Tein mokui keman tikitaj Tein timomachtiaj itech nechikol Tonemilis uan toTanojnotsalis
3-9 METSTI ABRIL
TAMACHTILIS TEIN KIPIA BIBLIA | JEREMÍAS 17-21
Tein moixtajtoltia itech Biblia
(Jeremías 21:3-14) Uan Jeremías kiniluij: “Yejua nejin tein nankiluiskej Sedequías: 4 ‘Nejin yejua tein kijtoua Jiova iDios Israel: “Xikita, nikchiuas maj namechixnamikikan ika teposmej tein ika nantateuiaj tein moajsij nanmomako, tein ika nankiteuijtokej akin tekiuajti Babilonia uan caldeos akin namechyoualojtokej kalampa itech tepamit. Uan nikinsentilis itajkotian nejin xolal. 5 Uan nejua namechteuis ika nomay tein nikmelaujtok uan ika nomay tein chikauak uan ika ueyi kualanyot. 6 Uan nikintatsakuiltis akin nemij itech nejin xolal, takat ijkon kemej tapial. Ika se ueyi kokolis momikiliskej”’. 7 ”‘“Uan satepan ke panos nejon, kijtoua Jiova, tekiuaj Sedequías akin taixyekana Judá uan itakeualuan uan ixolal, akin amo kinmiktis ueyi kokolis, espada uan mayan, nikintemakas imako Nabucodorosor akin tekiuajti Babilonia, hasta ininmako akin kintauelitaj akin kitemouaj kinmiktiskej. Yejua kinmiktis ika espada. Senkis amo kiniknelis.”’ 8 ”Uan nejin xolal tikiluis: ‘Yejua nejin tein kijtoua Jiova: “Nikan niktalia nanmoixpan ojti tein teuika itech nemilis uan ojti tein teuika itech mikilis. 9 Akin mokauaskej itech nejin xolal mikiskej ika espada uan ika mayan uan ika ueyi kokolis; sayoj ke akin kisaskej uan motemakaskej ininmako caldeos akin namechyoualojtokej kisentokaskej nemiskej, uan ininnemilis kisentokas yeski ininaxka”’. 10 ”‘“Porin nikixtalijya niktatsakuiltis nejin xolal, kijtoua Jiova. Niktemakas imako akin tekiuajti Babilonia, uan yejua kichichinos ika tit.” 11 ”’Xikakikan itajtol Jiova akin nanpouij ichan akin tekiuajti Judá. 12 Ichan David, yejua nejin tein kijtoua Jiova: “Mojmostaj kualkampa xikpaleuikan melaujkayot, uan xikmakixtikan akin kitachtekijkej tachtekinij ika takajkayaualis, uan ijkon amo kisas nokualanyo kemej tit uan xotas uan amo akin uelis kiseuis porin tel amo kuali tein nankichiuaj”.’ 13 ”‘Nimitsixnamikiti, tejua akin tinemi ixtauat, tejua tet tein timoajsi tamanispan, kijtoua Jiova. Uan namejuan akin nankijtojtokej: “¿Akoni temos techixnamikikiuj? ¿Uan akoni kalakis tochan?”, 14 nejua no namechtajtanis xitanankilikan noixpan ika tein nankichiuanij, kijtoua Jiova. Uan nikxotaltis se tit itech ikoujtaj, uan kitamichichinos nochi tein kiyoualoua’”.
10-16 METSTI ABRIL
TAMACHTILIS TEIN KIPIA BIBLIA | JEREMÍAS 22-24
Tein moixtajtoltia itech Biblia
(Jeremías 23:25-36) Nejua nikakini tein tanauatianij kijtouanij akin notokaykopa kitematiltijtokej tein amo melauak: ‘¡Nikochitani teisa! ¡Nikochitani teisa!’. 26 ¿Hasta kemanian kisentokas nejin itech ininyolo tanauatianij akin kitematiltijtokej tein amo melauak? Yejuan tanauatianij akin amo melaujkej itech ininyolo. 27 Yejuan kitemouaj kichiuaskej maj noxolal kielkaua notokay ika takochitalismej tein motapouiaj se iuan okse, ijkon kemej inintatuan kielkaujkej notokay porin kiueyichiujkej Baal. 28 Tanauatijkej akin takochitak, maj kijto tein kikochitak; sayoj ke akin kipia notajtol, maj kijto notajtol ika melaujkayot.” “¿Keniuj mouika sakat uakik iuan tatet?”, kijtoua Jiova. 29 “¿Amo tamati notajtol kemej se tit, kijtoua Jiova, uan kemej se martillo tein kitajtapana tepejxit?” 30 “Yejua ika, nikinixnamikiti tanauatianij, kijtoua Jiova, akin kiichtektokej notajtoluan se iuan okse.” 31 “Nikinixnamikiti tanauatianij, kijtoua Jiova, akin kikuij ininnenepil uan kitematiltiaj: ‘¡Yejua kijtoua!’.” 32 “Nikinixnamikiti tanauatianij akin kikochitanij tein amo melauak, kijtoua Jiova, akin kitetapouiaj uan kipojpolouaj noxolal ika inintakajkayaualis uan ininueyinekilis.” “Sayoj ke nejua amo nikintitanik nion nikinnauatij. Yejua ika nion tepitsin kipaleuiskej nejin xolal”, kijtoua Jiova. 33 “Uan keman nejin xolal, oso se tanauatijkej, oso se tiopixkat, mitstajtanis: ‘¿Katiyejua itamamal Jiova?’, tikinnankilis: ‘“¡Namejuan nanmochiuaj itamamal! Uan namechsenkauas”, kijtoua Jiova’. 34 Keman tanauatijkej oso tiopixkat oso xolal kijtos: ‘¡Yejua nejin itamamal Jiova!’, amo ijkon nikauas nejon takat uan ichan. 35 Yejua nejin tein nankisentokaj nankiniluiaj oksekin uan namoikniuan: ‘¿Toni tanankiliani Jiova? ¿Uan toni kijtouani Jiova?’. 36 Sayoj ke amo ika xitajtokanok itamamal Jiova, porin tamamal yejua tein nankijtouaj nansejsemej, uan nankipatanij itajtoluan Dios akin yoltok, Jiova akin kinixyekana tateuianij, toDios.
17-23 METSTI ABRIL
TAMACHTILIS TEIN KIPIA BIBLIA | JEREMÍAS 25-28
Tein moixtajtoltia itech Biblia
(Jeremías 27:12-22) Uan no ijkon nikiluij tekiuaj Sedequías akin taixyekana ompa Judá keman nikijtoj: “Xiktalikan nanmokechko iyugo akin tekiuajti Babilonia, xiktekitilikan yejua uan ixolal uan xiksentokakan xinemikan. 13 ¿Keyej monekiskia timomikilis tejua uan moxolal ika espada, ika mayan uan ika ueyi kokolis, ijkon kemej Jiova kijtouani ke kipanos altepet tein amo kitekitilis akin tekiuajti Babilonia? 14 Amo xikakikan inintajtoluan tanauatianij akin namechiluijtokej: ‘Namejuan amo nankitekitiliskej akin tekiuajti Babilonia’, porin kitematiltijtokej takajkayaualis. 15 ”‘Porin nejua amo nikintitanini, kijtoua Jiova; sayoj ke kitematiltijtokej takajkayaualis notokaykopa, porin ika kitemouaj maj namechmoyaua uan xiixpoliuikan, namejuan uan tanauatianij akin mitsmatiltijtokej nejon’”. 16 Uan nikiniluij tiopixkamej uan nochi xolal: “Yejua nejin tein kijtoua Jiova: Amo xikakikan inintajtoluan tanauatianij akin namechmatiltijtokej: “¡Xikitakan! ¡Manamikmej tein pouij ichan Jiova tein moajsij ompa Babilonia oksepa niman kinualkuitokej!”. Porin amo melauak tein kiteixmatiltijtokej. 17 Amo xikinkakikan. Xiktekitilikan akin tekiuajti Babilonia uan xiksentokakan xinemikan. ¿Keyej monekiskia ixpoliuis nejin xolal? 18 Sayoj ke komo yejuan yekmelauj tanauatianij uan komo itajtol Jiova moajsi iniuan, ika kualtakayot, xiktataujtikan Jiova akin kinixyekana tateuianij, maj manamikmej tein mokauajok ichan Jiova uan ichan akin tekiuajti Judá uan Jerusalén amo kinuikakan Babilonia’. 19 ”Porin yejua nejin tein kijtoua Jiova akin kinixyekana tateuianij ika nejin taman, kalikximej, ueyiat tein moajsi itech templo, carretillas uan manamikmej tein mokauajok itech nejin xolal, 20 tein amo moaxkatilij Nabucodonosor akin tekiuajti ompa Babilonia keman Jeconías ikoneuj Jehoiaquim, akin tekiuajti Judá, akin moajsia Jerusalén uan kiuikakej hasta Babilonia, iniuan nochin ueyichiuanimej akin moajsiaj ompa Judá uan Jerusalén; 21 kemaj, yejua nejin tein kijtoua Jiova akin kinixyekana tateuianij, iDios Israel, ika manamikmej tein mokauajok ichan Jiova uan ichan akin tekiuajti Judá uan Jerusalén: 22 ‘“Ompa Babilonia kinuikaskej, uan ompa mokauaskej hasta keman nejua nikijtos”, kijtoua Jiova. “Uan oksepa nikinkepas uan nikinyekchijchiuas nikan”’”.
24-30 METSTI ABRIL
TAMACHTILIS TEIN KIPIA BIBLIA | JEREMÍAS 29-31
Tein moixtajtoltia itech Biblia
(Jeremías 31:31-40) “¡Xikita! Uitsej tonalmej, kijtoua Jiova, keman nikchiuas se yankuik netenkaualis iuan ichan Israel uan ichan Judá. 32 Amo yeski kemej netenkaualis tein nikchiuak iniuan ininuejkaujtatuan itech tonal keman nikinkixtij itech tal Egipto, ‘netenkaualis tein yejuan amo kitakamatkej, maski nejua nikatka ininteko’, kijtoua Jiova.” 33 “Porin yejua nejin netenkaualis tein nikchiuas iuan ichan Israel satepan ke panoskej nejon tonalmej, kijtoua Jiova. Niktalis notanauatil itech inintanemilil, uan itech ininyolo nikijkuilos. Uan nimochiuas ininDios, uan yejuan mochiuaskej noxolal.” 34 “Uan amo monekisok kimachtiskej okse taltikpaknenkej oso ininikniuj, keman kijtoskej: ‘¡Xikixmatikan Jiova!’, porin nochin yejuan nechixmatiskej, akin nojnel hasta akin xiuejya, kijtoua Jiova. Porin nikintapojpoluis ininnepololuan, uan amo nikelnamikisok inintajtakol.” 35 Yejua nejin tein kijtoua Jiova, akin sejse tonal kitemaka tanex ika tonaltsin, akin kiixtalia keniuj metsti uan sitalimej kitemakaskej tanex itech youak, akin kiajkotamota ueyiat uan kichiua maj kakistikan olas, itokay yejua Jiova akin kinixyekana tateuianij: 36 “‘Komo nejin tein moixtaliani amo mochiuaskia, kijtoua Jiova, sayoj ijkon ichankauan Israel amo yeskiajok altepet noixpan nochipaya’”. 37 Yejua nejin tein kijtoua Jiova: “‘Komo iluikak ueliskia motamachiuas, uan ueliskia se kimatis tein kipia taltikpak kampa tsineua, sayoj ijkon ueliskia nikinixtopeuas nochin akin ualeuaj itech ichankauan Israel ika nochi tein kichiuanij’, kijtoua Jiova”. 38 “¡Xikita! Uitsej tonalmej, kijtoua Jiova, keman kichijchiuiliskej Jiova altepet tein peuas kampa yetok Torre de Hananel hasta itech Puerta de la Esquina. 39 Uan mekat tein ika se tatamachiua kisas kampa ika tepet tein poui Gareb, uan tamalakachos hasta Goá. 40 Uan nochi kampa tamanis kampa moajsij mikemej uan koujnex, uan tal tamanis hasta talmej kampa amo tepeyoj tein poui Cedrón, hasta kampa moajsi Puerta de los Caballos kampa tonalkisayampa, moajsis yektik iixpan Jiova. Amo kemanok kijkuaniskej, nion kixitiniskej.”