Ma tikinpaleuikan akinmej amo tlachiaj ma kixmatikan Jehová
1. ¿Ken okiteititi Jesús okinmiknomatiaya akinmej amo otlachiayaj?
1 Seki tonalmej achto kimiktiskiaj Jesús, ijkuak okiski itech altepetl Jericó ome tlakamej tlen amo otlachiayaj opejkej kitsajtsiliaj: “¡Tejwatsi, ikone n David, techiknomati!”. Sapanoa omotekipachoaya pampa yokimatiaya tlen kipanoskia, pero Jesús omoketski uan okinpajti (Mat. 20:29-34). ¿Ken uelis tikchiuaskej ken Jesús uan tikinmiknomatiskej akinmej amo tlachiaj?
2. ¿Ken uelis tikintlapouiskej akinmej amo tlachiaj ijkuak titetlapouiaj itech ojtli?
2 Ma tikinpaleuikan. Tla tikajsij akin amo tlachia, ken ijkuak titetlapouiaj itech ojtli, ma tiktlajpalokan uan ma tikpaleuikan. Pero ken miakej tlaltikpaktlakamej kinchiuiliaj tlen amo kuali, uelis amo kinekis ma tikpaleuikan. Ik non, tla tikteititiaj kuali toyelis uan melauak itech timotekipachoaj, kichiuas ma kineki ma tikpaleuikan. Moneki tikilnamikiskej amo nochtin sepa amo tlachiaj, uan nin techpaleuis tikitaskej ken uelis tikinpaleuiskej. Ijkuak yotikpaleuijkej, uelis tikiluiskej tejuan titlamachtiaj Biblia itech nochi Tlaltikpak. Ma tikiluikan tiknekij tiktlajtoltiliskej se tlaxelol ken Salmo 146:8 noso Isaías 35:5, 6. Uelis tikpaleuiskej ma kinkixti seki grabaciones itech jw.org. Uan tla non tlaltikpaktlakatl ueli kitlajtoltia braille, ma tikiluikan kox kineki seki amatlajkuilolmej ika Braille tlen okachi kipaleuiskej ma momachti Biblia. Uan tla kipia se computadora tlen kipia se programa tlen ueli kitlajtoltia tlen mota itech pantalla, uelis tikiluiskej ma kinkaki seki tlamachtilmej tlen katej itech jw.org uan ma kinkixti amatlajkuilolmej ika formato RTF. Ninmej tlamantli katej san ika español uan ika okseki tlatlamantli tlajtolmej tlen okachi tlajtoaj. (Xikita recuadro “Ijkuak tikpaleuis akin amo tlachia...”.)
3. ¿Ken uelis tikintemoskej akinmej amo tlachiaj kanin titetlapouiaj?
3 Ma tikintemokan akinmej amo tlachiaj. Ijkuak titetlapouiaj inkalijtik tlaltikpaktlakamej amo tikinmajsij akinmej amo tlachiaj pampa yejuan amo kuali momachiliaj motlapouiskej iuan akinmej amo kinmixmatij. Ik non, moneki timochijchikauaskej tikintemoskej uan tikintlapouiskej (Mat. 10:11). Ma timotlajtlanikan: ¿Onka ikaj akin amo tlachia kanin titekitij noso kanin timomachtiaj? Tla kema, iuan ma timotlapouikan. Uan tla kanin titetlapouiaj onka kanin momachtiaj akinmej amo tlachiaj, ma tikinuikilikan amatlajkuilolmej ika braille pampa kinpiaskej itech escuela. ¿Tikixmatij ikaj akin kipia se ikalchanejke akin amo tlachia? Kanin titetlapouiaj, ¿onka nechikolmej tlen kinpaleuiaj akinmej amo tlachiaj noso kalmej kanin kinpaleuiaj akinmej amo kuali katej uan ompa chantij akinmej amo tlachiaj? Kuali ma tikyekiluikan ikalchanejke, akin teselia noso akin tlayekana. TiiTlaixpantijkauan Jehová tiknekij tikinpaleuiskej akinmej amo tlachiaj, uan tiknekij tikinmakaskej amatlajkuilolmej ika braille noso grabaciones ika audio. Ma tikinmiluikan toTajtsin Dios kijtoa kinpajtis akinmej amo tlachiaj. Noijki uelis tikititiskej se video tlen kajki itech jw.org tlen itoka “Tla amo nikpiaskia, amo nikmati tlen nikchiuaskia”, itech nin video techtlapouia itech se tlakatl akin amo tlachia uan mopaleuia ika Biblia ika Braille. Tla kuali tikinyekiluiaj akinmej tikintlajpalotiuij, uelis okachi totoka tikinmajsiskej akinmej amo tlachiaj.
4. ¿Tlen techmachtia tlen okichi Janet?
4 Janet, se tokni tlen amo tlachia yaui tetlajpaloti itech se kali kanin chantij akinmej amo tlachiaj. Ye opejki motlapouia iuan se ichpochtli. Janet okilui: “Jesús okinpajti akinmej amo tlachiaj pampa kiteititis ken satepan kinpajtis akinmej amo tlachiaj”. Omotlapouijkej itech tlen kijtoa Apocalipsis 21:3, 4 uan Janet okiyekilui ichpochtli ken melauak mochiuas ika iTekiuajkayo toTajtsin Dios. Ichpochtli san okikak uan satepan okijto: “Amo keman onikkakiaya nin tlamantli uan amo onikchiaya ma nechilui ikaj akin amo tlachia. Miakej tlaltikpaktlakamej kineltokaj akinmej amo tlachiaj ijkon katej pampa itlaj amo kuali okichijkej noso intatajuan”. Janet okititlanili se correo ichpochtli kanin uelis kitas amochtli Tlamachtia Biblia, uan axkan momachtiaj ome uelta itech semana.
5. Maski amo uelis tikinpajtiskej akinmej amo tlachiaj ijkon ken Jesús, ¿tlen tlateochiualismej kiseliskej tla tikinpaleuiaj?
5 Tejuan amo uelis tikinpajtiskej akinmej amo tlachiaj ijkon ken okichi Jesús. Pero pampa akin tlanauatia itech nin Tlaltikpak kinkajkayajtok miakej tlaltikpaktlakamej, moneki tikinpaleuiskej ma kajsikamatikan iTlajtol toTajtsin Dios uan noijki akinmej amo tlachiaj (2 Cor. 4:4). Jesús okinpajti ome tlakamej tlen amo otlachiayaj itech altepetl Jericó pampa “okinmiknoma” (Mat. 20:34). Tiyolpakiskej miak tikinpaleuiskej ma kixmatikan Jehová tla noijki tikteititiaj timotekipachoaj intech akinmej amo tlachiaj, uan Jehová kinpajtis uan kinmakas yolilistli tlen amo keman tlamis.