Tikchiuaskej tlen kuali:Techpaleuia tlen kijtoua Biblia
ITlajtol toTajtsin Dios miakej yokinpaleui mayolpakikan. Matikitakan naui tlamantli tlen noijki techpaleuis.
1. Akinmej yomonamiktijkej
Tinochtin tlatlamantli tikitaj ijkuak ikaj monamiktia. Noijki tlatlamantli timokuayejyekouaj tlen moneki kichiuaskej akinmej yomonamiktijkej para mayolpakikan.
BIBLIA KIJTOUA: “Namejuan xiktlasojtlakan namosiua ijkon ken nanmotlasojtlaj. Siuatl noijki makitlakaita inamik” (Efesios 5:33).
KIJTOSNEKI: ToTajtsin Dios ye akin achto okinnamikti tlakatl uan siuatl. Ikinon san ye kimati tlen moneki kichiuaskej akinmej yomonamiktijkej para mayolpakikan (Marcos 10:6-9). Akinmej yomonamiktijkej uelis yolpakiskej tla mokuayejyekoskej tlen kitekipachoua insiua noso innamik. Tlakatl kiteititia kitlasojtla isiua ijkuak kuali kimaluia. Siuatl kiteititia kitlasojtla inamik ijkuak kitlakaita, kipaleuia uan kiyeknotsa.
TECHPALEUIA TLEN KIJTOUA BIBLIA: Se tlakatl tlen itoka Quang uan isiua tlen itoka Thi tlen chantij Vietnam amo kuali omomachiliayaj porque amo oyolpakiayaj. Quang okitlajyouiltiaya isiua uan nochipa okajuaya. Ye okijto: “Amo onechtekipachouaya tlen okimachiliaya nosiua uan okiyolkokouaya tlen onikiluiaya”. Ikinon Thi okinekiaya kikauas inamik. Ye okijto: “Ayakmo onikneltokiliaya tlen onechiluiaya uan onikitaya oui niktlakaitas”.
Satepan Quang uan Thi opejki momachtiaj Biblia uan opejki kichiuaj tlen kijtoua Efesios 5:33. Quang okijto: “Tlen kijtoua Biblia onechpaleui maniktlasojtla nosiua. Noijki onikajsikamatki omonekiaya nikmakas tlen ika mopanoltis, nikmaluis uan nikajsikamatis ken momachilia. Ijkon nosiua okachi nechtlasojtla uan nechtlakaita”. Thi okijto: “Ijkon ken kijtoua Efesios 5:33 okachi nimochijchikaua niktlakaitas nonamik. Ye nechtlasojtla ikinon kuali nimomachilia uan amitlaj nechtekipachoua”.
Tla tikneki tikmatis tlen okachi moneki kichiuaskej akinmej yomonamiktijkej, xikalaki itech jw.org uan xiktlajtolti revista ¡Ma titlachixtokan! número 2, 2018 tlen itoka “¿Tlen techpaleuis ma tiyolpakikan?”.
2. ¿Ken moneki timouikaskej inuan oksekimej?
Ualeua miakej kinchikoitaj porque uitsej itech okseki altepemej, kipiaj inreligión, mosiuakopaj, motlakakopaj noso porque tlatlamantli motaj.
BIBLIA KIJTOUA: “Nochtin xikintlakaitakan” (1 Pedro 2:17).
KIJTOSNEKI: Biblia amo kijtoua matikinchikoitakan akinmej uitsej itech okse altepetl nion akinmej motlakakopaj noso mosiuakopaj. Biblia techmachtia nochtin matikintlakaitakan maski kipiaj tomin noso amo uan noijki maski uitsej itech okse altepetl (Hechos 10:34). Matikinyeknotsakan uan matikintlakaitakan maski tlatlamantli tlaneltokaj noso kichiuaj seki tlamantli tlen tejuan amo techpaktia (Mateo 7:12).
TECHPALEUIA TLEN KIJTOUA BIBLIA: Se tlakatl tlen itoka Daniel nochipa okiluijkej amo yolkualmej akinmej chantij Asia porque tetlajyoluiltiaj. Ikinon okinkokoliaya uan okinuijuikaltiaya inmixpan oksekimej. Ye okijto: “Amo onimotlajtlaniaya kox kuali tlen onikchijtoka. Ne onimokuayejyekouaya kuali tlen onikchijtoka porque ijkon onikteititiaya onikpaleuiaya noaltepe”.
Satepan Daniel opejki momachtia Biblia. Ye okijto: “Onikitak toTajtsin Dios amo techikoita uan ye nochtin kinselia maski san kanin uitsej. Ikinon onikpatlak ken onimokuayejyekouaya uan opejki nikinmita oksekimej ijkon ken toTajtsin Dios kinmita”. ¿Axkan ken kinmita oksekimej? Ye okijto: “Axkan nochtin nikintlasojtla uan noijki nikinpia noyolikniuan tlen tlamantli inmialtepe”.
Tla tikneki okachi tikmatis, xikalaki itech jw.org uan xiktlajtolti revista ¡Ma titlachixtokan! número 3, 2020 tlen itoka “¿Ajsis tonal ijkuak ayakmo titechikoitaskej?”.
3. Matikitakan tomin ken moneki
Miakej kixnekij kipiaskej miak tomin porque mokuayejyekouaj ijkon yolpakiskej uan kuali yetoskej satepan.
BIBLIA KIJTOUA: “Ixtlamatilistli techpaleuia ijkon ken tomin noijki techpaleuia pero ixtlamatilistli kichiua matiyoltokan” (Eclesiastés 7:12).
KIJTOSNEKI: Tomin techpaleuia matikpiakan tlen moneki pero non amo kijtoskej techpaleuis matiyolpakikan nion techpaleuis kuali matiyetokan satepan (Proverbios 18:11; 23:4, 5). Tla tiknekij tiyolpakiskej uan kuali tiyetoskej satepan, moneki tikchiuaskej tlen techiluia iTlajtol toTajtsin Dios (1 Timoteo 6:17-19).
TECHPALEUIA TLEN KIJTOUA BIBLIA: Se tlakatl tlen itoka Cardo uan chanti Indonesia omochijchika kipias miak tomin. Ye okijto: “Onikpiaya miak tomin ikinon san onipaxialouaya, onikmokouiaya miak tlamantli tlen patio, onikinpiaya carros uan kalmej. Onimoyolpaktiaya uan onikpiaya nochi tlen oksekimej amo kipiaj. Miak xiuitl onitekipano para nikpias miak tomin. Pero satepan nochi onikpolo porque onechtlachtekijkej. Sapanoua onimoyolkoko uan onikmachili amitlaj nopati ijkuak ijkon onechpanok”.
Cardo opejki kichiua tlen kijtoua Biblia uan ayakmo okixnekiaya kipias miak tomin. Ye okijto: “Onikitak okachi ipati nimouikas iuan toTajtsin Dios. Axkan melauak niyolpaki uan okachi kuali nikochi”.
Tla tikneki okachi tikmatis tlen kijtoua Biblia ken moneki tikitaskej tomin, xikalaki itech jw.org uan xiktemo revista Akin tetlapouijtok número 3, 2021 uan xiktlajtolti kanin kijtoua “¿Kuali tiyetos satepan tla okachi timomachtia uan tikpia miak tomin?”.
4. ¿Akinmej san sekan uelis motekaskej?
Miakej tlatlamantli mokuayejyekouaj ijkuak kijtouaj akin iuan motekaskej.
BIBLIA KIJTOUA: “Amo xiauilnemikan. Nochtin namejuan xikmatikan ken nankinauatiskej namocuerpo para mayeto chipauak uan makitlakaitakan. Amo xikchiuakan ken akinmej amo kixmatij toTajtsin Dios, porque yejuan sapanoua kinekij ikaj iuan motekaskej uan san kinekij ijkon kichijtoskej” (1 Tesalonicenses 4:3-5).
KIJTOSNEKI: Biblia kijtoua akinmej uelis san sekan motekaskej. Biblia kijtoua tlajtoli auilnemi kijtosneki akinmej kikajkayauaj insiua noso kikajkayauaj innamik, akinmej monemakaj, akinmej san sekan motekaj pero ayamo monamiktiaj, tlakamej tlen motekaj inuan tlakamej, siuamej tlen motekaj inuan siuamej uan akinmej motekaj inuan yolkamej (1 Corintios 6:9, 10). Jehová kijtoua se tlakatl uelis motekas iuan se siuatl tla yomonamiktijkej uan ijkon moyolpaktiskej (Proverbios 5:18, 19).
TECHPALEUIA TLEN KIJTOUA BIBLIA: Se siuatl tlen itoka Kylie uan chanti Australia, okijto: “Ijkuak ayamo onimonamiktiaya onimokuayejyekouaya okachi kuali niyetoskia uan niyolpakiskia tla ikaj iuan nimotekaskia. Pero amo ijkon onimomachili ijkuak ijkon onikchi. San onimoyolkokouaya uan amo onikmatiaya tlen nikchiuas”.
Satepan Kylie opejki momachtia Biblia uan opejki kichiua tlen omomachtijtoka. Ye okijto: “Biblia yonechpaleui amo manimoyolkoko uan amo manitlajyoui. Axkan kuali nimomachilia uan niyolpaki porque nikchiua tlen kipaktia Jehová”.
Tla tikneki okachi tikmatis, xikalaki itech jw.org uan xiktlajtolti tlamachtil tlen itoka “¿Uelis chantiskej san sekan se tlakatl uan se siuatl tla ayamo monamiktiaj?”.
ToTajtsin Dios techpaleuia matikmatikan tlen kuali uan tlen amo kuali porque ye otechchijchi. Maski ualeua tikitaskej oui tiktlakamatiskej uelis tikneltokaskej nochipa tiyolpakiskej tla ijkon tikchiuaskej.