Okachi matimomachtikan tlen melauak tlamachtia Biblia

1. ¿Ken techpaleuia ijkuak techtlatlaniaj keman opejki timomachtiaj Biblia?

“¿KEMAN opejki timomachtia Biblia?” Xamo miak uelta ijkon yotechtlajtlanijkej. Ijkon tikintlajtlaniaj tokniuan ijkuak yikin tikinmixmatij. Techpaktia tikmatiskej ken okixmatkej Jehová uan opejki kitlasojtlaj. Noijki techpaktia tikinmiluiskej tleka tikpatioitaj timomachtiskej tlen melauak tlamachtia Biblia (Rom. 1:11). Ijkuak timotlapouiaj inmiuan oksekimej techilnamiktia tleka tikpatioitaj tiyetoskej iTlaixpantijkauan Jehová. Noijki techpaleuia nochipa matiknekikan tikchiuaskej tlen Jehová kipaktia, noijki tikyolpaktiskej uan ye techteochiuas (3 Juan 4).

2. ¿Tlen tikitaskej?

² Itech nin tlamachtil tikitaskej tleka tikpatioitaj timomachtiskej Biblia. Noijki tikitaskej ken uelis tikteititiskej tikpatioitaj timomachtiskej Biblia. Non techpaleuis okachi matiktlasojkamatilikan Jehová porque ye otechyoltilanki (Juan 6:44). Noijki okachi tiknekiskej tikintlapouiskej oksekimej tlen melauak tlamachtia Biblia.

¿TLEKA TIKPATIOITAJ TLEN MELAUAK TLAMACHTIA BIBLIA?

3. ¿Tleka sapanoua tikpatioitaj tlen melauak tlamachtia Biblia?

³ Onka miak tlamantli tlen kichiua matikpatioitakan tlen melauak tlamachtia Biblia. Sapanoua tikpatioitaj porque tiktlasojtlaj Jehová uan ye techmachtia tlen kajki itech Biblia. Yotimomachtijkej toTajtsin Dios sapanoua chikauak uan okichijchi iluikak uan tlaltikpak. Noijki porque ye sapanoua techtlasojtla uan kitekipachoua tlen techpanoua (1 Ped. 5:7). Ye toTajtsin Dios tlen “teiknomati uan teajsikamati, amo san niman kualani uan sapanoua tetlasojtla uan kijtoua tlen melauak” (Éx. 34:6). Jehová kichiua tlen kuali (Is. 61:8). Ijkuak techita titlajyouiaj ye moyolkokoua uan kinektok kipojpolos tlen kichiua matitlajyouikan (Jer. 29:11). ¡Tejuan ayakmo tiknekij titlajyouiskej! Ik non, sapanoua tiktlasojtlaj Jehová.

4, 5. ¿Tleka apóstol Pablo okijto yetoskia ken se ancla tlen tikneltokaj tikseliskej satepan?

⁴ Noijki tikpatioitaj tlen techmachtia Biblia porque yotechpaleui kuali matiyetokan. Itech Biblia yotimomachtijkej satepan kuali tiyetoskej. Apóstol Pablo noijki okipatioitaya, ik non, okijkuilo: “Tlan tejwah tikchiah, tikchiah ika totlaneltokalis, kemi se tépostli ankla” (Heb. 6:19). Ijkon ken se ancla kipaleuia barco para amo mamolini, tejuan noijki titlaxikouaj ijkuak titlajyouiaj porque tikmatij satepan kuali tiyetoskej.

⁵ Ijkuak Pablo ijkon okijto, okinmiluijtoka tokniuan tlapejpenalmej. Pero noijki kinpaleuiaj akinmej mokauaskej nikan tlaltikpak (Juan 3:16). Axkan tiyolpakij porque otimomachtijkej uelis tiyoltoskej nochipa.

6, 7. ¿Ken okipaleui Yvonne kimatis tlen tlamachtia Biblia?

⁶ Matikitakan tlen okipanok Yvonne. Ijkuak okatka takotsin ayamo omomachtiaya Biblia, ik non, omomojtiaya porque omokuayejyekouaya xamo mikiskia. Okachi omomojti ijkuak okitlajtolti itech se amochtli: “Ajsis tonal timikiskej”. Ye okijto: “Ijkuak non oniktlajtolti, ayakmo ueli onikochiaya, san onimotekipachojtoka. Onimokuayejyekouaya tlen nechpanoskia uan onikijtouaya: ‘Ok moneki yetos okseki tlamantli ¿Tleka niyoltok?’ ¡Amo oniknekiaya nimikis!”.

⁷ Ijkuak okatka ichpochtli, opejki kimachtiaj iTlaixpantijkauan Jehová. Ye okijto: “Opejki nikneltoka uelis niyoltos itech se xochitlali”. Ijkuak okimatki tlen melauak tlamachtia Biblia sapanoua okipaleui. Ye okijto: “Yiueli nikochi porque ayakmo nechtekipachoua, xamo nimikis noso tlen panos satepan”. Yvonne kipatioita tlen melauak tlamachtia Biblia, ik non, kipaktia kinmiluis oksekimej tlen kineltoka (1 Tim. 4:16).

8, 9. (1) ¿Ken okiteititi tlakatl okipatioitaya tomin tlen okajsik? (2) ¿Tleka tikpatioitaj tlen melauak tlamachtia Biblia?

⁸ Noijki Biblia techilui tlen kichiuas iTekiuajkayo toTajtsin Dios. Jesús okijto iTekiuajkayo toTajtsin Dios yetoskia ken tomin tlen tlalpachitok. Okijto: “Itech ilwikak kan Dios tlanawatia, noiwa kemi se xoktsi non kipia tomi [noso tlamantli tlen patio] non tlalpachitok tetlala. Ijkuak se tlakatl konajsi non tomi oksepa kitlaatia, iwa ika miak pakílistli yawi kinamaka nochi tlan kipia iwa kikoa n tlali kan okajsik non xoktsi” (Mat. 13:44). Tlakatl amo okitemojtinemiaya tomin. Pero ijkuak okajsik okinemakak tlen okipiaya uan okiko tlali kanin otoktoka tomin. ¿Tleka ijkon okichi? Porque okimatiaya non okatka okachi ipati uan amo tlen okipiaya.

⁹ ¿Noijki tikpatioita tlen melauak tlamachtia Biblia? Kema. Tikmatij okachi tiyolpakiskej tla tiktekichiuiliaj Jehová uan ye kichiuas nochipa ma tiyoltokan ijkuak tlanauatis iTekiuajkayo. Timochijchikauaj okachi timouikaskej iuan Jehová uan tiyolpakij tikchiuaskej tlen ye kineki (Col. 1:10).

10, 11. ¿Tlen okipaleui Michael ayakmo makichiua tlen okipaktiaya?

¹⁰ Miakej tokniuan ayakmo kichiuaj miak tlamantli para kiyolpaktiskej Jehová. Sekimej ayakmo momachtiaj. Oksekimej ayakmo kitemouaj kipiaskej miak tomin. Oksekimej ijkuak okixmatkej Jehová ayakmo okichijkej tlen okinpaktiaya. Ijkon okipanok Michael, ijkuak ayamo omomachtiaya Biblia uan okatka telpochtli omomachti ken tlateuis. Ye okijto: “Oniyolpakiaya porque sapanoua chikauak onikatka uan onikmachiliaya amikaj uelis nechtlaniliskia”. Pero ijkuak opejki momachtia Biblia okajsikamatki Jehová amo kipaktia matitlateuikan (Sal. 11:5). Ijkuak kilnamiki tokniuan tlen okimachtijkej, ye kijtoua: “Yejuan amo keman onechiluijkej ayakmo manimomachti ken nitlateuis, yejuan san onechmachtijkej tlen melauak tlamachtia Biblia”.

¹¹ Ijkuak okachi omomachtiaya tlen melauak tlamachtia Biblia okachi opejki kitlasojtla Jehová. Oajsik itech iyolo ijkuak okajsikamatki Jehová kinmiknomati akinmej kitekichiuiliaj. Noijki okajsikamatki omonekiaya kipejpenas tlen kichiuaskia. Ye okijto: “Sapanoua oui onikitak ayakmo nimomachtis nitlateuis. Pero onikmatiaya tla ijkon nikchiuaskia, nikyolpaktiskia Jehová uan non sapanoua onikpatioitaya”. Michael okipatioitak momachtis tlen melauak tlamachtia Biblia uan non okipaleui ayakmo makichiua seki tlamantli (Sant. 1:25).

12, 13. ¿Ken okipaleui Mayli opejki momachtia tlen melauak tlamachtia Biblia?

¹² Tlen melauak tlamachtia Biblia yetoskia ken se lámpara tlen tlauia kanin tlayouatok (Sal. 119:105; Efes. 5:8). Mayli tlen chanti Azerbaijan, sapanoua motlasojkamati porque okimatki tlen melauak tlamachtia Biblia. Itajtsin okatka musulmán uan inantsin okatka judía. Ye okijto: “Maski onikneltokaya okatka Dios amo onikajsikamatiaya seki tlamantli. Ik non, onimotlajtlaniaya: ‘¿Tleka otechchijchi? ¿Tleka ikaj sapanoua tlajyouia uan satepan ijkuak ixpoliui oksepa kitlajyouiltiaj ijtik tlitl?’ Miakej kineltokaj ijkon kineki toTajtsin Dios, ik non, onimokuayejyekouaya ‘¿Nochi tlen techpanoua itlajtlakol toTajtsin Dios? ¿Yolpaki ijkuak kita titlajyouiaj?’”.

¹³ Mayli okinekiaya kimatis tlen omotlajtlaniaya. Satepan opejki momachtia Biblia uan omochi iTlaixpantijka Jehová. Ye okijto: “Ijkuak onikmatki tlen tlamachtia Biblia onimoyolseui”. Ijkon ken Mayli tinochtin tikueyichiuaj uan tiktekichiuiliaj Jehová porque yetoskia ken otechkixti kanin tlayouatok uan otechtlauili (1 Ped. 2:9).

14. ¿Tlen techpaleuis okachi matikpatioitakan tlen melauak tlamachtia Biblia? (Xikita recuadro “Okseki neskayomej”).

¹⁴ Tlen yotimomachtijkej itech okseki párrafos kiteititia sapanoua ipati tlen melauak tlamachtia Biblia. Xamo tikinmilnamikij okseki tlamantli tleka ipati tlen melauak tlamachtia Biblia. ¿Tleka amo timomachtiaj okseki tlamantli para okachi matikpatioitakan tlen melauak tlamachtia Biblia? Tla ijkon tikchiuaj, okachi tikpatioitaskej tlen timomachtiskej.

MATIKTEITITIKAN TIKPATIOITAJ TLEN MELAUAK TLAMACHTIA BIBLIA

15. ¿Ken tikteititiaj tikpatioitaj tlen melauak tlamachtia Biblia?

¹⁵ Tikteititiaj tikpatioitaj tlen melauak tlamachtia Biblia, ijkuak mojmostla timomachtiaj uan tikintlajtoltiaj amatlajkuilolmej. Maski yikin noso yiuejkika timomachtiaj Biblia, tinochtin nochipa timomachtiaj itlaj yankuik. Nin revista tlen achto okiski ika inglés, okijto: “Oui tikajsiskej se xochitl kanin tlauaki uan moneki kuali titlatemoskej para tikajsiskej. Ijkon panoua ijkuak tiknekij tikmatiskej tlen melauak tlamachtia Biblia, ok moneki matimochijchikauakan uan kuali matimomachtikan, ijkon tikmatiskej okseki tlamantli”. Sapanoua techpaleuis tla timochijchikauaj timomachtiskej.

16. ¿Tlen yomitspaleui okachi kuali ximomachti Biblia? (Proverbios 2:4-6).

¹⁶ Amo tinochtin techpaktia timomachtiskej Biblia pero Jehová kineki matimochijchikauakan matimomachtikan para tikajsikamatiskej tlen melauak tlamachtia (xiktlajtolti Proverbios 2:4-6). Tla ijkon tikchiuaj, techpaleuis. Se tokni tlen itoka Corey ijkuak momachtia Biblia, san se versículo kitlajtoltia. Ye okijto: “Nikintlajtoltia notas tlen uitsej tlakxitlan uan referencias marginales, ijkon okachi kuali nimomachtia”. Tla timomachtiaj ijkon ken tokni noso amo, tikteititiskej tikpatioitaj tlen melauak tlamachtia Biblia, tla timochijchikauaj timomachtiskej (Sal. 1:1-3).

17. ¿Ken uelis tikmatiskej kox tikchijtokej tlen kijtoua Biblia? (Santiago 1:25).

¹⁷ Amo san moneki timomachtiskej Biblia, moneki tikchiuaskej tlen ompa timomachtiaj, tla ijkon tikchiuaj tiyolpakiskej (xiktlajtolti Santiago 1:25). Pero ¿ken uelis tikmatiskej kox tikchijtokej tlen kijtoua Biblia? Se tokni okijto moneki tikitaskej kox tikchijtokej tlen kuali noso moneki itlaj tikpatlaskej, Apóstol Pablo okijto: “Moneki nochipa ma tiekan ipan iojwi in toTajtzin Dios katlej ya ipan tiwitzej” (Filip. 3:16, Itlajtol Totajtzin Dios, [NHY]).

18. ¿Tleka sapanoua timochijchikauaj tikchiuaskej tlen melauak tlamachtia Biblia?

¹⁸ Matimokuayejyekokan ken uelis techpaleuis ijkuak timochijchikauaj tikchiuaskej tlen melauak tlamachtia Biblia. Ijkuak ijkon tikchiuaj, kuali tikatej, tikyolpaktiaj Jehová uan tokniuan (Prov. 27:11; 3 Juan 4). ¡Moneki tikpatioitaskej tlen melauak tlamachtia Biblia uan tikchiuaskej tlen ompa kijtoua!