¿Uelis kuali tiyetoskej maski onka guerras uan mokualaniaj?
Se tlakatl itoka Gary okatka soldado. Ye okijto: “Ijkuak ayamo onimomachtiaya Biblia amo onikmatiaya tleka titlajyouiaj, miakej kichiuaj tlen amo kuali uan tikixnamikij miak tlamantli. Axkan kuali nimomachilia porque nikmati tleka ijkon panoua uan nikmati Jehová satepan kichiuas kuali matiyetokan”.
Amo san Gary kuali momachilia. Matikitakan ken momachiliaj oksekimej ijkuak opejki momachtiaj Biblia.
¿TLEN KIJTOUA BIBLIA? “Te Jehová tiyolkuali uan tikneki titetlapojpoluis” (Salmo 86:5).
¿KEN TECHPALEUIA? Wilmar tlen ichan Colombia okijto: “Nechyolseuia miak non texto porque nechititia Jehová teiknomati. Nikmati Jehová kineki nechtlapojpoluis nochi tlen onikchi itech guerra”.
¿TLEN KIJTOUA BIBLIA? “Nikchiuas se yankuik iluikak uan se yankuik tlaltikpak uan nochi tlamantli tlen achto opanok ayakmo moilnamikis, nion ayakmo yetos itech toyolo” (Isaías 65:17).
¿KEN TECHPALEUIA? Zafirah tlen ichan Estados Unidos okijto: “Nimotekipachoua uan nimoyolkokoua porque onechpanok miak tlamantli ijkuak onikatka soldado. Nin texto nechititia Jehová nechpaleuis manikilkaua nochi tlen onechpanok uan ayakmo nimoyolkokos. Nochi non tlamantli ayakmo nikilnamikis uan sapanoua nimotlasojkamati”.
¿TLEN KIJTOUA BIBLIA? “Yetos akin yolmelauak uan nochipa yetos miak yolseuilistli, ijkon ken metstli amo keman poliuis” (Salmo 72:7).
¿KEN TECHPALEUIA? Olexandra tlen ichan Ucrania okijto: “Miak uelta nimokuayejyekoua tlen kijtoua non texto. Ayakmo miak poliui ayakmo yetos guerra uan ayakmo techtekipachos kox kuali yetoskej akinmej tikintlasojtlaj”.
¿TLEN KIJTOUA BIBLIA? “Akinmej yoixpolikej oksepa yoltoskej. [...] ¡Xiijsakan uan xiyolpakikan akinmej onankatkaj tlali!” (Isaías 26:19).
¿KEN TECHPALEUIA? Marie tlen ichan Ruanda okijto: “Okinmiktijkej nofamiliares ijkuak okinmiktijkej akinmej kinmiluiaj tutsis. Nin texto nechyolchikaua porque kijtoua oksepa nikinmitas nofamiliares. Nikneki makinyolitikan uan oksepa inuan oksepa nimotlapouis”.
¿TLEN KIJTOUA BIBLIA? “San tepitsin poliui uan akinmej amo yolkualmej ayakmo yetoskej [...]. Pero akinmej yolkualmej kinmakaskej tlaltikpak uan melauak yolpakiskej porque yetos miak yolseuilistli” (Salmo 37:10, 11).
¿KEN TECHPALEUIA? Daler tlen ichan Tayikistán okijto: “Nikan otlanki guerra pero miakej kichiuaj tlen amo kuali uan amo kuali inyelis. Nin texto nechyolchikaua miak. Jehová nochi kita uan kajsikamati ken nimomachilia. Ye yokijto kachiuas tlen techtlajyouiltia uan ayakmo tikilnamikiskej”.
Yotikitakej itech nin revista iTlaixpantijkauan Jehová kinyolseuia iTlajtol toTajtsin Dios uan oksekimej noijki ijkon momachiliaj. Sekimej otechikoitayaj, amo okintlasojtlayaj akinmej uitsej itech altepetsitsintin uan okinchikoitayaj akinmej okse tlamantli motaj pero axkan ayakmo ijkon kichiuaj (Efesios 4:31, 32). TiiTlaixpantijkauan Jehová amo timokajkalakiaj itech política nion titlapaleuiaj ijkuak mokualaniaj (Juan 18:36).
TiiTlaixpantijkauan Jehová timosepanpaleuiaj porque tikatej ken se familia ipan nochi tlaltikpak (Juan 13:35). Olexandra tlen itech yotimotlapouijkej, ye uan ikni oyajkej itech okse altepetl porque okatka guerra kanin ochantiayaj. Ye okijto: “Ijkuak otiajsitoj itech okse altepetl kanin otimopaleuitoj, ompa yotechchixtokaj iTlaixpantijkauan Jehová uan kuali otechselijkej. San niman otimomatkej itech non altepetl porque yejuan otechpaleuijkej”.
Timitsyoleuaj touan ximonechiko uan tikmatis tlen moneki tikchiuas tla tikneki axkan timoyolseuis. Noijki tla tiknekij tikmatiskej ken tiyetoskej satepan. Xikalaki itech jw.org uan xiktemo kanin timonechikos uan noijki xiktlajtlani mamitsmachtikan uan amitlaj tiktlaxtlauas. Se iTlaixpantijka Jehová mitsmachtis ika amatlajkuilol Tiyoltos uan tiyolpakis.