Yitikpiaj 100 xiuitl tiktematiltijtokej Tekiuajkayotl
1. ¿Tlen okinyolejkej ma kichiuakan itekipanojkauan Jehová itech 100 xiuitl tlen yopanokej?
1 “¡Xikitakan, ueyi Tekiua yitlanauatijtok! Namejuan nankitematiltiaj. Ik non, xiktematiltikan, xiktematiltikan, xiktematiltikan ueyi Tekiua uan iTekiuajkayo.” Yikipia kanaj 100 xiuitl tokni Rutherford okijto ninmej tlajtolmej tlen teyolpaktia, ik non, miakej opejkej tetlapouiaj itech Tekiuajkayotl. ¡Uan non tlen tikchijtokej! Ijkon ken tokniuan itech achto siglo, axkan “nin kuali tlájtoli [itech Tekiuajkayotl] motetlapowijtok itech nochi n tlaltíkpaktli” (Col. 1:23). Itech 100 xiuitl tlen yopanokej, ¿tlen otikchijkej pampa titetlapouiskej itech iTekiuajkayo toTajtsin Dios? ¿Ken uelis titetlapouiskej ijkuak kajxitis 100 xiuitl ijkuak opejki tlanauatia?
2. ¿Ken toamatlajkuiloluan kitematiltiaj iTekiuajkayo toTajtsin Dios?
2 Tlen yotikchijkej. Yiuejkika toamatlajkuiloluan kitematiltiaj iTekiuajkayo toTajtsin Dios. Itech xiuitl 1939 revista La Atalaya. Anunciando el Reino de Jehová, opejki kitematiltia Tekiuajkayotl uan tlen kichiuas. Uan revista ¡Despertad! noijki kitematiltia san iTekiuajkayo toTajtsin Dios uelis kinpaleuis tlaltikpaktlakamej. Axkan ninmej revistas okachi motlajtolkuepaj uan mochijchiuaj itech nochi Tlaltikpak (Apoc. 14:6).
3. ¿Ken titetlapouiaj itech Tekiuajkayotl?
3 ITlaixpantijkauan Jehová tlatlamantli tetlapouiaj itech Tekiuajkayotl. Achto otikintekitiltiayaj carros tlen okipiayaj bocinas, radio uan noijki fonógrafos. Nochi nin tlamantli otechpaleui pampa oksekimej tlaltikpaktlakamej ma kimatikan itech Tekiuajkayotl, maski amo miakej otetlapouiayaj (Sal. 19:4). Axkan itech jw.org, onka miakej tlamachtilmej pampa miakej ma kimatikan itech Tekiuajkayotl. Maski itech seki altepemej amo techkauiliaj ma titetlapouikan.
4. ¿Tlen tekitl tikchijtokej pampa tiktematiltiskej Tekiuajkayotl?
4 ITlaixpantijkauan Jehová noijki kichiuaj seki tekitl pampa tetlapouiskej itech Tekiuajkayotl. Se neskayotl, itech xiuitl 1995 pampa tlayekapan okachi timochijchikajtokej pampa titetlapouiskej itech inkalijtik tlaltikpaktlakamej, parques uan san kanin yetoskej tlaltikpaktlakamej. Uan axkan titetlapouijtokej itech ojtli kanin okachi nemij tlaltikpaktlakamej itech uejueyij altepemej. Uan noijki miakej tlanechikolmej tetlapouiaj ika carritos uan mesas tlen kintlaliaj kanin panoaj miakej tlaltikpaktlakamej. Pero okachi titetlapouiaj itech inkalijtik tlaltikpaktlakamej pampa ma kimatikan itech Tekiuajkayotl (Hech. 20:20).
5. ¿Tlen uelis tikchiuaskej ijkuak peuas yankuik xiuitl?
5 Tlen uelis tikchiuaskej. Ijkuak peuas yankuik xiuitl itech septiembre, miakej tokniuan peuaskej tekitiskej ken precursores regulares. ¿Tikchiuas? Tla amo, ¿uelis titekitis ken precursor auxiliar maski san se metstli? Maski titekitis ken precursor noso amo, Jehová mitsteochiuas itech nochi tlen tikchiuas pampa tiktematiltis iTekiuajkayo (Mal. 3:10).
6. ¿Tleka miak ipati metstli octubre?
6 Itech octubre iTekiuajkayo toTajtsin Dios kajxitis 100 xiuitl. Uan revista La Atalaya techmachtis itech iTekiuajkayo toTajtsin Dios. ¿Tleka amo timochijchikaua pampa tikintemakas miakej revistas? Ma timochijchikauakan pampa tikinmatiltiskej nochtin tlaltikpaktlakamej itech iTekiuajkayo toTajtsin Dios (Hech. 8:12, TNM).