Biblia kijtoua ajsis tonal ayakmo kintlajyouiltiskej siuamej

Madhua tlen chanti India okijto:“Ijkuak onikatka nitakotsin, nokni nochipa onechuijuikaltiaya uan onechuitekiaya. Satepan ijkuak onimonamikti nomonna noijki ijkon onechtokti. Ye uan nomonta onechtlajyouiltijkej. Onimokuayejyekouaya nimomiktis pero onimochijchika amo ijkon nikchiuas”.

Akinmej pouij itech Organización Mundial de la Salud kijtouaj ipan nochi tlaltikpak kintlajyouiltiaj siuamej. Miakej siuamej kinuitekij noso kintlajyouiltiaj ijkuak inuan motekaj.

Tla ijkon yomitspanok, xamo timokuayejyekoua oksepa ijkon mitspanos maski san kanin tias. Sapanoua kintlajyouiltiaj siuamej ikinon xamo kimachiliaj amitlaj inpati. Pero ¿toTajtsin Dios kinpatioita siuamej?

¿Ken kinmita toTajtsin Dios siuamej?

Biblia kijtoua: ToTajtsin Dios okichijchi “tlakatl uan siuatl” (Génesis 1:27).

Kijtosneki: ToTajtsin Dios okichijchi tlakatl uan siuatl ikinon kineki oksekimej makintlakaitakan. Ye kineki tlakatl ‘makitlasojtla isiua ijkon ken ye motlasojtla’. ToTajtsin Dios amo kineki tlakatl makitlajyouilti isiua noso makiuijuikalti (Efesios 5:33; Colosenses 3:19). Non kiteititia toTajtsin Dios kineki kuali mayetokan siuamej.

María tlen chanti Argentina okijto:“Nofamiliares onechchiualtijkej inuan manimoteka ijkuak onikatka nitakotsin. Ijkuak onikpiaya 17 xiuitl akin onikpaleuiaya onechilui ayakmo nechmakaskia tekitl tla amo iuan nimotekaskia. Noijki nikita amo nechtlasojtla nonamik, nopapanuan nion novecinos. Satepan opejki nimomachtia Biblia uan onikixmatki Jehová.b Onimomachti ye kinpatioita siuamej uan non onechpaleui manikajsikamati ye nechtlasojtla uan nechpatioita”.

¿Tlen uelis mitsyolchikauas?

Biblia kijtoua: “Onka se toyolikni tlen okachi kuali iuan timouikaj uan amo ken iuan se tokni” (Proverbios 18:24).

Kijtosneki: Tla timoyolkokoua, uelis mitspaleuis se moyolikni tla tikiluis ken timomachilia.

Elif tlen chanti Turquía okijto:“Kanaj 20 xiuitl amikaj onikilui ikaj onechchiualti iuan manimoteka. Ikinon ayakmo oniyolpakiaya, onimotekipachouaya uan onimoyolkokouaya. Pero kuali onimomachili ijkuak onikilui se noyolikni tlen onechpanok”.

Biblia kijtoua: “Xiktlalikan imak toTajtsin Dios nochi tlen namechtekipachoua, porque ye kitekipachoua tlen namechpanoua” (1 Pedro 5:7).

Kijtosneki: ToTajtsin Dios mitskaki ijkuak tiktlatlaujtia (Salmo 55:22; 65:2). Ye kitekipachoua tlen techpanoua ikinon techpatioita.

Ana tlen chanti Belice okijto:“Opejki kuali nimomachilia ijkuak opejki nimomachtia iTlajtol toTajtsin Dios. Nimouika iuan toTajtsin Dios porque nechkaki ijkuak niktlatlaujtia uan kajsikamati tlen nikmachilia”.

¿Se tonal ayakmo kintlajyouiltiskej siuamej?

Biblia kijtoua: “Tikinchiuilis tlen kuali iknomej uan akinmej moyolkokouaj uan ijkon amikaj kinmomojtis” (Salmo 10:18).

Kijtosneki: Ajsis tonal toTajtsin Dios ayakmo kitekauilis makintlajyouiltikan siuamej.

Roberta tlen chanti México okijto:“Nechyolchikaua uan kuali nimomachilia nikmatis Jehová ayakmo kitekauilis makintlajyouiltikan siuamej uan takotsitsintin”.

Tla tikneki okachi tikmatis tlen kichiuas toTajtsin Dios uan ken tiiTlaixpantijkauan Jehová tikinpaleuiaj oksekimej ika Biblia, xikilui mamitstlajpaloti akin omitsmakak nin amatsintli.

Xikkixti nin tlamachtil.