Tein mokui keman tikitaj Tein timomachtiaj itech nechikol Tonemilis uan toTanojnotsalis
3-9 METSTI JULIO
TAMACHTILIS TEIN KIPIA BIBLIA | EZEQUIEL 11-14
Tein moixtajtoltia itech Biblia
(Ezequiel 12:1-10) Itajtol Jiova kisentokak nechnojnotsak uan nechiluij: 2 “Ikoneuj taltikpaknenkej, akin tinemi iniuan kalyetouanij taixnamikinij. Yejuan kipiaj ininixtololouan, sayoj ke amo tachiaj, kipiaj ininnakasuan sayoj ke amo takakij, porin yejuan kalyetouanij taixnamikinij. 3 Uan tejua, ikoneuj taltikpaknenkej, xikui tein se kiuika ijkuak teuikaj itech okse altepet. Ompa, keman tonayan ijkuak yejuan mitsitstoskej, monekis tiyas itech okse altepet. Xikaujteua mochan uan xiyouj itech okse altepet keman yejuan mitsitstoskej. Xa kiajsikamatiskej, maski yejuan kalyetouanij taixnamikinij. 4 Uan tonayan xikixti tein kinextia ke mitsuikaj itech okse altepet keman mitsitstoskej, uan tiotakpa xikisa kemej akin kiuikaj itech okse altepet.
5 ”Keman yejuan mitsitstoskej, xikoyoni tepamit, uan ompakauin xiknalpanolti tein tikuikas. 6 Keman yejuan mitsitstoskej, ximoajkoltalili tein tikuikas uan xikisa keman tayouayantias. Ximoixpiki uan ijkon amo tikitas tal, porin ika nejin nikinnextilijtok se taman ichan Israel”.
7 Uan nikchiuak ijkon kemej nechnauatijkej. Tonayan nikixtij tein se kiuika ijkuak teuikaj itech okse altepet; uan tiotakpa nikoyonij tepamit ika nomay. Uan keman tayouak, nikixtij nochi tein nikuikaya, uan nimoajkoltalilij ininixpan nochin.
8 Uan kualkampa itajtol Jiova kisentokak nechnojnotsak, uan nechiluij: 9 “Ikoneuj taltikpaknenkej, ¿amo mitstajtanij ichan Israel, kalyetouanij taixnamikinij: ‘¿Toni tikchiua?’? 10 Xikinilui: ‘Yejua nejin tein kijtoua toTeko Jiova akin okachi Ueyi Taixyekankej: “Ika nejin nikinnejmachtia akin taixyekantokej Jerusalén uan nochin kalyetouanij Israel tein moajsij itech xolal”’.
10-16 METSTI JULIO
TAMACHTILIS TEIN KIPIA BIBLIA | EZEQUIEL 15-17
Tein moixtajtoltia itech Biblia
(Ezequiel 16:28-42) ”’Porin amo uelia tikseuiaya motanejnekilis, tiauilnemik iniuan ikoneuan Asiria, sayoj ke satepan ke iniuan tiauilnemik, amo seuik motanejnekilis. 29 Yejua ika okachi tiauilnemik itech inintal tanamakanij uan iniuan caldeos, sayoj ke, maski ijkon amo seuik motanejnekilis. 30 ¡Tel amo kuali moajsi moyolo, kijtoua toTeko Jiova akin okachi Ueyi Taixyekankej, keman tikchiuak nochi nejin taman, timonejnemiltij kemej se siuaauilnenkej akin nion tepitsin pinaua! 31 Sayoj ke ijkuak tikchijchiuak se tal lomojtsin kampa okachi kiitaskiaj itech sejse ojti uan tikchijchiuak kalikximej kampa miakej mosentiliaj, amo timochiuak kemej siuaauilnenkej, porin amo tiknekia maj mitstaxtauikan. 32 ¡Tejua se siuat auilnenkej akin moteka iniuan oksekin uan amo iuan inamik! 33 Taltikpakneminij kinmakaj se netetayokolil nochin siuaauilneminij, sayoj ke tejua tikinmaka netetayokolilmej nochin akin mouan auilnemij, uan akin yeski tikintaxtauia maj ualakan uan maj mouan auilnemikij. 34 Tejua amo kemej siuamej akin tekitij itech auilnemilis. ¡Amo akin auilnemi kemej tejua! Tejua tikintaxtauia uan amo yejuan mitstaxtauiaj. Semi taman tein tikchiua.’ 35 ”Sayoj ke, siuaauilnenkej, xikaki itajtol Jiova. 36 Yejua nejin tein kijtoua toTeko Jiova akin okachi Ueyi Taixyekankej: ‘Porin senkis tiknextiani eliuisyot itech auilnemilis uan tiknextij monakayo keman tiauilnemik iniuan akin mitstasojtaj uan nochin motiotsitsin tein tetajyaltiaj tikinmaktiani iesyo mokoneuan, 37 yejua ika, nikinsentilijtok nochin akin mitstasojtaj akin tikinyolpaktij, nochin akin tikintasojtak uan nochin akin tikintauelitak. Nikinsentiliti maj mitsyoualokan nochin akin ualeuaj kampa yeski uan nikinnextilis monakayo uan yejuan senkis kiitaskej monakayo. 38 ”’Uan nimitstatsakuiltiti kemej kintatsakuiltiaj siuaauilneminij uan siuamej akin kitoyaujtokej esti uan niktoyauas moesyo ika kualanyot porin amo nikxikoua xinechixpatani. 39 Nimitstemaktis iniuan, uan yejuan kixitiniskej motal lomojtsin uan kiuetsiltiskej kampa titaueyichiua tepekuapan; uan mitskixtiliskej motilmaj uan joyas tein kualtsitsin uan mitskauaskej tixipetstik uan kiitaskej monakayo. 40 Tel miakej ualaskej mitsixnamikikiuij, uan mitstetemaskej uan mitstmiktiskej ika ininespadas. 41 Yejuan kichichinoskej mokaluan uan mitstatsakuiltiskej ininixpan tel miakej siuamej; uan niktamis moauilnemilis uan amo nikauasok xikintaxtaui. 42 Nikixtis nokualanyo mouan uan amo nimitskualanuisok; uan niyolseuis uan amo nimoyolkokosok’.
17-23 METSTI JULIO
TAMACHTILIS TEIN KIPIA BIBLIA | EZEQUIEL 18-20
Tein moixtajtoltia itech Biblia
(Ezequiel 20:1-12) Itech chikometika xiuit, itech makuiltika metsti, itech tonal majtakti itech metsti, sekin tayekananij ompa Israel nechitakoj uan motalijkej noixpan porin kinekiaj kimatiskej tein kijtouaya Jiova. 2 Ompa itajtol Jiova nechnojnotsak, uan nechiluij: 3 “Ikoneuj taltikpaknenkej, xitajto iniuan tayekananij ompa Israel, uan xikinilui: ‘Yejua nejin tein kijtoua toTeko Jiova akin okachi Ueyi Taixyekankej: “¿Nanualajkej nankimatikoj toni nikijtoua? ‘Yekmelauj kemej nejua niyoltok, nejua amo namechnankilis’, kijtoua toTeko Jiova akin okachi Ueyi Taixyekankej”’. 4 ”¿Uelisya tikiniluis tein kinpanos? ¿Uelisya tikiniluis tein kinpanos, ikoneuj taltikpaknenkej? Xikinmatilti tein tel amo kuali tein kichiujkej ininuejkaujtatuan. 5 Xikinilui: ‘Yejua nejin tein kijtoua toTeko Jiova akin okachi Ueyi Taixyekankej: “Itech tonal keman nimitsixpejpenak Israel, no nimotenkauak iniuan ikoneuan ichan Jacob, uan nimoteixmatiltij ininixpan ompa Egipto. Kemaj, nimotenkauak iniuan uan nikijto: ‘Nejua niJiova nanmoDios’. 6 Itech nejon tonal nimotenkauak ke nikinkixtiskia ompa Egipto uan nikinuikaskia itech se tal tein nikintemolijka, kampa meya leche uan nekti. Katka se tal tein okachi kualtsin ke okseki talmej. 7 Ompa nikiniluij: ‘Nansejsemej moneki nankitamotaskej tein amo moitstani tein nankipiaj nanmoixpan; amo ximopitsotilikan ika tiotsitsin tein kipia Egipto. Nejua niJiova nanmoDios’. 8 ”’”Sayoj ke yejuan peujkej nechixnamikij uan amo kinekkej kikakiskej notajtol. Yejuan amo kitamotkej tein amo moitstani tein moajsia ininixpan, uan amo kinkaujkej tiotsitsin tein tetajyaltiaj tein kipia Egipto. Yejua ika nimotenkauak ke nikixtiskia nokualanyo iniuan uan senkis nikixtiskia nokualanyo iniuan itech tal Egipto. 9 Sayoj ke nikinkixtij porin ijkon notokay amo mopitsotiliskia ininixpan altepemej kampa nannemiaj. Porin nimoteixmatiltij iniuan israelitas ininixpan nejon altepemej keman nikinkixtij itech tal Egipto. 10 Yejua ika nikinkixtij itech tal Egipto uan nikinuikak taluakyan. 11 ”’”Ompa, nikinmakak notanauatiluan uan nikauak maj kimatikan tein nikixtalijtoya nikchiuas, uan ijkon taltikpaknenkej akin kitakamatis kisentokas nemis itechkopa. 12 Uan no nikinmakak nosábados kemej se neskayot tein kinmatiltiskia ke nejua niJiova akin nikinchipaua.
24-30 METSTI JULIO
TAMACHTILIS TEIN KIPIA BIBLIA | EZEQUIEL 21-23
Tein moixtajtoltia itech Biblia
(Ezequiel 21:1-13) Itajtol Jiova nechnojnotsak uan nechiluij: 2 “Ikoneuj taltikpaknenkej, xikita Jerusalén, uan xiktematilti tein kipanos kampa taueyichiuaj, uan xiktematilti tein kipanos tal Israel. 3 Xikilui tal Israel: ‘Yejua nejin tein kijtoua Jiova: “Nikan niyetok nimitsixnamikiti uan nikixtiti noespada itech icubierta, uan kinmiktis akin yolmelaujkej uan akin amo yolkualmej. 4 Porin nikmiktiti akin yolmelauak uan akin amo yolkuali, noespada kisas itech icubierta uan kinmiktis nochin ompa kampa ika sur hasta kampa ika norte. 5 Nochin moneki kimatiskej ke nejua niJiova, nikixtijtok noespada itech icubierta. Uan amo oksepa nikalakis”’. 6 ”Uan tejua, ikoneuj taltikpaknenkej, ximoujkaijsika, kemaj, ximoijyokui ika tayokol ininixpan. 7 Uan komo mitsiluiaj: ‘¿Keyej timoujkaijsika?’, xikinilui: ‘Porin nechmatiltianij teisa’. Porin yekmelauj ualas, uan sejse mouis uan ininmauan uetsiskej uan senkis mosenkauaskej uan itech nochi tankuaymej temos at. ‘¡Xikita! Yekmelauj ualaskej uan moaxkatiliskej’, kijtoua toTeko Jiova akin okachi Ueyi Taixyekankej”. 8 Jiova kisentokak nechnojnotsak, uan nechiluij: 9 “Ikoneuj taltikpaknenkej, xiktematilti tein panos uan xikijto: ‘Yejua nejin tein kijtoua Jiova: “Xikijto: ‘¡Se espada, se espada! Kitentianij uan kialaxouanij. 10 Kitentianij uan ijkon miakej kinmiktis; kialaxouanij uan ijkon petanis kemej ijkuak tapetani’”’”. “¿Amo moneki tiyolpakiskej?” “‘¿Iespada Jiova kiixtopeuas itaixyekanalis nokoneuj, kemej kichiua iuan nochi kouit? 11 ”’Kitemakas maj kitentikan, uan ijkon kuali motekitiltis. Nejin espada kitentianij uan kialaxouanij, uan ijkon kimaktiskej akin temiktia. 12 ”’Xitsajtsi uan xitayokolchoka, ikoneuj taltikpaknenkej, porin yejua nejin tein kipanoti noxolal; tein kinpanoti nochin akin taixyekanaj Israel. Yejuan akin mikiskej ika espada iniuan noxolal. Yejua ika xiktatsini mokes. 13 Porin nochin kuali kinitanij, ¿uan toni panos komo espada kiixtopeua taixyekanalis? Taixyekanalis amo kisentokasʼ, kijtoua toTeko Jiova akin okachi Ueyi Taixyekankej.
31 METSTI JULIO HASTA 6 METSTI AGOSTO
TAMACHTILIS TEIN KIPIA BIBLIA | EZEQUIEL 24-27
Tein moixtajtoltia itech Biblia
(Ezequiel 25:1-11) Itajtol Jiova kisentokak nechnojnotsak, uan nechiluij: 2 “Ikoneuj taltikpaknenkej, xikinita ammonitas, uan xikinilui tein kinpanos. 3 Moneki tikijtos tein kinpanos ammonitas: ‘Xikaki itajtol toTeko Jiova akin okachi Ueyi Taixyekankej. Yejua nejin tein kijtoua toTeko Jiova akin okachi Ueyi Taixyekankej: “Porin tikijtoj ¡no kualia!, keman kipitsotilijkej kampa nechueyichiuaj, uan keman tal Israel mokauak taseltijkan, uan keman ichan Judá kiuikakej itech okse altepet, 4 yejua ika nimitstemaktiti iniuan akin kayomej Tonalkisayampa uan timochiuas ininaxka, uan yejuan kitaliskej inintakenkaluan kampa timoajsi. Kikuaskej motakilo, uan tayiskej moleche. 5 Nikchiuas maj Rabba mochiua se sakatal kampa takuaskej camellos, uan inintal ammonitas kampa moseuiskej ichkamej; uan namejuan moneki nankimatiskej ke nejua niJiova”’”. 6 “Porin yejua nejin tein kijtoua toTeko Jiova akin okachi Ueyi Taixyekankej: ‘Porin timomataxkaloj uan tiajkotsikuinik uan tiyolpakik ika tein kipanotoya Israel porin tikteltauelitaya, 7 yejua ika nimomamelauas uan nimitstemaktis iniuan altepemej kemej se taman tein moaxkatiliskej. Nimitsixpoloti kemej xolal uan nimitsixpoloti itech altepemej. Nimitsixpoloti, uan moneki tikmatis ke nejua niJiova’. 8 ”Yejua nejin tein kijtoua toTeko Jiova akin okachi Ueyi Taixyekankej: ‘Porin Moab uan Seír kijtojkej: “¡Xikita! Ichan Judá no kemej nochi okseki altepemej”, 9 nikinkauati maj altepemej moajsikan itatenoj Moab uan ijkon kiixnamikiskej, ijkon kemej talmej tein moajsij altepetenoj kemej Bet-jesimot, Baal-meón, uan no Quiryataim. 10 Uan iniuan ammonitas namechtemakati ininmako akin kayomej Tonalkisayampa, uan ijkon altepemej amo kinelnamikiskej ammonitas. 11 Uan nitamelauas ompa Moab, uan yejuan moneki kimatiskej ke nejua niJiova’.