¿Keyej kampa yeski amo tetakachiuajok? | ¿Toni kijtoua Biblia?

Axkan okachi miakej amo tetakachiuajok: akin mopajtitij kintsatsajtsiliaj tapajtianij, akin takuatij itech se restaurante kinajuaj akin tekitij ompa, akin youij itech avión kinuijuikaltiaj akin ompa tapaleuiaj, konemej taixnamikij uan kinkejkelouaj inintamachtijkauan, kinixnamikij uan kintemojmoujtiaj. Uan no, seki políticos eliuistitinemij uan oksekin kijtojtinemij ke semi tetakachiuaj.

Biblia techmelauilia keniuj kinamiki se monejnemiltis, uan no kinextia keyej axkan kampa yeski amo tetakachiuajok.

¿Keyej kampa yeski amo tetakachiuajok?

Kampa yeski moita ke miakej amo kuali monejnemiltiajok, amo kiitaj maj mochiua tein kuali, amo kichiuajok tein kimatij ke kuali yetok uan amo tetakachiuaj kemej momattoyaj kichiuaskej.

• Se escuesta tein yankuixtok kichiujkej, kinextij ke akin nemij Estados Unidos kinemiliaj itech nochi nejon altepet axkan okachi amo yeknemijok ke itech 22 xiujmej tein panouanij.

• No kinchiuilijkej se encuesta kemej 32,000 akin nemij itech 28 países, uan 65% kijtoj ke axkan okachi amo tetakachiuajok.

Biblia kijtojka ke akin nemij axkan semi amo kuali monejnemiltiskiaj.

• “Itech tonalmej keman tatamitiya, tein mochiujtos semi ouij yeski uan tamouilil. Porin tel miakej sayoj yejuan motasojtaskej; semi kitemoskej motomintiskej, moueyichiuaskej ininselti, moueyimatiskej, teuijuikaltiskej, amo kintakamatiskej inintatuan, amo motasojkamatiskej, [...] amo motsakuiliskej, [uan] kichiuaskej tein tel fiero” (2 Timoteo 3:1-3).

Para tikonmatis keniuj nejin tajtolmej mochiujtokya itech nejin tonalmej, xikonlero tamachtilis “¿Predijo la Biblia cómo sería la gente en nuestros días?”.

Tein techpaleuia maj tikmatikan keniuj kinamiki timonejnemiltiskej

Maski axkan noyampa semi amo tetakachiuaj, tel miakej kiitanij ke Biblia tapaleuia maj se kimati keniuj kinamiki timonejnemiltiskej. Tein techiluia “nochipa takuaujtamach, axkan uan nochipaya” (Salmo 111:8). Seki tein techiluia yejua nejin:

• Tein kijtoua Biblia: “Xikinchiuilikan oksekin nochi tein nankiuelitaskiaj maj namechchiuilikan” (Mateo 7:12).

  Tein kijtosneki: Moneki tiyeskij tikualtakamej iniuan oksekin uan tikintakachiuaskej kemej tikuelitaskiaj maj ijkon kichiuakan touan.

• Tein kijtoua Biblia: “Axkan ke amo nantakajkayauajok nion tepitsin, ximoiluikan tein melauak se iuan okse” (Efesios 4:25).

  Tein kijtosneki: Maj amo keman titakajkayauakan.

Uelis tikonleros nejin para tikonmatis okachi:

• Amaix Tanejmachtijkej tein itokay “¿Toni techpaleuis maj tikmatikan toni kuali yetok?”.

• Tamachtilis “¿Techiluia Biblia maj titetakachiuakan?”.