TLAMACHTIL 56
Xitlapaleui para nochtin tokniuan kuali mamouikakan
Ijkuak tikatej inuan tokniuan timomachiliaj ken ueyi tekiua David. Ye okijto: “¡Xikitakan! ¡Sapanoua kuali uan teyolpaktia san sekan mayetokan tokniuan!” (Salmo 133:1). Moneki tinochtin timochijchikauaskej para kuali timouikaskej.
1. ¿Tlen okachi mitspaktia tlen kichiuaj tokniuan?
Tla tias itech okse altepetl xamo amo tikajsikamatis intlajtol tokniuan, pero kuali timomachilis ijkuak inuan timonechikos, ¿tleka? Porque maski san kanin timonechikos, tinochtin san se tlamantli timomachtiaj noijki timochijchikauaj para tinochtin timotlasojtlaskej. Maski san kanin tichantij, tinochtin tiknekij san sekan tiktekichiuiliskej Jehová (Sofonías 3:9, nota).
2. ¿Ken uelis titlapaleuis kuali mamouikakan tokniuan?
“Sapanoua ximosepantlasojtlakan ika nochi namoyolo” (1 Pedro 1:22). ¿Ken uelis ijkon tikchiuas? Matikitakan tlen kuali kichiuaj oksekimej uan amo tlen amo kichiuaj. Amo san ximouika inuan akinmej kinpaktia kichiuaskej tlen mitspaktia, ximochijchikaua timouikas inuan nochtin. Noijki ximochijchikaua nochtin xikintlasojtla (xiktlajtolti 1 Pedro 2:17).a
3. ¿Tlen tikchiuas tla itlaj mitschiuiliskej?
Tinochtin timotlasojtlaj pero ken titlajtlakolejkej ualeua timotlapololtiaj, ikinon xamo tikchiuaj noso tikijtouaj itlaj tlen kinyolkokoua oksekimej. Biblia kijtoua ‘nochipa [...] matimotlapojpoluikan’. Noijki kijtoua: “Jehová onamechtlapojpolui ika nochi iyolo ikinon namejuan noijki ijkon xikchiuakan” (xiktlajtolti Colosenses 3:13). Miak uelta tikyolkokouaj Jehová uan ye techtlapojpoluia, ikinon ye noijki kineki matikintlapojpoluikan oksekimej. Tla ikaj otikyolkoko san niman iuan ximotlapojpolui (xiktlajtolti Mateo 5:23, 24).b
MATIMOMACHTIKAN
Ximokuayejyeko ken uelis titlapaleuis para nochtin tokniuan kuali mamouikakan.
¿Tlen uelis nankichiuaskej para nanmotlapojpoluiskej?
4. Amo san sekimej inuan ximouika
Tiknekij timouikaskej inuan nochtin tokniuan pero xamo tikitaj oui timouikaskej inuan akinmej amo kichiuaj tlen tejuan techpaktia, ¿tlen uelis techpaleuis? Xiktlajtoltikan Hechos 10:34, 35 uan satepan xikitakan tlen namechmachtia.
Jehová nochtin kinselia para mayetokan iTlaixpantijkauan. Tla Jehová ijkon kichiua, ¿ken moneki tikinmitaskej akinmej amo ijkon ken tejuan?
Ik kanin tejuatsin tichanti, ¿tleka sekimej mochikoitaj? ¿Tleka tejuatsin amo moneki ijkon tikchiuas?
Xiktlajtoltikan 2 Corintios 6:11-13 uan satepan xikitakan tlen namechmachtia.
¿Tlen moneki tikchiuas para tikintlasojtlas nochtin tokniuan?
5. Ximotlapojpoluikan
Amo keman monekis tiktlapojpoluiskej Jehová pero ye techtlapojpoluia. Xiktlajtoltikan Salmo 86:5 uan satepan xikitakan tlen namechmachtia.
¿Tlen techmachtia nin versículo ijkuak Jehová techtlapojpoluia?
¿Tiktlasojkamatilia Jehová porque nochipa techtlapojpoluia? ¿Tleka?
¿Tlen uelis kichiuas ayakmo kuali matimouikakan inuan oksekimej?
¿Ken uelis tikchiuaskej ken Jehová tla tiknekij nochtin tokniuan kuali mamouikakan? Xiktlajtoltikan Proverbios 19:11 uan satepan xikitakan tlen namechmachtia.
Tla ikaj kichiua itlaj tlen amo mitspaktia, ¿tlen uelis tikchiuas para kuali nanmouikaskej?
Ualeua tikinyolkokouaj oksekimej, ¿tlen moneki tikchiuaskej tla ijkon techpanos? Xikitakan VIDEO uan satepan xikitakan tlen namechmachtia.
¿Tlen okichi tokni para oksepa kuali mouikaskej?
6. Xikita tlen kuali kichiuaj tokniuan
Ijkuak ikaj kuali tikixmatij tikitaj tlen kuali kichiua uan noijki tlen amo kuali kichiua. ¿Tlen uelis tikchiuaskej para okachi tikpatioitaskej tlen kuali kichiua? Xikitakan VIDEO uan satepan xikitakan tlen namechmachtia.
¿Tlen mitspaleuis xikita tlen kuali kichiuaj oksekimej?
Jehová kipatioita tlen kuali tikchiuaj. Xiktlajtoltikan 2 Crónicas 16:9a uan satepan xikitakan tlen namechmachtia.
¿Ken timomachilia ijkuak tikmati Jehová kita tlen kuali tikchiua?
Maski se diamante itlaj kipoloua, ok miak ipati. Tokniuan ualeua noijki motlapololtiaj pero Jehová sapanoua kinpatioita.
SEKIMEJ KIJTOUAJ: “Tla ikaj kineki maniktlapojpolui, moneki achto mamoyolkopa”.
¿Tleka moneki titetlapojpoluiskej?
XIKILNAMIKTO
Tla titetlasojtla uan titetlapojpoluia, titlapaleuis para nochtin kuali mamouikakan.
Matikojpauikan
¿Tlen uelis tikchiuas para amo titechikoitas?
¿Tlen tikchiuas tla se tokni itlaj mitschiuilis?
¿Mitspaktiskia tikintlapojpoluis oksekimej ijkon ken Jehová tetlapojpoluia? ¿Tleka ijkon tikijtoua?
NIN NOIJKI MITSPAKTIS
Xikita ken otlamachti Jesús para amo san tikitas tlen amo kuali kichiuaj oksekimej.
Xikmokixtili n tláktsontli non tikpixtok ijtik moixtololo (7:01)
Tla ikaj touan kualani, ¿moneki tikiluiskej matechtlapojpolui tla timokuayejyekouaj amo totlajtlakol?
“Ma timotlapojpoluikan para kuali timouikaskej” (Akin Tetlapouijtok, 1 de noviembre 2002)
Xikita tlen okinpaleui sekinmej ayakmo matechikoitakan.
Amo ma tikinteneuakan oksekimej san ika tlen tikitaj noso tlen tikkakij (5:06)
Xikita tlen uelis tikchiuas tla tikpia se ouijkayotl iuan se tokni, ijkon amo moxexeloskej oksekimej tokniuan.
““Ma tikyektlalikan ouijkayotl ika tlasojtlalistli” (Akin Tetlapouijtok, mayo de 2016)
a Itech nota 6 kijtoua tejuan tikintlasojtlaj oksekimej, ikinon amo tikchiuaj seki tlamantli para amo mokokoskej.