Tlamachtilmej para Toteki akinmej tikchiuaj ken Cristo
© 2024 Watch Tower Bible and Tract Society of Pennsylvania
2-8 DE SEPTIEMBRE
KEN TECHPALEUIA BIBLIA SALMOS 79-81
Xikteititi tikpatioita itoka Jehová
Jehová okitemakak iKone para techmakixtis
5 ¿Uan tejuan ken tikteititiaj tiktlakaitaj itoka Jehová? Ika tlen tikchiuaj. Jehová kineki ma tiyetokan santos (xiktlajtolti 1 Pedro 1:15, 16). Ik non, san ye tikueyichiuaj uan tiktlakamatij ika pakilistli. Uan maski techtojtokaskej, timochijchikauaskej tikchiuaskej tlen Jehová kineki. Uan Ijkuak tikintlakamatij itlanauatiluan, tikueyichiuaj itoka (Mateo 5:14-16). Noijki, tikteititiaj techpaleuiaj itlanauatiluan Jehová uan Satanás tlakajkayaua. Uan ken titlajtlakolejkej ualeua tikchiuaj itlaj amo kuali. Pero timoyolkuepaj uan ayakmo tikchiuaj nochi tlen kisokiotia itoka Jehová (Salmo 79:9).
ijwbv-S pág. 3 párrs. 4, 5
Romanos 10:13 | “Akin kinotsa Toteko ika itoka”
Ijkuak Biblia kijtoua “akin kinotsa Jehová ika itoka” amo kijtosneki san tikmatiskej itoka uan ijkon tiknotsaskej ijkuak tikueyichiuaskej (Salmo 116:12-14). Kijtosneki tikneltokaskej toTajtsin Dios uan tikiluiskej matechpaleui ijkuak moneki (Salmo 20:7; 99:6).
Jesucristo okipatioitaya itoka toTajtsin Dios. Ijkuak omotlatlaujti ye okijto: “ToTajtsin Dios tlen tika iluikak, nochtin makitlakaitakan motoka” noso makichipauakan (Mateo 6:9). Jesús noijki okijto tla tiknekij nochipa tiyoltoskej moneki tikixmatiskej Jehová, matiktlakamatikan uan matiktlasojtlakan (Juan 17:3, 6, 26).
Matiktemokan ken techpaleuia Biblia
it-2-S pág. 127 párrs. 5, 6
José
Okiueyitlalijkej itoka José. José okachi oueyititoka ikinon ualeua ijkon okintokayotiayaj nochtin familias israelitas (Sal. 80:1). Ualeua noijki ijkon okintokayotiayaj familias tlen okatkaj ik norte (Sal. 78:67; Amós 5:6, 15; 6:6). Itoka José noijki moijtoua itech profecía tlen okitak Ezequiel. Ompa kijtoua José kimakaskiaj ome pedazo tlali uan amo san se pedazo (Ezeq. 47:13). Altepetl tlen okitokayotiayaj “Jehová ompa kajki” okipiaya se puerta tlen noijki okitokayotiayaj José (Ezeq. 48:32, 35). Ijkuak Jehová kinsetiliskia familias israelitas, omoijto José kinyekanaskia sekimej uan oksekimej kinyekanaskia Judá (Ezeq. 37:15-26). Profecía tlen okijkuilo Abdías kijtoua “ifamilia José” noijki kixixiniskia “ifamilia Esaú” (Abd. 18). Noijki profecía tlen okijkuilo Zacarías kijtoua Jehová kimakixtiskia “ifamilia José” (Zac. 10:6). Familias tlen pouij itech Israel espiritual omoijkuilo ifamilia José kanin ijkuilitoskia ifamilia Efraín (Apoc. 7:8).
Ifamilia José ijkuilitok itech Apocalipsis 7:8. Non kiteititia tlen okijto Jacob ijkuak yimikiskia mochiuaskia ijkuak yetoskiaj tlapejpenalmej. Jacob kineskayotia Jehová porque okitemakak iKone. Ye okitlali mayeto tlajpixki uan okitemakak iyolilis inpatka “ichkauan” (Juan 10:11-16). Noijki Cristo Jesús ye tetl tlen okachi tlakitskijtok kanin motlakxilijtok ikal toTajtsin Dios uan itech non kali pouij tlapejpenalmej (Efes. 2:20-22; 1 Ped. 2:4-6). Non “tlajpixki” uan “tetl” kajki iuan toTajtsin Dios (Juan 1:1-3; Hech. 7:56; Heb. 10:12; noijki xikita Gén. 49:24, 25).
9-15 DE SEPTIEMBRE
KEN TECHPALEUIA BIBLIA SALMOS 82-84
Matikpatioitakan ken tiktekichiuiliaj Jehová
wp16.6-S pág. 8 párrs. 2, 3
¿Tlen techmachtia tlen kichiuaj totomej?
Akinmej ochantiayaj Jerusalén kuali okinmixmatiayaj golondrinas porque okichiuayaj intepajsol itech tepamitl. Noijki itech templo tlen okichijchi Salomón okichiuayaj intepajsol golondrinas. Xamo sejse xiuitl ompa ochantiayaj uan okinpiayaj inkoneuan porque ompa kuali okatkaj.
Se ixui Coré tlen okijkuilo Salmo 84 okinmitaya tepajsolmej tlen okatkaj templo. Ye ompa otlapaleuiaya tlatlajko xiuitl pero noijki okinekiaya ompa chantiskia ijkon ken golondrinas ompa ochantiayaj. Ye okijto sapanoua kualtsin itabernáculo Jehová ikinon okinekiaya ika nochi iyolo ompa yetos. Hasta omosotla uan chikauak otsajtsiaya porque okinekiaya ompa yetos. Noijki okijto totomej ompa ochantiayaj uan golondrinas ompa okinmaluiayaj inkoneuan (Salmo 84:1-3). ¿Tejuan uan tokoneuan noijki tikpatioitaj timonechikoskej kanin tikueyichiuaj Jehová? (Salmo 26:8, 12).
w08-S 15/7 pág. 30 párrs. 3, 4
Matiyolpakikan ijkuak tikchiuaj tlen tiuelij
Xamo ayakmo okachi tiktekichiuiliaj Jehová porque yitikpiaj miak xiuitl noso timokokouaj. Tla tikinpiaj tokoneuan xamo tikitaj oui nochipa timomachtiskej Biblia uan titlakakiskej ijkuak timonechikouaj porque moneki tikinmaluiskej. Ikinon xamo san timokuayejyekouaj ayakmo uelis itlaj tikchiuaskej uan amo tikitaj tlen ok uelis tikchiuaskej.
Ijkon okipanok se israelita tlen okatka levita. Ye otlapaleuiaya sejse xiuitl ome semana ompa templo pero okinekiaya nochipa yetos ixpan altar. Kuali tlen okinekiaya kichiuas pero amo uelis ompa mokauaskia (Sal. 84:1-3). ¿Tlen okipaleui amo mamoyolkoko? Okipaleui ijkuak okajsikamatki sapanoua ipati ompa otlapaleuiaya maski san se tonal ijkon kichiuaskia (Sal. 84:4, 5, 10). Tejuan noijki matikpatioitakan tlen ueli tikchiuaj uan amo san matimokuayejyekokan tlen amo ueli tikchiuaj.
Jehová techpatioita
12 Tla timokokouaj, ma tikneltokakan Jehová kajsikamati tlen techpanotok. Ma tiktlatlaujtikan ma techpaleui amo matimokuayejyekokan amitlaj topati. Ma tiktemokan itech iTlajtol Jehová tlen kineki techiluis. Ma timokuayejyekokan itech textos kanin techiluiaj Jehová kinpatioita akinmej kitekichiuiliaj. Tla ijkon tikchiuaskej, tikitaskej Jehová yolkuali uan kinpaleuia akinmej kitekichiuiliaj uan amo kikauaj (Sal. 84:11).
Matiktemokan ken techpaleuia Biblia
it-1-S pág. 1183 párrs. 1, 2
Akin amo kipia ipapa
Jehová okijto akinmej amo okipiayaj inpapa omoyolkokouayaj porque amo okipiayaj akin kinmaluiskia. Jehová ijkon okijto porque ayakmo okinpaleuiayaj akinmej amo okipiayaj inpapa ijkuak israelitas okichiuayaj tlen amo kuali uan nochtin otlajyouiayaj. Pero ijkuak israelitas omouikayaj iuan Jehová, okinmaluiayaj akinmej amo okipiayaj inpapa (Sal. 82:3; 94:6; Is. 1:17, 23; Jer. 7:5-7; 22:3; Ezeq. 22:7; Zac. 7:9-11; Mal. 3:5). Jehová okijto kintlajyouiltiskia akinmej okintlajyouiltiayaj akinmej amo kipiaj inpapa (Deut. 27:19; Is. 10:1, 2) Ye okijto kinmakixtiskia akinmej amo kipiaj inpapa (Prov. 23:10, 11). Noijki kinpaleuiskia (Sal. 10:14). Yetoskia inpapa (Sal. 68:5). Jehová inpatka tlaixkomakaskia (Deut. 10:17, 18). Kiteititiskia kinmiknomati (Os. 14:3). Kinyolseuiskia (Sal. 146:9). Noijki kinpaleuiskia mayoltokan (Jer. 49:11).
Akinmej kichiuaj ken Cristo noijki kinpaleuiaj akinmej amo kipiaj inpapa uan siuamej tlen oixpoliuik innamik. Apóstol Santiago okinmijkuilili tokniuan: “Ixpan toTajtsin Dios nin kijtosneki chipauak tikueyichiuaskej uan amo sokio: matikinmaluikan ijkuak tlajyouiaj iknomej uan siuamej tlen oixpoliuik innamik. Noijki amo matimosokiotikan ika tlen kichiuaj akinmej amo tetlakamatij” (Sant. 1:27).
16-22 DE SEPTIEMBRE
KEN TECHPALEUIA BIBLIA SALMOS 85-87
Titlaxikouaj ijkuak timotlatlaujtiaj
w12-S 15/5 pág. 25 párr. 10
Matikueyitlalikan Jehová
10 Moneki tikchiuaskej tlen kijtoua Biblia tla tiknekij tikueyitlaliskej toTajtsin Dios. Ompa kijtoua: “Nochipa ximotlatlaujtikan” (Rom. 12:12). Moneki matiktlatlaujtikan Jehová matechpaleui matikueyichiuakan ken ye kipaktia. Matikiluikan matechmaka espíritu santo, matechpaleui okachi matitlaneltokakan, matechyolchikaua para amo tikchiuaskej tlen techyoltilana uan matechpaleui kuali ‘matiknejnekikan iTlajtol’ (2 Tim. 2:15; Mat. 6:13; Luc. 11:13; 17:5). Moneki matikneltokakan Jehová ijkon ken se chokotsin kineltokilia ipapa kipaleuis. Matikneltokakan techpaleuis ijkuak tikiluiaj matechpaleui okachi tiktekichiuiliskej. Amo matikijtokan ye kualanis tla tiktlatlaujtiaj porque ye nochipa techkaki. Matiktlatlaujtikan para tikueyichiuaskej, matimotlasojkamatikan uan matikiluikan matechyekana ijkuak itlaj techpanoua. Noijki matikiluikan matechpaleui matikueyichiuakan itoka ijkuak tiktekichiuiliaj (Sal. 86:12; Sant. 1:5-7).
¿Ken technankilia Jehová ijkuak tiktlatlaujtiaj?
17 (Xiktlajtolti Salmo 86:6, 7). David okineltokaya Jehová okikakiaya uan okinankiliaya ijkuak okitlatlaujtiaya. Tejuan noijki uelis ijkon tikneltokaskej. Tlen okinpanok tokniuan techmachtia Jehová uelis kichiuas matiyetokan tiixtlamatkej uan techyolchikauas para matitlaxikokan. Noijki otikitakej Jehová techyolchikaua ijkuak tokniuan techpaleuiaj. Noijki uelis kinyolinis akinmej amo kitekichiuiliaj matechpaleuikan.
18 Tikneltokaj Jehová nochipa technankilia maski ualeua amo technankilia ijkon ken tejuan tiknekij. Jehová techmakas tlen techpoloua ijkuak monekis. Ikinon matiktlatlaujtikan uan matikneltokakan ye axkan techmaluis. Noijki ijkon kichiuas ijkuak tiyetoskej itech xochitlali porque kinmakas “tlen kinekij nochtin tlen yoltokej” (Sal. 145:16).
Matiktemokan ken techpaleuia Biblia
“Xikchiua ika nochi noyolo ma niktlakaita motoka”
17 Titlajyouiskej tla amo tiktlakamatiskej Jehová. Ma tikijtokan akinmej mauiltiaj pelota amo kuali mouikaj. Sekimej san kinekij tlatlaniskej uan oksekimej amo mauiltiaj ken moneki uan amo kitlakaitaj akin kinmachtia. Amo tlatlaniskej akinmej ijkon kichiuaj. Pero kuali mauiltiskej tla nochtin kuali mouikaj. Ijkon ken akinmej kuali mauiltiaj, tejuan noijki tiktekichiuiliskej Jehová ika nochi toyolo tla san se tlamantli timokuayejyekouaj uan tikchiuaskej tlen ye kineki. Ma tikilnamiktokan Satanás kineki ma tikkauakan Jehová. Kineki ma titlajtlakolchiuakan maski yitikmatij Jehová amo kipaktia ijkon ma tikchiuakan. Moneki tiktlakamatiskej Jehová ika nochi toyolo tla tiknekij tiktekichiuiliskej (Mat. 22:36-38). Amo ma tikkauilikan Satanás ma techkajkayaua.
18 Ijkon ken David okichi ma tikiluikan Jehová: “Xikchiua ika nochi noyolo ma niktlakaita motoka”. Ma tikchiuakan tlen tikiluiaj Jehová. Nochipa ma tikteititikan tiktlakaitaj itoka. Ijkon tikteititiskej technamiki ma techtokayotikan tiiTlaixpantijkauan Jehová (Prov. 27:11). Tinochtin uelis tikijtoskej ken okijto profeta Miqueas: “Nochipa tinemiskej itech itoka Jehová toDios” (Miq. 4:5).
23-29 DE SEPTIEMBRE
KEN TECHPALEUIA BIBLIA SALMOS 88, 89
San Jehová kuali tlanauatia
Ma tikpaleuikan Jehová san ye kinamiki tlanauatis
5 Onka okse tlamantli tleka san Jehová kinamiki tlanauatis: tlanauatia ika melajkayotl. Ineuian kijtoa: “Ne niJehová Akin kiteititia tlasojtlalistli yolmelajki uan melajkayotl itech nochi Tlaltikpak. Porque nimoyolpaktia itech nin tlamantli” (Jer. 9:24). Itech Jehová kisa melajkayotl. Ik non, para itlaj kichiuas amo moneki kitas se tlanauatil tlen okitlalijkej tlaltikpaktlakamej. Tlanauatilmej tlen otechmakak kisaj itech imelajkayo. Biblia kijtoa: ‘Ipan melajkayotl uan ipan tlaixkomakalistli okitlali itrono’ Jehová. Ik non, uelis tikneltokaskej nochi tlanauatilmej, principios uan nochi tlen kipejpena kichiuas nochi katej ika melajkayotl (Sal. 89:14; 119:128). Maski Satanás kijtoa Jehová amo kuali tlanauatia, ye amo ueli kichiua ma yeto melajkayotl itech Tlaltikpak.
Ma tikpaleuikan Jehová san ye kinamiki tlanauatis
10 Jehová amo se tlanauati tetlajyouilti. Akinmej kinnauatia kuali momachiliaj uan yolpakij (2 Cor. 3:17). David okijto: “Ixpan kajki ueyichiualistli; chikaualistli uan pakilistli katej kanin ye kajki” (1 Crón. 16:7, 27). Uan okse salmista itoka Etán noijki okijto: “Yolpakij akinmej kimatij tsajtsiskej ika pakilistli. Oh Jehová, yejuan nejnemij kanin te tikintlauilia. Yejuan yolpakij itech motoka nochi tonal uan ika momelajkayo kinueyichiuaj” (Sal. 89:15, 16).
11 Ijkuak okachi timokuayejyekoaj itech itlasojtlalis Jehová, okachi tikneltokaskej ye okachi kuali technauatis. Timomachiliskej ken salmista akin okijto: “¡Porque niyetos se tonal kanin kajki moteokal okachi kuali uan amo ken mil tonalmej oksekan niyetos!” (Sal. 84:10). Amo onka kanin okachi tiyetoskej. Jehová otechchijchi, ik non, kimati tlen okachi moneki para tiyolpakiskej uan techmaka ika nochi iyolo. San tlen tlamantli kinekis ma tikchiuakan, techpaleuis. Noijki tla tiktlakamatiskej okachi tiyolpakiskej maski monekis timochijchikauaskej (xiktlajtolti Isaías 48:17).
Melauak xitlaneltoka itech Tekiuajkayotl
13 Axkan ma tikitakan tlajtolsenkaualistli iuan David (xiktlajtolti 2 Samuel 7:12, 16). Ika nin tlajtolsenkaualistli Jehová okiyekilui nin ueyi Tekiua tlen okatka itech Israel, Mesías kisaskia itech ikalchanejkauan (Luc. 1:30-33). Ijkon okachi kuali okiteititi kanin kisaskia iixui. Okijto se iixui David tlanauatiskia itech Tekiuajkayotl mesiánico (Ezeq. 21:25-27). Ika Jesús, itekiuajkayo David “kitlaliskej nochipa ma yeto”. Uan noijki “iixuiuan yetoskej nochipa, uan kanin tlanauatia [uejkauas miak] ken Tonaltsin” (Sal. 89:34-37). ITekiuajkayo Mesías nochipa kuali tlanauatis uan tlen kichiuas uejkauas nochipa.
Matiktemokan ken techpaleuia Biblia
Jehová okilui David tlen kichiuaskia
Tonal uan metstli techilnamiktiaj nochipa yetos itekiuajkayo Mesías (Sal. 89:35-37). Ijkuak tikinmitas, xikilnamiki Jehová ika iTekiuajkayo mitsteochiuas te uan mofamilia.
30 DE SEPTIEMBRE-6 DE OCTUBRE
KEN TECHPALEUIA BIBLIA SALMOS 90, 91
Matikneltokakan Jehová tla tiknekij tiyoltoskej
Kitemoaj tlen techpaleuis
Amo nochtin ixtlamatkej kineltokaj pajtli tlen kichijchiuaj uelis kichiuas okachi miak xiuitl ma tiyoltokan. Itech siglo diecinueve opejki okachi kuali tikatej porque axkan technauatiaj ma tiyetokan tichipauakej, techiluiaj tlen tikchiuaskej uan ijkon amo techajsis se kokolistli uan yokichijchijkej miak pajtli tlen ika timopajtiaj. Sekimej ixtlamatkej tlen kitaj ken chijchitok totlalnakayo kijtoaj ayakmo tiyoltoskej miak xiuitl.
Yikipia kanaj tres mil quinientos xiuitl, Moisés tlen okinmijkuilo seki amochmej tlen pouij itech Biblia, okijto: “Tiyoltokej 70 xiuitl uan tla ok tikpiaj chikaualistli tikajxitiaj 80 xiuitl. Pero tikpiaj miak ouijkayotl uan timotekipachoaj; san totoka panotikisa xiuitl” (Salmo 90:10). Ixtlamatkej miak tlamantli kitemoaj ma techpaleui okachi miak xiuitl ma tiyoltokan pero san tiyoltokej ken okijto Moisés.
Sekimej ayotsitsintin yoltokej kanaj ciento cincuenta xiuitl uan noijki se kuauitl itoka cedro yoltok sapanoa miak xiuitl. Ik non, ijkuak tikitaj amo miak xiuitl tiyoltokej, timotlajtlaniaj: “¿Kox ipati ma tiyoltokan san kanaj setenta noso ochenta xiuitl?”.
wp19.1 pág. 5, recuadro
¿Tlen itoka toTajtsin Dios?
¿Akin okichijchi toTajtsin Dios?
Miakej motlajtlaniaj akin okichijchi toTajtsin Dios. Xamo noijki ijkon timotlajtlania, ¿akin okichijchi toTajtsin Dios tla ye okichijchi nochi tlen onka?
Miakej ixtlamatkej kijtoaj ikaj opejki kichijchiua semanauak. Ijkon kiteititia achto versículo tlen kajki itech Biblia, kijtoa: “Achto, toTajtsin Dios okichijchi iluikak uan tlaltikpak” (Génesis 1:1).
Semanauak amo iselti omochijchi. Tla amitlaj onka amo uelis itlaj mochijchiuas. Tla amo yetoskia akin otlachijchi, ¿akin uelis kichijchiuaskia semanauak? Jehová kipia miak chikaualistli uan ixtlamatki, ik non, nochi otlachijchi (Juan 4:24).
Biblia kijtoa itech toTajtsin Dios: “Ijkuak ayamo otikchijchiuaya tepeyo, ijkuak ayamo otikchijchiuaya tlaltikpak uan ijkuak ayamo otlatlakiaya, te yotikatka tiDios uan nochipa tiyetos” (Salmo 90:2). ToTajtsin Dios nochipa kajki. Ye ‘okichijchi nochi tlan onka’ (Apocalipsis 4:11).
Amo timomojtiskej porque Jehová techtlasojtla
16 Satanás kuali kimati tejuan tikpatioitaj tonemilis, ik non, kijtoua uelis ayakmo timouikaskej iuan Jehová tla tiknekij tiyoltoskej (Job 2:4, 5). ¡Pero amo melauak tlen kijtoua! Ye ‘amokualitlakatl non kinmiktia n tlaltikpaktlakah’ kineki techmomojtis uan ayakmo ma tiktekichiuilikan Jehová (Heb. 2:14, 15). Ualeua Satanás kichiua sekimej ma techiluikan tla amo tikkauaskej Jehová, techmiktiskej. Noso ijkuak timokokouaj ye kineki amo ma tiktlakamatikan Jehová. Xamo akinmej tlapajtiaj noso tofamiliares tlen amo kitekichiuiliaj, techiluiskej ma techtlalilikan estli uan ijkon amo ma tiktlakamatikan Jehová. Noso xamo ikaj techiluis ma timopajtikan pero ika tlen kixnamiki principios bíblicos.
17 Tejuan amo tiknekij tiixpoliuiskej pero tla tiixpoliuij Jehová ok techtlasojtlas (xiktlajtolti Romanos 8:37-39). Ijkuak ixpoliuij iyolikniuan ok kinmilnamiktok ken yetoskia ok yoltokej (Luc. 20:37, 38). Ye kinektok kinyolitis (Job 14:15). Jehová okichi itlaj sapanoua ipati para uelis tiyoltoskej nochipa (Juan 3:16). Kuali tikmatij Jehová sapanoua techtlasojtla, ik non, ijkuak timokokouaj noso techiluiaj techmiktiskej amo tikkauaj. Tikneltokaj ye techyolseuis, techpaleuis ma titlaxikokan uan techpaleuis ma tiyetokan tiixtlamatkej. Non tlen okichijkej Valeria uan inamik (Sal. 41:3).
Matiktemokan ken techpaleuia Biblia
wp17.5-S pág. 5
¿Kox tikpiaj se ángel tlen techmaluia?
Biblia amo kijtoua kox tikpiaj sejse ángel tlen techmaluia. Jesús okijto: “Amo keman xikintlauelitakan akinmej yolyamankej [noso idiscípulos]. Porque ne namechiluia inmiángeles nochipa kitaj noTajtsin tlen kajki iluikak” (Mateo 18:10). Pero non amo kijtosneki tikpiaj sejse ángel tlen techmaluia. Jesús okinekiaya kijtos ángeles kinekij kinpaleuiskej akinmej kichiuaj ken ye. Ikinon akinmej tikchiuaj ken Cristo timomaluiaj uan amo tikijtouaj ángeles techmaluiskej amitlaj matechpano.
Non amo kijtosneki ángeles amo keman techpaleuiaj (Salmo 91:11). Sekimej kineltokaj toTajtsin Dios kinualtitlanilia iángeles makinpaleuikan. Ijkon kineltoka Kenneth tlen achto otimotlapouijkej. Tejuan amo uelis tikijtoskej kox melauak ijkon opanok. Miak uelta sekimej tokniuan kijtouaj ángeles okinpaleuijkej ijkuak otetlapouiayaj. Ángeles amo tikinmitaj ikinon amo tikmatij ken kinnauatia toTajtsin Dios matechpaleuikan. Pero uelis tiktlasojkamatiliskej Jehová tla tikmachiliaj yotechpaleui (Colosenses 3:15; Santiago 1:17, 18).
7-13 DE OCTUBRE
KEN TECHPALEUIA BIBLIA SALMOS 92-95
Tiyolpakiskej tla tiktekichiuiliskej Jehová
Telpokamej uan ichpokamej, ¿nankinekij okachi nankitekichiuiliskej Jehová?
5 Achto, moneki tikitas ken okachi tiktekichiuilis Jehová porque moneki tikteititis tiktlasojkamatilia ijkuak mitspaleuia uan mitstlasojtla. Se salmista okijkuilo: “Kuali se kitlasojkamatilis Jehová”. Noijki okijto: “Jehová, nechyolpaktia nochi tlen tikchiua uan nimitstlakuikilia porque yotikchi miak tlamantli” (Sal. 92:1, 4). Ximokuayejyeko tlen yomitsmakak Jehová: yolilistli, Biblia, tlanechikol, tiyetos itech xochitlali uan mitskauilia xikixmati. Tla tikpejpenas tiktekichiuilis, tikteititis tiktlasojkamatilia tlen mitsmaka uan okachi kuali iuan timouikas.
¿Akin tiknekij ma techyekana?
8 Jehová kineki kuali ma tiyetokan porque techtlasojtla ken se teta (Is. 48:17, 18). Ik non, kineki ma timoyekanakan ika principios bíblicos tlen techpaleuiaj ma tikpiakan kuali toyelis uan ken timouikaskej iuan oksekimej. Techiluia ma timokuayejyekokan ken ye. ¿Kijtosneki amo techkauilia ma tikpejpenakan tlen tikchiuaskej? Amo. Porque ye kineki kuali ma timokuayejyekokan tlen tikchiuaskej (Sal. 92:5; Prov. 2:1-5; Is. 55:9). Kineki ma tikpejpenakan tlen kuali uan noijki tlen techpaktia. Ijkon sapanoa tiyolpakiskej (Sal. 1:2, 3). Sapanoa techpaleuia timokuayejyekoskej ken Jehová.
Jehová techpatioita
18 Amo ma tikilkauakan ijkuak yitikpiaj miak xiuitl ok uelis tiktekichiuiliskej Jehová (Sal. 92:12-15). Jesús otechititi Jehová kipatioita tiktekichiuiliaj maski ualeua timokuayejyekouaj ayakmo tiktekichiuiliaj ken achto otikchiuayaj (Luc. 21:2-4). Ik non, san ma timokuayejyekokan ken uelis okachi tiktekichiuiliskej Jehová. Ma tikitakan ken uelis tikchiuaskej. Ma tikintlapouikan oksekimej akin Jehová, ma timotlatlaujtikan inpatka tokniuan uan ma tikinyolchikauakan amo ma kikauakan Jehová. Jehová kijtoua “titlapalewijkeh itech iteki” porque tiktlakamatij uan amo san kita kox sapanoua tiktekichiuiliaj (1 Cor. 3:5-9).
Matiktemokan ken techpaleuia Biblia
cl-S pág. 176 párr. 18
“ToTajtsin Dios sapanoua [...] ixtlamatki”
18 Pablo okijkuilo ken omomachiliaya ijkuak omokuayejyekouaya Jehová sapanoua ixtlamatki. Ye okijto: “¡ToTajtsin Dios sapanoua techteochiua! Ye ixtlamatki uan kimati miak tlamantli. Amikaj uelis kajsikamatis ken tlaixkomaka uan tejuan amo uelis tikmatiskej nochi tlen kichiua” (Romanos 11:33). Mota sapanoua omotlajtlachialti ijkuak apóstol Pablo okijkuilo nin texto. Tlajtoli “sapanoua” ika griego okijtosnekiaya ken itlaj uejkatlan. Non kijtosneki ijkuak timokuayejyekouaj toTajtsin Dios sapanoua ixtlamatki yetoskia ken ijkuak tontlachiaj kanin uejkatlan uan amo tikitaj kanin tlami. Ikinon amo keman tikajsikamatiskej tleka Jehová sapanoua ixtlamatki maski timochijchikauaskej tikmatiskej. Noijki amo keman tikmatiskej nochi tlen Jehová kimati (Salmo 92:5). San Jehová sapanoua ixtlamatki.
14-20 DE OCTUBRE
KEN TECHPALEUIA BIBLIA SALMOS 96-99
Matiktematiltikan kuali tlajtoli
w11-S 1/3 pág. 6 párrs. 1, 2
¿Tlen kijtosneki kuali tlajtoli?
AKINMEJ tikchiuaj ken Cristo moneki titetlapouiskej kuali tlajtoli. Ikinon tikinmiluiaj oksekimej iTekiuajkayo toTajtsin Dios kuali tlanauatis nikan tlaltikpak. Biblia noijki kijtoua “kuali tlajtoli tlen temakixtia”, ‘tiktematiltiaj kuali tlajtoli’ uan “kuali tlajtoli tlen okijto Jesucristo” (Salmo 96:2, Romanos 15:16, Marcos 1:1). Pero ¿tlen kijtosneki kuali tlajtoli?
Kuali tlajtoli kijtosneki tlen otlamachti Jesús uan okijkuilojkej idiscípulos. Achto yaskia iluikak ye okinnauati idiscípulos: “Xiakan itech nochi altepemej uan xitlamachtikan makichiuakan tlen ne onikchi. Xiteapolaktikan ika itoka noTajtsin, iKone uan espíritu santo. Xikinmachtikan makichiuakan nochi tlen onamechnauati” (Mateo 28:19, 20). Ikinon akinmej tikchiuaj ken Cristo moneki titetlapouiskej uan tikinmachtiskej oksekimej para mamochiuakan idiscípulos Cristo.
w12-S 1/9 pág. 16 párr. 1
¿Tlen panos ijkuak toTajtsin Dios tlaixkomakas?
Dibujo tlen mota toyekma kiteititia tlen miakej mokuayejyekouaj panos ijkuak toTajtsin Dios tlaixkomakas. Mokuayejyekouaj sapanoua miakej monechikoskej ixpan itrono para makinmixkomaka. Mokuayejyekouaj ijkuak kinmixkomakas sekimej yaskej iluikak uan oksekimej kintlajyouiltiskej ijtik tlitl. Pero Biblia kijtoua ijkuak toTajtsin Dios tlaixkomakas ayakmo yetos tlen amo kuali (Salmo 96:13). ToTajtsin Dios okitlali Jesús matlaixkomaka uan ijkon mamochiua tlen kuali nikan tlaltikpak (xiktlajtolti Isaías 11:1-5; Hechos 17:31).
w12-S 15/9 pág. 12 párrs. 18, 19
Timoyolseuijtoskej mil xiuitl uan mochiuas okseki tlamantli
18 Adán uan Eva ayakmo omouikakej iuan Jehová ijkuak ayakmo okikauilijkej makinnauati porque okitlakamatkej Satanás. Pero desde 1914 iTekiuajkayo toTajtsin Dios kichijtok miak tlamantli para san sekan matiyetokan uan kuali matimouikakan (Efes. 1:9, 10). Ijkuak Jesús tlanauatis mil xiuitl mochiuas seki tlamantli tlen ayamo tikitaj. Satepan nochi tlamis uan non kijtosneki ijkuak Jesús tlamis tlanauatis mil xiuitl. ¿Tlen panos satepan? Jesús amo tlaixneki uan amo kineki kipatkayotis Jehová maski okiluijkej matlanauati iluikak uan tlaltikpak. Jesús yolyamanki ikinon kimaktilis Tekiuajkayotl iTajtsin uan ijkon kiueyichiuas (Mat. 28:18; Filip. 2:9-11).
19 Ijkuakon non Tekiuajkayotl tlapaleuis ayakmo mayetokan tlajtlakolejkej nochtin akinmej chantiskej nikan tlaltikpak. Yejuan kichiuaskej ijkon ken Jesús okichi uan kikauiliskej Jehová makinnauati porque yetoskej yolyamankej. Pero ok monekis itlaj kichiuaskej para kiteititiskej kinekij Jehová makinnauati (Apoc. 20:7-10). Saiktlami akinmej chantij iluikak uan tlaltikpak kinmixpoloskej porque kixnamikij Jehová. Sapanoua tipakiskej ijkuak ijkon panos. Ijkuakon nochtin akinmej chantiskej tlaltikpak uan akinmej katej iluikak san sekan kiueyichiuaskej Jehová (xiktlajtolti Salmo 99:1-3).
Matiktemokan ken techpaleuia Biblia
Jehová techiluia kichiuas se xochitlali
9 Apocalipsis 21:5 kijtoua: “Ne nochi nikyankuilijtok”. Nonmej tlajtolmej techpaleuiaj matimokuayejyekokan ome tlamantli tlen Jehová kichiuas. Ye tlayektlalis uan kipatlas seki tlamantli. Achto tikitaskej tlen kipatlas. Apocalipsis 21:1 kijtoua: “Opojpoliuik iluikak uan tlaltikpak tlen achto okatkaj”. Iluikak tlen achto okatka kijtosneki tekiuajkej tlen kinyekana Satanás uan iejekauan (Mat. 4:8, 9; 1 Juan 5:19). Ijkuak Biblia kijtoua tlaltikpak ualeua kijtosneki akinmej chantij ipan tlaltikpak (Gén. 11:1; Sal. 96:1). Tlaltikpak tlen achto okatka kijtosneki akinmej amo yolkualmej. Non kijtosneki Jehová amo san kiyektlalis iluikak uan tlaltikpak. Ye kinpojpolos uan kitlalis se yankuik “iluikak” uan se yankuik “tlaltikpak”. Non kijtosneki kitlalis se yankuik tekiua uan ye kinnauatis akinmej yolkualmej.
21-27 DE OCTUBRE
KEN TECHPALEUIA BIBLIA SALMOS 100-102
Matikteititikan tiktlasojkamatiliaj Jehová techtlasojtla
¿Tlen moneki tikchiuaskej para timoapolaktiskej?
18 Okachi ipati tiktlasojtlas Jehová (xiktlajtolti Proverbios 3:3-6). Tla tiktlasojtla toTajtsin Dios ika nochi moyolo, mitspaleuis xitlaxiko ijkuak mitspanos tlen amo kuali. Biblia kijtoua miak uelta Jehová okiteititi kintlasojtla itekipanojkauan ika nochi iyolo. Non kijtosneki ye nochipa kinpaleuia uan nochipa kintlasojtla (Sal. 100:5). Jehová omitschijchi ken ye (Gén. 1:26). Ikinon ¿ken uelis titetlasojtlas ijkon ken Jehová?
19 Xitetlasojkamati (1 Tes. 5:18). Mojmostla ximotlajtlani: “¿Ken okiteititi axkan Jehová nechtlasojtla?”. Satepan ijkuak tiktlatlaujtis Jehová, xiktlasojkamatili. Ijkon ken apóstol Pablo xikpatioita ijkuak Jehová kiteititia mitstlasojtla (xiktlajtolti Gálatas 2:20). Ximotlajtlani: “¿Nikneki nikititis Jehová niktlasojtla?”. Tla tiktlasojtla Jehová, amo titlajtlakolchiuas, titlaxikos ijkuak titlajyouis uan okachi iuan timouikas. Ijkon mojmostla tikteititis tiktlasojtla toTajtsin Dios.
‘Matiijsatokan uan kuali matitlachixtokan’
10 Amo san matikinonotsakan noso matikinmixuetskilikan oksekimej, amo matitlauanakan, amo sapanoua matitlakuakan, amo matiteyolkokokan, amo matikitakan kanin moteuiaj nion matikitakan pornografía. Non seki tlamantli tlen amo moneki tikchiuaskej (Sal. 101:3). Satanás nochipa kitemojtok ken techijtlakos uan ayakmo matimouikakan iuan Jehová (1 Ped. 5:8). Tla amo timomaluiaj, ye techyolinis matitenexikolitakan, matitlachtekikan, matitlaixnekikan, matitekokolikan, matimoueyinekikan uan amo matitetlapojpoluikan (Gál. 5:19-21). Xamo ijkuak yikin peuas techijtlakos timokuayejyekoskej amitlaj techpanos. Tla ijkon timokuayejyekojtoskej uan amo tikpatla ken timokuayejyekouaj, moskaltis ijkon ken se xiuitl tlen amo kuali uan titlajyouiskej (Sant. 1:14, 15)
w11-S 15/7 pág. 16 párrs. 7, 8
¿Tikkakiskej tlen techiluia Jehová matikchiuakan?
7 ¿Tlen uelis tikchiuaskej para amo tikinkakiskej akinmej tlamachtiaj tlen amo melauak? Amo tikintlajpalouaj uan amo tikinseliaj tokalijtik. Amo keman tiktlajtoltiaj nion tikkakij tlen kijtouaj itech televisión, tlen kijkuilouaj itech amochmej, tlen kitlaliaj itech internet nion tikintlajkuililiaj itech páginas tlen kipiaj itech internet. ¿Tleka amo ijkon tikchiuaj? Porque tiktlasojtlaj Jehová akin nochipa techiluia tlen melauak. Ikinon amitlaj tiknekij tikkakiskej tlen kixnamiki iTlajtol (Sal. 31:5; Juan 17:17). Noijki tiktlakamatij tlen kijtoua ialtepe porque yotechmachti miak tlamantli. Yotechmachti itoka toTajtsin Dios uan tlen kijtosneki, tleka okichijchi tlaltikpak, ken katej akinmej yoixpolikej uan ajsis tonal kinyolitiskej. ¿Ken otimomachilijkej ijkuak otechmachtijkej nochi non tlamantli? Ialtepe toTajtsin Dios yotechmachti miak tlamantli. Ikinon ¿tleka tikinkakiskej akinmej kixnamikij toTajtsin Dios uan kikokoliaj ialtepe? Tla tikinkakiskej timokuayejyekoskej ijkon ken yejuan mokuayejyekouaj (Juan 6:66-69).
8 Amo tikinkakiskej maski san tlen tlamantli kijtoskej. ¿Tleka amo moneki matikinkakikan? Porque yejuan yetoskiaj ken se tlakoyo tlen amo kipia atl porque san tlakajkayauaj. Tejuan amo keman tikkauaskej Jehová nion ialtepe porque yimiak xiuitl techmachtijtok tlen kijtoua Biblia uan non techyolseuia (Is. 55:1-3; Mat. 24:45-47).
Matiktemokan ken techpaleuia Biblia
w14-S 15/03 pág. 16 párr. 21
Matimokuayejyekokan tlen kuali
21 Salmo 102 techmachtia okachi matimokuayejyekokan tlen kuali. Akin okijkuilo Salmo omokuayejyekouaya tlen kuali porque okachi okitak ken omouikaya iuan Jehová (Sal. 102:12, 27). Ye omoyolseuiaya porque okimatiaya Jehová kipaleuiskia ialtepe ijkuak tlajyouiskia. Ikinon xikilui Jehová ken timomachilia porque amo ueli tiktekichiuilia ijkon ken tiknekiskia. Xikilui mamitskaki para mamotematilti itoka uan amo san para timoyolseuis (Sal. 102:20, 21).
28 DE OCTUBRE-3 DE NOVIEMBRE
KEN TECHPALEUIA BIBLIA SALMOS 103, 104
Kilnamiktok “tejuan titlali”
Matiteajsikamatikan ijkon ken Jehová kichiua
5 Jehová teajsikamati porque ye yolyamanki uan teiknomati. Ijkon okiteititi ijkuak kinmixpoloskia akinmej ochantiayaj Sodoma. Jehová okintitlanki sekimej ángeles makinmiluitij Lot uan ifamilia macholokan kanin tepeyo. Pero ye amo okinekiaya ompa yas porque omomojtiaya. Ikinon okitlatlaujti Jehová makikauili ye iuan ifamilia mokauaskiaj altepetl Zóar. Jehová uelis kichiualtiskia makitlakamati pero amo ijkon okichi. Ye okikauili Lot uan ifamilia ompa mauiaj maski noijki okinekiaya kipojpolos non altepetl (Gén. 19:18-22). Satepan Jehová noijki okinmiknomatki akinmej ochantiayaj Nínive. Jehová okititlanki profeta Jonás para makinmiluiti kinmixpoloskia porque okatkaj sapanoua amo yolkualmej. Pero Jehová okinmiknomatki uan okintlapojpolui porque yejuan omoyolkopkej (Jon. 3:1, 10; 4:10, 11).
w23.09 págs. 6, 7 párrs. 16-18
Matikiluikan Jehová matechpaleui ijkon ken okichi Sansón
16 Sansón otlajyoui ijkuak okichi tlen amo kuali pero nochipa omochijchika kichiuas tlen kineki toTajtsin Dios. Tejuan noijki amo matimosotlauakan tla tikchiuaj itlaj amo kuali uan techyektlaliskej noso ayakmo tikpiaskej se tekitl itech tlanechikol. Matikilnamiktokan Jehová amo kijtoua amo keman uelis itlaj kuali tikchiuaskej (Sal. 103:8-10). Ualeua tikchiuaj tlen amo kuali pero Jehová uelis techpaleuis matikchiuakan tlen ye kineki ijkon ken okipaleui Sansón.
17 Matikitakan tlen okipanok se telpochtli itoka Michael. Ye okatka siervo ministerial, precursor regular uan sapanoua omochijchikauaya kitekichiuilis Jehová. Pero satepan okichi itlaj tlen amo kuali uan ayakmo okikauilijkej makichiua seki tekitl kanin monechikoua. Ye okijto: “Sapanoua onimochijchikajtoka niktekichiuilis Jehová. Pero opejki nikmachilia itlaj onechtsakuiliaya uan ayakmo uelis niktekichiuiliskia Jehová. Onikmatiaya Jehová amo keman nechkauaskia noselti. Pero onimotlajtlaniaya kox oksepa nimouikaskia iuan Jehová uan kox oksepa nitlapaleuiskia kanin nimonechikoua ijkon ken achto onikchiuaya”.
18 Michael amo omosotla. Ye okijto: “Onimochijchika okachi nimouikas iuan Jehová. Onechpaleui nimotlatlaujtis ika nochi noyolo, nimomachtis uan nimokuayejyekos tlen onimomachtiaya”. Satepan Michael oksepa opejki tlapaleuia kanin monechikoua. Axkan ye tlayekanki uan tlapaleuia ken precursor regular. Ye okijto: “Tlayekankej onechyolchikajkej uan onechpaleuijkej manikita Jehová ok nechtlasojtla. Axkan niktekichiuilia Jehová uan amo nechkuejsoua notlalnamikilis. Tlen onechpanok nechititia Jehová techtlapojpoluia tla melauak timoyolkopaj”. Ualeua tikchiuaj tlen amo kuali pero Jehová uelis techpaleuis matikchiuakan tlen ye kineki ijkon ken okipaleui Michael. Noijki matikyektlalikan tlen amo kuali tikchijtokej uan matikiluikan Jehová matechpaleui uan ijkon techteochiuas (Sal. 86:5; Prov. 28:13).
Uelis okachi tiktekichiuiliskej Jehová
2 Amo ximotekipacho tla tikita oui okachi tiktekichiuilis Jehová. Moneki timochijchikauas uan timajxilis para tikchiuas seki tlamantli. Xamo ijkon tikchiuaj porque tiktlasojtla Jehová uan tikpatioita kuali iuan timouika. Ye kimati tlen uelis tikchiuas uan amo mitsiluia xikchiua tlen amo tiueli (Sal. 103:14; Miq. 6:8). Xikita kox melauak uelis tikchiuas tlen tikneki para okachi tiktekichiuilis Jehová. Tla tikita tiuelis tikchiuas tlen tikneki, ¿tlen mitspaleuis ijkon xikchiua? Matikitakan seki tlamantli.
Matiktemokan ken techpaleuia Biblia
cl-S pág. 55 párr. 18
Jehová okichijchi iluikak uan tlaltikpak porque kipia miak chikaualistli
18 ¿Tlen techmachtia Jehová ijkuak tikitaj nochi tlen okichijchi? Techtlajtlachialtia nochtin yolkamej tlen okinchijchi Jehová. Se tlakatl tlen okijkuilo Salmo okijto: “¡Jehová melauak miak tlamantli yotikchijchi! [...] Tlaltikpak tentok ika nochi tlen otikchijchi” (Salmo 104:24). Melauak tlen kijtoua nin Salmo. Científicos kijtouaj yokinmajsikej sapanoua miakej yolkamej pero kijtouaj katej okachi miakej tlen ayamo kinmajsij. Tejuan amo miak tlamantli tikchiuaj pero Jehová kichiua sapanoua miak tlamantli. Ye kipia miak chikaualistli uan nochipa kichiua miak tlamantli yankuik uan tlatlamantli.