¿Akinmej kikokoliaj toTajtsin Dios?

Akin okachi kikokolia toTajtsin Dios ye Satanás noso Diablo. Ye se ángel tlen amo okitlakamatki Jehová. Satanás ok kixnamiktok toTajtsin Dios uan noijki kintlajyouiltia tlaltikpaktlakamej. Satanás amo yolkuali, ye se tekajkaya uan se temiktiani (Juan 8:44).

Oksekimej ángeles okichijkej ken Satanás uan okixnamikej toTajtsin Dios. Biblia kintokayotia amo kuali ejekamej. Ijkon ken Satanás, amo kuali ejekamej noijki kinkokoliaj tlaltikpaktlakamej. Kinpaktia kintlajyouiltiskej tlaltikpaktlakamej (Mateo 9:32, 33; 12:22). Jehová kinmixpolos Satanás uan amo kuali iejekauan pampa nochipa. Ayakmo kipiaj miak kauitl pampa kintlajyouiltiskej tlaltikpaktlakamej (Apocalipsis 12:12).

Tla tiknekij timochiuaskej tiiyolikniuan toTajtsin Dios, amo ma tikchiuakan tlen Satanás kineki. Satanás uan amo kuali iejekauan kikokoliaj Jehová. Yejuan kikokoliaj toTajtsin Dios uan noijki kinekij ijkon ma tikchiuakan. Ik non, moneki tikpejpenaskej akin tiknekij tikyolpaktiskej: Satanás noso Jehová. Tla tiknekij tinemiskej nochipa, moneki tikchiuaskej itlanekilis toTajtsin Dios. Satanás kimati ken kinkajkayauas tlaltikpaktlakamej uan ika miak tlamantli ijkon kichiua. Miakej ijkon kinkajkayajtok (Apocalipsis 12:9).