasojta uan akin okachi itasojikniuj para maj yoli nikan taltikpak kemej akin amo kipiaya tajtakol. Keman Jesús yetoya nikan taltikpak semi tajyouij, kipiak miak ouijkayomej uan tel fiero kemej kimiktijkej. Jehová kitemakak tein semi kipia ipatiuj. Kemej yejuatsin semi tetasojta amo kitemakaskia ikonetsin maj tajyouiani para maj kuali tinemikan sayoj seki tonalmej (Juan 3:16; 1 Ped. 1:​18, 19). Kemej Jehová kitemakak tein semi kipia ipatiuj, kichiuas maj ueli tinemikan nochipaya itech xochital. w23.04 27 § 8, 9

¿Kineki Jehová kichiuas maj oksepa nemikan akin momikilijkejya? Kemaj. Yejuatsin kichiuak maj miakej akin kijkuilojkej Biblia ika tajtouanij ke motenkaua ke oksepa nemiskej akin momikilijkejya (Is. 26:19; Apoc. 20:​11-13). Uan keman Jehová motenkaua teisa, yekmelauj kichiua (Jos. 23:14). Jehová kitelneki kichiuas maj oksepa nemikan akin momikilijkejya. Maj itech titanemilikan tein kijtoj Job. Yejua senkis kimatia ke komo momikiliaya, Jehová kichiuaskia maj oksepa nemini (Job 14:​14, 15). Yejuatsin no kineki maj oksepa nemikan nochin itekitikauan akin momikilijkejya, kineki maj paktokan uan maj yolpakikan. ¿Uan toni kineki kichiuas Jehová ininka akin momikilijkejya uan amo keman kiixmatkej? ToTajtsin akin semi techtasojta no kineki maj oksepa nemikan (Hech. 24:15). Kineki maj kuali iuan mouikakan uan maj nemikan nochipaya nikan taltikpak (Juan 3:16). w23.04 9 § 5, 6

¿Toni moneki tikonchiuas para okachi tikonneltokas tein tikonchia? Komo tikonchia tionnemis nochipaya nikan taltikpak, xikonixtajtolti kampa Biblia ika tajtoua xochital uan xikonnemili ke ompa tionyetok (Is. 25:8; 32:​16-18). Xikonnemili keniuj tinemiskej itech xochital, akonimej ompa yetoskej, toni tikonkakis uan keniuj tionmomachilis. Komo tikxelouaj tiempo para tiknemiliskej keniuj tinemiskej itech xochital, ouijkayomej tein tikpiaskej ‘panotikisaskej uan amo uejueykej’ yeskij (2 Cor. 4:17). Tein Jehová motenkaua kichiuas mitsonpaleuis xikonxiko ouijkayomej. Jehová techmakani nochi tein techpaleuia maj tichikaujkej. Yejua ika keman ouij mitsonkisas nochipa tionyolpakis keman tikontekitilis Jehová, tikonchiuas se tekit itech nechikol oso tikonxikos se ouijkayot, xikontataujti uan xikonilui tein tikonmachilia uan xionmomachti Biblia para maj mitsonixyekana. Uan no, xionmokaua maj tokniuan mitsonpaleuikan uan xikonsentoka xikonneltoka ke mochiuas tein tikonchia. Uan Jehová “ika iueyi chikaualis” mitsonpaleuis ‘xikonxiko nochi ika nejmachkayot uan xionyolpaki’ (Col. 1:11). w23.10 17 § 19, 20

Keman tiktataujtiaj ueli tiktasojkamatiliaj miak taman. Maj tiktasojkamatilikan Jehová nochi tein tikpiaj, porin ualeua imako (Sant. 1:17). Xa porin techmakatok tochankauan, tonemilis, totasojikniuan, taltikpak kampa tinemij, nochi tein kichijchiuak uan tein tikchiaj. Uan no porin ueli kuali iuan timouikaj. Xa tisejsemej moneki tiknemiliskej keyej uelis tiktasojkamatiliskej Jehová. Kemej tinemij itech tonalmej kampa amo akin motasojkamati xa ouij techkisas. Miakej sayoj itech tanemiliaj tein kinekij kipiaskej uan amo kitasojkamatij tein kipiajya. Komo no ijkon peua titanemiliaj, xa keman timotataujtiskej sayoj titajtaniskej miak taman tein tiknejnekij. Komo amo tiknekij maj techpano nejon, moneki maj tiksentokakan timochikauakan tiktasojkamatiliskej Jehová nochi tein techmakani (Luc. 6:45). w23.05 4 § 8, 9

ToTajtsin Jehová, techtasojta uan amo kineki maj titajyouikan (Is. 63:9). Sayoj ke amo techajchiuilia nochi ouijkayomej tein tikpiaj tein Biblia kijtoua ke tamatij kemej uejueyi amej uan tit (Is. 43:2). Yejuatsin motenkaua ke techpaleuis maj ‘tikpanauikan’ tein yeski ouijkayot, uan maski semi titajyouijtoskej kijtoua ke techpaleuis maj nochipa kuali timouikakan iuan. Uan no, Jehová techmaka ichikaualis para techpaleuis maj titaxikokan (Luc. 11:13; Filip. 4:13). Yejua ika tikmatij ke nochipa tikpiaskej tein moneki para titaxikoskej uan tiksentokaskej tiktekitiliskej Jehová. Jehová kineki maj iuan titakuaujtamatikan (Heb. 11:6). Xa semi ouij tein tikpanotoskej uan tiknemiliskej ke Jehová amo techpaleuis. Sayoj ke Biblia techiluia ke ichikaualis Dios techpaleuis maj kemej yeskia ‘ueli titejkokan itech se tepamit’ (Sal. 18:29). Yejua ika maj amo tiknemilikan ke Jehová amo techpaleuis. Ta maj tiktataujtikan uan maj titakuaujtamatikan ke yejuatsin technankilis (Sant. 1:7). w23.11 22 § 8, 9

¡Tel kualtsin kemej kimelaua! Nejin tajtolmej technextiliaj ke se takat uan isiuatsin uelis nochipa motasojtaskej uan amo teyi uan nion akin uelis kintsakuilis. Takat uan isiuatsin moneki mosenpaleuiskej para motasojtaskej nochipaya. Maj itech titanemilikan tit, komo amo tiknekij maj seui moneki tiktatokiliskej. Komo amo teyi tiktaliliaj, tit seuis. No ijkon panoua keman se takat uan isiuatsin motasojtaj: moneki kichiuaskej tein kinpaleuis maj nochipa motasojtakan. Sayoj ke kemansa, keman amo teyi tomin, keman mokokouaj, uan ouijkayomej tein kipiaj keman kiniskaltiaj ininkoneuan uelis kichiuas maj yolik amo motasojtakanok. Yejua ika para maj kisentoka xotato “tit tein iaxka Jah”, takat uan isiuatsin moneki mosenpaleuiskej okachi kuali mouikaskej iuan Jehová. w23.05 20, 21 § 1-3

Maski totatuan xa semi yolchikaujkej uan techpaleuiskej maj no ijkon tikchiuakan, amo uelis techpanoltiliskej nejon, ta tejuan moneki teisa tikchiuaskej. Moneki timomachtiskej keniuj tiyeskij tiyolchikaujkej. Keman tiknekij timomachtiskej teisa moneki kuali tikitaskej akin techmachtijtok uan no ijkon tikchiuaskej. No ijkon komo tiknekij tiyeskij tiyolchikaujkej moneki tikinitaskej akin ijkon kichiuaj uan no ijkon tikchiuaskej. Kemej Daniel, moneki kuali timomachtiskej Biblia, semi tiktataujtiskej Jehová uan tiktapouiskej tein tikmachiliaj para kuali iuan timouikaskej, uan moneki titakuaujtamatiskej ke yejuatsin nochipa techpaleuis. Komo tikchiuaj nochi nejin, tiyeskij tiyolchikaujkej keman monekis tiknextiskej ke titakuaujtamatij. Maj timochikauakan tiyeskij tiyolchikaujkej. w23.08 2 § 2; 4 § 8, 9

Keman nikan kijtoua “xikyekitakan” itech tajtol griego mokuia keman akin kikouaya plata oso oro kiitaya ox yekmelauj chijchiujtoya ika nejon. Tejuan no moneki tikyekitaskej ox yekmelauj tein tikakij oso tein tikixtajtoltiaj. Tejuan okachi moneki ijkon tikchiuaskej porin motokijtiuj tonal keman mochiuas tetsaujkatajyouilis. Amo moneki tikneltokaskej nochi tein techiluiaj, ta moneki tikitaskej uan kuali tiknemiliskej ox tein tikitaj uan tein tikakij no yejua tein kijtoua inechikol Jehová uan Biblia. Nejin techpaleuis maj amo tikneltokakan nion teyi tein kitematiltiskej amo kuali ejekamej (Prov. 14:15; 1 Tim. 4:1). Tikmatij ke itekitikauan Jehová makisaskej itech tetsaujkatajyouilis, sayoj ke amo tikmatij toni techpanos mosta tisejsemej (Sant. 4:14). Maski timomikiliskej achto ke mochiuas tetsaujkatajyouilis oso tiyoltoskejok, tikyekmatij ke Jehová kichiuas maj tinemikan nochipaya komo amo tikauaj. Sayoj ke axkan moneki maj itech titanemilikan tein Jehová motenkaua techmakas uan maj tikchiujtokan tein techpaleuis keman ejkos itonal Jehová. w23.06 13 § 15, 16

Seki taman tein Biblia achto kijtojka ke mochiuaskia amo tikmatij keniuj mochiuaskej (Dan. 12:​8, 9). Sayoj ke maski amo senkis tikajsikamatiskej keniuj mochiuas amo kijtosneki ke amo mochiuas. Tikyekmatij ke Jehová kisentokas techmatiltis tein kineki maj tikmatikan keman okachi monekis, ijkon kemej kichiuak ne uejkauj. Itech altepemej motematiltis “¡Axkan tiyolseujkanemijya uan amo timouijok!” (1 Tes. 5:3). Tekiuanij niman kinixnamikiskej taneltokalismej tein amo melaujkej uan kinixpoloskej (Apoc. 17:​16, 17). Uan ompa kinixnamikiskej itekitikauan Dios (Ezeq. 38:​18, 19). Satepan peuas ueyi neteuilis Armagedón (Apoc. 16:​14, 16). Senkis tikmatij ke amo uejkaua mochiuas nochi nejin. Maj tiksentokakan tikitstiakan keniuj mochiujtiuj tein Biblia achto kijtojka ke mochiuaskia, uan maj tikinpaleuikan oksekin maj no ijkon kichiuakan, ijkon tiknextiskej ke tiktasojkamatiliaj toTajtsin. w23.08 13 § 19, 20

Keman tatitanil Pablo kijtoj ke moneki tiknextiskej seki taman kemej titakuaujtamatiskej, tikchiaskej tein kuali uan titetasojtaskej, kijtoj ke ‘tein okachi tayekantok yejua maj timotasojtakan’ (1 Cor. 13:13). ¿Keyej kijtoj nejon? Porin satepan amo monekisok maj titakuaujtamatikan ke Dios kichiuas tein motenkaua, porin ijkuak nochi kitamichiuasya. Sayoj ke nochipa monekis tiktasojtaskej Jehová uan oksekin. Uan ijkon kemej panos tiempo okachi tikintasojtaskej. No, keman tikintasojtaj tokniuan tiknextiaj ke yekmelauj tikchiuaj kemej Cristo. Jesús kiniluij itatitaniluan: “Ijkon nochin kimatiskej ke namejuan nannomomachtijkauan: komo namotasojtaj se iuan okse” (Juan 13:35). Uan no, keman timotasojtaj, kualtsin timouikaj. Yejua ika tatitanil Pablo kijtoj ke “keman titetasojtaj yekmelauj kualtsin timouikaj se iuan okse” (Col. 3:14). Tatitanil Juan kinijkuilouilij tokniuan: “Akin kitasojta Dios maj no kitasojta iiknitsin” (1 Juan 4:21). Yejua ika, keman tikintasojtaj tokniuan no tiknextiaj ke tiktasojtaj Jehová. w23.11 8 § 1, 3

Biblia kijtoua ke akin tikchiuaj kemej Cristo kemej yeskia titsikuintokej. Akin tamitsikuiniskej uelis nemiskej nochipaya (2 Tim. 4:​7, 8). Moneki tiksentokaskej timochikauaskej titsikuiniskej uan okachiok axkan porin tiajsitokejya kampa moneki. Tatitanil Pablo, kijtoj toni uelis techpaleuis maj tiajsikan kampa moneki. Yejua kijtoj: “Maj […] timokixtilikan tein techetilia […] uan maj titsikuinikan itech ojti tein yetok toixpan”. Amo kinekia kijtos ke akin tikchiuaj kemej Cristo amo teyi moneki tikchiuaskej keman titsikuintoskej, ta ke amo moneki tikchiuaskej seki taman tein amo techpaleuis. Porin nejon kichiuas maj yolik titsikuinikan uan maj niman tisiouikan. Yejua ika moneki tikitaskej ox tikchiujtokej teisa tein amo moneki uan maj niman tikauakan. Sayoj ijkon uelis tiksentokaskej titsikuintoskej, sayoj ke onkak okseki taman tein kemaj moneki tikchiuaskej uan amo moneki tikauaskej, komo amo tikchiuaj kemej ixyetok amo uelis tiksentokaskejok titsikuiniskej (2 Tim. 2:5). Maj tikitakan toni kemaj moneki tikchiuaskej. w23.08 26 § 1, 2

Komo amo tiktemouaj maj nochipa mochiua tein tiknemiliaj, amo ouij techkisas tikpoujkaitaskej tein kinemiliaj oksekin. Tikmatij ke seki tokniuan siuamej kiuelitaj moixchijchiuaskej oso moixpintaroskej uan sekin amo. Seki tokniuan kiuelitaj kiyekoskej tein teuintij, sayoj ke oksekin amo kinekij tayiskej, uan oksekin tataman kemej moyekpiaj para amo kokolispeuaskej. Komo nochipa tiknemiliaj ke tein tikijtouaj yejua tein okachi kuali uan tikchiuaj maj oksekin no tanemilikan kemej tejuan, uelis tikinuetsiltiskej uan tikchiuaskej maj amo kuali mouikakanok iniuan tokniuan itech nechikol (1 Cor. 8:9; 10:​23, 24). Kemej neskayot, Jehová amo techiluia toni tasal uelis timotaliliskej, sayoj ke techyolmajxitia keniuj uelis timotakentiskej. Kemej timotakentiaj moneki kiueyitalis Dios, moneki kinextis ke amo tikchiuaj tein tejuan tiknemiliaj uan maj kinexti ke ‘tiyektalnamikij uan amo timotelpanoltiaj’ (1 Tim. 2:​9, 10). Amo tiknekij maj sayoj kiitakan keniuj timotakentiaj. Tein Biblia tayolmajxitia no uelis kinpaleuis tokniuan tayekananij maj amo yejuan kiixtalikan keniuj timotakentiskej uan timoxiluiskej. w23.07 23, 24 § 13, 14

Jehová ika techmachtia toni moneki tikchiuaskej para tiyolpakiskej satepan. Akin kiseliaj keman kinyoleua “siuat akin amo tanemilia” kinekij maj auilnemilis kinyolpakti. Yejuan sayoj kitemouaj moyolpaktiskej. Tein melauj yejuan ajsiskej “uejkatan itech Miketekoch” (Prov. 9:​13, 17, 18). Akin kiseliaj keman kinyoleua siuat akin kiixnextia “yekmelauj tamatilis” (Is. 55:1). Timomachtijtokej keniuj tiktasojtaskej tein Jehová kitasojta uan tiktauelitaskej tein kitauelita (Sal. 97:10). Uan no tiyolpakij porin ueli tikinyoleuaj oksekin maj no kiselikan “yekmelauj tamatilis”. Tejuan titamatij kemej siuatakeualmej akin ininka tajtoua Proverbios capítulo 9 akin desde ajko tanotsaj chikauak. Tejuan no tikijtouaj kemej yejuan: “¡Nochin akin amo teyi kimatij maj ualakan nikan!”. Tejuan uan nochin akin kiseliaj keman kinyoleuaj, tikpiaj miak taman tein kuali axkan. Sayoj ke amo sayoj axkan, ta no satepan. Komo tiksentokaj itech ‘ojti tein techpaleuis maj tiyektanemilikan’, uelis tinemiskej nochipaya (Prov. 9:​3, 4, 6). w23.06 24 § 17, 18

¿Keniuj tionmomachilia keman akin iuan tionmomachtia oso akin iuan tiontekiti mitsontajtania toni tikonneltoka? ¿Tepitsin tionmomoujtia? Timiakej ijkon techpanoua. Sayoj ke keman aksa techtajtania teisa, techpaleuia maj tikmatikan toni yekmelauj kinemilia uan toni kineltoka, uan no techpaleuia maj ueli tiknojnotsakan ika Biblia. Oso kemansa techtajtaniskej teisa porin amo tanemiliaj kemej tejuan oso sayoj kinekij motajtolteuiskej touan, xa ijkon kichiuaj porin kikakinij tein amo melauak tein techijtouiliaj (Hech. 28:22). Uan no, tinemij “itech tonalmej keman tatamitiya”, keman miakej ‘amo kinekij moyektenkauaskej iniuan oksekin’ uan ‘kichiuaj tein tel fiero’ (2 Tim. 3:​1, 3). Xa tionmotajtanis: “¿Keniuj uelis niyolseujtos uan kuali nitanankilis keman nechtajtaniskej toni nikneltoka sayoj para nouan motajtolteuiskej?”. Mitsonpaleuis komo tionyolnejmach. Akin yolnejmach amo ijsiujka kualani keman kinekij kikualantiskej oso keman amo kiyekmati toni tanankilis. w23.09 14 § 1, 2

Kemansa inechikol Jehová technejmachtia tein uelis techpanos komo tiktemouaj timotomintiskej, uan no techiluia toni uelis kichiuas maj amo tiktakamatikanok Dios. Komo timokauaj maj Jehová techixyekana keman monekis tikixtaliskej toni tikchiuaskej, yejuatsin techtiochiuas (Is. 48:​17, 18; 1 Tim. 6:​9, 10). Jehová kisentokas kinkuis takamej para kiixyekanas ixolal keman mochiujtos tetsaujkatajyouilis uan keman Jesús taixyekantos mil xiujmej. ¿Tiksentokaskej timokauaskej maj Jehová techixyekana? Komo axkanya titatakamatij, amo techouijmakas tikchiuaskej satepan. Yejua ika maj nochipa timokauakan maj Jehová techixyekana, uan nejin no tikchiuaj keman tikintakamatij takamej akin yejuatsin kinixtalij maj techyekpiakan (Is. 32:​1, 2; Heb. 13:17). Uelis titakuaujtamatiskej iuan Jehová akin techixyekana porin yejuatsin techpaleuia maj nochipa kuali iuan timouikakan uan maj satepan ueli tinemikan nochipaya itech xochital. w24.02 25 § 17, 18

Tatitanil Pablo semi yolpakia keman kitekitiliaya Jehová, sayoj ke kemansa kipiaya ouijkayomej. Monekia yajtinemis uejka maski kemansa ouij kikisaya. Keman yajtinemia, ‘miakpa kiuikatoyaya at’ uan ‘moinnamikiliaya tachtekinij’. Kemansa kitajyouiltiayaj akin kitauelitayaj (2 Cor. 11:​23-27). Uan tokniuan amo nochipa kitasojkamatiaj tein kichiuaya Pablo para kinpaleuis (2 Cor. 10:10; Filip. 4:15). ¿Toni kipaleuij Pablo maj kisentoka kitekitili Dios? Tein kipanoka uan tein momachtiaya itech iTajtol, kipaleuij maj kuali kiixmati Jehová. Pablo kimatia ke Jehová kitasojtaya (Rom. 8:​38, 39; Efes. 2:4). Uan yejua no semi kitasojtak Jehová. Uan kinextij ke kitasojtaya ‘keman kinpaleuij tokniuan’ uan kisentokak ijkon kichiuak (Heb. 6:10). w23.07 9 § 5, 6

Miakej kiajsikamatij ke moneki yetoskej tekiuanij uan ke moneki tiktakamatiskej seki tanauatilmej tein kiixtaliaj. Sayoj ke, keman amo kiuelitaj se tanauatil oso kiitaj ke tel ouij, amo kinekij kitakamatiskejok. Biblia kijtoua ke tekiuanij kintajyouiltiaj oksekin, ke kinixyekantok Satanás uan ke amo uejkaua ixpoliuiskej (Sal. 110:​5, 6; Ecl. 8:9; Luc. 4:​5, 6). Sayoj ke no kijtoua ke “komo tikixnamikij inintanauatil, tein melauj tikixnamiktokej Dios”. Jehová kikaujtok maj taixyekanakan para maj amo semi mochiua tein amo kuali, uan kineki maj tikinpoujkaitakan. Yejua ika moneki tikinmakaskej ‘tein kinnamiki’ kiseliskej, nejin no kijtosneki maj tikixtauakan impuesto, maj tikinpoujkaitakan uan maj tikintakamatikan (Rom. 13:​1-7). Xa tiknemiliskej ke komo tiktakamatij se tanauatil, amo techpaleuis, tel ouij oso ke amo kinamiki maj tikchiuakan. Sayoj ke tejuan tiktakamatij Jehová, uan yejua kineki maj tikintakamatikan akin taixyekanaj, sayoj ke amo moneki tikintakamatiskej komo techiluiaj maj amo tikchiuakanok tein Jehová technauatia (Hech. 5:29). w23.10 8 § 9, 10

Sansón yolik keman filisteos kinixyekanayaj israelitas uan semi kintajyouiltiayaj (Juec. 13:1). Kemej filisteos tel amo yolkualmej katkaj, semi kintajyouiltiayaj israelitas. Yejua ika Jehová kiixpejpenak Sansón para maj kinpaleuiani uan ijkon ‘filisteos amo kintajyouiltiskiajok’ (Juec. 13:5). Yejua ika monekia kitemos maj Jehová kipaleui. Miakej tateuianij filisteos yajkaj Lehí, tein xa moajsia Judá para kikitskiskej Sansón. Takamej akin nemiaj Judá semi momoujtijkej, yejua ika kitemakakej Sansón. Iikniuan israelitas kiilpijkej ika ome lazos tein yankuikej uan kitemakatoj iniuan filisteos (Juec. 15:​9-13). Sayoj ke “Jehová kimakak ichikaualis Sansón”, uan ijkon uelik momakixtij. Satepan, “Sansón kiajsik itenomiyo se burro tein yekin mikka” uan ika kinmiktij mil filisteos (Juec. 15:​15, 16). w23.09 2 § 3, 4

Jehová kiixtalijtok maj mochiua “amo keman tami” uan semi tiktasojkamatiliaj maj yolik techmatiltijtiuj itech Biblia. Jehová kichiua miak taman para kichiuas tein kiixtalijtok, nochi ‘kichijchiuani para kichiuas itanejnekilis’ (Prov. 16:4). Uan tein Jehová kichiuas amo keman ixpoliuis. Sayoj ke, ¿toni kiixtalijtok kichiuas Jehová? Uan, ¿toni kipatani para ijkon kichiuas? Dios kiniluij Adán uan Eva toni kinekia maj kichiuakan keman kinnauatij: “Xikinpiakan miakej namokoneuan, ximomiakilikan, ximomoyauakan itech nochi taltikpak uan […] xikinyekpiakan […] nochin tapialmej” (Gén. 1:28). Adán uan Eva amo kitakamatkej Jehová uan yejua ika tinochin titajtakolejkej, sayoj ke nejon amo kitsakuilij maj kichiua tein kiixtalijtok, ta yejuatsin sayoj kipatak kemej kichiuas. Niman kiixtalij maj sekin tekiuajtikan ompa iluikak para maj mochiuani tein kiixtalijtoya nikan taltikpak (Mat. 25:34). w23.10 20 § 6, 7

Jehová no uelis techpaleuis maj amo timosenkauakan. Nejin xa ouij techkisas uan okachiok komo kemanya timochikaujtokej amo tikchiuaskejok tein amo kuali. Xa tiknemiliskej ke tein tejuan tikpanotokej okachi ouij ke tein kipanok tatitanil Pedro. Sayoj ke Jehová uelis techpaleuis maj tiksentokakan tiktekitilikan (Sal. 94:​18, 19). Yejua nejon tein kipanok se tokniuj achto ke kiixmatiskia Jehová, yejua miak xiujmej auilnemia iniuan itakaikniuan. Maski satepan amo auilnemiaok, kemansa oksepa kinejnekia kichiuas. ¿Toni kipaleuij maj amo mosenkaua? Yejua kijtoj: “Jehová nechchikaua”. No kijtoj ke ichikaualis Dios kipaleuia maj kiajsikamati ke uelis nemis kemej Jehová kiyolpaktia, ke yejuatsin kikauani maj kitekitili, uan ke maski mopoloua kisentoka kichikaua. w23.09 23 § 12

Komo tiokichpilok, xikelnamiki ke moneki timochikauas para uelis tikchiuas kemej Jesús. Moneki tikchiuas kemej sekin akin kuali kitekitiliaj Dios, achto kuali tiknemilis tein tikchiuas, yeski titakuaujtamach, uan timomachtis seki taman tein mitspaleuis satepan. Keman tiknemilis nochi tein moneki tikchiuas, xa timoluis ke semi ouij. Sayoj ke amo ximosenkaua porin kemaj uelis tikchiuas. Amo xikelkaua ke Jehová kineki mitspaleuis (Is. 41:​10, 13). Uan tokniuan itech nechikol no mitspaleuiskej. Keman okachi kuali tiktekitilisya Jehová kemej yejuatsin kineki, kuali tinemis uan tiyolpakis. Semi timitstasojtaj uan tiknekij maj Jehová kisentoka mitstatiochiui porin timochikaujtok okachi kuali tiktekitilis. w23.12 29 § 19, 20

Xikonnemili nejin: tejuatsin tionyetok iniuan seki tokniuan uan nankinekij namokixtiliskej se taixkopin nannochin. Tikonkixtia eyi taixkopimej para tionmokauilis tein okachi kualtsin kisak. Sayoj ke tikonita ke itech semej taixkopimej, se tokniuj amo kuali kisak. Tikonixpoloskia nejon taixkopin uan tionmokauiliskia omen kampa nochin ixuetskatokej. Sayoj ke, xikonnemili ke se tonal se tokniuj kijtoj oso kichiuak teisa tein amo kuali yetok. ¿Toni tikonchiuaskia? ¿Keyej amo tikonelkaua ijkon kemej tikonixpoloskia se taixkopin tein amo kuali kisak? (Efes. 4:32). Porin okachi tikelnamikij keman miakpa kualtsin iuan tietoyaj. Okachi kuali, maj sayoj timokauilikan “taixkopimej tein kualtsitsin”. w23.11 12, 13 § 16, 17

Tajtol griego tein Pablo kikuik, kinextia ke tokniuan siuamej moneki kuali kiitaskej toni motaliliskej uan kinemiliskej keniuj kinitaskej oksekin. ¡Semi tamechpatiuitaj tokniuan siuamej akin kuali nankiitaj toni tasal namotaliliskej! Kuali taixejekouaj. Keman aksa kuali taixejekoua kimati toni kuali yetok uan toni amo, uan kiixtalia kichiuas tein kuali yetok. Maj tikitakan tein kichiuak Abigaíl. Itakauj kichiuak tein amo kuali uan Abigaíl kiajsikamatik ke nejon kintajyouiltiskiaj akin nemiaj ichan. Yejua niman kitemoj keniuj kinpaleuis, uan kemej kuali taixejekoj kimatik toni kichiuas para kinmakixtis miakej (1 Sam. 25:​14-23, 32-35). Komo kuali titaixejekouaj no techpaleuis maj tikmatikan kemanian titajtoskej uan kemanian amo. No techpaleuis maj ininka timotekipachokan oksekin, sayoj ke amo tikintajtaniskej teisa tein ika mopinaujmatiskej (1 Tes. 4:11). w23.12 20 § 8, 9

Tatitanil Pablo kinijkuilouilij nejin versículos tokniuan itech nechikol ompa Roma. Yejuan kimatiajya akoni katka Jehová uan Jesús, kinextijkajya ke takuaujtamatij uan mochiujkajya tokniuan. Yejua ika Dios kinitak ke katkaj ‘yolmelaujkej porin takuaujtamatiaj’ uan kinixpejpenak ika ichikaualis (Rom. 5:1). Desde ijkuakya peuak kichiaj maj mochiua se taman tein kualtsin uan senkis takuaujtamatiaj ke mochiuaskia. Satepan, Pablo ika kinnojnotsak tokniuan taixpejpenalmej de Éfeso tein Jehová kijtojka ke ueliskia kichiaskej. Pablo kinmelauilij ke kiseliskiaj “uejueyi tatiochiualismej tein [Dios] motenkauak kinmakas akin moinxelouilij” (Efes. 1:18). Uan Pablo no kiniluij tokniuan de Colosas kani kiseliskiaj nejon tatiochiualismej tein kichiayaj. Kiniluij: “Dios namechmakas ne iluikak” (Col. 1:​4, 5). Yejua ika, tokniuan taixpejpenalmej kichiaj nemitiuij nochipaya ompa iluikak kampa iuan taixyekanaskej Cristo (1 Tes. 4:​13-17; Apoc. 20:6). w23.12 9 § 4, 5

Itech tajtol tein ika moijkuiloj Biblia keman kikui tajtol “kiyekpias”, kiteajsikamatiltia keman soldados kiyekpiayaj se xolal para maj amo kiteuikan. Akin ompa nemiaj kualtsin kochiaj porin kimatiaj ke soldados kiyekpiayaj xolal. No ijkon panoua keman Dios ‘techyolseuia’, porin nejon kiyekpia toyolo uan totanemilil yejua ika kuali timomachiliaj uan tiyolseuij (Sal. 4:8). Maski amo niman moyektalis se ouijkayot, uelis oksepa tiyolseuiskej ijkon kemej kipanok Ana (1 Sam. 1:​16-18). Nejon techpaleuis maj tiyektanemilikan uan maj kuali titaixpejpenakan. ¿Toni uelis tikchiuaskej tejuan? Ijkon kemej akin nemiaj itech se xolal uelia kitajtaniayaj soldado maj kinyekpia, tejuan no uelis tiktajtaniskej Jehová maj techyekpia. Yejua ika, moneki maj tiksentokakan tiktataujtikan Dios hasta keman tikmachiliskej ke tiyolseujkejya (Luc. 11:9; 1 Tes. 5:17). Komo tejuatsin no tikonpia se ouijkayot xikonsentoka xionmotataujti. Tikonitas keniuj Jehová mitsonyolseuia uan kiyekpia moyolo uan motanemilil (Rom. 12:12). w24.01 21 § 5, 6

Para kiueyitalis itokay iTajtsin, Jesús taxikoj keman kitajyouiltijkej, kiuijuikaltijkej uan keman kipantijkej miak taman. Yejua kimatia ke nochipa kitakamatia iTajtsin yejua ika amo monekia mopinaujmatis (Heb. 12:2). No kimatia ke keman tel tajyouijtoya, yejua Satanás akin kiixnamiktoya (Luc. 22:​2-4; 23:​33, 34). Satanás kinekia maj Jesús amo kitakamatiniok Jehová, sayoj ke amo uelik kichiuak nejon, ¡amo mochiuak tein kinekia! Jesús senkis kinextij ke Satanás takajkayaua uan ke Jehová kemaj kinpia itekitikauan akin amo kikauaj maski kipiaj ouijkayomej. ¿Tikonneki tikonyolpaktis moTekiuaj Jesucristo? Komo ijkon, xikonsentoka xikonueyitali itokay Jehová uan xikonpaleui oksekin maj kuali kiixmatikan. Ijkon uelis tikonchiuas kemej Jesús (1 Ped. 2:21). Tejuatsin no uelis tikonyolpaktis Jehová kemej kichiuak Jesús uan tikonnextis ke Satanás, akin kitauelita se xolopij. w24.02 11, 12 § 11-13

Itech makuil xiuit tein panokya, panoua se millón moauijkej para mochiuaskej itaixpantijkauan Jehová. Keman tejuan timotemaktiaj iuan Dios kijtosneki ke tikixtaliaj tikchiuaskej kemej Jesús uan tiktayekanaltiskej tikchiuaskej tein Dios kiyolpaktia. ¿Keniuj tikchiuaj nejon? Jesús kijtoj: “Komo aksa kineki nechtojtokas, maj moixtopeua” (Mat. 16:24). Tajtolmej “maj moixtopeua” no kijtosneki “maj amo nemiok para yejua”, uan nejon kinextia ke aksa moneki kiixtopeuas tein kinejneki. Keman tejuatsin tionmotemaktis iuan Jehová, monekis tikonixtopeuas tein amo kiuelita (2 Cor. 5:​14, 15). No moneki tikonixtopeuas tein ‘kinejneki monakayo’, kemej auilnemilis (Gál. 5:​19-21; 1 Cor. 6:18). Komo tikontasojta Jehová uan tikonneltoka ke tein mitsonnauatia, semi mitsonpaleuis amo mitsonouijmakas tikonchiuas nejin (Sal. 119:97; Is. 48:​17, 18). w24.03 2 § 1; 3 § 4

Jehová kinmaka ichikaualis sayoj akin kiyolpaktiaj (Mat. 12:18). Maj timotajtanikan: “¿Niknextia seki taman tein ichikaualis Dios tepaleuia maj se kinexti?”. ¿Tikonita ke axkan okachi amo tionyolijsiui ke keman ayamo tikonixmatia Jehová? Tein melauj, ijkon kemej okachi tikonnextis tein ichikaualis Dios tepaleuia maj se kinexti, okachi nesis ke tikonyolpaktijtok Jehová. Jehová kichiua maj kinpaleui inemilis Jesús tein kitemakak sayoj akin kiyolpaktiaj (1 Tim. 2:​5, 6). Uan komo tikmachiliaj ke amo tikyolpaktiaj Jehová maski tikneltokaj ke Jesús toka momikilij uan timoauijkejya, ¿toni uelis tikchiuaskej? Maj tikelnamikikan ke toyolo uelis techkajkayauas, sayoj ke Jehová amo keman kichiuas. Komo tikneltokaj ke Jesús toka momikilij, Jehová techita ke tiyolmelaujkej uan motenkaua ke techtatiochiuis (Sal. 5:12; Rom. 3:26). w24.03 30 § 15; 31 § 17