Tein tikiniluiaj tetatmej

Tetatmej kinekij maj ininkoneuan kitasojtakan Jiova uan maj iuan motemaktikan. ¿Keniuj uelis kinpaleuiskej maj moauikan? ¿Kemanian uelisya kichiuaskej nejon tein semi moneki?

Jesús kiniluij itatojtokakauan: ‘Xiyakan, xikinchiuakan nomomachtijkauan uan xikinauikan’ (Mat. 28:19). Yejua ika, komo aksa kineki moauis, moneki mochiuas imomachtijkauj Cristo. Nejon kijtosneki ke amo sayoj kineltoka uan kiajsikamati tein Jesús tamachtij, ta no kitakamati nochi tein tanauatij. Uan nejon uelis kichiuas hasta akin okachi nojnel.

Xikinkauilikan se kuali neskayot nanmokoneuan uan xikinpaleuikan maj kitasojtakan itanauatiluan Jiova ika nochi ininyolo (Deut. 6:6-9). Ika amaix ¡Uelis tiyolpakiskej nochipaya!, xikinpaleuikan maj kimatikan toni tamachtilismej tayekantokej itech Biblia uan keman taixejekoskej maj moyekanakan ika tein tayolmajxitia iTajtol Dios. Xikonmachti keniuj ika inintajtoluan uelis kimelauaskej tein kineltokaj (1 Ped. 3:15). Kuali nankinojtokaltiskej uan nankinyolchikauaskej kinpaleuis maj moauikan uan maj kisentokakan moskaltikan kemej itatojtokakauan Cristo. No semi moneki maj yejuan momachtikan ininselti, maj momachtikan keman nantaueyichiuaj kemej kalyetouanij, maj yakan nechikolmej uan maj kipiakan kuali tasojiknimej itech nechikol. Uan no, amo xikelkauakan nankinpaleuiskej maj kiixtalikan kiajsiskej tekimej itech nechikol.

Proverbios 20:11 kijtoua: “Hasta se okichpil kiixmatij ika tein kichiua, komo monejnemiltia ika chipaujkayot uan melaujkayot”. ¿Toni tein kichiujtok mokonetsin kinextia ke uelisya moauis?

Biblia kijtoua ke keman Jesús kipiaya 12 xiujmej katka se okichpil tatakamatkej (Luc. 2:51). No ijkon, telpoch oso ichpoch akin kineki moauis moneki kintakamatis itatuan (Hech. 5:29; Col. 3:20). Sayoj ke, mokonetsin kipias nepololmej. Maski ijkon, mochia maj mochikaua kitojtokas ineskayo Jesús uan maj oksekin kiitakan ke tatakamati.

No moneki maj mokonetsin kinexti ke kineki okachi kuali kiixmatis tein kijtoua Biblia (Luc. 2:46). Xionmotajtani: “¿Kineki nokonetsin yas nechikolmej uan tanankilis? ¿Kiuelita kiixtajtoltis uan iselti momachtis Biblia?” (Sal. 122:1; Mat. 4:4).

Okichpipilmej uan siuapipilmej akin kinekij moauiskej mochikauaj kitayekanaltiskej iTekiuajyo Dios (Mat. 6:33). Kiita ke semi moneki kinixmatiltis oksekin tein kineltoka. Tapaleuia itech tataman tanojnotsalis. Amo pinaua kiniluis tamachtianij uan akin iuan momachtia ke yejua itaixpantijkauj Jiova. Uan no, kuali momachtia keman panoua itech nechikol Tonemilis uan toTanojnotsalis.

Mochikaua chipaujkanemis. Yejua ika, kitemoua kuali tasojiknimej uan ika nejmachkayot kiixpejpena tatsotson, películas, tein kiita itech televisión, videojuegos uan tein kiita itech Internet (Prov. 13:20; 1 Cor. 15:33).

Miakej okichpipilmej uan siuapipilmej kiselianij tein melauak uan moauianij porin inintatuan kinpaleuianij. Maj Jiova kitiochiua nochi tein nankichiuaj tein ika nankinpaleuiaj nanmokoneuan maj moauikan uan maj monejnemiltikan kemej Cristo.

Tein tikiluiaj tanojnotskej akin ayamo moauia

Nemachtil ika Biblia mitsonpaleuiani xikonixmati Dios, xiontakuaujtamati itech tein motenkaua kichiuas uan xionmoskalti kemej itatojtokakauj Cristo hasta ke tionmochiuak se tanojnotskej akin ayamo moauia, nejon se kualtsin tatiochiualis. Kuali tein tikonchiuak (Juan 17:3; Heb. 11:6).

Achto ke tionmomachtiskia iniuan itaixpantijkauan Jiova, xa tionpouia itech okse taneltokalis oso senkis amo mitsonyolnotsaya nion se taneltokalis. Xa tikonchiuaya tein Biblia kijtoua ke amo kuali yetok. Sayoj ke kemej tiontakuaujtamatik iuan Jiova kichiuak xionmoyolnonotsa uan maj mitsonyolkoko tein tikonchiuak achto. Uan no tionmopatani, tein kijtosneki ke tikonkauak amo kuali tachiualismej uan senkis tikonixtalij tikonchiuas tein melauak iixpan Dios (Hech. 3:19).

Oso xa tikixmatik tamachtilis tein melauak ijkuak katka tinojnelok, uan nejon mitspaleuiani amo ximonejnemilti kemej se aksa akin amo momachtia Biblia, nion no xiuetsi itech uejueyi tajtakolmej (2 Tim. 3:15). Timomachtijya tikixnamikis tayejyekolis uan tikixtopeuas keman mitschikaujkauiaj xikchiua tein amo kuali. Tiknextiani takuaujtamatilis keman tikpaleuia taueyichiualis tein melauak uan tikteixmatiltia tein timomachtijtok. Uan tikmatis keniuj mochiua tekit itech tanojnotsalis mitsyololiniani xikixtali timochiuas tanojnotskej akin ayamo moauia.

Maski tein yeski xiuit tein tikonpiaya keman tikonixmatik Jiova, xa tikonnemilijtokya tikonchiuas okseki ome taman: tionmotemaktis uan tionmoauis. Timotemaktiaj iuan Dios keman tikchiuaj se netataujtil kampa tikiluiaj ke tikixtalijkejya nochipa tiktekitiliskej (Mat. 16:24). Uan satepan tiknextiaj ke timotemaktijkejya keman timoauiaj (Mat. 28:19, 20). Keman timotemaktiaj uan timoauiaj, timochiuaj tiitekitikauan Dios. ¡Nejin se ueyi tatiochiualis!

Tepitsin satepan keman Jesús moauij “Espíritu kiyekanak [...] ne kampa tayiujkan [oso taluakyan] uan ompa in amokuali Satanás kieleuisuij ika tajtakol [...] para ma motajtakolmakani” (Mat. 4:1). Kemej tionmomachtiani itech Biblia, tejuatsin no tikonixnamikis tayejyekolis uan okachiok satepan keman tionmoauis (Juan 15:20). Xa mitsonixnamikiskej mochankauan oso mitsonkejkeloskej akin iniuan tionmomachtia, tiontekiti oso akin achto kuali iniuan tionmouikaya (Mat. 10:36). Yejua ika, nochipa xikonelnamiki nejin tajtolmej tein Jesús kijtoj: “Uan kuali kichiuas se tagat taneltok[a]ke komo yejua nechyoltasojtas uan kinkautiyas ya ninchan, uan ikniuan taka, uan ikniuan siuame, uan itajtsin uan inantsin, uan nisiuau, uan nipiluan uan nitaluan ten niaxka. Uan in taneltokani komo kikakke ya nochi nijin porin kitasojtaj notokay, yejuan nojonkes kiseliske se makuilpoalpa tatiochiualisme, uan no kiseliske in yek nemilis ten amo keman tamis” (Mateo 19:29). Tein yeski tein panos, amo keman xikonkaua Jiova uan xikontakamati itanauatiluan.

Keman tikonnekis tionmoauis, xikonilui akin kinixyekana tayekananij itech nechikol. Yejuan kiitaskej mouan netajtanilmej tein nikan ixnesij, ijkon kiitaskej ox uelisya tionmoauis. Uelis peuas tikonitas nejon netajtanilmej ijkuak tionmomachtis moselti.

Ijkuak tionmomachtis netajtanilmej, xikonixtajtolti nochi textos uan itech xiontanemili. Uelis tikonijkuilos tein mitsonpaleuis. Keman tionmosentilis iniuan tayekananij uelis tikonitas tein tikonijkuiloj. Komo mitsonouijmaka tikonajsikamatis se netajtanil, xikonilui tokniuj akin iuan tionmomachtia Biblia oso se tayekankej maj mitsonpaleui.

Xiontanankili ika motajtoluan. Uan tein tiontanankilis amo moneki maj ueyak. Okachi kuali xikonijto tanankilil ika motajtoluan. No uelis tikonijtos se oso ome textos tein kipaleuia motanankilil.

Komo tayekananij kiitaj ke ayamo senkis tikonajsikamati tamachtilismej itech Biblia tein tayekantokej, yejuan kiitaskej maj aksa mitsonpaleui xikonajsikamati uan kuali xikonmelaua iTajtol Dios, ijkon satepan uelis tionmoauis.

[Tein moneki kimatiskej tayekananij: Itech páginas 54 hasta 59 moijtoua keniuj moneki mochiuaskej nechikolmej iniuan akin kinekij moauiskej.]