¿Keniuj moneki yeski akin yekmelauj kitojtoka Cristo? | ¿Toni kijtoua Biblia?

Noyampa taltikpak miakej moueyitaliaj porin kijtouaj ke kitojtokaj Cristo. Sayoj ke kichiuaj seki taman tein ika kinyolkokouaj oksekin. Sekin nexikolmej, amo kijtoua tein melauj, amo tapoujkaitaj, uan hasta kinkajkayauaj ininnamik iuan aksa. Yejua ika miakej motajtaniaj, ¿keniuj moneki yeski akin yekmelauj kitojtoka Cristo?

Toni moneki kichiuas akin yekmelauj kitojtoka Cristo

Akin yeski uelis kijtos ke kitojtoka Cristo, sayoj ke nejon amo moneki sayoj se kijtos. Biblia kinextia toni moneki kichiuas akin yekmelauj kitojtoka Cristo (Hechos 11:26). Jesús kijtoj: “Komo nochipa nankichiuaj tein nitamachtia, yekmelauj nanyeskij nannomomachtijkauan” (Juan 8:31). Tein melauj, amo akin ueli kitakamati nochi tein tamachtij Jesús. Maski ijkon, akin yekmelauj kitojtoka Cristo mochikaua kichiuas tein tamachtij, uan mojmostaj kichiua tein yejua kichiuak. Maj tikitakan seki taman tein kijtoj uan tein kichiuak.

Akin yekmelauj kitojtokaj Cristo kintasojtaj oksekin

Tein kijtoj Jesús: “Namechmaka se yankuik tanauatil: ximotasojtakan se iuan okse; ijkon kemej nejua namechtasojta, namejuan no ximotasojtakan se iuan okse. Ijkon nochin kimatiskej ke namejuan nannomomachtijkauan: komo namotasojtaj se iuan okse” (Juan 13:34, 35).

Tein kichiuak Jesús: Jesús yekmelauj kintasojtak nochin. Yejua amo kiitaya ox kipiayaj tomin nion de kani kayomej katkaj. Kinpajtij akin mokokouayaj, kintamakak akin mayanayaj uan hasta motemakak maj kimiktikan por oksekin (Mateo 14:14-21; 20:28).

Tein kichiuaj akin yekmelauj kitojtokaj Cristo: Kinextiaj ke yekmelauj kintasojtaj oksekin keman kinpaleuiaj, amo kinchikoitaj uan tetapojpoluiaj. No kinpaleuiaj akin tajyouijtokej uan hasta kikauaj seki taman para kinpaleuiskej oksekin (1 Juan 3:16).

Akin yekmelauj kitojtokaj Cristo amo takajkayauaj

Tein kijtoj Jesús: “Nejua tein melauak” (Juan 14:6).

Tein kichiuak Jesús: Jesús nochipa kichiuak tein kuali yetok uan amo keman takajkayauak. Amo keman kinchiualtij oksekin tein yejua kinekia, nion kijtouaya teisa tein amo melauak para maj oksekin kineltokilikan. Nochin kimatiaj ke yejua kijtouaya tein melauak maski nejon kikuejmolkalakiskia (Mateo 22:16; 26:63-67).

Tein kichiuaj akin yekmelauj kitojtokaj Cristo: Amo takajkayauaj nion tachtekij. Kiixtauaj impuestos, kuali tekitij uan tekitij horas tein ixyetok tekitiskej (Romanos 13:5-7; Efesios 4:28). Amo kinkajkayauaj oksekin para kinkuiliskej tomin, amo tacopiarouaj itech exámen, nion takajkayauaj keman kitemouaj tekit nion takajkayauaj itech okseki amamej (Hebreos 13:18).

Akin yekmelauj kitojtokaj Cristo kualtakamej iniuan nochin

Tein kijtoj Jesús: “Xiualakan nouan, nochin namejuan akin chikauak nantekitij uan nantamamajtokej uan nejua namechyolseuis. Nouan xitekitikan uan ximokauakan maj namechmachti, porin niyolnejmach uan niyolyemanik, uan ijkon nanyolseuiskej. Porin amo ouij se tekitis nouan uan notamamal amo semi etik” (Mateo 11:28-30).

Tein kichiuak Jesús: Jesús katka kualtakat uan kualtsin uelia iuan tajtouayaj. Kiuelitaya yetos iuan konemej, kinyolchikauaya akin tayokoxtoyaj uan kinpoujkaitaya oso kintakachiuaya nochin (Marcos 10:13-15; Lucas 9:11).

Tein kichiuaj akin yekmelauj kitojtokaj Cristo: Kualtsin kinnojnotsaj oksekin; amo teyolkokouaj nion kinpinaujtiaj oksekin (Efesios 4:29, 31, 32). Kintekipachoua tein kipanouaj oksekin uan kitemouaj keniuj kinpaleuiskej (Gálatas 6:10).

Akin yekmelauj kitojtokaj Cristo amo kinkajkayauaj ininsiuatsin oso inintakatsin iuan okse

Tein kijtoj Jesús: “Maj amo akin kixelo tein Dios kisentilij” (Marcos 10:9).

Tein kichiuak Jesús: Maski Jesús amo keman monamiktij, kiniluij takamej uan siuamej akin monamiktijkajya maj amo mokajkayauakan (Mateo 19:9). No kinyekiluij toni uelis kichiuas maj mokauakan (Mateo 5:28).

Tein kichiuaj akin yekmelauj kitojtokaj Cristo: Amo kichiuaj teisa tein uelis kichiuas maj inintakatsin oso ininsiuatsin moyolkokokan (Hebreos 13:4). Takatsin uan siuatsin akin monamiktijkejya motasojtaj uan mopoujkaitaj oso motakachiuaj (Efesios 5:28, 33).