“¿Tlen nechtsakuilia amo ma nimoapolakti?”

1. ¿Tlen okipanok Adán uan Eva?

¿AKIN moneki techiluis tlen kuali uan tlen amo kuali? Adán uan Eva okikuajkej tlakilotl tlen okinnauatijkej amo ma kikuakan. Ijkon okiteititijkej amo otlaneltokayaj itech Jehová uan amo okinekiayaj kitlakamatiskej. Okipejpenkej tlen yejuan okinekiayaj kichiuaskej (Gén. 3:22). Pero ¿tlen okinpanok? Ayakmo omouikakej iuan toTajtsin Dios uan ayakmo nochipa ochantikej itech tlaltikpak (Rom. 5:12). Okintlajyouilti tlen okichijkej.

2. ¿Tlen okichi tlakatl tlen oualaya Etiopía ijkuak Felipe okitlapoui?

² Adán uan Eva okipejpenkej kichiuaskej okse tlamantli. Pero tlakatl tlen oualaya Etiopía okipejpenki kichiuas tlen okitlapoui Felipe. Tlakatl tlen oualaya Etiopía okitlasojkamatili Jehová uan Jesús tlen okichijkej uan san niman omoapolakti (Hech. 8:34-38, TNM). Tejuan noijki otimotemakakej ixpan Jehová uan otimoapolaktijkej ken tlakatl tlen oualaya Etiopía. Ijkon otikteititijkej otiktlasojkamatilijkej Jehová uan Jesús tlen okichijkej. Noijki tikteititiaj titlaneltokaj itech Jehová uan tikseliaj san ye kinamiki kijtos tlen kuali uan tlen amo kuali.

3. (1) ¿Ken techteochiuas toTajtsin Dios ijkuak timoapolaktiskej? (2) ¿Tlen tlajtlanilmej tikinnankiliskej?

³ Ximokuayejyeko ken techteochiua Jehová ijkuak tiktekichiuiliaj. Uelis tikpiaskej tlen Adán uan Eva okipolojkej uan uelis nochipa tichantiskej tlaltikpak. ToTajtsin Dios techtlapojpoluis tla itech titlaneltokaj uan noijki itech Jesucristo. Nin techpaleuis ma tikpiakan chipauak totlalnamikilis (Mat. 20:28; Hech. 10:43). Noijki uelis tipouiskej itech ialtepe Jehová, techselis uan satepan techteochiuas (Juan 10:14-16; Rom. 8:20, 21). Sekimej maski yikimatij kiseliskej miak tlamantli kualtsin, amo kinekij kichiuaskej ken tlakatl tlen oualaya Etiopía. ¿Tlen kintsakuilia amo ma moapolaktikan? ¿Tlen kinpaleuis ma kixnamikikan tlen kintsakuilia?

¿TLEN KINTSAKUILIA SEKIMEJ AMO MA MOAPOLAKTIKAN?

4, 5. ¿Tlen okipanoaya Avery uan Hannah?

⁴ Sekimej kijtoaj amo uelis kitekichiuiliskej Jehová. Se telpochtli itoka Avery itatajuan kitekichiuiliaj Jehová. Itajtsin kixmatij kipia kuali iyelis uan noijki kuali kinyekana tokniuan. Pero Avery amo okinekiaya moapolaktis. Okijto: “Onimokuayejyekoaya amo keman nikpias noyelis ken notajtsin”. Noijki omokuayejyekoaya amo uelis kichiuaskia tekitl tlen satepan kimakaskiaj itech tlanechikol. Okijto: “Amo oniknekiaya ma nechiluikan ma nimotlatlaujti inmixpan oksekimej, ma nitlamachti uan ma nikinyekana tokniuan ijkuak tetlapouitiuij”.

⁵ Okse ichpochtli itoka Hannah uan kipia 18 xiuitl, amo okimatiaya tlen kichiuas. Maski itatajuan okitekichiuiliayaj Jehová, ye san omoyolkokoaya uan omokuayejyekoaya amo uelis kintlakamatiskia itlanauatiluan toTajtsin Dios. Ualeua sapanoa omoyolkokoaya uan omotejtekiaya. San okachi omotlajyouiltiaya. Hannah okijto: “Amikaj onikiluiaya tlen onikchiuaya nion notatajuan. Onimokuayejyekoaya Jehová amo keman nechseliskia porque onimotejtekiaya”.

6. ¿Tleka Vanessa amo omoapolaktiaya?

⁶ Sekimej mouikaj iuan akinmej amo kinpaleuiaj ma kitekichiuilikan Jehová. Vanessa tlen kipia 22 xiuitl, okijto: “Yokipiaya kanaj majtlaktli xiuitl kuali onimouikaya iuan se noyolikni”. Pero iyolikni amo okitekipachoaya tlen ye okineltokaya uan amo okiyolchikauaya ma moapolakti uan non okiyolkokoaya. Vanessa okijto: “Onikitaya oui nimouikas iuan oksekimej uan onimokuayejyekoaya tla ayakmo iuan nimouikaskia, ayakmo nikajsiskia akin iuan nimouikas”.

7. ¿Tlen amo okinekiaya kichiuas Makayla uan tleka?

⁷ Sekimej kijtoaj xamo tlajtlakolchiuaskej. Makayla okipiaya makuili xiuitl ijkuak ikni okikixtijkej itech tlanechikol. Itatajuan sapanoa okinyolkoko tlen okichi ikni. Okijto: “Onimomojtiaya nimoapolaktis, xamo nitlajtlakolchiuaskia, uelis nechkixtiskej itech tlanechikol uan okachi nikinyolkokoskia notatajuan”.

8. ¿Tleka omomojtiaya Miles?

⁸ Sekimej momojtiaj kintlajyouiltiskej. Ma tikitakan tlen okipanok se telpochtli itoka Miles. Itajtsin uan itlakpanantsin kitekichiuiliaj toTajtsin Dios. Pero ye inantsin amo iTlaixpantijka Jehová. Okijto: “Onichantik iuan nonantsin dieciocho xiuitl. Amo oniknekiaya nikiluis oniknekiaya nimoapolaktis. Porque nikilnamiki tlen okichi ijkuak notajtsin omochi iTlaixpantijka Jehová. Onimomojtiaya noijki nechtlajyouiltiskia”.

¿KEN UELIS KIXNAMIKISKEJ NIN TLAMANTLI AKINMEJ IJKON KINPANOA?

9. ¿Tlen nankichiuaskej ijkuak okachi nankimatiskej Jehová tetlasojtla uan kimati mochias?

⁹ Adán uan Eva amo okitekichiuilijkej Jehová porque amo okitlasojtlayaj. Pero toTajtsin Dios ok okinkauili ma kinpiakan inkoneuan uan yejuan ma kitakan ken kinmiskaltiskiaj. San niman motaskia ken tlajyouiskia Adán uan Eva porque okipejpenkej inselti monauatiskej. Caín okimikti ikni uan satepan nochtin opejkej kichiuaj tlen amo kuali (Gén. 4:8; 6:11-13). Pero Jehová yokimatiaya ken kinmakixtis ikoneuan Adán uan Eva tlen kinekiskiaj kitekichiuiliskej (Juan 6:38-40, 57, 58). Melauak tetlasojtla Jehová uan kimati mochias. Ijkuak okachi nankixmatiskej, okachi nankitlasojtlaskej. Xamo amo nankinekij nankichiuaskej ken Adán uan Eva. Okachi nanyolpakiskej tla nanmotemakaskej ixpan Jehová.

10. ¿Ken namechpaleuis Salmo 19:7 xiktekichiuilikan Jehová?

¹⁰ Okachi xikixmatikan Jehová. Ijkuak okachi nankixmatiskej Jehová, okachi nankinekiskej nankitekichiuiliskej. Avery okipaleui okachi momachtis uan omokuayejyeko tlen kijtoa Salmo 19:7 (xiktlajtolti). Okachi okitlasojtlak Jehová ijkuak okitak ken okipaleui tlen kijtoa nin texto. Tla tiktlasojtlaj Jehová, techpaleuis ma tiktekichiuilikan uan ma tikchiuakan tlen kineki. Hannah okijto: “Niktlajtoltia Biblia uan noijki nimomachtia uan onechpaleui ma nikajsikamati ijkuak nimotlajyouiltia, noijki nikyolkokoa Jehová” (1 Ped. 5:7). Ye omochijchika kichiuas tlen kijtoa iTlajtol toTajtsin Dios (Sant. 1:22). ¿Tlen okichi Hannah? Ye okijto: “Okachi opejki niktlasojtla Jehová ijkuak onikitak nechpaleuia niktlakamatis. Axkan nikneltoka ye nechpaleuis ijkuak monekis”. Hannah ayakmo motejteki uan omotemakak ixpan Jehová uan omoapolakti.

11. (1) ¿Tlen okipaleui Vanessa ma mouika iuan miakej tokniuan? (2) ¿Tlen techmachtia tlen okichi Vanessa?

¹¹ Kuali xikinpejpenakan akinmej inmiuan nanmouikaskej. Vanessa okitak iyolikni amo okipaleuiaya ma kitekichiuili Jehová. Ik non, ayakmo iuan omouikak. Pero noijki omochijchika mouikas iuan oksekimej tokniuan. Okijto okipaleui tlen okichi Noé uan ikalchanejkauan: “Yejuan ochantiayaj kanin ochantiayaj akinmej amo okitekichiuiliayaj Jehová. Pero Noé uan ikalchanejkauan kuali omouikayaj”. Omoapolakti uan omochi precursora. Noijki okijto: “Nin nechpaleuia ma nimouika iuan miakej tokniuan”. Namejuan noijki uelis nanmouikaskej iuan miakej tokniuan tla nankitekichiuiliskej Jehová (Mat. 24:14, TNM).

12. (1) ¿Tlen okichi Adán uan Eva? (2) ¿Tlen okinpanok?

¹² Amo ximomojtikan uan xiktlakamatikan toTajtsin Dios. Ualeua timomojtiaj itlaj tikchiuaskej. Xamo timomojtiaj tikyolkokoskej Jehová (Sal. 111:10). Tla Adán uan Eva kimauiliskiaj Jehová, amo kixnamikiskiaj. Ijkuak okixnamikej “omotlapojkej inmixtololouan” uan ijkon okajsikamatkej okatkaj tlajtlakolejkej uan okinpanoltilijkej inkoneuan tlajtlakoli uan mikilistli. Ijkuak okajsikamatkej tlen okinpanok, opinauakej okatkaj xipetstikej uan omotlakentijkej (Gén. 3:7, 21).

13, 14. (1) Ijkon ken kijtoa 1 Pedro 3:21, ¿tleka amo ma tikmauilikan mikilistli? (2) ¿Tleka moneki ma tiktlasojtlakan Jehová?

¹³ Noijki kuali ma tikmauilikan Jehová ijkuak tiknekij tikchiuaskej tlen amo kuali. Pero amo ma tikmauilikan mikilistli. ¿Tleka? Porque toTajtsin Dios yokijto nochipa tiyoltoskej. Tla se tonal titlajtlakolchiuaskej, Jehová techtlapojpoluis tla timoyolkopaj ika nochi toyolo. Porque tikneltokaj Jesús topatka omotemakak. Tikteititiskej titlaneltokaj itech Jesús tla timotemakaskej ixpan toTajtsin Dios uan timoapolaktiskej (xiktlajtolti 1 Pedro 3:21).

¹⁴ Onka miak tlamantli tlen kiteititia tleka moneki ma tiktlasojtlakan Jehová. Ye amo san techmaka miak tlamantli. Noijki techmachtia ken iyelis uan tlen kineki kichiuas (Juan 8:31, 32). Okitlali tlanechikol para techmachtis uan techpaleuis. Techpaleuia ma tikixnamikikan ouijkayotl uan techiluia tichantiskej itech xochitlali (Sal. 68:19; Apoc. 21:3, 4). Ijkuak timokuayejyekoaj nochi tlen yokichi toTajtsin Dios, sapanoa tiktlasojtlaj uan amo tiknekij tikyolkokoskej. Ijkon moneki ma tikmauilikan.

15. ¿Tlen okipaleui Makayla ma moapolakti?

¹⁵ Makayla okajsikamatki Jehová kitlapojpoluiskia tla se tonal tlajtlakolchiuaskia. Okijto: “Onikajsikamatki tinochtin titlajtlakolejkej uan tikchiuaj tlen amo kuali. Noijki onikajsikamatki Jehová techtlasojtla uan techtlapojpoluia porque yokitemakak iKone”. Non okipaleui ma motemaka ixpan Jehová uan omoapolakti.

16. ¿Tlen okipaleui tokni Miles ma moapolakti?

¹⁶ Tokni Miles omomojtiaya moapolaktis porque inantsin kitlajyouiltiskia, ik non, okilui se tlayekanki itech circuito ma kipaleui. Okijto: “Tokni tlayekanki itech circuito noijki inantsin amo iTlaixpantijka Jehová. Onechpaleui ma nimokuayejyeko tlen nikiluiskia nonantsin uan ijkon nimoapolaktiskia uan amo porque notajtsin onechiluiaya ma nimoapolakti”. Inantsin amo okipakti ma moapolakti. Satepan oksekan ochantito uan ijkon okichi tlen Jehová okilui. Noijki okijto: “Onechyolini Jehová porque sapanoa onechpaleui. Noijki onikajsikamatki Jehová nechtlasojtla porque Jesús nopatka omotemakak. Non onechpaleui ixpan ma nimotemaka uan onimoapolakti”.

XIKCHIUAKAN TLEN ONANKILUIJKEJ JEHOVÁ

17. ¿Tlen uelis tinochtin tikchiuaskej?

¹⁷ Ijkuak Eva okikua tlakilotl, okixtope iTajtsin. Noijki ijkuak Adán okikua tlakilotl, okiteititi amo okitlasojkamatiliaya Jehová nochi tlen okimakak. Tinochtin uelis tikteititiskej Adán uan Eva amo kuali tlen okichijkej. Ijkuak timoapolaktiaj, tikteititiaj san ye Jehová kinamiki kijtos tlen kuali uan tlen amo kuali. Noijki tikteititiaj tiktlasojtlaj uan itech titlaneltokaj.

18. ¿Tlen moneki nankichiuaskej tla nankinekij kuali nankitekichiuiliskej Jehová?

¹⁸ Ijkuak timoapolaktiaj, moneki mojmostla tikintlakamatiskej itlanauatiluan Jehová uan amo tikchiuaskej tlen tejuan tiknekij. Maski ualeua oui, sejse xiuitl miakej mochijchikauaj moapolaktiskej. Namejuan uelis ijkon nankichiuaskej. Uelis ijkon nankichiuaskej tla nanmomachtiskej tlen kijtoa Biblia. Noijki ximouikakan iuan tokniuan uan xikintlapouikan oksekimej tlen nanmomachtiaj itech toTajtsin Dios akin sapanoa techtlasojtla (Heb. 10:24, 25). Ijkuak nankipejpenaskej tlen nankichiuaskej, xikchiuakan tlen kijtoa iTlajtol toTajtsin Dios uan noijki xikkakikan tlen namechiluia ialtepe (Is. 30:21). Melauak nanyolpakiskej tla ijkon nankichiuaskej (Prov. 16:3, 20).

19. ¿Tlen moneki nochipa xikilnamiktokan uan tleka?

¹⁹ Okachi nankitlasojtlaskej Jehová uan nankinpatioitaskej itlanauatiluan tla nankichiuaskej tlen ye namechiluia. Non namechpaleuis nochipa xiktekichiuilikan Jehová uan nankixtopeuaskej tlen ika tlakajkayaua Satanás. Ijkuak ajsis mil xiuitl uan nankilnamikiskej ijkuak onanmoapolaktijkej, nankijtoskej: “Melauak niyolpaki onimoapolakti”.