¿Onka se Tekiuajkayotl tlen kuali tlanauatis ipan nochi tlaltikpak? | ¿Tlen kijtoua Biblia?

Nochtin tekiuajkej kinpanotok miak tlamantli. Mokualaniaj, sapanoua motlatlanij ijkuak kipejpenaj se tekiua uan personas amo mouikaj inuan tekiuajkej porque kinkualaniaj uan yejuan kinmixnamikij. Noijki ijkon kinpanoua tekiuajkej tlen mota kuali tlanauatiaj.

Biblia kiyekijtoua onka se tekiuajkayotl tlen kuali tlanauatia. Xamo se tonal yotikkak non tekiuajkayotl porque Jesús okijto itech padrenuestro.

• “Namejuan moneki ijkin nanmotlatlaujtiskej: ‘ToTajtsin Dios tlen tika iluikak, nochtin makitlakaitakan motoka. Mauiki moTekiuajkayo. Mamochiua tlen tikneki ompa iluikak uan noijki nikan tlaltikpak’” (Mateo 6:9, 10).

¿Tlen kijtoua Biblia kichiuas non Tekiuajkayotl?

Non Tekiuajkayotl kuali tlanauatia

Non Tekiuajkayotl kajki iluikak.

• Jesús okitokayoti “Tekiuajkayotl tlen kajki iluikak” (Mateo 4:17; 5:3, 10, 19, 20). Ikinon okijto: “NoTekiuajkayo amo nikan poui” (Juan 18:36).

Non Tekiuajkayotl kinpatkayotis nochtin tekiuajkej.

• Biblia kijtoua: “Nin tekiuajkayotl amo kiuikaskej itech okse altepetl. Kintlajtlamis uan kinmachiuas nochi ninmej tekiuajkayomej uan ye nochipa yetos” (Daniel 2:44).

Nin Tekiuajkayotl kiyekanas Jesucristo uan amo keman pojpoliuis.

•  Biblia kijtoua: “Itlanauatijkayo se tlanauatijkayotl tlen amo keman tlamis uan itekiuajkayo amo keman kipojpoloskej” (Daniel 7:13, 14).

Nin Tekiuajkayotl techpaleuis okachi kuali matimouikakan uan amitlaj matechpano.

• Biblia kijtoua: “[Personas] motlaliskej itlampa uvas uan itlampa higos uan amikaj kinmomojtis” (Miqueas 4:4).

Okachi ximomachti tlen kichiuas nin Tekiuajkayotl

Jesús nochipa “otetlapouiaya kuali tlajtoli tlen kijtoua toTajtsin Dios ualtlanauatis ipan tlaltikpak” (Mateo 9:35). Noijki okijto:

• “Ipan nochi tlaltikpak, motetlapouis kuali tlajtoli para nochtin makimatikan toTajtsin Dios ualtlanauatis ipan tlaltikpak uan ijkuakon tlatlamis” (Mateo 24:14).

Axkan kuali tlajtoli motetlapouijtok itech kanaj 240 altepemej uan altepetsitsintin. Timitsyoleuaj okachi ximomachti tlen kichiuas nin Tekiuajkayotl uan xikita ken mitspaleuis.

Xikita video ¿Tlen iTekiuajkayo toTajtsin Dios?