Keman tikonneki tionmosenkauas

Adriana, kayot Brasil, kijtoua: “Nochipa semi nimotekipachouaya uan hasta niknemilij nimomiktis”.

¿NO TIONMOMACHILIANI kemej Adriana uan hasta amo tikonnekiok tionyoltos? Yejua nochipa motekipachouaya, moteltayokoltiaya uan nion teyi kiyolseuiaya. Satepan, kiluijkej ke kipiaya se kokolis tein kichiua maj nochipa tayokoxto.

Kaoru, se takat kayot Japón, no ijkon momachilij. Yejua kinyekpiak itatuan akin mokokouayaj uan xiuejkejya katkaj. Yejua kijtoua: “Ijkuak, amo nitaxikouayaok porin semi nitekitia. Satepan, amo nimayanayaok uan amo niueliaok nikochi. Niknekia nimikis porin amo niknekiaok nitajyouis”.

Uan no, Ojebode, se takat kayot Nigeria, kijtoua: “Nochipa nitayokoyaya uan nichokaya. Hasta niknemilij nimomiktis”. Ojebode, Kaoru uan Adriana amo momiktijkej, sayoj ke sejse xiuit tel miakej kemaj momiktiaj.

TEIN UELIS MITSONPALEUIS

Takamej yejuan akin okachi momiktiaj porin miakej pinauaj tajtaniskej maj kinpaleuikan. Sayoj ke, Jesucristo kijtoj ke akin kipiaj kokolis moneki maj se tapajtijkej kinpaleui (Lucas 5:31). Yejua ika, komo tejuatsin ijkon tionmomachilia, amo xionpinaua tiontajtanis maj mitsonpaleuikan. Tapajtianij kinpaleuianij miakej maj okachi kuali momachilikan, kemej Ojebode, Kaoru uan Adriana.

Seki tapajtianij kinpaleuiaj akin tel tayokoyaj keman kinmakaj pajti oso keman kinkakij uan kinyolchikauaj. Uan no, ininchankauan uan akin iniuan mouikaj moneki kinpaleuiskej, kinajsikamatiskej uan amo yolijsiuiskej iniuan. Jiova, yejua akin okachi kuali uelis iuan timouikaskej uan techpaleuia ika iTajtol, Biblia.

KEMAN AMO TIONTAYOKOYASOK

Kemansa, akin tel tayokoyaj moneki uejkaua kinpajtiskej uan kipataskej kemej monejnemiltiaj. Sayoj ke, komo tejuatsin no semi tiontayokoya, mitsonyolseuis komo tikonneltoka ke satepan kualtsin tinemiskej. Ojebode ijkon kichiua. Yejua kijtoua: “Nikneki nikitas keman mochiuas tein kijtoua Isaías 33:24, kampa kijtoua ke ejkos tonal keman amo akin kijtos: ‘Nimokokoua’”. Tejuatsin no mitsonyolseuis tikonmatis ke Dios motenkauak maj nikan mochiua “se yankuik taltikpak” kampa “amo aken yoltajyouis ok” (Apocalipsis [Revelación] 21:1, 4). Amo keman tiontayokoyasok nion tikonelnamikisok (Isaías 65:17).

Tein Biblia kijtoua uelis mitsonpaleuis

Dios kimati keniuj tionmomachilia

“Nejua, Jiova moDios, nikitskijtok moyekmay, Akin mitsiluia: ‘Amo ximoui. Nejua nimitspaleuis.’” (Isaías 41:13.)

Jiova senkis kiajsikamati keniuj timomachiliaj uan kineki techpaleuis.

Xiontanemili itech tein kijtoua iTajtol Dios

“[Elías] peuak tajtani maj momikili. Yejua kijtoj: ‘¡Hasta nikanya! Axkan, Jiova, xinechkuili nonemilis.’” (1 Reyes 19:4.)

Ojebode kijtoua: “Nechpaleuij itech nitanemilis tein kijtoua iTajtol Dios. Nikmatik ke tanauatijkej Elías no momachilij kemej nejua”.

Xionmomachti akin Biblia ininka tajtoua

Jesús kiluij Pedro: “Nimotatatautilij ya iuan Dios de ke ma amo xikpoloti motakuautamatilis” (Lucas 22:32).

Pedro semi tayokoyak uan chokak keman expa kijtoj ke amo kiixmatia Jesús. Yejua ika, Kaoru kijtoua: “Semi nechyolchikauak nikmatis ke Jiova uan Jesús kiitstoyaj keniuj momachiliaya Pedro”.

Amo keman tiontayokoyasok nion tikonelnamikisok (Isaías 65:17)