¿Ipati matikmatikan tlen melauak?

¿Ayakmo tikmati ken tikitas tlen melauak uan tlen amo melauak? Axkan miakej san moyekana ika tlen kimachiliaj, ika tlen kineltokaj uan amo ika tlen melauak panoua. Axkan miakej mokuayejyekouaj amikaj kijtoua tlen melauak.

Yiuejkika ijkon opanok, yikipia kanaj 2,000 xiuitl tekiua Poncio Pilato okitlajtlani Jesús: “¿Tlen kijtosneki tlen melauak?” (Juan 18:38). Maski Pilato amo okichiaya makinankili, tlen okitlajtlani sapanoua ipati. Biblia uelis mitsnankilis tlen timotlajtlania uan ijkon tikmatis tlen melauak.

¿Kajki tlen melauak?

Kema. Biblia kitekitiltia tlajtoli melauak para kiteititis tlen melauak opanok uan para kijtos tlen kuali. Noijki techmachtia Jehováa ye melauak ikinon kijtoua “toTajtsin Dios akin kijtoua tlen melauak” (Salmo 31:5). Biblia tlamachtia tlen melauak itech toTajtsin Dios uan kijtoua tlajtoli melauak yetoskia ken tlauili. Porque ueli techyekana itech nin tlaltikpak kanin sapanoua tlakajkayauaj (Salmo 43:3; Juan 17:17).

¿Ken uelis tikajsis tlen melauak?

ToTajtsin Dios amo kineki matikneltokakan san tlen tikkakij. Ye kineki kuali matimokuayejyekokan tlen tikneltokaj uan amo matimoyekanakan san ika tlen tikmachiliaj (Romanos 12:1). Jehová kineki matikixmatikan, matiktlasojtlakan ika nochi tokuayejyekol uan techyoleua matiktemokan tlen melauak tlamachtia Biblia (Mateo 22:37, 38; Hechos 17:11).

¿Akin opejki tlakajkayaua?

Biblia kijtoua Satanás noso Diablo opejki tlakajkayaua porque kikokolia toTajtsin Dios ikinon Biblia kijtoua: “Ye intaj akinmej tlakajkayauaj” (Juan 8:44). Ye okikajkaya achto tlakatl uan achto siuatl (Génesis 3:1-6, 13, 17-19; 5:5). Satanás ok tlakajkayajtok uan kijtoua tlen amo melauak itech toTajtsin Dios (Apocalipsis 12:9).

¿Tleka axkan miakej tlakajkayauaj?

Biblia kijtoua tikatej itech itlamian tonalmej ikinon Satanás okachi tlakajkayaua. Miakej kijtouaj tlen amo melauak para kinkajkayauaskej oksekimej uan ijkon kintlachtekiliskej (2 Timoteo 3:1, 13). Axkan miakej religiones noijki san tlakajkayauaj. Biblia yokijtojka tlen panoskia itech itlamian tonalmej, miakej san kikakiskiaj tlen kijtouaj oksekimej uan amo kikakiskiaj tlen melauak (2 Timoteo 4:3, 4).

¿Tleka miak ipati?

Tlen melauak techpaleuia kuali matimouikakan inuan oksekimej. Tla nochtin san tlakajkayauaskiaj amikaj kuali mouikaskia. Biblia kijtoua toTajtsin Dios kineki matikueyichiuakan ika tlen melauak. Kijtoua: “Akinmej kiueyichiuaj [toTajtsin Dios] moneki kiueyichiuaskej ika espíritu uan ika tlen melauak” (Juan 4:24). Miakej religiones san tlakajkayauaj ikinon, ¿ken uelis mitspaleuis Biblia xikmati tlen melauak? Xiktlajtolti tlamachtilmej tlen intoka “Mentiras que nos alejan de Dios”

¿Tleka kineki toTajtsin Dios xikmati tlen melauak?

ToTajtsin Dios kineki ximomakixti ikinon moneki tikmatis tlen melauak (1 Timoteo 2:4). Tla tikmati tlen tlamantli kipaktia toTajtsin Dios uan tlen amo, mitspaleuis iuan ximouika tla tikchiua tlen ye kipaktia (Salmo 15:1, 2). ToTajtsin Dios okiualtitlanki Jesús, para kinpaleuis oksekimej makimatikan tlen melauak uan kineki makikakikan tlen otlamachti (Mateo 17:5; Juan 18:37).

¿ToTajtsin Dios kichiuas ayakmo ikaj matlakajkayaua?

Kema. ToTajtsin Dios kikokolia ijkuak oksekimej tlakajkayauaj. Ye yokijto kinpojpolos akinmej san tlakajkayauaj (Salmo 5:6). Ijkuak ijkon kichiuas noijki mochiuaskej ninmej tlajtolmej: “Nochipa yetoskej akinmej kijtouaj tlen melauak” (Proverbios 12:19).