Jehová kichiua kuali ma nikpia monemilis

NOTATAJUAN ONECHPALEUIJKEJ MA NIKTEKICHIUILI JEHOVÁ

Notatajuan opejki momachtiaj Biblia kanaj itech xiuitl 1920 ijkuak ok inselti okatkaj. Kanaj itech 1939 ne onineski ompa Inglaterra. Ijkuak onikatka nitsikitsin opejki nimonechikoua uan opejki nipanoua itech Tlamachtil para Akinmej Tetlapouiaj. Ok nikilnamiktok ijkuak yikin onipanok. Onitlejkok ipan se caja para nikinmitaskia tokniuan porque nitsikitsin onikatka, yikin onikpiaya chikuase xiuitl. Sapanoua onimomojti ijkuak onikinmitak tokniuan porque nochtin yokipiayaj miak xiuitl.

Notajtsin onechijkuilili ipan se amatsintli tlen nikijtoskia ijkuak nitetlapouiskia. Onikpiaya chikueyi xiuitl ijkuak yikin onitetlapouito. Okiski se tlakatl, okitlajtolti amatsintli tlen onikmakak uan okimokaui amochtli “Sea Dios veraz”. Oniyolpakik miak uan san niman oniktlapoui notajtsin. Ijkuak onitetlapouiaya uan onimonechikouaya onechpaleui okachi ma nikneki niktekichiuilis Jehová.

Okachi opejki nikpatioita tlen tlamachtia Biblia ijkuak notajtsin okitlajtlanki noijki ne ma nechtitlanilikan revistas Akin Tetlapouijtok. San niman onikintlajtoltiaya. Opejki okachi nitlaneltoka itech Jehová, ik non, onikijto ixpan nimotemakaskia.

Itech xiuitl 1950 notatajuan uan ne otiajkej se ueyi nechikol ompa Nueva York. Ueyi nechikol omotokayoti “Aumento de la Teocracia”. Jueves 3 de agosto tlamachtil omotokayoti “Día del misionero”. Tokni Carey Barber, akin satepan opouiaya iuan tokniuan tlen pouij itech Cuerpo Gobernante, otechtlapoui akinmej otimoapolaktijkej. Ijkuak otlanki otechtlapoui, otechtlajtlani ome tlamantli. Onimoketski uan chikauak onikijto: “Kema”. Maski san onikpiaya 11 xiuitl onikmatoka miak ipati tlen onikchijtoka. Onimomojtiaya nikalakis ijtik atl porque amo onikmatiaya niajkuis. Pero notío onechyolseui uan onechuikak kanin nimoapolaktiskia. Totoka onechapolaktijkej uan san ixko atl onechpanoltijtiajkej. Se tokni onechapolakti uan okse tokni onechpaleui ma nikisa. Non tonal miak ipati porque Jehová opejki kichiua kuali ma nikpia monemilis.

ONITLANELTOKAK ITECH JEHOVÁ

Ijkuak otlanki onimomachti escuela, oniknekiaya nimochiuas precursor. Pero akinmej onechmachtiaya onechchiualtijkej ma niuia universidad. Pero san niman onikitak amo uelis nikpiaskia chikauak notlaneltokilis uan nimomachtiskia universidad. Ik non, ayakmo onimomachti. Oniktlatlaujti Jehová uan satepan onikinmijkuilili se carta akinmej onechmachtiayaj uan onikinmilui san se xiuitl nimomachtiskia. Onitlaneltokaya itech Jehová ika nochi noyolo, ik non, san niman onimochi precursor.

Itech julio 1957 onimochi precursor ompa Wellingborough. Onikintlajtlani tokniuan tlen otlapaleuiayaj Betel ompa Londres, ma nechiluikan kanin okatka se precursor ixtlamatki para iuan nitetlapouiskia. Onia iuan se tokni tlen omotokayotiaya Bert Vaisey. Non tokni okichiuaya miak tlamantli uan onechpaleui ma nikita keman nitetlapouiskia. Itech tlanechikol san okatkaj chikuase tokniuan tlen yokipiayaj miak xiuitl, tokni Bert uan ne. Ijkuak onimomachtiaya tlen tikitaskiaj itech nechikol uan onitlamachtiaya, onechpaleui okachi ma nitlaneltoka itech Jehová uan ma nikteititi.

Amo onimomachtito para niyetos soldado, ik non, onechtsakej. Satepan onikixmatki se tokni tlen omotokayotiaya Barbara uan okatka precursora especial. Itech xiuitl 1959 otimonamiktijkej uan otiknekiayaj tiktekichiuiliskej Jehová san kanin techtitlaniskiaj. Achto otechtitlankej ompa Lancashire, ik noroeste Inglaterra. Satepan itech enero 1961 ompa Betel onikselito se metstli Tlamachtil itech Tekiuajkayotl. Ijkuak otlanki onimomachti, onechiluijkej nitlapaleuiskia ken tlayekanki itech circuito, non sapanoua onechtlajtlachialti. Ompa Birmingham se tokni tlen yokipiaya miak xiuitl ken tlayekanki itech circuito onechmachti ome semanas, Barbara nouan oyajki. Satepan otiajkej Lancashire uan Cheshire, ompa titlapaleuiskiaj.

SAPANOUA NIYOLPAKI PORQUE NITLANELTOKA ITECH JEHOVÁ

Itech agosto 1962 ijkuak otipaxialotoj, otikselijkej se carta tlen otechintitlanilijkej tokniuan tlen otlapaleuiayaj Betel. Ompa otechtitlanilijkej solicitudes para tikseliskiaj tlamachtil tlen kichiuaj ompa Patterson tlen itoka Galaad, tlamachtil 38. Barbara uan ne otiktlatlaujtijkej Jehová, san niman otiktemitijkej solicitudes uan otiktitlankej Betel. Ijkuak opanok makuili metstli, otiajkej Brooklyn Nueva York para timomachtiskiaj majtlaktli metstli.

Ompa amo san otimomachtijkej iTlajtol toTajtsin Dios uan ialtepe, noijki otechmachtijkej itech tokniuan. Ayamo otikajxitiayaj 25 xiuitl, ik non, tokniuan tlen inmiuan otimomachtijkej otechititijkej tlen omonekiaya tikchiuaskej. Se ueyi tlateochiualistli onikpaleui tokni Fred Rusk akin noijki otechmachtiaya. Nikpatioita ye onechmachti ijkuak nikiluis se tokni tlen moneki kichiuas, moneki nikiluis ijkon ken kijtoua Biblia. Noijki otechmachtiayaj tokniuan ixtlamatkej ken Nathan Knorr, Frederick Franz uan Karl Klein. Tokni Alexander Macmillan okatka yolyamanki uan otechmachti tlen omonekiaya tikchiuaskej. Ye okitemakak se tlapoualistli uan okiyekijto ken Jehová okipaleui ialtepe ijkuak okixnamik ouijkayotl itech 1914, hasta kanaj ijkuak opejki xiuitl 1919.

OKSEKAN OTITETLAPOUITOJ

Ijkuak yitlamiskia timomachtiskej, tokni Nathan Knorr otechilui Barbara uan ne techtitlaniskiaj itech se altepetl tlen okatka ompa África uan omotokayotiaya Burundi. San niman otiajkej kanin okintlatiayaj amochmej ompa Betel uan otiktemojkej itech Anuario para tikmatiskiaj keski otetlapouiayaj ompa Burundi. Pero amo kanaj otlajtouaya itech non altepetl. Tiaskiaj kanin ayamo ikaj otetlapouiaya uan amitlaj otikmatiayaj itech non altepetl. Otimomojtiayaj pero otimoyolseuijkej ijkuak otimotlatlaujtijkej.

Ompa okseki tlamantli otlakatka, okse tlamantli tlen okichiuayaj uan noijki otlajtouayaj okse tlajtoli. Ik non, omonekiaya timomachtiskej francés. Omonekiaya tiktemoskej kanin tichantiskiaj. Itech non altepetl otechtlajpalotikiski tokni Harry Arnott tlen noijki touan omomachtito ijkuak otiajkej Nueva York. Ye oyaya Zambia pero otechpaleui ma tikajsikan kanin tichantiskiaj. Ompa otichantitoj ijkuak yikin opejki titlapaleuiaj ken misioneros. Pero tekiuajkej opejkej techtlajyouiltiaj, amo okinmixmatiayaj iTlaixpantijkauan Jehová. Otechpaktiaya titetlapouiskej pero otechiluijkej amo uelis ompa titetlapouiskiaj uan tla otiknekiayaj ompa tiyetoskej, omonekiaya tikkixtiskej se amatl. Ik non, otiajkej Uganda.

Amo otikpiayaj visa, ik non, otimomojtiayaj pero otikneltokayaj Jehová techpaleuiskia. Se tokni tlen oualaya Canadá uan ompa yotetlapouiaya, omotlapoui iuan se tlakatl tlen okijtouaya akinmej uelis kalakiskiaj itech non altepetl. Otikitakej otechpaleui Jehová porque otechkauilijkej ompa ma timokauakan.

Non altepetl okse tlamantli okatka porque ompa okatkaj 28 tokniuan. Miakej akinmej otikintlapouiayaj otlajtouayaj inglés. Pero otikitakej omonekiaya timomachtiskej intlajtol para ijkon kitekichiuiliskiaj Jehová. Otikijtojkej timomachtiskiaj tlajtoli luganda porque ompa Kampala kanin peuas titetlapouiskiaj, miakej otlajtouayaj non tlajtoli. Maski otiuejkajkej otimomachtijkej uan otikitakej melauak okinpaleui ijkuak opejki tikintlapouiaj ika intlajtol. Opejki tikajsikamatij ken omonekiaya tikinpaleuiskej akinmej otikinmachtiayaj para okachi kitlasojtlaskiaj Jehová. Noijki yejuan opejkej techiluiaj tlen omokuayejyekouayaj tlen omomachtijtokaj.

OTITLAPALEUITOJ OKSEKAN

Otiyolpakej ijkuak otikinmajsikej akinmej yolyamankej uan okinekiayaj momachtiskej Biblia. Pero noijki otiyolpakej ijkuak otechiluijkej tikintlajpaloskiaj tlanechikolmej. Tokniuan tlen tlapaleuiaj Betel ompa Kenia otechiluijkej ma tiakan itech seki altepemej para tikitaskiaj kanin okachi omonekiaya kintitlaniskej precursores especiales. Sekimej maski amo okinmixmatiayaj iTlaixpantijkauan Jehová, kuali otechselijkej inkalijtik uan noijki otechtlamakakej.

Satepan oksekan otechtitlankej, itech tren otikiskej ompa Kampala uan otiajsitoj Mombasa ompa Kenia. Satepan ika se Barco otiajsitoj Seychelles ompa itech océano Índico. Satepan itech xiuitl 1965 hasta 1972, Barbara uan ne opejki tikintlajpalouaj akinmej ochantiayaj ompa, san okatkaj ome tokniuan. Ijkuakon opejkej mololouaj san sekimej pero satepan omomiaktilijkej uan omochi se tlanechikol. Satepan noijki onikintlajpaloto tokniuan itech altepetl Eritrea, Etiopía uan Sudán.

Ompa Uganda sekimej soldados okinmixnamikej tekiuajkej uan yejuan opejkej tlanauatiaj. Ijkuakon miak xiuitl otlajyouijkej akinmej ompa ochantiayaj. Onikajsikamatki miak ipati ma tikmakakan “César tlan iaxka n César” (Mar. 12:17). Se tonal akinmej amo ompa inchan, okinnauatijkej ma moijkuilotij kanin okatkaj policías, san niman otiajkej. Se tonal se misionero uan ne otiayaj Kampala, seki policías otechtsakuilijkej. Sapanoua onimomojti, otechiluijkej san otitlajtlachiatoj uan otechuikakej inmixpan okseki policías. Otikinmiluijkej tejuan san otitetlapouitoj uan noijki yotimoijkuilojkaj. Pero amo otechkakej, seki policías otechuikakej kanin okatkaj okseki policías, ik kanin otichantiayaj. Ompa se policía tlen okimatoka yotimoijkuilojkaj achto, otechixmatki uan otlanauati ma techkajkauakan. Ijkuakon otimoyolseuijkej.

Ijkuakon itech ojtli okatkaj soldados uan otechtsakuiliayaj. Sapanoua otimomojtiayaj okachi ijkuak soldados ouintitokaj. Nochipa otimotlatlaujtiayaj uan ijkuak otechkauiliayaj ma tiakan otimoyolseuiayaj. Itech 1973 otlanauatijkej ma tikisakan ompa Uganda, akinmej amo ompa toaltepe uan otimoyolkokojkej.

Satepan otechtitlankej Costa de Marfil, tlen okatka África occidental. Omonekiaya tikpatlaskej miak tlamantli para ompa titlapaleuiskiaj, ompa okipiayaj seki costumbres uan omonekiaya timomatiskej. Noijki omonekiaya oksepa titlajtoskej francés uan noijki omonekiaya tichantiskej inmiuan misioneros tlen oualayaj itech miakej altepemej. Pero otikitayaj Jehová otechteochiuaya porque miakej okatkaj yolyamankej uan okinpaktiaya kikakiskej iTlajtol. Otikneltokayaj Jehová techpaleuiskia uan ijkon okichiuaya.

ONECHPANOK SEKI TLAMANTLI

Se tonal Barbara okajxilijkej cáncer. Ik non, miak uelta otiajkej Europa porque ompa okipajtiayaj. Pero itech 1983 ayakmo ueli otitlapaleuijkej África porque sapanoua oui otikitayaj. Non sapanoua otechyolkoko.

Ijkuak yotikatkaj Betel tlen kajki Londres Barbara okachi opejki mokokoua uan satepan oixpoliuik. Tokniuan betelitas sapanoua onechpaleuijkej. Sekimej tokniuan tlen yomonamiktijkej onechpaleuijkej para nimomatiskia ijkuak ayakmo okatka nosiua. Uan noijki onechyolchikajkej para ma nikilnamikto Jehová nechpaleuiskia. Opanok seki xiuitl uan onikixmatki Ann, ye otlapaleuiaya seki tonal ompa Betel uan noijki otlapaleuijka ken precursora especial. Onikitaya okitlasojtlaya Jehová uan kuali iuan omouikaya. Ik non, itech xiuitl 1989 otimonamiktijkej uan desde ijkuakon titlapaleuiaj Betel nikan Londres.

Itech xiuitl 1995 hasta 2018, onikintlajpalo 60 altepemej. Non onechpaleui ma nikita Jehová kinteochijtok itekipanojkauan maski san tlen ouijkayotl kixnamikij.

Itech xiuitl 2017 onia oksepa África uan oniyolpakik porque onikuikak Ann ma tlaixmatiti Burundi. Uan noijki porque onikitak okachi yomomiaktilijkaj tokniuan. Ik kanin onitetlapouiaya itech 1964 axkan kajki se kualtsin kali Betel uan ompa kitaj tekitl tlen kichiuaj kanaj 15,500 tokniuan.

Ijkuak onechmakakej amatl tlen okijtouaya kanin niaskia nitetlajpaloti itech xiuitl 2018, sapanoua oniyolpakik porque okijtouaya niaskia Costa de Marfil. Kuali onimomachili ijkuak otiajsitoj Abiyán, non altepetl sapanoua ueyi. Ijkuak otiajsitoj Betel opejki nikita amatl kanin okatka innúmero betelitas uan onikitak se apellido tlen onikixmatiaya: Sossou. Onimokuayejyeko xamo non tokni tlen okatka tlayekanki uan otlapaleuiaya ijkuak ne onikatka altepetl Abiyán. Pero satepan onikmatki tokni tlen ompa otlapaleuiaya okatka itelpoch.

Yonikitak Jehová nochipa kichiua tlen kijtoua. Nochi tlen onechpanok onechititi ijkuak tikneltokaj ye techpaleuis, nochipa techyekana. Tiknekij ika nochi toyolo tiktekichiuilijtoskej Jehová, ijkon nochipa tiyoltoskej ijkuak nin tlaltikpak yetos se xochitlali (Prov. 4:18).