Tein mokui keman tikitaj Tein timomachtiaj itech nechikol Tonemilis uan toTanojnotsalis
1-7 METSTI MAYO
TAMACHTILIS TEIN KIPIA BIBLIA | JEREMÍAS 32-34
Tein moixtajtoltia itech Biblia
(Jeremías 32:1-12) Tajtol tein Jiova kiluij Jeremías itech xiuit majtakti keman tekiuajtitoya Sedequías akin taixyekanaya Judá, tein kijtosneki, itech xiuit dieciocho keman tekiuajtitoya Nabucodorosor. 2 Itech nejon tonalmej itateuijkauan akin tekiuajtia Babilonia kiyoualojtoyaj Jerusalén, uan tanauatijkej Jeremías, tsaktoya ompa itech Patio de la Guardia tein moajsia itech ikaltekiuaj akin taixyekanaya Judá, 3 porin Sedequías akin taixyekanaya Judá kitsakka ompa, uan kiluij: “¿Keyej tiktematiltijtok nejon? Tikijtoua: ‘Yejua nejin tein kijtoua Jiova: “Niktemakati nejin xolal imako akin tekiuajti Babilonia, uan yejua moaxkatilis; 4 uan tekiuaj Sedequías akin taixyekana Judá, amo kincholuis caldeos, porin senkis kitemakaskej imako akin tekiuajti Babilonia, uan kinojnotsas iixpan uan kiixitas”’. 5 ‘Uan yejua kuikas Sedequías ompa Babilonia, uan ompa moajsis hasta keman oksepa nikelnamikis’, kijtoua Jiova. ‘Maski nankisentokaskej nankinixnamikiskej caldeos, amo nantataniskej’”. 6 Jeremías kijtoj: “Jiova nechnojnotsak, uan nechiluij: 7 ‘Nikan uitse Hanamel ikoneuj Salum motío, uan kijtoua: “Xinechkouili notal tein moajsi Anatot, porin tejua mitsnamiki yekinika tikojpakakouas”’”. 8 Hanamel ikoneuj notío nechitako, ijkon kemej kijtojka Jiova, ompa itech Patio de la Guardia, uan nechiluij: “Ika kualtakayot, xikoua, tal tein nikpia Anatot, ompa itech ital Benjamín, porin tejua mitsnamiki xikpia uan xikojpakakoua. Ximokouili”. Ompa, nikmatik ke katka itajtol Jiova. 9 Yejua ika nikouak tal tein moajsia Anatot tein iaxka Hanamel ikoneuj notío. Uan niktamachiuilij tomin, chikome siclos uan majtakti platajtomin. 10 Ompa nikijkuiloj itech se amat, niktalilij se sello uan nikinnotsak taixpantinij uan niktamachiuak tomin itech balanza. 11 Satepan nikuik tajkuilol kampa ixnesia tein nikouak, tein kipiaya sello ijkon kemej tajtanij tekiuanij uan kemej ixyetok itech tanauatil, uan no tein amo kipiaya sello; 12 uan nikmakak Baruc ikoneuj Nerías, ikoneuj Mahseya, tajkuilol kampa ixnesia tein nikouak, iixpan Hanamel ikoneuj notío, ininixpan taixpantinij akin tajkuilojkej, uan ininixpan nochin judíos akin tokotsyetoyaj ompa itech Patio de la Guardia.
8-14 METSTI MAYO
TAMACHTILIS TEIN KIPIA BIBLIA | JEREMÍAS 35-38
Tein moixtajtoltia itech Biblia
(Jeremías 36:27–37:2) Uan Jiova oksepa kinojnotsak Jeremías satepan ke tekiuaj kichichinoj amatajkuilol tein kipiaya tajtolmej tein Jeremías kiluijka Baruc maj kijkuilo, uan kijtoj: 28 “Xikui okse amatajkuilol uan xikijkuilo tajtolmej tein moajsiaj itech yekinika amatajkuilol, tein kichichinoj tekiuaj Jehoiaquim akin taixyekana Judá. 29 Uan moneki tikiluis tekiuaj Jehoiaquim akin taixyekana Judá: ‘Yejua nejin tein kijtoua Jiova: “Tejua tikchichinoj nejin amatajkuilol, uan tikijtoj: ‘¿Keyej ompa tikijkuiloj: “Akin tekiuajti Babilonia yekmelauj ualati uan kiixpolos nejin altepet uan kikixtis takat uan tapial”?’. 30 Yejua ika, yejua nejin tein Jiova kiluia tekiuaj Jehoiaquim akin taixyekana Judá, ‘Amo kipias okse akin motalis kampa taixyekanaya David, uan inakayo tein miket tonaltatatos uan sesextos youak. 31 Uan niknotsas yejua uan ikoneuan, uan itekitikauan uan nikintajtanis maj tanankilikan ika inintajtakoluan, uan nikinualkuilis nochi tatsakuiltilis tein nikiniluiani yejuan uan akin nemij Jerusalén uan takamej akin nemij Judá, sayoj ke yejuan amo takakkej’”’”. 32 Uan Jeremías kikuik okse amatajkuilol uan kimakak tajkuilojkej Baruc ikonetsin Nerías, uan yejua peuak kijkuiloua nochi tajtolmej tein Jeremías kiluijka, tein moajsiaj itech amatajkuilol tein tekiuaj Jehoiaquim akin taixyekana Judá kichichinojka. Uan okseki tajtolmej kemej nejon no moajxitilij ompa.
37 Uan tekiuaj Sedequías ikonetsin Josías kiixpatak tekiuaj Conías ikonetsin Jehoiaquim, akin tekiuaj Nabucodorosor akin taixyekana Babilonia kiixtalij maj kiixyekana altepet Judá. 2 Sayoj ke yejua uan itekitikauan uan akin nemiaj itech altepet amo kikakej itajtol Jiova tein kitematiltij itenkopa tanauatijkej Jeremías.
15-21 METSTI MAYO
TAMACHTILIS TEIN KIPIA BIBLIA | JEREMÍAS 39-43
Tein moixtajtoltia itech Biblia
(Jeremías 40:11–41:3) Uan nochin judíos akin moajsiaj ompa Moab, Ammón uan Edom uan akin moajsiaj itech nochi okseki altepemej, yejuan no kikakkej ke akin tekiuajtia Babilonia kikauak maj sekin mokauakan ompa Judá uan ke kiixtalij Guedalías ikoneuj Ahiqam ikoneuj Safán maj kinixyekana. 12 Uan nochin judíos akin moajsiaj kampa kinmoyaujkaj peujkej mokepaj, uan ualajkej ompa Judá, kiajsitoj Guedalías ompa Mizpá. Uan peujkej kisentiliaj tel miak vino uan koujtakilomej tein mochiuaj verano. 13 Johanán ikoneuj Qaréah uan nochin akin kinixyekanaj tateuianij akin moajsiaj ixtauat, kiitatoj Guedalías ompa Mizpá. 14 Uan kiluijkej: “¿Xe amo tikmati ke Baalís, akin kinixyekana ammonitas, kititanik Ismael ikoneuj Netanías maj mitsmiktiki?”. Sayoj ke Guedalías ikoneuj Ahiqam amo kinneltokilij. 15 Ompa Johanán ikoneuj Qaréah, kiichtakailuij Guedalías ompa Mizpá: “Nikneki niyas nikmiktitiuj Ismael ikoneuj Netanías, uan amo akin kimatis. ¿Keyej kitemoua mitsmiktis, uan keyej moneki momoyauaskej nochin judíos akin mouan mosentilianij, uan amo akin mokauasok Judá?”. 16 Sayoj ke Guedalías ikoneuj Ahiqam kiluij Johanán ikoneuj Qaréah: “Amo xikchiua nejon, porin sayoj se takajkayaualis tein tikijtouilijtok Ismael”.
41 Itech chikometika metsti, Ismael ikoneuj Netanías ikoneuj Elisamá, akin ikalyetouanij katkaj tekiuanij uan katka semej itapaleuijkauj tekiuaj, kiitato Guedalías ikoneuj Ahiqam ompa Mizpá iniuan majtakti takamej. Keman sentakuajtoyaj ompa Mizpá, 2 Ismael ikoneuj Netanías uan majtakti takamej akin iuan moajsiaj moketskej uan kimiktijkej ika espada Guedalías ikoneuj Ahiqam ikoneuj Safán. Ijkon kimiktij akin tekiuaj Babilonia kiixtalijka maj kiixyekana altepet. 3 Ismael no kinmiktij nochi judíos akin moajsiaj iuan Guedalías ompa Mizpá, ijkon kemej tateuianij caldeos akin ompa moajsiaj.
22-28 METSTI MAYO
TAMACHTILIS TEIN KIPIA BIBLIA | JEREMÍAS 44-48
Tein moixtajtoltia itech Biblia
(Jeremías 47:1-7) Yejua nejin tajtolmej tein Jiova itenkopa tanauatijkej Jeremías kiniluij filisteos, achto ke Faraón kiixpoloskia Gaza. 2 Yejua nejin tein kijtoua Jiova: “¡Xikita! Amej uitsej kampa ika norte uan mochiuaskej ueyiamej tein taapexontiskej. Uan taapexontis itech altepet uan nochi tein ompa onkak, xolal uan akin ompa nemij. Takamej tayokoltsajtsiskej, uan nochin akin nemij itech altepet tayokolchokaskej. 3 Keman kikakiskej ininmetsteposuan caballos, kemej kakalakatiyouij carros tein ika tateuiaj uan kemej kakistitiyouij ruedas, tetatmej amo kinkuitiuij ininkoneuan, porin ininmauan uetsiskej, 4 porin uitse se tonal keman kinixpoloskej nochin filisteos, amo kikauas maj ompa Tiro uan Sidón mokaua akin kitemaka nepaleuil. Porin Jiova kinixpolos filisteos, akin mokauajok ompa isla de Caftor. 5 Akin nemij Gaza mokuaximaskej. Asquelón amo kakistis. Akin mokauaok ompa taltamanis, ¿hasta kemanian tiksentokas timotejtekis? 6 ”¡Ajá, iespada Jiova! ¿Hasta kemanian timotamatilis? Xikalaki itech mocubierta. Ximoseui uan amo xikakistiok. 7 ”¿Keniuj ueliskia motsakuilis keman Jiova kinauatiani? Xikixnamikiti Asquelón uan akin nemij ueyiatenoj. Ompa yejua kititanini”.
29 METSTI MAYO HASTA 4 METSTI JUNIO
TAMACHTILIS TEIN KIPIA BIBLIA | JEREMÍAS 49-50
Tein moixtajtoltia itech Biblia
(Jeremías 50:1-10) Itajtol Jiova tein kiluia Babilonia, tein kiluia ialtepeuj caldeos, itenkopa tanauatijkej Jeremías: 2 “Xikteixmatiltikan itech xolalmej uan xikmoyauakan. Xiktalikan se neskayot uan xikteixmatiltikan. Amo teyi xiktatikan. Xikijtokan: ‘Babilonia moaxkatilijkejya. Bel kipinaujtijkejya. Merodac senkis moui. Inintiotsitsin kinpinaujtijkej. Inintiotsitsin tein tetajyaltijkej senkis mouij’. 3 Porin se altepet tein ualeua kampa ika norte kiixnamikiko. Kichiua maj altepet senkis moui, uan maj amo akin ompa nemi. Takat uan tapial tein kipiaj kalijtik cholojkej. Yajkej”. 4 “Itech nejon tonalmej, kijtoua Jiova, xolal Israel, uan xolal Judá senualaskej. Yejuan chokatiyaskej ijkuak nejnentiyaskej, uan kitemoskej Jiova ininDios. 5 Yejuan tajtaniskej ojti tein teuika Sión, tachixtoskej kampa moajsi, uan kijtoskej: ‘Xiualakan uan maj timosentilikan iuan Jiova itech se netenkaualis tein amo keman tamis uan amo moelkauas’. 6 Noxolal mochiuako kemej ichkamej tein poliujtokej. Inintajpixkauan kichiujkej maj mopolokan. Itech tepemej mopolojkej. Yanij itech tepet hasta kampa amo tepeyoj. Kielkauanij kampa moseuiayaj. 7 Nochin akin kinajsinij kinkuanij, uan akin kinixnamikij kijtouanij: ‘Amo totajtakol, porin yejuan tajtakojkej iixpan Jiova, iixpan kali kampa onkaya melaujkayot uan nechialis tein kipiayaj ininuejkaujtatuan, Jiova’.” 8 “Xikisakan itajkotian Babilonia, uan xikisakan itech inintal caldeos, uan ximochiuakan kemej tapialmej tein kinyekanaj ichkamej. 9 Porin nikan nikchiujtok uan nikinuikatok se nechikol kampa moajsij uejueyi altepemej tein ualeuaj kampa ika norte maj kiixnamikikan Babilonia. Yejuan ualaskej uan motekpanaskej kemej ijkuak tateuitij. Ijkon moaxkatiliskej. Ininflechas tamatij kemej se tateuijkej uan kinmiktiaj konemej, uan senkis kichiua tein kinauatijkej. 10 Uan Caldea mochiuas se taman tein moaxkatiliskej. Nochin akin moaxkatiliskej kuali moajsiskej”, kijtoua Jiova.