ToTajtsin Dios kinmaluia akinmej amo tlakakij
Axkan itech nochi tlaltikpak katej kanaj 70 millones tlen amo tlakakij pero kajsikamatij kanaj 200 lenguas de señas. Miakej san kintlajyouiltiaj uan amo kintlakaitaj akinmej amo tlakakij, ijkon kijtouaj sekimej ixtlamatkej:
Asociación Nacional de Sordos de Estados Unidos okijto “ipan nochi tlaltikpak miakej amo kintlakaitaj akinmej amo tlakakij noso akinmej san tepitsin tlakakij”.
Federación Mundial de Sordos okijto “sekimej tlen amo tlakakij chantij kanin amo onka miak tomin ikinon amo kipiaj tlen ika mopanoltiskej, amo kipiaj kanin momachtiskej, amo kimatij tlen panoua itech okseki altepemej uan amo kipiaj kanin tekipanoskej”.
¿Ken kinmita toTajtsin Dios akinmej amo tlakakij? ¿Tlen kijtoua Biblia? ¿Tlen kichijtokej iTlaixpantijkauan Jehová para kinpaleuiskej akinmej amo tlakakij?
¿Ken kinmita toTajtsin Dios akinmej amo tlakakij?
Biblia kijtoua Jehováa kitekipachoua tlen kinpanoua akinmej amo tlakakij. ToTajtsin Dios kineki makinpaleui tlen momachtiaj itech Biblia uan amo matikinchikoitakan.
Texto bíblico: “Amo xikuijuikalti akin amo tlakaki” (Levítico 19:14).
Tlen kijtosneki: Jehová okinmakak israelitas se tlanauatil tlen okinmaluiaya akinmej amo otlakakiayaj.
Texto bíblico: “ToTajtsin Dios amo techikoita” (Hechos 10:34).
Tlen kijtosneki: Jehová kintlasojtla uan kitekipachoua tlen kinpanoua akinmej chantij itech oksekimej altepemej maski kipiaj tlatlamantli intlaken, tlatlamantli intlajtol noso akinmej amo tlakakij.
Texto bíblico: “Jesús oyajki itech altepemej uan altepetsitsintin [...] otetlapouiaya kuali tlajtoli tlen kijtoua toTajtsin Dios ualtlanauatis ipan tlaltikpak” (Mateo 9:35).
Tlen kijtosneki: Jesús ouala nikan tlaltikpak para techmachtis tlen kichiuas iTekiuajkayo toTajtsin Dios uan noijki kinpaleuis akinmej amo tlakakij (Mateo 6:10).
Texto bíblico: Jesús okichi “matlakakikan akinmej amo tlakakij uan matlajtokan akinmej amo tlajtouaj” (Marcos 7:37).
Tlen kijtosneki: Jesús okiteititi san iTekiuajkayo toTajtsin Dios uelis kichiuas matlakakikan akinmej amo tlakakij uan matlajtokan akinmej amo tlajtouaj. Se tonal Jesús okititi okitlasojtlaya se tlakatl tlen amo otlakakiaya porque iuan omotlapoui ika señas uan satepan okichi matlakaki uan matlajto (Marcos 7:31-35).
Texto bíblico: “Innakasuan akinmej amo tlakakij motlaposkej” (Isaías 35:5).
Tlen kijtosneki: Jehová okijto tlakakiskej akinmej amo tlakakij (Isaías 29:18).
¿Tlen kichijtokej iTlaixpantijkauan Jehová para kinpaleuiskej akinmej amo tlakakij?
TiiTlaixpantijkauan Jehová noijki tikintlapouiaj akinmej amo tlakakij tlen kichiuas toTajtsin Dios. ¿Ken tikchiuaj? Tiktlajtolkopaj Biblia ika señas ikinon tikpiaj Biblia ika video, noijki tikinchiuaj okseki videos ika kanaj 100 lenguas de señas. Tikinmachtiaj Biblia akinmej amo tlakakij uan tikinchiuaj nechikolmej ika lengua de señas, tejuan tiknekij tikinpaleuiskej oksekimej makixmatikan toTajtsin Dios ikinon amo tikintlajtlaniliaj tomin. ¿Tleka amitlaj kitlaxtlauaj? Porque Jesús okijto: “Amo onankitlaxtlajkej tlen onankiselijkej ikinon noijki ijkon xiktemakakan” (Mateo 10:8).
¿Kanin uelis tikinmajsis ninmej tlamachtilmej? Nikan tikinmajsis:
Itech internet JW.ORG. Ijkuak tikalakis itech internet xiktlali clic kanin kijtoua “Idioma” uan xikpejpena lengua de señas. Satepan xiktemo tlen tikneki tiktlajtoltis.
Noijki uelis tikajsis aplicación JW Library Sign Language. Xikkixti nin aplicación tlen amo tiktlaxtlauas uan xiktlali itech moteléfono ijkon uelis tikinkixtis videos noso tikinmitas itech internet ika lengua de señas.
¿Tlen tiktekitiltiaj para titlamachtiskej ika Biblia?
Biblia ika lengua de señas. Achto Biblia tlen omotlajtolkopki ye Traducción del Nuevo Mundo ika lengua de señas americano. Traducción del Nuevo Mundo yokitlajtolkopkej tlajko noso nochi ika tlatlamantli lenguas de señas uan sejse xiuitl motlajtolkopa ika okseki tlajtolmej. (Tla tikneki tikitas tlen tlajtolmej yikatej noso tikneki tikitas Biblia ika internet xikita recuadro “La Traducción del Nuevo Mundo en lengua de señas”).
Tla tikneki tikmatis ken tiktlajtolkopaj Biblia ika lengua de señas, xikita nin video La Traducción del Nuevo Mundo completa en lenguaje de señas americano ya está disponible.
Tla tikneki okachi timomachtis Biblia, xiktlali aplicación JW Library Sign Language itech motelefono. Nin aplicación mitspaleuis xikintemo seki versículos tlen te tiknekis.
Dmytro uan Vita amo tlakakij pero ome inkoneuan kema tlakakij. Xikita ken kinpaleuia kitaskej nochipa Biblia ika lengua de señas.
Videos tlen techpaleuiaj matikajsikamatikan tlen kijtoua Biblia. TiiTlaixpantijkauan Jehová tikinchiuaj videos ika lengua de señas, tlen kinpaleuia oksekimej makajsikamatikan uan makichiuakan tlen Biblia tlamachtia. ¿Akinmej kinpaleuia tlen Biblia kijtoua?
Titlamachtiaj ika Biblia. Ika nin tlamachtil ikaj mitspaleuis xikajsikamati Biblia ika tlajtoli señas uan nanmomachtiskej ijkuak timajxilis. Xiktlajtlani ikaj mamitsmachti uan tikitas ken titlamachtiaj.
Jeson Senajonon chanti Filipinas, ye opejki mouika iuan toTajtsin Dios porque omomachti Biblia. Xikita tlen okipanok.
Mario Antúnez okiyekanaya se religión ompa Honduras. Xikita ken Biblia okipaleui makajsikamati seki tlamantli, itech tlamachtil tlen itoka “Tenía muchas preguntas y pocas respuestas”.
Nechikolmej uan uejueyij nechikolmej. Itech nochi tlaltikpak katej nechikolmej uan grupos tlen tlajtouaj lengua de señas, sejse semana nochtin akinmej amo tlakakij monechikouaj para momachtiskej uan kiueyichiuaskej toTajtsin Dios. Noijki sejse xiuitl tikinchiuaj uejueyij nechikolmej para ompa timomachtiskej Biblia. Itech nechikolmej uan uejueyij nechikolmej tikinpaleuiaj akinmej amo tlakakij uan akinmej amo tlachiaj makajsikamatikan Biblia. Noijki tikinpiaj amatlajkuilolmej ika braille uan amo tikinnemakaj.
Xiktemo se tlanechikol ik kanin tichanti.
Xiktlajtlani keman tikinpiaskej uejueyij nechikolmej.
Touan ximonechiko ijkuak tikilnamikiskej imikilis Toteko Jesucristo.
José Luis Ayala, tlen chanti México amo tlakaki uan satepan opejki ayakmo tlachia. Xikita ken okipaleuijkej oksekimej para kuali matlamachti Biblia.
a ToTajtsin Dios itoka Jehová (Salmo 83:18). Xikita tlamachtil “¿Akin Jehová?”.