Tlajtlanilmej
◼ ¿Moneki ma tiktekitiltikan Internet pampa tikintlapouiskej noso tikinmachtiskej Biblia tlen chantij itech okseki uejueyij altepemej tlen amo tikinmixmatij?
Miakej akinmej tetlapouiaj kitekitiltiaj Internet pampa kinmachtiskej tlaltikpaktlakamej itech okseki uejueyij altepemej kanin amo kinkauiliaj ma tetlapouikan noso kanin amo katej miakej iTlaixpantijkauan Jehová. Ualeua tlapaleuia. Pero ualeua uelis tikpiaskej ouijkayotl timotlapouiskej noso tikmakaskej tocorreo akin amo tikixmatij (xikita Nuestro Ministerio del Reino [ika náhuatl del centro Toteki itech Tekiuajkayotl] de julio de 2007, página 3). Maski tiknekij tikinmachtiskej tlaltikpaktlakamej kuali tlajtolmej itech Tekiuajkayotl, amo tikmatij akin iuan timotlapouijtokej, uelis timotlapouijtoskej iuan akinmej amo yolkualmej noso akinmej yomoxelojkej itech Jehová (1 Cor. 1:19-25; Col. 2:8). Noijki, itech uejueyij altepemej kanin amo techkauiliaj ma titetlapouikan, tekiuajkej uelis kitaskej tlen tlamantli tiktitlanij. Nin uelis kinouijtilis tokniuan tlen chantij itech non ueyi altepetl. Ik non, amo ma tikintemokan tlaltikpaktlakamej itech Internet tlen chantij itech okse ueyi altepetl pampa tikinmachtiskej iTlajtol toTajtsin Dios.
Tla tiktlapouiaj ikaj tlen opaxialoko tlen uits itech okse ueyi altepetl, ijkuak ye mokuepas itech ialtepe amo ok moneki iuan timotlapouiskej. Okachi kuali, tikititiskej ken uelis kitekitiltis jw.org pampa ma kitemo tlen ye kineki kimatis noso pampa kajsis Kali kanin tekitij iTlaixpantijkauan Jehová kanin ye chanti, uan ijkon uelis okachi momachtis ijkuak mokuepas ialtepe. Tla katej kalmej kanin monechikoaj iTlaixpantijkauan Jehová kanin ye chanti, ma tikyoleuakan ma tlachiati. Tla kineki kimatis okachi, xikilui ma mitsmaka dirección uan xikmaka secretario uan kititlanis itech jw.org. Uan itech non Kali kanin tekitij iTlaixpantijkauan Jehová itech non ueyi altepetl okachi kuali kipaleuiskej pampa yejuan kixmatij non ueyi altepetl (xikita Toteki itech Tekiuajkayotl de junio de 2014, página 7, uan Nuestro Ministerio del Reino [ika náhuatl del centro Toteki itech Tekiuajkayotl] de noviembre de 2011, página 2).
Tla se tlaltikpaktlakatl yitiktlapouijtokej itech Biblia uan yaui itech okse ueyi altepetl noso ikaj tikmachtijtokej tlen chanti itech okse ueyi altepetl san itech Internet, moneki ma tikchiuakan tlen yotimomachtijkej. Uelis tikmachtijtoskej non tlaltikpaktlakatl tla ayamo kajsij se tokni tlen kitlajpaloti. Tla tlaltikpaktlakatl chanti itech ueyi altepetl kanin amo techkauiliaj ma titetlapouikan, kuali ma tikitakan tlen tlamantli tiktitlaniliaj ijkuak tiktlajkuililiaj itech tlen tlamachtia Biblia, ijkuak tiknotsaj itech teléfono noso ijkuak tiktitlaniliaj se correo (Mat. 10:16).