¿Tlen kijtoua Biblia?
“Ijkin okichijchijkej iluikak uan tlaltikpak” (Génesis 2:4). Ijkon kijtoua Biblia ken okichijchijkej iluikak uan tlaltikpak. ¿Tlamachtia Biblia tlen kijtouaj ixtlamatkej? Ma tikitakan seki tlamantli.
Achto: Okichijchijkej tlen onka itech iluikak uan tlaltikpak.
¿Nochipa yokatka iluikak?
Génesis 1:1 kijtoua: “Achto, toTajtsin Dios okichijchi iluikak uan tlaltikpak”.
Kanaj itech xiuitl 1950 miakej ixtlamatkej okijtouayaj iluikak nochipa yokatka pero axkan yokajsikamatkej miak tlamantli uan kijtouaj iluikak kema opejki.
Achto, ¿ken okatka tlaltikpak?
Génesis 1:2, 9 kijtoua “tlaltikpak ayamo okiyekchijchiuaya uan amo itlaj okatka” uan oatentoka.
Tlen kijtoua Génesis kiteititia tlen axkan kimatij ixtlamatkej. Se biólogo tlen itoka Patrick Shih okijto achto itech tlaltikpak “amo uelis ikaj mijyotiskia porque amo okatka oxigeno” uan “amo kualtsin omotaya”. Revista Astronomy kijtoua: “Ixtlamatkej yokitakej yiuejkika tlaltikpak oatentoka uan amo okipiaya tlali uaki”.
¿Ken omoyektlali atmósfera?
Génesis 1:3-5 kiteititia tlauili oajsiaya itech atmósfera pero ipan tlali amo omotaya kanin oualaya non tlauili. Ouejka para ma mota tonaltsin uan metstli (Génesis 1:14-18).
Biblia amo kijtoua nochi tlen onka itech tlaltikpak omochijchi san itech chikuase tonal
Centro Smithsonian de Investigaciones Ambientales okijto achto san tepitsin tlauili okalakiaya itech atmósfera uan oajsiaya ipan tlaltikpak. Okijto: “Achto, metano tlen okatka itech ejekatl okichiuaya ma tlamixtento ipan nochi tlaltikpak”. Satepan “okiski non mixtli uan otlachipauak”.
¿Akinmej achto oyolkej itech tlaltikpak?
Génesis 1:20-27 kijtoua achto oyolkej michimej, totomej, yolkamej tlen nemij itech tlali uan saiktlami tlakamej uan siuamej. ¿Tlen kijtoua ixtlamatkej? Yejuan kineltokaj achto oyolkej michimej, satepan yolkamej ipan tlaltikpak uan miak xiuitl satepan tlakamej uan siuamej.
Biblia amo kijtoua akinmej yoltokej uelis mopatlaskej ken motaj
¿Tlen amo kijtoua Biblia?
Sekimej kijtouaj Biblia amo kijtoua tlen ixtlamatkej yokajsikej. Ijkon kijtouaj porque amo kajsikamatij tlen kijtoua Biblia.
Biblia amo kijtoua tlen onka iluikak uan tlaltikpak san kipia 6,000 xiuitl. Ompa kijtoua “achto” okichijchijkej tlen onka iluikak uan tlaltikpak (Génesis 1:1). Pero amo kijtoua keman opanok.
Biblia amo kijtoua nochi tlen onka itech tlaltikpak omochijchi san itech chikuase tonal. Ualeua ijkuak Biblia kijtoua tonal, kijtosneki miak xiuitl. Ijkuak okichijchijkej nochi tlen onka, Biblia kijtoua: “Itech tonal ijkuak Jehováa okichijchi iluikak uan tlaltikpak” (Génesis 2:4). Itech chikuase tonal toTajtsin Dios okichijchi tlaltikpak uan nochi tlen yoltok, ijkon kijtoua Génesis capítulo 1. Ik non, xamo sejse tonal, kijtosneki sapanoua miak xiuitl.
Biblia amo kijtoua tlen yoltok uelis mopatlas. Amochtli Génesis kijtoua okinchijchijkej “tlatlamantli yolkamej” (Génesis 1:24, 25). Biblia kiteititia katej miakej uan tlatlamantli yolkamej. Ijkuak panoua miak xiuitl seki yolkamej uelis mopatlaskej ken motaj pero amo mopatlaj ken chijchitokej. Techpaleuia ijkon ma tikajsikamatikan ijkuak Biblia kijtoua “tlatlamantli yolkamej”.
¿Tlen timokuayejyekoua?
Biblia techiluia ken opejki mochiua iluikak, tlaltikpak uan ken opejki nochi tlen yoltok. Ompa techiluia tlen melauak uan amo oui tikajsikamatiskej, ik non, ¿uelis techiluis akin okichijchi nochi tlen onka? Encyclopædia Britannica kijtoua: “Tla ikaj okichijchi nochi tlen onka, [...] non amo kitlajtolnamiki tlen axkan ixtlamatkej kijtouaj”.b
a Biblia kijtoua toTajtsin Dios itoka Jehová.
b Tlen kijtoua Encyclopædia Britannica amo kinpaleuia akinmej kijtouaj ikaj okichijchi nochi tlen yoltok.