Sábado 27 metsti septiembre
Dios kikui ichikaualis tein techmaka para technextilis ke techtasojta (Rom. 5:5).
Nejin versículo kiteajsikamatiltia ke Jehová semi kintasojta taijitalmej. Se amaix kijtoua ke semi kintasojta kemej at tein chikauak motaloua. ¡Tel kualtsin kemej Jehová kinextia keniuj semi kintasojta tokniuan taijitalmej! Yejuan kimatij ke ‘Dios kintasojta’ (Jud. 1). Tatitanil Juan kijtoj tein kimachiliaya keman kijkuiloj: “¡Xikitakan keniuj semi techtasojta toTajtsin Dios porin hasta techiluia ke tiikoneuan!” (1 Juan 3:1). ¿Kintasojta Jehová sayoj taijitalmej? Amo, ta kemej tikitaskej, Jehová kintasojta nochin itekitikauan. ¿Keniuj Jehová kinextiani ke semi techtasojta? Yejuatsin kitemakak iKonetsin maj toka momikili. Tein kichiuak kinextia ke sayoj yejuatsin okachi techtasojta (Juan 3:16; Rom. 5:8). w24.01 28 § 9, 10
Domingo 28 metsti septiembre
Tonal keman nimitstatautis xinechpaleui, akin nechixnamikij choloskej. Kuali nikmati ke Dios nouan yetok (Sal. 56:9).
Nejin versículo kinextia okse taman tein kichiuak David keman mouia maj kimiktikan: itech tanemilij tein Jehová kichiuaskia satepan. David kimatia ke Jehová kimakixtiskia keman monekiskia porin yejuatsin motenkaujka ke mochiuaskia tekiuaj ompa Israel (1 Sam. 16:1, 13). David no kimatia ke ipa mochiuaskia porin Jehová motenkaujka. ¿Toni motenkauani Jehová touan? Yejuatsin amo motenkauani ke axkan amo tikpiaskej ouijkayomej. Sayoj ke maski axkan tikpiaskej tein yeski ouijkayot, Jehová motenkaua ke itech yankuik taltikpak kiixpolos nochi nejon (Is. 25:7-9). Uelis tikneltokaskej ke kipia chikaualis para techpajtis, para kinixpolos akin techtauelitaj uan para kichiuas maj oksepa nemikan akin momikilijkejya (1 Juan 4:4). w24.01 6 § 12, 13
Lunes 29 metsti septiembre
Yolpaki akin kitapojpoluiaj keman kitapanauilia tanauatil, akin kitapojpoluiaj itajtakol (Sal. 32:1).
Maj tiknemilikan keyej timotemaktijkej uan timoauijkej. Tikchiujkej nejin porin tiknekiaj tiktekitiliskej Jehová. Xikonelnamiki toni mitsonpaleuij xikonneltoka ke yejua nejin tein melauak. Peuak tikonixmati Jehová, uan peuak tikonpoujkaita uan tikontasojta kemej moTajtsin. Okachi peuak tiontakuaujtamati uan tionmoyolpatak. Peuak amo tikonchiuaok tein Jehová kitauelita uan tikonchiua tein kiyolpaktia. Kuali tionmomachilij keman tikonitak ke Dios mitsontapojpoluijtoya (Sal. 32:2). Tikonixtalij tionyas nechikolmej uan tikontapouis oksekin tein tionmomachtiaya. Kemej tionmotemaktijya iuan Dios uan tionmoauijya, kinextia ke tikonchiujtokya tein mitsonpaleuis xionnemi nochipa uan ke tikonixtalijya ijkon tikonsentokas (Mat. 7:13, 14). Maj tiksentokakan tiyekijkatokan uan maj amo timotsinkixtikan, maj nochipa tikixtalikan tiktasojtaskej Jehová uan maj tiktakamatikan itanauatiluan. w23.07 17 § 14; 19 § 19