¿Uelis mundial de fútbol kichiuas maj nochin kuali mouikakan? | ¿Toni kijtoua Biblia?

Itech nochi taltikpak kemej 5.000 millones kiitaskej Copa Mundial tein kichiua FIFA, tein peuak 20 de noviembre uan tamis 18 de diciembre 2022. Miakej kinemiliaj ke keman mauiltiaj akin kayomej itech tataman altepemej kemej itech nejin mundial, uelis kichiuas maj nochin kuali mouikakan.

• “Mauiltilis uelis kipatas tein mochiua itech taltikpak, techyolchikaua para maj tiuelikan tikchiuakan tein tiknejnekij uan kichiua maj nochin kuali mouikakan” (Nelson Mandela, katka tekiuaj ompa Sudáfrica).

• “Fútbol [...] tapaleuia maj nochin kuali mouikakan porin kichiua maj kichiakan tein kuali, maj yolpakikan, maj motasojtakan uan maj amo kinchikoitakan oksekin” (Gianni Infantino, kiixyekana FIFA).a

¿Uelis kichiuas maj kuali timouikakan mundial de fútbol oso keman mauiltiaj akin kayomej itech tataman altepemej? ¿Se tonal nochin kuali tietoskej uan kuali timouikaskej?

¿Kichiua maj nochin kuali mouikakan?

Itech mundial tein mochiujtok nejin xiuit amo sayoj ika motajtoua fútbol. Ta no kichiuani maj miakej motajtolteuikan porin kinekij maj nochin kuali kinitakan, maj amo techikoitakan uan maj amo sayoj sekin kipiakan miak tomin.

Maski ijkon, miakej kinemiliaj ke keman mauiltiaj akin kayomej itech tataman altepemej kemej mundial de fútbol, kichiua maj miakej yolpakikan. Sayoj ke maski miakej kiuelitaskiaj, nejin amo kichiua maj nochipa kuali mouikakan, ta miakpa moxejxelouaj porin tataman tein kinemiliaj uan kichiuaj. Biblia ipa kijtojkaya ke miakej ijkon kichiuaskiaj itech “tonalmej keman tatamitiya” (2 Timoteo 3:1-5).

Tein kichiuas maj nochin kuali mouikakan

Biblia kijtoua ke yekmelauj uelis tikchiaskej maj nochin kuali mouikakan. Kijtoua ke nochin akin nemij itech taltikpak kuali mouikaskej uan kinixyekanas se tekiuajyot tein moajsi iluikak, “iTaixyekanalis Dios” (Lucas 4:43; Mateo 6:10).

Tekiuaj itech nejon taixyenakalis, Jesucristo, kichiuas maj noyampa taltikpak nochin kuali mouikakan. Biblia kijtoua:

• “Akin yolmelauak kualtsin nemis, nochin semi yolseujkanemiskej” (Salmo 72:7).

• “Yejua kimakixtis pobre akin tsajtsi maj kipaleuikan [...] Kinmakixtis de akin kintajyouiltia uan kinkojkokoua” (Salmo 72:12, 14).

Itech nejin tonalmej, tein Jesús tamachtij kichiuani maj kuali mouikakan miak millones itech 239 altepemej uan xolalmej, uan kinpaleuiani maj amo motauelitakan. Komo tikonneki tikonmatis okachi, xikonita tamachtilismej “Uelis tikchiuaskej maj motsakuili netauelitalis”.