¿Keyej mopatatok taltikpak? ¿Toni kijtoua Biblia ke techpanos?

“Mopatatokya taltikpak. Amo uelisok tinemiskej nikan” (The Guardian).

Miakej kichiujtokej maj taltikpak okachi uejueliui. Seki taixmatinij kinemiliaj ke akin nemij nikan kichiujtokej maj okachi takauani itech taltikpak. Kemej okachi takauani mopatatok miak taman nikan taltikpak uan semi tauejueliujtok. Maj tikitakan toni mochiujtok:

• Seki tonalmej okachi takauani, tauaki, tetsaujkakioui, uan panotok okseki taman tein kichiujtok maj taapexoni uan maj motatikui koujtaj.

• Pattoka nochi hielo tein onkak Ártico uan miakkan.

• Mar okachi ueyixtok.

Noyampa taltikpak momachilijtok keniuj nochi mopatatok. Se periódico kijtoj toni panotoya itech 193 altepemej uan no kijtoj : “Taltikpak motsajtsilijtok maj kipaleuikan”. Nochi nejin kichiujtok maj miakej tajyouikan uan maj momikilikan, yejua ika Organización Mundial de la Salud kijtoua ke “yejua nejon tein kichiuas maj nochin tajyouikan”.

Sayoj ke, uelis tikneltokaskej ke satepan okachi kuali tinemiskej. Biblia ipa kijtojkaya ke panoskia tein axkan panotok uan no techpaleuia maj tikneltokakan ke Dios tayektalis uan ke kichiuas maj kualtsin tinemikan satepan.

¿Ipa kijtojkaya Biblia ke mopataskia taltikpak?

Kemaj. Axkan semi takauani uan nejon kichiujtok maj mopata taltikpak. Nochi nejon mouika ika tein Biblia kijtojka ke panoskia itech nejin tonalmej.

Tein moijtojka: “Itech tonalmej keman tatamitiya, tein mochiujtos semi ouij yeski uan tamouilil. Porin tel miakej sayoj yejuan motasojtaskej; semi kitemoskej motomintiskej, [...] tekauaskej, [...] amo kinekiskej moyektenkauaskej iniuan oksekin, [...] kinchiuiliskej tein amo kuali inintasojikniuan uan amo takakiskej” (2 Timoteo 3:1-4).

Biblia kijtojka tein kichiuaskiaj miakej uan keniuj tamatiskiaj, nochi nejon kichiujtok maj taltikpak uejueliui. Tekiuanij uan akin ueyichiuanimej okachi kitayekanaltiaj tomin uan amo kintekipachoua tein kinpanos oksekin nion tein kinpanos akin nemiskej satepan. Hasta keman kinekij sentekitiskej, amo ueli moyektenkauaj para kiitaskej toni kichiuaskej para maj amo tel takauaniok nion maj uejueliuiok taltikpak.

Tein Biblia achto kijtojka, technextilia ke akin nemij nikan taltikpak amo kipataskej tein kichiuaj nion kichiuaskej teisa para maj amo kisentoka uejueliok taltikpak. Biblia kijtoua ke yejuan “okachi kichiuaskej tein amo kuali” (2 Timoteo 3:13).

Keyej senkis tikmatij ke Dios kiyektalis taltikpak

Biblia kijtoua ke Jehováa akin kichijchiuak nochi tein onkak, kineki maj amo uejueliok taltikpak uan ininka motekipachoua akin ompa nemij. Maj tikitakan eyi textos tein kinextiaj ke Dios kiyektaliti taltikpak:

1. 1. Dios “amo nenkaj kichijchiuak [taltikpak], ta kichijchiuak para maj ompa nemikan” (Isaías 45:18).

   Dios kichiuas tein kiixtalijka maj mochiua nikan taltikpak (Isaías 55:11). Amo kikauas maj kiuejuelokan nion maj amo akin nemiok itech taltikpak.

2. 2. “Nochin akin yolyemankej ininaxka yeski taltikpak uan tel kuali nemiskej porin yolseujtoskej. […] Akin yolmelaujkej ininaxka yeski taltikpak uan ompa nemiskej nochipaya” (Salmo 37:11, 29).

   Dios kijtoua ke uelis tinemiskej nochipaya nikan taltikpak uan tiyolseujtoskej.

3. 3. “Akin amo yolkualmej ixpoliuiskej den taltikpak” (Proverbios 2:22).

   Dios kijtoua ke kinixpolos akin kiixtaliaj kichiuaskej tein amo kuali uan no akin kiuejuelojtokej taltikpak.

Tein Dios kichiuas para kuali tinemiskej

¿Keniuj Dios kichiuas tein kijtoj ke kichiuaskia nikan taltikpak? Yejua kikuis iTaixyekanalis para kichiuas. ITaixyekanalis Dios taixyekanas itech nochi taltikpak (Mateo 6:10). Ualtaixyekanas desde iluikak. Amo monekis motenkauas teisa iniuan okseki tekiuanij para kiyektalis taltikpak. ITaixyekanalis Dios kinixpatas tekiuanij tein moajsij nikan taltikpak (Daniel 2:44).

Semi kualtsin tein Dios kichiuati para techpaleuis uan para kiyektalis taltikpak (Salmo 96:10-13). Xikonita tein Jehová kichiuas keman taixyekantosya:

• Kiyektalis taltikpak

  Tein Biblia kijtoua: “Yolpakiskej akin nemij taluakyan uan kampa tauaktok. Yolpakiskej akin nemij taluakyan uan kemej yeskia taxochiouas kemej azafrán” (Isaías 35:1).

  Keniuj techpaleuis nejon: Jehová kiyektalis taltikpak, maski miakkan semi tauejuelojkejya.

• Kichiuas maj amo tel takauani nion maj tel taseseya

  Tein Biblia kijtoua: “[Jehová] kichiua maj amo chikauakok taejeka, uan maj at amo moajkotamotaok” (Salmo 107:29).

  Keniuj techpaleuis nejon: Jehová uelis kitsakuilis ejekat uan tonal uan okseki taman tein onkak itech taltikpak. Amo akin tajyouisok porin tel chikauak takauani oso porin tel taseseya.

• Techmachtis keniuj tikyekpiaskej taltikpak

  Tein Biblia kijtoua: “Nimitspaleuis xiyektanemili uan nimitsmachtis keniuj kuali titaixpejpenas” (Salmo 32:8).

  Keniuj techpaleuis nejon: Jehová kinnauatij akin nemij nikan maj kiyekpianij taltikpak (Génesis 1:28; 2:15). Yejua techmachtis keniuj kuali tikchiuaskej nejon. Tikmatiskej keniuj tikyekpiaskej tein Dios kichijchiuak uan keniuj kualtsin tinemiskej iuan nochi tein kichijchiuak.