¿Tleka moneki timotlatlaujtiskej ika itoka Jesús?

JESÚS nochipa otlamachti ken moneki timotlatlaujtiskej. Yiuejkika, teopixkej judíos nochipa omotlatlaujtiaya “itech ojmeh kan panoah miakeh tokniwah”. ¿Tleka ijkon okichiuayaj? Porque okinekiayaj makinmitakan oksekimej. Okinekiayaj makijtokan yejuan tetlasojtlaj uan teiknomatij. Ijkuak omotlatlaujtiayaj ouejkauayaj uan okijtouayaj san se tlamantli, “yejwah kimoliah tla san ompa kojpatilijtoskeh intlajtol” toTajtsin Dios kinkakiskia (Mateo 6:​5-8). Jesús otlamachti tlen yejuan okichiuayaj amo okinpaleuiaya, ijkon oksekimej okimatkej ken motlatlaujtiskiaj. Noijki okijto tlen omonekiaya kichiuaskej para kuali motlatlaujtiskej.

Jesús okijto ijkuak timotlatlaujtiskej moneki tikteititiskej tiknekij mamochipaua itoka toTajtsin Dios, mauiki iTekiuajkayo uan mamochiua itlanekilis. Noijki okijto uelis tikiluiskej Jehová tlen techpanoua noso tlen techtekipachoua (Mateo 6:​9-13; Lucas 11:​2-4). Jesús okitekitilti seki tlamantli para techititis amo matimosotlauakan, matitlaneltokakan uan matiyetokan tiyolyamankej tla tiknekij Jehová matechkaki (Lucas 11:​5-13; 18:​1-14). Jesús amo san otlamachti, ye noijki ijkon okichi (Mateo 14:23; Marcos 1:35).

Nochi tlen okijto Jesús okinpaleui imachtijkauan para kuali mamotlatlaujtikan. Ijkuak yikimiktiskiaj Jesús, ok okinmachti tleka miak ipati motlatlaujtiskej.

“Omopatlak ken motlatlaujtiskiaj”

Itech non youak Jesús okinyolchika apóstoles. Noijki okinmilui se tlamantli miak ipati: “Ne Ni ojtli nontewika inawak Dios, Ne nomechnonotsa ika milák tlájtoli, iwa Ne Akin kichiwa xiyolitokah. Sanwel akin nechtlakita weletis kalakiti inawak Notajtsi”. Satepan okinmilui: “Nochi tlan nonkitlajtlaniliskeh Notajtsi ika Notoka, Ne nikchiwas, para makiseli weyílistli Notajtsi por Ne. Tla itla nonkitlajtlaniskeh ika Notoka Ne nikchiwas”. Uan saiktlami okinmilui: “Asta axa nomejwah amitla nonkitlajtlaniliah ika Notoka. Xiktlajtlanikah ijkó nonkiseliskeh, ijkó nonkipiaskeh miak pakílistli” (Juan 14:​6, 13, 14; 16:24).

¡Tlen okinmilui okintlajtlachialtij! Se diccionario bíblico kijtoua tlen otlamachti Jesús “omopatlak ken motlatlaujtiskiaj”. Jesús amo okijto ye makitlatlaujtikan, tlen otlamachti kinpaleuiskia okachi mamotokikan inauak Jehová.

ToTajtsin Dios nochipa kinkaki itekipanojkauan yolmelajkej ijkuak motlatlaujtiaj (1 Samuel 1:​9-19; Salmo 65:2). Jehová okichi se tlajtolsenkaualistli iuan altepetl Israel, ik non, akinmej okinekiayaj ma kinkaki ijkuak omotlatlaujtiayaj, omonekiaya kineltokaskej Jehová okipejpenki Israel ken ialtepe. Satepan ijkuak otlanauatiaya Salomón, omonekiaya kineltokaskej Jehová okipejpenki teokali para ompa makitemakakan tlamanali (Deuteronomio 9:29; 2 Crónicas 6:​32, 33). Pero amo nochipa ijkon kichiuaskiaj. Pablo okijkuilo tlanauatil tlen okinmakakej israelitas “sanwel itlasekawilo tlan satepa walaskia, iwa amo tlan milák techmakaskia” (Hebreos 10:​1, 2). Tlen yiuejkika omoteititi, axkan ijkon mochiuaskia (Colosenses 2:17). Ik non, para kuali mouikaskej iuan Jehová ayakmo omonekiaya kitlakamatiskej tlanauatil tlen okimakakej Moisés, axkan omonekiaya kitlakamatiskej Jesucristo ijkon ken kiteititia tlanauatil uan nin opejki itech xiuitl 33 (Juan 15:​14-16; Gálatas 3:​24, 25).

Se tokayotl tlen okachi ueyititok

Jesús okichi se tlamantli para uelis timotokiskej inauak Jehová. Yetoskia ken se toyolikni akin chikauak uan techpaleuia para matechkaki uan matechnankili toTajtsin Dios. ¿Tleka san Jesús uelis ijkon kichiuas?

Tinochtin titlajtlakolejkej, ik non, maski tiktemakaskej tlamanali amo uelis tikpojpoloskej totlajtlakol nion amo uelis timouikaskej iuan toTajtsin Dios akin santo (Romanos 3:20, 24; Hebreos 1:3, 4). Jesús okipojpolo totlajtlakoluan ijkuak topatka okitemakak iyolilis (Romanos 5:12, 18, 19). Ik non, nochtin uelis tikpiaskej chipauak totlalnamikilis uan uelis timotokiskej inauak toTajtsin Dios, pero moneki titlaneltokaskej itech imikilis Jesús uan ijkuak timotlatlaujtiskej moneki kitekitiltiskej itoka (Efesios 3:11, 12).

Ijkuak timotlatlaujtiaj ika itoka Jesús tikneltoka eyi tlamantli tlen ye kichiua: 1) Ye “Iichkatsi Dios”, porque ika imikilis uelis techtlapojpoluiskej. 2) Jehová okiyoliti uan okitlali ken “Toweyi Tiópixki”, ik non, axkan uelis techpaleuis. 3) Jesús okijto: “Ne Ni ojtli”, nin kijtosneki uelis techpaleuis matechkaki Jehová ijkuak timotlatlaujtiaj (Juan 1:29; 14:6; Hebreos 4:​14, 15).

Ijkuak timotlatlaujtiaj ika itoka Jesús tikteititiaj tiktlakaitaj. Jehová kineki ijkuak kijtoskej “itoka n Jesús, mamotlankuaketsakah nochteh [...]. Ijkó nochteh makiyekixmatikah iwa makimokuitikah Cristo Jesús Ye Inteko, iwa ijkó Totajtsi Dios makiseli weyílistli” (Filipenses 2:​10, 11). Ijkuak timotlatlaujtiaj ika itoka Jesús tikueyichiuaj itoka Jehová porque ye topatka okitemakak ikonetsin para matechmakixti (Juan 3:16).

Biblia kijtoua Jesús tlatlamantli kitokayotiaj. Nin tlamantli techpaleuia matikajsikamatikan uelis techteochiuaskej porque Jesús yotechpaleui, techpaleuijtok uan ok techpaleuis (Xikita recuadro “Tlen kichiua Jesús miak ipati” ). Jesús okimakakej “se Itoka non okachi weyi ken oksikimeh intokah”, nin kijtosneki kipia chikaualistli itech iluikak uan ipan tlaltikpak (Filipenses 2:9; Mateo 28:18).a

Amo san ijkon matikchiuakan

Ken yotimomachtijkej, tla tiknekij Jehová matechkaki ijkuak timotlatlaujtiaj moneki tikchiuaskej ika itoka Jesús (Juan 14:​13, 14). Pero amo san matikijtokan “ika itoka Jesús”, moneki makisa itech toyolo. ¿Tleka moneki ijkon tikchiuaskej?

Ximokuayejyeko itech nin tlamantli. Xamo ijkuak tikselia se carta, saiktlami kijtoua “ximomalui, timotaskej”. Pero, ¿tikijtoskia ninmej tlajtolmej melauak kisa itech iyolo noso porque san moneki ijkon kichiuas? Ik non, ijkuak timotlatlaujtiskej ika itoka Jesús moneki kisas itech toyolo uan amo porque san moneki ijkon tikchiuaskej. Maski nochipa timotlatlaujtiskej moneki kisas itech toyolo (1 Tesalonicenses 5:17; Salmo 119:145).

¿Tlen uelis tikchiuaskej para makisa itech toyolo ijkuak tikijtoskej “ika itoka Jesús”? ¿Tleka amo timokuayejyekouaj tlen yokichi Cristo? Techpaleuis tla ijkon tikchiuaskej. Ijkuak timotlatlaujtiskej, matiktlasojkamatilikan uan matikueyichiuakan Jehová porque okitemakak iKone. Tla ijkon tikchiuaj, okachi tikneltokaskej tlen okijto Jesús: “Notajtsi nomechmakas nochi tlan nonkitlajtlaniliskeh ika Notoka” (Juan 16:23).