Tlamachtil 4

¿Akin ye Diablo?

Diablo, ¿ken omochi? (1, 2)

¿Ken kinkajkayaua tlaltikpaktlakamej? (3-7)

¿Tleka moneki tikixtopeuas Diablo? (7)

1. Tlajtoli “diablo” kijtosneki se akin kijtoa tlen amo melauak itech okse. “Satanás” kijtosneki akin tekokolia noso teixnamiki. Ninmej tokayomej kinamiki akin okachi kikokolia toTajtsin Dios. Achto okatka se ángel tlen amo okipiaya tlajtlakoli uan onemia inauak toTajtsin Dios itech iluikak, maski ijkon, satepan omoueyineki uan kinekia ma kiueyichiuakan, itlaj tlen san toTajtsin Dios kinamiki (Mateo 4:8-10).

2. Nin ángel, Satanás, okichi ma tlajto se koatl uan ijkon omotlapoui iuan Eva, uan ika itlakajkayaualis okichi amo ma kitlakamati toTajtsin Dios. Ijkuak ijkon okichi, kinekia kiteititis Jehová amo kinamiki tlanauatis. Okijto kox kuali tlanauatia toTajtsin Dios uan kox kinpaleuia akinmej kinyekana. Noijki okijto nion se tlakatl amo kipiaskia iyolo ajsitok inauak toTajtsin Dios. Ijkuak ijkon okichi, opejki kikokolia toTajtsin Dios. Ik non, kitokayotiaj Satanás noso Diablo (Génesis 3:1-5; Job 1:8-11; Apocalipsis 12:9).

3. Satanás kinkajkayaua tlaltikpaktlakamej pampa ma kiueyichiuakan (2 Corintios 11:3, 14). Kichiua ika tlaneltokalistli tlen amo melauak. Tla se tlaneltokalistli tlamachtia tlen amo melauak itech toTajtsin Dios, kichiua tlen Satanás kineki (Juan 8:44). Tlaltikpaktlakamej tlen katej itech tlaneltokalistli tlen amo melauak, yejuan kineltokaskej kiueyichijtokej toTajtsin Dios akin melauak, maski ijkon, yejuan kiueyichiuaj Satanás, pampa ye “kajki kej dios de yin tiempo ixko yin tlaltikpak” (2 Corintios 4:4).

4. Satanás kitekitiltia naualotl uan ijkon kinkajkayaua miakej. Sekimej tlaltikpaktlakamej kinnotsaj espíritus pampa ma kintlajyouiltikan oksekimej, ma kinmiluikan tlen panos satepan noso ma kichiuakan milagros. Satanás ye akin kichiua nochi nin tlamantli. Tla tiknekij tikyolpaktiskej toTajtsin Dios, moneki tikixtopeuaskej nochi naualotl (Deuteronomio 18:10-12; Hechos 19:18, 19).

5. Satanás kichiua tlaltikpaktlakamej ma moueyinekikan pampa ixchipajkej uan oksekimej amo, uan kichiua ma kinueyichiuakan tekiuajkej. Sekimej tlaltikpaktlakamej kineltokaj inueyi altepetl okachi kuali. Maski non amo melauak (Hechos 10:34, 35). Oksekimej kichiaj tekiuajkej ma kitlajtlamikan nochi ouijkayotl tlen onka. Ijkuak ijkon kichiuaj, kixtopeuaj iTekiuajkayo toTajtsin Dios, akin kema techpaleuis itech tlen techtlajyouiltia (Apocalipsis 11:15).

6. Okse tlamantli tlen kichiua Satanás pampa tlakajkayauas ye teyoltilana ika tlen amo kuali. Jehová techiluia ma tikixtopeuakan tlen amo kuali pampa ye kimati techijtlakos (Gálatas 6:7, 8). Uelis sekimej kinekiskej noijki ijkon xikchiua. Maski ijkon, xikilnamiki ye Satanás akin kineki ijkon xikchiua (1 Corintios 6:9, 10; 15:33).

7. Satanás uelis kichiuas ma mitskokolikan noso ma mitstlajyouiltikan pampa tikauas Jehová. Uelis sekimej mochanejkauan kualaniskej pampa timomachtia Biblia. Oksekimej uelis mitspinatiskej. Maski ijkon, ¿akin omitsmakak moyolilis? Satanás kineki mitsmomojtis pampa ayakmo ximomachti itlajtol Jehová. Amo xikmokauili (Mateo 10:34-39; 1 Pedro 5:8, 9). Tla tikixtopeua Diablo, tikyolpaktis Jehová uan ijkon tikteititis san ye kinamiki tlanauatis (Proverbios 27:11).

[Tlaixkopinalmej itech páginas 9]

Satanás tlakajkayaua ika tlaneltokalistli tlen amo melauak, naualotl uan ika akinmej moueyinekij itech inueyi altepetl

[Tlaixkopinal itech página 9]

Tla timomachtia itech Jehová mitspaleuis tikixnamikis Satanás