Seki taman tein moneki kielnamikiskej akin moauitij

Miakpa, neauilis mochiua itech uejueyi nechikolmej tein kipiaj itaixpantijkauan Jiova. Keman tokniuj kitamia itanojnots tein kinmaka akin moauitij, kiniluia maj moajokuikan uan maj kinankilikan ika tajtol chikauak nejin ome netajtanilmej:

1. ¿Tionmoyolnonotsakya ika motajtakoluan, tionmotemaktijya iuan Jiova uan senkis tikonneltoka ke Jesucristo yejua akin Dios ika techmakixtia?

2. ¿Tikonajsikamati ke ijkuak tionmoauia tikonnextia sentaixpan ke tionmochiua se itaixpantijkauj Jiova uan ke peua tionpoui itech inechikol Dios?

Keman akin moauitij tanankiliaj “kemaj”, ‘kiyekijtouaj senteixtenoj’ ke takuaujtamatij itech inemilis Jesús tein kitemakak kemej se taxtauil uan ke senkis motemaktijkejya iuan Jiova (Rom. 10:9, 10). Sayoj ke achto monekik motataujtiskej uan tanemiliskej itech nejon netajtanilmej uan ijkon kijtoskej tein yekmelauj kinemiliaj.

¿Tionmotemaktijya iuan Jiova ika se netataujtil, tionmotenkauak ke sayoj yejuatsin tikonueyichiuas uan ke tikontayekanaltis itanejnekilis itech monemilis?

¿Yekmelauj tikonneki tionmoauis niman keman uelis?

¿Toni taman taken kinamiki se kiuikas keman se moauis? (1 Tim. 2:9, 10; Juan 15:19; Filip. 1:10).

Moneki tikuikaskej totaken tein kinextis kuali taixejekolis porin ijkon tikueyichiuaj Dios. Yejua ika, amo kuali yetoskia maj tikuikakan taken tein amo techyektsakua oso tein kipia tajkuilol oso taixkopimej. Moneki kinextis kuali taixejekolis porin nejin se tonal tein semi moneki.

¿Toni taman moneki amo kichiuas aksa ijkuak moauiti? (Luc. 3:21, 22).

Jesús kinkauilij se kuali neskayot akin kichiuaj kemej yejua. Ijkuak yejua moauij kinextij ke amo kiauilmatia nejon. Yejua ika keman moauiti aksa, amo kuali yetoskia maj kamanalo, mauilti, moatamota oso kichiuas okse taman tein kinextis ke amo kipoujkaita nejon tonal. Amo no kuali yetok maj tokniuj akin yekin moauij kichiua seki taman tein ika kinextis kemej yeskia kitanik teisa. Tein melauj nejon tonal semi teyolpaktij, yejua ika moneki se kinextis kuali taixejekolis.

Komo nochipa tionyoui nechikolmej uan tionmouika iniuan tokniuan, ¿keniuj nejon mitsonpaleuis xikonchiua ijkon kemej tionmotenkauak ijkuak tionmotemaktij iuan Jiova?

Satepan ke tionmoauis, ¿keyej semi moneki xikonsentoka nochipa xionmomachti Biblia uan xiontanojnotsa?

TEIN TIKINILUIAJ TAYEKANANIJ

Keman se tanojnotskej kineki moauis, moneki kiluiskej maj momachti netajtanilmej tein moajsij itech páginas 12 hasta 49 itech nejin amaix. Uan maj kiixtajtolti taxelol “Tein tikiluiaj tanojnotskej akin ayamo moauia” (página 7). Ompa kijtoua keniuj moneki momachtis achto ke tayekananij kichiuiliskej nejon netajtanilmej. No kijtoua ke tanojnotskej uelis kiixtapos amaix keman kichiuiliskej netajtanilmej uan kiitas tein kijkuiloj inakastan amaix. Amo moneki maj achto aksa iuan kiita netajtanilmej.

Akin yeski akin kinekis moauis, moneki kimatiltis akin kinixyekana oloch tayekananij. Satepan kimakaskej tiempo maj momachti taxelol “Netajtanilmej tein kinchiuiliaj akin kinekij moauiskej”. Ompa, akin kinixyekana oloch tayekananij kitajtanis akin kineki moauis ox motemaktijya iuan Jiova ika se netataujtil uan kiluijya ke kichiuas itanejnekilis. Komo kemaj, akin kinixyekana oloch tayekananij kiniluis ome tayekananij maj kiitakan sejse taxelol iuan akin kineki moauis. Amo moneki maj mochiakan maj moijto kemanian mochiuas okse ueyi nechikol.

Sejse taxelol moitas kemej itech se hora, maski uelis okachi uejkauas komo moneki. Itech sejse taxelol moneki peuas uan tamis ika netataujtil. Nion tayekankej nion tanojnotskej moneki ijsiuis porin kineki niman matamis. Tayekananij mosentiliskej iuan tanojnotskej uan kichiuiliskej netajtanilmej niman keman ueliskej.

Okachi kuali maj tayekananij mosentilikan iniuan sejsemej tanojnotsanij keman kinchiuiliskej netajtanilmej. Nejon tapaleuis maj kikakikan keniuj kinankilia nochi netajtanilmej uan kiitaskej ox kiajsikamati tein melauak uan ox uelisya moauis. Uan no, tanojnotskej okachi kuali momachilis uan kijtos tein kinemilia. Akin namikuanij, uelis kinsenchiuiliskej netajtanilmej.

Komo se siuat kineki moauis, tayekananij iuan mosentiliskej kampa oksekin uelis kinitaskej, sayoj ke moneki maj amo kikakikan tein kijtouaj. Keman monekis, akin kichiuati netajtanilmej uelis yas iuan okse tayekankej komo moitas taxelol ome oso iuan se tapaleuijkej komo moitas taxelol se.

Itech nechikolmej kampa amo onkakej miakej tayekananij, tapaleuianij akin kinextianij ke kuali kichiuaj tekit uan kuali taixejekouaj uelis kiitaskej taxelol se tein itokay “Tein tikneltokaj akin tikchiuaj kemej Cristo”. Uan itech taxelol ome “Kemej timonejnemiltiaj akin tikchiuaj kemej Cristo”, nochipa kiitaskej sayoj tayekananij. Uan komo itech nechikol amo moajsij tokniuan akin uelis kiitaskej netajtanilmej iuan tanojnotskej, uelis kiluiskej tokniuj takalpanojkej maj kinilui tayekananij akin moajsij itech okse nechikol tein amo uejka yetok maj tapaleuikan itech nejin taman.

Komo moauiti se akin nojnelok, itatuan moneki yetoskej keman kichiuiliskej netajtanilmej. Komo tetatmej amo uelis yetoskej, ome tayekananij moneki yetoskej keman moitas taxelol ome oso se tayekankej uan se tapaleuijkej komo moita taxelol se.

Tayekananij kiyekitaskej ox tanojnotskej akin kineki moauis kiajsikamatiya tamachtilis tein tayekantok itech Biblia. Uan no, moneki senkis kiitaskej ox kiita ke semi moneki tamachtilis tein melauak uan ox kipoujkaita inechikol Jiova. Komo kiitaj ke amo kiajsikamati tamachtilis tein tayekantok, tayekananij kiitaskej maj kiseli nepaleuil uan ijkon uelis moauis satepan. Kemansa kiitaskej ke ayamo uelis moauis porin moneki okachi kinextis ke kineki tanojnotsas uan ke kitakamati tein kiixtalia inechikol Jiova. Tayekananij kiixejekoskej kanachi tiempo uejkauaskej itech sejse netajtanil uan ijkon uelis kiitaskej ox tanojnotskej uelisya moauis. Sayoj ke, moneki kiitaskej nochi netajtanilmej.

Keman kitamiskej taxelol ome, tayekananij akin kiitakej netajtanilmej iuan tanojnotskej mosentiliskej uan kiixejekoskej ox uelisya moauis oso amo. Keman kiixejekoskej, moneki amo kielkauaskej kiitaskej keniuj moajsi tanojnotskej. Itech nejin taman, okachi tiktemouaj maj tanojnotsanij kiajsikamatikan tamachtilis tein tayekantok itech Biblia uan maj kitasojtakan Jiova ika nochi ininyolo. Ika nanmonepaleuil, akin moauiskej kuali kimatiskej keniuj kiteixmatiltiskej kuali tanauatilmej tein semi moneki.

Satepan se oso ome tayekananij akin kichiujkej netajtanilmej, mosentiliskej iuan tanojnotskej uan kiluiskej ox uelis moauis oso amo. Komo kemaj, kiitaskej iuan tanojnotskej taxelol “Seki taman tein moneki kielnamikiskej akin moauitij” (página 51 hasta 53). Uan komo ayamo motamimachtia amaix ¡Uelis tiyolpakiskej nochipaya!, kiyolchikauaskej maj ijkon kichiua satepan keman moauis. Kiluiskej akin moauiti ke tonal keman moauis motalis itech Registro de publicador de la congregación. Kielnamiktiskej ke tanojnotskej kitajtaniaj idatos porin ijkon uelis tapaleuis itech itekiyo Dios tein mochiua itech nechikol uan tayekananij uelis kimakaskej nepaleuil uan yolchikaualis. Uan no, tayekananij kinelnamiktiskej yankuik tanojnotsanij ke inindatos motekitiltia kemej moijtoua itech “Política global de protección de datos personales de los testigos de Jehová”, tein ixnesi itech jw.org. Keman iuan mosentiliskej moneki amo panos majtakti minuto.

Se xiuit satepan ke moauis, ome tayekananij mosentiliskej iuan tokniuj uan kiyolchikauaskej uan kimakaskej seki tayolmajxitilismej. Semej tayekananij moneki yeski akin kiixyekana oloch tanojnotsanij kampa yejua poui. Uan komo nojnelok, moneki moajsiskej itatuan akin no itaixpantijkauan Jiova. Tayekananij moneki kichiuaskej maj kuali momachilikan. Kiluiskej keniuj moskaltiani kemej itatojtokakauj Cristo uan kiyolmajxitiskej keniuj uelis kisentokas momachtis iselti, kiixtajtoltis Biblia mojmostaj, uan taueyichiuas iniuan ikalyetouanij, no keniuj kisentokas yas nochipa nechikolmej uan tanojnotsatiuij nochi semanas (Efes. 5:15, 16). Komo ayamo motamimachtia amaix ¡Uelis tiyolpakiskej nochipaya!, tayekananij kiitaskej maj se tokniuj momachti iuan. Yejuan kitemoskej kiyolchikauaskej uan kiyolmajxitiskej sayoj itech se oso ome taman tein monekis.