Lunes 15 metsti septiembre
Nokniuan, xikchiuakan kemej tanauatianij akin tajtojkej itokaykopa Jehová. Yejuan taxikojkej maski tajyouijkej uan amo yolijsiujkej (Sant. 5:10).
Biblia no ininka tajtoua miakej akin amo yolijsiujkej. Uelis mitsonpaleuis komo tionmomachtia tein kichiujkej. Kemej tein kipanok David, yejua katka semi telpoch keman kiixpejpenkej maj kinixyekanani israelitas, sayoj ke monekik mochias miak xiujmej para uelis taixyekanas. Simeón uan Ana amo keman kikaujkej Jehová keman kichixtoyaj maj ejko Mesías akin moijtojka ke ualaskia (Luc. 2:25, 36-38). Keman tionmomachtijtos tein kichiujkej, xionmotajtani: “¿Toni kipaleuij maj amo yolijsiui? ¿Keniuj kipaleuij maj amo yolijsiui? ¿Keniuj no uelis ijkon nikchiuas?”. No semi mitsonpaleuis keman tionmomachtis tein kichiujkej akin yolijsiujkej (1 Sam. 13:8-14). Uelis tionmotajtanis: “¿Keyej yolijsiujkej? ¿Toni tein amo kuali kinpanok porin yolijsiujkej?”. w23.08 25 § 15
Martes 16 metsti septiembre
Tejuan titaneltokakej uan tikmatij ke Dios mitsualtitanik (Juan 6:69).
Tatitanil Pedro amo kikauak maj nion teyi kitsakuiliani maj kitojtoka Jesús. Yejua kinextij ke amo tekauaya keman Jesús kijtoj se taman tein imomachtijkauan amo kiajsikamatkej (Juan 6:68). Miakej kikaujteujkej Jesús uan amo kikaujkej maj kinmelauiliani nion kitajtanijkej toni kijtosnekia tein kijtojka. Sayoj ke Pedro amo ijkon kichiuak. Yejua kijtoj ininixpan nochin ke sayoj tein tamachtiaya Jesús “kichiua maj se nemi nochipaya”. Jesús ipa kimatiaya ke Pedro uan okseki itatitaniluan kikaujteuaskiaj. Maski ijkon, Jesús kiluij Pedro ke kimattoya ke oksepa mokepaskia uan kisentokaskia kitekitiliskia Jehová (Luc. 22:31, 32). Jesús kimatia ke kinekia kichiuas ‘tein kuali, sayoj ke inakayo tein tajtakolej, amo chikauak’ katka (Mar. 14:38). Yejua ika, maski Pedro kijtojka ke amo kiixmatia Jesús, yejua amo kinemilij ke Pedro amo mopataskiaok. Satepan ke Jesús oksepa nemik, monextij iixpan Pedro, xa keman iselti yetoya (Mar. 16:7; Luc. 24:34; 1 Cor. 15:5). Xa nejin semi kiyolchikauak Pedro porin semi kitayokoltiaya tein kichiujka. w23.09 22 § 9, 10
Miércoles 17 metsti septiembre
Yolpakij akin kintapojpoluilianij tein amo kuali tein kichiujkej uan akin kinelkauilianij inintajtakoluan (Rom. 4:7).
Jehová senkis kintapojpoluia inintajtakoluan nochin akin iuan takuaujtamatij, kinelkauilia nochi tein kichiujkej (Sal. 32:1, 2). Yejuatsin kiita ke yolmelaujkej uan yolchipaujkej porin takuaujtamatij. Maski Abrahán, David uan okseki itekitikauan Jehová katkaj yolmelaujkej, ipa katkaj tajtakolejkej uan mopolouayaj. Sayoj ke kemej iuan takuaujtamatiaj Dios, yejuatsin kinitak ke katkaj yolchipaujkej, okachiok keman kinitaya akin amo kiueyichiuayaj (Efes. 2:12). Keman tatitanil Pablo kintajkuilouilij akin yetoyaj Roma, kijtoj ke semi moneki maj titakuaujtamatikan para kuali timouikaskej iuan Jehová. Abrahán uan David kuali mouikakej iuan Jehová porin iuan takuaujtamatiaj, uan tejuan no uelis kuali iuan timouikaskej komo titakuaujtamatij. w23.12 3 § 6, 7