Tein mokui keman tikitaj Tein timomachtiaj itech nechikol Tonemilis uan toTanojnotsalis
5-11 METSTI AGOSTO
TAMACHTILIS TEIN KIPIA BIBLIA | 2 TIMOTEO 1-4
“Dios techpaleuia maj amo timomoujtikan”
w09 15/5 pág. 15 § 9
Telpoch, xiknexti ke okachi chikauak motakuaujtamatilis
9 Kemej Pablo kinekia kipaleuis Timoteo, kiluij: “Dios amo techmakak se espíritu tein kichiua maj timomoujtikan, ta tein kipia chikaualis uan netasojtalis uan kuali taixejekolis” (2 Tim. 1:7, TNM). “Kuali taixejekolis” kijtosneki se tanemilis ika nejmachkayot. Nejon mitspaleuis kuali xitaixejeko keman tikpanos seki taman, maski semi ouij yeski. Tetayokoltij tikijtoskej ke seki telpochmej amo yekyolmajsitokej uan yejua ika amo moyolchikauaj kitemoskej kimelauaskej kuejmolmej tein kipanouaj, ta nochi tonal sayoj kiitaj televisión, kochij, kikuij drogas, tauanaj, youij iluimej oso auilnemij. Sayoj ke, Biblia techiluia ke akin tikchiuaj kemej Cristo moneki maj “tiksekokautiyakan ne amokuali nemilis uan ma tikmajpeutiyakan ne tanejnekilisme ten ualeutok iuan in taltikpakuani” uan “ma tiyekchipaukanemikan ika ne kuali taixejekolis, uan ma tikpiakan ne yolmelaukanemilis uan ma tikmouistilijtiyakan Totajtsin Dios nikan taltikpak” (Tito 2:12).
w03 1/3 pág. 9 § 7
‘Maj tiyolchikaujkej uan maj tichikaujkej’
7 Pablo kijkuilouilij Timoteo: “Dios amo techmakak se espíritu tein kichiua maj timomoujtikan, ta tein kipia chikaualis [...]. Yejua ika, amo ximopinaujmati ika tein yeski itamachtilis toTeko” (2 Timoteo 1:7, 8, TNM; Marcos 8:38). Keman tikixtajtoltiaj nejin texto, moneki timotajtaniskej: “¿Nimopinaujmati ika tein nikneltoka oso niknextia yolchikaualis? ¿Nikiniluia akin iniuan nitekiti oso akin iniuan nimomachtia ke niitaixpantijkauj Jiova, oso amo nikijtoua? ¿Nipinaua porin amo nikchiua kemej oksekin oso nikita ke se tatiochiualis niknextis ke kuali nimouika iuan Jiova?”. Komo aksa xa moui kiteixmatiltis kuali tanauatilmej oso kimouilia peuas tanemilis kemej oksekin, moneki maj kielnamiki tein Jiova kiyolmajxitij Josué: “Ximoyolchikaua uan xichikauak”. Maj amo tiktayekanaltikan tein kinemiliskej akin iniuan titekitij oso akin iniuan timomachtiaj, ta tein kinemiliaj Jiova uan Jesucristo (Gálatas 1:10).
Maj tiktemokan tamachtilis ika nejmachkayot
Maj tiktemokan tein yekmelauj kipia ipatiuj
13 Timoteo no kinextij ke takuaujtamatia. Pablo kiluij ke katka se itekitikauj “Cristo Jesús, ijkon keme se soldado”, uan satepan kiluij: “Porin in soldado amo mokalakitinemi tech miak tataman tekime. Ta, in soldado kineki kichiutinemis sayo ne tekit ten kinajnauatia ne tayekankasoldado” (2 Tim. 2:3, 4). Axkan, itatojtokakauan Jesús mochikauaj kitakamatiskej nejin tayolmajxitilis. Ompa no pouij panoua se millón tokniuan akin kitekitiliaj Dios miak tonalmej. Yejuan amo kikauaj maj kintanejnekti nochi taman tanamakalis tein moteixmatiltia nion tein onkak itech nejin taltikpak, uan kielnamikij ke “akin taneui teisa mochiua itakeual akin tetaneujtia” (Prov. 22:7). Satanás kineki maj tikuikan totiempo uan tochikaualis uan maj ika tiktemokan timotomintiskej. Sekin taneuij tel miak tomin porin kinekij kikouaskej se kali, se carro, kiixtauaskej se ueyi tamachtilis oso kichiuaskej se ueyi iluit keman monamiktiskej. Komo amo timoyekpiaj, uelis titauikatoskej tel miak xiujmej. Tiknextiaj tamatilis keman amo tiktemouaj tikpiaskej miak taman, amo timotauikaltiaj uan amo tikouaj miak taman. Ijkon amo tiktemoskej timotomintiskej uan uelis okachi tiktekitiliskej Dios (1 Tim. 6:10).
Itekitikauan Jiova kiixtopeuaj tein amo kuali
10 Itech nejin tonalmej, itech nechikol semi amo moita maj moajsikan akin kinekepiliaj Jiova. Sayoj ke, keman timoajsiskej ika tamachtilis tein amo mouika ika tein kijtoua Biblia, moneki senkis tikixtopeuaskej, maski kampa yeski ualas. Amo tiknextiskiaj tamatilis komo tikintajtolixnamikij akin kinekepiliaj Jiova, nion keman iniuan timoajsij nion itech Internet uan nion ika okse taman tein onkas. Maski xa tiknemiliaj tikchiuaskej porin tiknekij tikinpaleuiskej, komo iniuan timonojnotsaj amo tiktakamattoskiaj tanauatil tein moajsi itech Biblia tein yekin tikitakej. Tiitekitikauan Jiova senkis tikixtopeuaj inintamachtilis akin kinekepiliaj Jiova.
12-18 METSTI AGOSTO
TAMACHTILIS TEIN KIPIA BIBLIA | TITO 1-FILEMÓN
“¿Keniuj kinixtaliaj tayekananij?”
Tein tajtanij akin taixtajtoltiaj
Maski Biblia amo senkis kimelaua keniuj kiixtaliayaj sejse tokniuj, kemaj kinextia seki taman kemej mochiuaya. Techiluia ke ijkuak Pablo uan Bernabé mokepayajya keman yekinika takalpanotoj itech altepemej kemej misioneros, “kinixtalijkej tayekananij itech nechikolmej keman kichiuayaj netataujtilmej uan mosauayaj, uan kintemaktiayaj iixpan Jiova akin iuan taneltokakej” (Hech. 14:23, TNM). Seki xiujmej satepan, Pablo kijkuilouilij Tito, akin no katka takalpanojkej, nejin tajtolmej: “Nimitskauak Creta uan ijkon tikmelauaskia tein amo kuali yetok uan tikinixtaliskia tayekananij itech se altepet uan okse, ijkon kemej nimitsnauatij” (Tito 1:5, TNM). Uan moajsikamati ke Timoteo, akin miakkan yajtinemik iuan tatitanil Pablo, no kipiak nejon tanauatil (1 Tim. 5:22). Ika nejin, moyekita ke yejuan tokniuan takalpanouanij taixtaliayaj, uan amo tatitanilmej uan tayekananij tein moajsiaj Jerusalén.
Ika nejin tein kinextia Biblia, Oloch Taojtokaltianij akin kinixyekanaj itaixpantijkauan Jiova kipatakej kemej kinixtaliaj tayekananij uan tapaleuianij. Itech tonal 1 metsti septiembre xiuit 2014 peua mochiua ijkon: sejse tokniuj takalpanojkej kiita ika nejmachkayot nochi tein kuali tein kichiujtokej tokniuan akin tayekananij kimatiltiaj ke uelisya kinixtaliskej. Keman takalpanoua itech nechikol, kitemoua kinixmatis nejon tokniuan uan komo ueli, tekiti iniuan itech tanojnotsalis. Satepan ke kiita iniuan tayekananij itech nechikol nochi tein kuali tein kimatiltijkej, yejua tokniuj takalpanojkej moneki kinixtalis tayekananij uan tapaleuianij itech nechikolmej kampa takalpanoua. Nejin tapaleuia maj senkis mochiua kemej itech yekinika siglo.
Keman kiixtaliaj se tokniuj, ¿akonimej kiitaj nejon? Kemej ipa, “takeual takuaujtamach uan tamatkej” yekinika kinauatijtokej maj kintamaka tokniuan (Mat. 24:45-47, TNM). Ika inepaleuil yektikatsin espíritu, kitemoua itech Biblia tajkuilolmej tein kinextia keniuj moneki tekitis axkan inechikol Dios tein moajsi noyampa taltikpak, uan satepan kitematiltia keniuj motekitiltis. Takeual takuaujtamach no kinixtalia nochin tokniuan takalpanouanij uan Taixyekananij itech Sucursal. Uan satepan, itech sejse sucursal kimelauaj keniuj mochiuas tein kitematiltia takeual. Uan no, oloch tayekananij moneki kiitaskej ika nejmachkayot ox tokniuj akin kiitaj ke uelisya kiixtaliskej itech nechikol kichiujtokya tein Biblia tajtani. Uan satepan, sejse tokniuj takalpanojkej moneki kiitas ika netataujtil tein oloch tayekananij kimatiltiaj ke kichiujtok tokniuj, uan ompa kiixtalis akin kiitas ke uelisya.
Maj tiktemokan tamachtilis ika nejmachkayot
w89 15/5 pág. 31 § 5
Tein tajtanij akin taixtajtoltiaj
Tein melauj, Pablo amo kinextijtoya ke kinchikoitaya akin kayomej Creta. Tikyekmatij nejon porin yejua kimatia ke ompa Creta moajsiaj tokniuan akin kuali tekititoyaj akin Dios kinixpejpenkaya ika iyektikatsin espíritu (Hechos 2:5, 11, 33). Kemej moajsiaj miakej tokniuan akin kiueyichiuayaj Dios, ueliskia mopeualtiskej nechikolmej itech sejse xolal. Maski nejon tokniuan katkaj tajtakouanij, uelis tikyekmatiskej ke amo takajkayauayaj nion sayoj tatakuayaj. Komo ijkon kichiuaskiaj, Jiova amo kinseliskia (Filipenses 3:18, 19; Apocalipsis 21:8). Ijkon kemej panoua axkan noyampa taltikpak, ompa Creta xa moajsiaj akin kipiayaj kuali ininyolo akin motekipachouayaj porin kiitayaj ke tel miakej amo kuali monejnemiltiayaj. Yejua ika, kuali kiseliayaj kuali tanauatilmej (Ezequiel 9:4; no xikonita Hechos 13:48).
w08 15/10 pág. 31 § 5
Tein moixtajtoltia itech amatajkuilolmej Tito, Filemón uan Hebreos
15, 16. ¿Keyej Pablo amo kitajtanij Filemón maj amo kipianiok Onésimo kemej takeual? Pablo sayoj kinekia kiteixmatiltis iTekiuajyo Dios uan tein Cristo tamachtij. Yejua ika, amo kitemoj mokalakis itech ininnemilis oksekin, kemej ijkuak sekin kipiayaj inintakeualuan (Hech. 28:31, TNM).
19-25 METSTI AGOSTO
TAMACHTILIS TEIN KIPIA BIBLIA | HEBREOS 1-3
“Maj tiktasojtakan melaujkayot uan maj tiktauelitakan tein amo kuali”
¡Maj tikueyitalikan Cristo, Tekiuaj ueyichiujkej!
8 Itech xiuit 1914, Jiova kiixpejpenak iKonetsin kemej Tekiuaj itech Tekiuajyot tein moajsi imako Mesías. ‘Takot tein kiixnextia itaixyekanalis kemej tekiuaj, yejua se takot tein kipia tein melauak’, yejua ika uelis tikyekmatiskej ke itech iTekiuajyo onkas melaujkayot uan amo tachichikouis. Kinamiki maj yejua Tekiuaj, porin Dios ‘yejua itrono’, tein kijtosneki ke Jiova kiixpejpenak kemej Tekiuaj. Uan no, iTekiuajyo Jesús uejkauas “nochipaya”. ¿Amo mitsonyolpaktia tikontekitilis Jiova ika itaixyekanalis Tekiuaj akin yejuatsin kiixtalij?
¡Maj tikueyitalikan Cristo, Tekiuaj ueyichiujkej!
7 (Xikonixtajtolti Salmo 45:6, 7.) Kemej Jesús kiteltasojta melaujkayot uan kiteltauelita nochi tein uelis kichiuas maj amo kuali ika motajto iTajtsin, Jiova kiixpejpenak kemej Tekiuaj itech Tekiuajyot tein moajsi imako Mesías. Kiixpejpenak ika “aceite tein teyolpaktia” okachi ke ‘itekitikaikniuan’, tein kijtosneki, akin tekiuajtiaj Judá akin ichankauan David. ¿Keniuj? Yekinika, yejuatsin Jiova kiixpejpenak; uan amo sayoj kiixpejpenak kemej Tekiuaj, ta no kemej Tayekankatiopixkat (Sal. 2:2; Heb. 5:5, 6). Uan no, Jesús amo kiixpejpenkej ika aceite, ta ika iespíritu Dios. Uan itekiuajyo amo moajsi nikan taltikpak, ta ompa iluikak.
Maj tiktemokan tamachtilis ika nejmachkayot
it-1 pág. 1211
Taixkopin
¿Nochipa kinextij Jesús kemej senkis tamati iPopaj?
Jesús yejua itayekankaKoneuj Dios uan tamati kemej yejuatsin. Jesús nemik nikan taltikpak kemej takat (2Co 4:4). Dios kiluij iKonetsin: “Maj tikchijchiuakan takat ijkon kemej tejuan titamatij”. Nejon kijtosneki ke keman Dios kichijchiuak iKonetsin, yejua peuak tamati kemej yejuatsin, akin katka iPopaj oso itachijchiujkauj (Gé 1:26; Jn 1:1-3; Col 1:15, 16, TNM). Keman iKonetsin Dios nemik nikan taltikpak kemej se takat akin amo kipiaya tajtakol, kinextij ikualneskayouan iPopaj uan kemej tamati yejuatsin ijkon kemej ueliskia kinextis se taltikpaknenkej. Yejua ika, Jesús uelik kijtoj: “Ijkon keme Nejuatsin tinechitstinemi, no ijkon Totajtsin Dios tikitstinemi” (Jn 14:9; 5:17, 19, 30, 36; 8:28, 38, 42). Yejua okachi kinextij ke tamatia kemej iPopaj, Jiova, keman yejuatsin kiajokuik kemej espíritu uan kimakak “nochi in tanauatil tech in eluiyaktsinko uan nikan taltikpak” (Mt 28:18; 1Pe 3:18). Kemej Dios “kiueyipantalij Cristo”, Jesús kinextij ikualtsinyo iPopaj okachiok ke achto ke ualaskia nikan taltikpak (Flp 2:9; Heb 2:9). Axkan, Jesús “monextijtinemi uan tamati ijkon keme Totajtsin Dios tamati” (Heb 1:2-4).
it-1 pág. 478 § 2
Iluikak
Itech Salmo 102:25, 26 ika motajtoua Jiova. Sayoj ke, tatitanil Pablo kijtoua ke itech nejon texto ika motajtoua Jesucristo. Ijkon kijtoj porin Dios kichijchiuak nochi tein onkak itechkopa itayekankaKoneuj. Pablo kijtoj ke komo Dios kinekiskia, kemej yeskia ueliskia kitetsilos nochi tein onkak kemej se kitetsiloua tilmaj uan kitamotas. Sayoj ke, kijtoj ke iKonetsin Dios nochipa yoltos (Heb 1:1, 2, 8, 10-12).
26 METSTI AGOSTO HASTA 1 METSTI SEPTIEMBRE
TAMACHTILIS TEIN KIPIA BIBLIA | HEBREOS 4-6
“Maj timochikauakan tikalakiskej itech ineseuilis Dios”
w11 15/7 pág. 24 § 3-5
¿Toni kijtosneki tonal keman Dios moseuia?
3 Moajsi ome taman tein techpaleuia maj tikyekmatikan ke itech yekinika siglo, chikometika tonal ayamo tamia. Yekinika, yejua tein Jesús kinnankilij akin kijtouiliayaj ke amo kitakamatia tein monekia mochiuas itech tonal sábado. Yejuan kijtouayaj ke keman tapajtiaya kijtosnekia ke tekitia, uan itech Tanauatil tein kiselij Moisés moijtouaya ke itech nejon tonal monekia amo se tekitis. Jesús kinnankilij: “Notajtsin tekititiuits hasta axkan uan Nejuatsin nitekititok axkan” (Juan 5:16, 17). Keman kijtoj: “Notajtsin tekititiuits hasta axkan”, kinextij ke amo melauak tein kijtouiliayaj. Kemej yeskia kijtoj: “NoPopaj uan nejua tisentekititokej. Yejua tekititok itech tonal sábado tein iaxka tein uejkauakya tel miak xiujmej. Yejua ika, nejua no uelis nitekitis itech tonal sábado”. Ijkon, Jesús kiteajsikamatiltij ke nikan taltikpak tonal sábado oso tonal keman Dios moseuia ayamo tamia.
4 Ojpatika, yejua tein Dios kichiuak maj Pablo kijkuilo. Keman tatitanil ika tajtoj tonal keman Dios moseuia uan achto ke ika tajtoskia Génesis 2:2, kijkuiloj: “Tejuan tikyekneltokaj ya ne itanojnotsalis de Dios. Ika ya nojon tejuan kuali tikselitiyoue ne yolseuilis iuan Dios” (Heb. 4:3, 4, 6, 9). Nejin kinextia ke ijkuak, chikometika tonal ayamo tamia. Komo ijkon, ¿kemanian tamiskia?
5 Uelis tikmatiskej kemanian tamis chikometika tonal komo tikajsikamatij keyej Dios kiixtalij nejon tonal. Génesis 2:3 kijtoua ke toTachijchiujkauj “peuak kitiochiua chikometika tonal uan kichiuak yektik”. Jiova kichiuak yektik nejon tonal porin kiixtalij kichiuas itanejnekilis nikan taltikpak. ¿Uan toni kiixtalij kichiuas? Maj noyampa taltikpak moajsikan taltikpakneminij tatakamatinij akin kiyekpiaskej nochi tein onkak (Gén. 1:28). Yejua ika, Jiova uan Jesucristo ‘tekititiuitsej hasta axkan’. Uan no, Biblia kijtoua ke Jesús “Tayekankatsin de ne tonal de neseuilis” oso tonal sábado (Mat. 12:8). Nejon kijtosneki ke tonal keman Dios moseuia, tein uejkaua tel miak xiujmej, tamis hasta keman senkis mochiuas itanejnekilis Dios nikan taltikpak. ¿Kemanian mochiuas? Keman tamis Mil xiujmej keman Cristo taixyekantos.
w11 15/7 pág. 25 § 6
¿Toni kijtosneki tonal keman Dios moseuia?
6 Jiova kinmelauilij Adán uan Eva tein kiixtalijtoya kichiuas, sayoj ke yejuan amo kinekkej kitakamatiskej. Tel miak xiujmejya, millones taltikpakneminij no ijkon kichiuanij. Hasta israelitas, akin katkajya iaxkauan Dios, no ijkon kichiujkej. Miak xiujmej satepan, Pablo kinnejmachtij yekinika itatojtokakauan Cristo ke hasta yejuan no ueliskia ijkon kichiuaskej. Yejua kinijkuilouilij: “Ma timofuerzauijtiyakan para tikselijtiyaske ne yolseuilis iuan Dios, para ma amo aken ok ma kichiutinemi ijkon keme kichiutinenke ne uejkau ipueblojkauan de Dios kuak yejuan amo kiyekneltokakke itanauatil de Moisés” (Heb. 4:11). Tikitaj ke tatitanil kijtoj ke komo amo titatakamatij, amo uelis tikalakiskej itech ineseuilis Dios. Nejin tajtolmej semi technejmachtiaj. ¿Toni techpanos komo amo tikchiuaj itanejnekilis Dios? Amo tikalakiskej itech ineseuilis. Yejua ika, moneki semi itech titanemiliskej nejon taman. Satepan ika titajtoskej nejon. Sayoj ke achto, maj tikitakan tein amo kuali tein kichiujkej israelitas uan keyej amo kalakkej itech ineseuilis Dios.
w11 15/7 pág. 28 § 16, 17
¿Toni kijtosneki tonal keman Dios moseuia?
16 Axkan, amo uelis tikijtoskej ke uelis timakisaskej komo tiktakamatij seki tanauatilmej tein kiselij Moisés. Pablo kinijkuilouilij tokniuan akin nemiaj Éfeso: “Ika por ne iteiknelilistsin Totajtsin Dios namechmakixtij ya porin namejuan nantakuautamatinemij inauaktsinko Cristo. Uan namejuan amo teyika uelik nanmomakixtijke. Ta, Totajtsin Dios namechmaktilij ya nijin nemakixtilis. Uan Totajtsin Dios amo namechmakixtij ya ika por tensa chiualis ten namejuan nankichiuke. [...] Ika ya nojon amo aken uelis moueyimatis uan kiyolmachilis ke yejua san uelis momakixtis” (Efe. 2:8, 9). Yejua ika, ¿toni moneki tikchiuaskej komo tiknekij tikalakiskej itech ineseuilis Dios? Maj tikelnamikikan ke Jiova kiixtalij ke moseuiskia itech chikometika tonal porin kichiuaskia itanejnekilis nikan taltikpak. Komo ijkon, komo tiknekij tikalakiskej itech ineseuilis Jiova oso tipouiskej itech nejon tonal, moneki tiktakamatiskej yejuatsin uan titapaleuiskej maj mochiua itanejnekilis ijkon kemej techiluijtiyaskej itech inechikol.
17 Maj nochipa tikpatiuitakan tein techyolmajxitis takeual takuaujtamach uan maj amo tiktayekanaltikan tein tejuan tiknemiliskej. Komo amo tikchiuaj nejon, tiknextijtoskej ke tikixnamikij itanejnekilis Dios uan amo kuali iuan timouikaskejok. Sayoj ke, ¿toni uelis kichiuas maj axkan amo tiktakamatikan Dios? Itech okse tamachtilis tikitaskej seki taman uan tikitaskej ke tein tikixpejpenaj itech nejon taman kinextia ox tikalakkejya itech ineseuilis Dios.
Maj tiktemokan tamachtilis ika nejmachkayot
Tein tajtanij akin taixtajtoltiaj
¿Toni kijtosneki Hebreos 4:12 keman kijtoua ke “in Tajtoltsin de Dios kipia uelilis uan kitemaka nemilis”?
▪ Seki tajkuilolmej achto kiteajsikamatiltiaj ke “Tajtoltsin de Dios” tein Pablo ika tajtoj yejua kemej Dios kiteixmatiltia itanejnekilis, kemej tikajsij itech Biblia.
Itech toamaixuan, miakpa titamachtiaj ika Hebreos 4:12 ke Biblia ueli kinpaleuia taltikpakneminij maj mopatakan. Uan nejon melauak. Sayoj ke no kuali maj tikajsikamatikan toni ika tajtojtoya Pablo keman kijkuiloj nejin tajkuilol. Yejua kinyoleujtoya tokniuan hebreos maj tapaleuikan maj mochiua itanejnekilis Dios. Miak taman tein poui itech itanejnekilis momelauayaj itech iTajtol Dios. Itech nejin tajkuilol, Pablo ininka tajtoj israelitas akin Dios kinmakixtij Egipto. Yejuan kichiayaj kalakiskej itech “se tal kampa meya leche uan nekti”, tein Dios motenkaujtoya kinmakas. Ompa yekmelauj ueliskia moseuiskej (Éx. 3:8; Deut. 12:9, 10).
Yejua nejon katka itanejnekilis Dios. Sayoj ke israelitas amo kinextijkej ke takuaujtamatiaj iuan Jiova uan amo kitakamatkej, yejua ika tel miakej akin ijkuak nemiaj amo kalakkej itech ineseuilis Dios (Núm. 14:30; Jos. 14:6-10). Maski ijkon, Pablo kijtoj: “Totajtsin Dios techtenilijtok ok de ke ma tikselikan ne yolseuilis de Dios” (Heb. 3:16-19; 4:1). Moyekita ke nejon netenkaualis poui itech nochi tein Dios kiixtalijtok kichiuas. Ijkon kemej tokniuan hebreos, tejuan no ueli tikixtajtoltiaj nejon tein Dios kiixtalijtok kichiuas uan titapaleuiskej. Pablo kijtoj tajtolmej tein moajsij itech Génesis 2:2 uan Salmo 95:11, uan ika kiyeknextij ke nejon netenkaualis moajsi itech iTajtol Dios.
Techyolpaktia tikmatiskej ke “Totajtsin Dios techtenilijtok ok de ke ma tikselikan ne yolseuilis”. Titakuaujtamatij ke yekmelauj uelis tikalakiskej itech ineseuilis Dios, kemej kijtoua Biblia. Yejua ika tikchiuaj nochi tein tiuelij. ¿Keniuj? Amo tiktemouaj tiktakamatiskej tanauatil tein kiselij Moisés nion tikchiuaskej tein kuali sayoj porin tiknekij maj Dios techseli, ta titapaleuiaj ika miak pakilis maj mochiua itanejnekilis Dios uan tiksentokaskej tikchiuaskej nejon porin titakuaujtamatij iuan yejuatsin. Tel miakej taltikpakneminij itech nochi taltikpak peuanij momachtiaj Biblia uan ijkon kimatij tein Dios kijtouani ke kiixtalijtok kichiuas. Nejin kinpaleuiani tel miakej maj kipatakan ininamo kuali tachiualisuan, maj kinextikan takuaujtamatilis uan maj moauikan. Nochi nejin kinextia ke “in Tajtoltsin de Dios kipia uelilis uan kitemaka nemilis”. Tein Dios kijtouani itech Biblia ke kiixtalijtok kichiuas techpaleuianiya uan kisentokas techpaleuis.
it-1 pág. 851 § 1
Nechialis
Akin Dios ‘kinijitakya uan kinnotsak maj poujtinemikan iuantsin’ kipiaskej nemilis tein amo keman tami uan tein amo palani (Heb 3:1). Nejon nechialis kuali ixyetokya uan uelis se takuaujtamatis ke yekmelauj mochiuas. Tikmatij nejon porin onkak ome taman tein kinextia ke Dios amo takajkayaua: porin motenkauakya uan kiyekijtojya ke kichiuas. Uan no, tikyekmatij ke axkan, Cristo kipiaya nemilis tein amo keman tami ompa iluikak. Yejua ika, moijtoua ke nejon nechialis “momasoutok uan takitskijtok ya tech totalnamikilis, ijkon keme se tepos ancla kitsajtsakuilijtok in barco para ma amo eliuis yetinemi. Uan ne totakuautamatilis ualeutok desde nepa eluiyaktsinko taijtik de ne Tamouisyojkan de Dios kampa Cristo Jesús kalayik ya [kemej ijkuak tayekankatiopixkat kalakia kampa Okachi Yektik itech Tonal keman Motapojpoluiaya Tajtakolmej] uan techtatapouilij ya para uelis tikalakiske. Uan ijkon Cristo Jesús mochiuako ya in kachi ueyi tiopixkatsin para sen nachipa ijkon keme ne uejkautiopixkat Melquisedec” (Heb 6:17-20).