¿Kinkajkauaskej bombas ipan nochi tlaltikpak? | ¿Tlen kijtoua Biblia?

Miakej tekiuajkej tlanauatiaj makinchijchiuakan bombas maski yikinpiaj miakej uan ika uelis kinmiktiskej miakej personas. Ikinon miakej motekipachouaj porque mokuayejyekouaj tekiuajkej uelis momakaskej ika nonmej bombas. Miakej momojtiaj porque tla ikaj kititlanis se bomba oksekimej noijki peuas kintitlaniskej uan uelis tinochtin techmiktiskej. Akinmej tekipanouaj itech Boletín de Científicos Atómicos (Bulletin of the Atomic Scientists), okijtojkej: “San tlen tonal uelis kititlaniskej se bomba”.

¿Se tonal kinkajkauaskej bombas uan miakej kinmiktiskej? ¿Kipojpoloskej tlaltikpak? ¿Tlen uelis tikchiuaskej tla timomojtiaj ijkon mapano? ¿Tlen kijtoua Biblia?

Tikinnankiliskej ninmej tlajtlanilmej:

¿Kijtoua Biblia tekiuajkej kinkajkauaskiaj bombas?

Biblia amo kijtoua kinnejnekiskiaj bombas ijkuak kichiuaskiaj guerra. Pero kijtoua ken kipiaskiaj inyelis, tlen kichiuaskiaj uan okseki tlamantli tlen tlapaleuia makinekikan momiktiskej ika bombas.

Xikintlajtolti ninmej textos tlen kiteititiaj tlen panotok axkan:

Biblia kijtoua: Discípulos okitlajtlanijkej Jesús: “Techilui, ¿keman ijkon panos uan tlen kiteititis yinikan tika uan yitlamis tlen axkan onka?”. Jesús okinnankili: “Se altepetl mokualanis iuan okse altepetl uan noijki tekiuajkej mokualaniskej” (Mateo 24:3, 7).

Panotok miak tlamantli ipan nochi tlaltikpak: Axkan miakej tekiuajkej tlen kinpiaj bombas okachi mokualaniaj.

Akinmej tlapaleuiaj itech Proyecto de Datos de Localización y Eventos de Conflictos Armados, okijtojkej: “Axkan okachi tetlajyouiltiaj uan okachi mokualaniaj”.

Biblia kijtoua: “Itlamian tonalmej, tekiua tlen kajki sur [...] mokualanis [iuan] tekiua tlen kajki norte” (Daniel 11:40).

Panotok miak tlamantli ipan nochi tlaltikpak: Biblia kijtoua yetoskiaj tekiuajkej tlen mokualaniskej uan motlatlaniskej para kiteititiskej akin okachi tlanauatia. Miakej tekiuajkej amo mokualaniaj ijkon ken oksekimej pero kinchijtokej bombas.

Akinmej tlapaleuiaj itech Programa de Datos sobre Conflictos de la Universidad de Uppsala, okijtojkej: “Majtlaktli xiuitl tlen yopanok tekiuajkej okachi mokualaniaj porque sekimej tekiuajkej tlen okachi ueyititokej kinpaleuiaj oksekimej tekiuajkej”.

Biblia kijtoua: “Itlamian tonalmej yetos oui uan oui kixikoskej”. Miakej “amo teajsikamatiskej, kinteneuaskej oksekimej para amo kuali makinmitakan, amo kimatiskej monauatiskej [uan] tetlajyouiltiskej” (2 Timoteo 3:1-3).

Panotok miak tlamantli ipan nochi tlaltikpak: Miakej tekiuajkej kichiuaj ijkon ken oksekimej porque amo teajsikamatij uan mokualaniaj. Yejuan amo moyektlapouiaj uan san kinekij momakaskej ikinon kinekij kinkajkauaskej bombas.

Samir Saran uan Jane Harman tlen tlapaleuiaj itech Foro Económico Mundial, okijtojkej: “Okachi panos miak tlamantli amo kuali tla amo tikmatij ken timosepanpaleuiskej”.

¿ToTajtsin Dios kinkauilis tekiuajkej makinkajkauakan bombas?

Biblia amo kijtoua pero kijtoua “motas miak tlamantli temomojti” (Lucas 21:11). Ijkon opanok itech Segunda Guerra Mundial ijkuak okinkajkajkej bombas. Biblia kiyekijtoua tleka toTajtsin Dios kitekauilia mapano guerra. Tla tikneki tikmatis okachi, xikita video ¿Tleka toTajtsin Dios ok kikajtok ma titlajyouikan?

¿Pojpoliuis tlaltikpak tla kinkajkauaskej bombas?

Amo. ToTajtsin Dios amo kitekauilis ijkon mapano maski oksepa kinkajkauaskej bombas. ITlajtol toTajtsin Dios kijtoua tlaltikpak amo keman pojpoliuis uan nochipa ipan tichantiskej.

“Tlaltikpak nochipa yetos” (Eclesiastés 1:4).

“ToTajtsin Dios [...] okichijchi tlaltikpak, [...] amo san okichijchi, okichijchi para itech chantiskiaj” (Isaías 45:18).

Miakej mokuayejyekouaj satepan ayakmo miakej chantiskej nikan tlaltikpak uan yejuan tlajyouiskej miak porque tlaltikpak ijtlakauis ika radiación. Pero Biblia kijtoua tlaltikpak moyektlalijtias maski kijtlakoskej ijkuak kichiuaskej guerra.

“Kualtsin yetos kanin tlauaki uan kualtsin tlaxochitis kanin tlakuauak tlali” (Isaías 35:1).

Miakej san sekan tekipanouaj uan pakij. — ToTajtsin Dios kineki matipakikan ijkuak tiyetoskej itech xochitlali.

Tlaltikpak iselti moyektlalia porque toTajtsin Dios ijkon okichijchi. Noijki tikmatij toTajtsin Dios kiyektlalis tlaltikpak uan nochipa ipan tichantiskej (Salmo 37:11, 29; Apocalipsis 21:5).

¿Tlen techpaleuis amo matimomojtikan?

Miakej momojtiaj makinkajkauakan bombas porque uelis timikiskej noso titlajyouiskej. Pero techpaleuis matimoyolseuikan tla tikmatiskej tlen yokijto kichiuas toTajtsin Dios uan tla tikchiuaj tlen techiluia.

Biblia kijtoua satepan kuali yetos tlaltikpak uan noijki akinmej ompa chantiskej. Techpaleuis amo okachi matimomojtikan tla tikilnamiktokej tlen kichiuas toTajtsin Dios (Hebreos 6:19). Noijki amo san matimokuayejyekojtokan tlen panos satepan. Jesús okijto san matechtekipacho tlen panoua “sejse tonal” (Mateo 6:34).

Miak ipati matikitakan tlen timokuayejyekouaj uan ken timomachiliaj para amo timokokoskej. Ikinon miak ipati matikitakan tlen tiktlajtoltiaj, tlen tikitaj uan tlen tikkakij. Amo okachi matikkakikan ijkuak oksekimej motlapouiaj kox kinkajkauaskej bombas noso amo. Noijki amo nochi matikneltokakan tlen panos tla mochiuas se guerra. Nin amo kijtosneki tikijtojtokej amitlaj panos. Tejuan amo timotekipachouaj porque tikmatij amitlaj uelis tikchiuaskej uan amo tikmatij kox melauak ijkon panos.

“Tlen kitekipachoua se tlakatl non tlen kiyolkokoua pero moyolchikaua ijkuak kiluiaj se kuali tlajtoli” (Proverbios 12:25).

Okachi miak ipati matikitakan tlen kuali tikpiaj uan amo san matikilnamiktokan tlen kijtouaj itech noticias.

“ToTajtsin Dios tlen techpaleuia matimochiakan, manamechpaleui xipakikan uan xikpiakan yolseuilistli porque nankineltokaj” (Romanos 15:13).

Fotos: Se tlakatl kiyolchikaua tlen kichia. 1. Mota panotok guerra, mota se avión, bombas uan mota ken toponij bombas. 2. Mota kualtsin tlaltikpak, tepeyo, tlaxoxouik, panotok atl uan motaj totomej. — Biblia kijtoua satepan kuali tiyetoskej.

Tipakiskej uan kuali tiyetoskej tla tikilnamiktokej tlen yokijto kichiuas toTajtsin Dios.

¿Kijtoua Biblia itech Armagedón kinnejnekiskej bombas?

Miakej ijkuak kikakij tlajtoli Armagedón mokuayejyekouaj kinkajkauaskej miakej bombas uan sapanoua ijtlakauis tlaltikpak.

Biblia kijtoua “Armagedón”a kijtosneki tekiuajkej momakaskej iuan toTajtsin Dios (Apocalipsis 16:14, 16). Ijkuak panos Armagedón amo kijtosneki nochtin kinmixpoloskej akinmej chantij tlaltikpak ijkon ken ijkuak kinkajkauaj bombas. Ijkuakon toTajtsin Dios kinmixpolos san akinmej amo yolkualmej uan non tlapaleuis kuali matiyetokan uan amitlaj matechmomojti (Salmo 37:9, 10; Isaías 32:17, 18; Mateo 6:10).

¿Kijtoua Biblia se tonal ayakmo ikaj kichiuas guerra?

“Kintlajtlamia guerras itech nochi tlaltikpak. Kiposteki arco uan kiposteki lanza; carruajes kintlatia ijtik tlitl” (Salmo 46:9).

Jehováb kiteititis kipia chikaualistli ijkuak ayakmo kitekauilis makichiuakan guerra uan kinpojpolos nochi teposmej tlen ika momakaj. Ijkon kichiuas ijkuak iTekiuajkayo tlen kajki iluikak ualtlanauatis nikan tlaltikpak (Daniel 2:44).

ITekiuajkayo toTajtsin Dios techpaleuis matimoyekuikakan uan ijkon kuali tiyetoskej. Ijkuakon ayakmo ikaj mokualanis porque san tlanauatis iTekiuajkayo toTajtsin Dios. Ayakmo ikaj kichiuas guerra (Miqueas 4:1-3). ¿Ken tiyetoskej ijkuak ijkon panos? Biblia kijtoua: ‘Tejuan timotlaliskej itlampa uvas uan itlampa higos uan amikaj techmomojtis’ (Miqueas 4:4).

a Xikita tlamachtil “¿Tlen kijtosneki Armagedón?”.

b ToTajtsin Dios itoka Jehová (Salmo 83:18). Xikita tlamachtil “¿Akin Jehová?”.

¿Kijtoua amochtli Apocalipsis kinkajkauaskej bombas para kipojpoloskej tlaltikpak?

Sekimej mokuayejyekouaj tlen kijtoua amochtli Apocalipsis kijtosneki kinkajkauaskej bombas para kipojpoloskej tlaltikpak (Apocalipsis 6:14; 8:7-12; 16:1-21). Biblia kijtoua ‘kisas tlitl iluikak uan ualtemos ipan tlaltikpak’ (Apocalipsis 13:11-13). TiiTlaixpantijkauan Jehová tikmatokej ijkon opanok itech Segunda guerra Mundial ijkuak okinkajkajkej bombas pero amo kijtosneki oksepa kinkajkauaskej para kipojpoloskej tlaltikpak.

Amochtli Apocalipsis kijtoua kinnejnekiskej bombas para ika temiktiskej pero amo techiluia non tlamantli para matimomojtikan. Ijkuak tiktlajtoltis amochtli Apocalipsis xikilnamikto:

Nin amochtli kinpia miakej neskayomej pero amo moajsikamatij ijkon ken moijtoua (Apocalipsis 1:1).
Amo okijkuilojkej para techmomojtiskej. Okijkuilojkej para mayolpakikan akinmej kajsikamatij uan kichiuaj tlen ompa kijtoua (Apocalipsis 1:3).

Tla tikneki tikmatis okachi, xiktlajtolti tlamachtil “¿Cuál es el mensaje del libro de Apocalipsis?”.