Jehová amo keman techkauas toselti

1, 2. (1) ¿Tleka tikijtouaj amo tikatej toselti ijkuak titlajyouiaj? (2) ¿Tlen timomachtiskej?

XAMO tikixnamikij miak tlamantli uan timomachiliaj ken otimixpolojkej ijtik tepeyo uan ayakmo tikmatij ik kanin tiaskej. Pero matikilnamiktokan toTajtsin Dios touan kajki ijkuak titlajyouiaj porque kita tlen techpanoua. Ye kijtoua ‘techpaleuis’ porque techtlasojtla (Is. 41:10).

² Axkan tikitaskej naui tlamantli tlen kiteititia Jehová techmaluia. Ye techyekana, techmaka tlen techpoloua, techmaluia uan techyolchikaua. Noijki yokijto amo keman techkauas toselti uan nochipa techilnamiktos ijkuak titlajyouiskej. Ikinon nochipa matikilnamiktokan amo tikatej toselti.

JEHOVÁ TECHYEKANA

3, 4. ¿Ken techyekana Jehová? (Salmo 48:14).

³ (Xiktlajtolti Salmo 48:14). Jehová kimati amo uelis san toselti timoyekanaskej ikinon ye kineki techpaleuis. ¿Ken techpaleuia Jehová? Ye techpaleuia ika tlen kijtoua iTlajtol (Sal. 119:105). Kineki matimopaleuikan ika iTlajtol ijkuak tikpejpenaskej tlen tikchiuaskej. Noijki techpaleuia matikpiakan kuali toyelis porque kineki matipakikan uan satepan uelis nochipa tiyoltoskej.a Techmachtia ken moneki titetlapojpoluiskej uan amo san matikilnamiktokan tlen techtoktiaj. Noijki techpaleuia matikchiuakan tlen kuali uan ‘matimosepantlasojtlakan ika nochi toyolo’ (Sal. 37:8; Heb. 13:18; 1 Ped. 1:22). Non kinpaleuis tetajmej kuali makinmaluikan inkoneuan. Akinmej yomonamiktijkej kinpaleuis kuali mamouikakan iuan insiua noso innamik. Noijki techpaleuis kuali matimouikakan inuan toyolikniuan.

⁴ Biblia kijtoua yiuejkika sekimej noijki okixnamikej miak tlamantli uan noijki omomachilijkej ijkon ken tejuan timomachiliaj (1 Cor. 10:13; Sant. 5:17). Ijkuak tiktlajtoltiaj Biblia uan tikchiuaj tlen techmachtia, techpaleuia matikilnamiktokan ome tlamantli. Achto techilnamiktia oksekimej noijki yokixnamikej miak tlamantli uan amo san tejuan ijkon techpanoua uan yotlaxikojkej porque Jehová yokinpaleui (1 Ped. 5:9). Noijki techilnamiktia tlen techpaleuis matikixnamikikan tlen tikijyouiaj (Rom. 15:4).

5. ¿Akinmej okintlali Jehová matechyekanakan?

⁵ Jehová noijki okintlali sekimej tokniuan matechyekanakan.b Tlayekankej itech circuito techyolchikauaj ijkuak yauij techtlajpalotiuij itech totlanechikol. Noijki kinpanoltiaj seki tlamachtilmej tlen techpaleuia kuali matimouikakan iuan Jehová uan noijki inuan tokniuan (Hech. 15:​40–16:5). Tlayekankej kitaj kuali mayetokan sejse tokniuan (1 Ped. 5:​2, 3). Tetajmej kinmititiaj inkoneuan makitlasojtlakan Jehová, kuali makipejpenakan tlen kinekij kichiuaskej uan makitekichiuilikan (Prov. 22:6). Tokniuan siuamej kichiuaj tlen kijtouaj porque kipiaj chikauak intlaneltokilis. Yejuan kinyolchikauaj ichpochmej uan kinyekiluiaj tlen moneki kichiuaskej (Tito 2:​3-5).

6. ¿Tlen moneki tikchiuaskej tla tiknekij matechpaleui tlen yotechmakak Jehová?

⁶ Jehová yotechmakak nochi tlen moneki para techyekanas uan non techpaleuia kuali matikpejpenakan tlen tikchiuaskej uan matiyolpakikan. ¿Tlen moneki tikchiuaskej tla tiknekij matechpaleui tlen ye yotechmakak uan ken tikteititiskej timotlasojkamatij? Proverbios 3:​5, 6 kijtoua: “Xitlaneltoka itech Jehová ika nochi moyolo uan amo xikchiua san tlen timokuayejyekoua”. Non kiteititia Jehová techpaleuis ‘kuali matikpiakan tonemilis’. Ijkon amo okachi titlajyouiskej uan tiyolpakiskej. Ikinon tiktlasojkamatiliaj Jehová porque techtlasojtla miak uan techyekiluia tlen moneki tikchiuaskej (Sal. 32:8).

JEHOVÁ TECHMAKA TLEN TECHPOLOUA

7. ¿Ken techpaleuia Jehová ijkon ken kijtoua Filipenses 4:19?

⁷ (Xiktlajtolti Filipenses 4:19). Jehová techpaleuia iuan matimouikakan. Pero noijki techpaleuia ijkuak timochijchikauaj tikmotlaniliskej tlen tikkuaskej, tlen tikmokentiskej uan kanin tichantiskej (Mat. 6:33; 2 Tes. 3:12). Tejuan tikmatij moneki tikpiaskej nin tlamantli pero Jehová techiluia amo okachi matechtekipacho (Mat. 6:25). ¿Tleka ijkon techiluia? Porque ye yokijto nochipa yetos inuan akinmej kitekichiuiliaj porque amo kikauaj (Mat. 6:8; Heb. 13:5). Ikinon tikneltokaj techmakas tlen techpoloua porque ye kichiua tlen kijtoua.

8. ¿Ken okipaleuijkej David?

⁸ Matimokuayejyekokan ken okipaleuijkej David ijkuak tekiua Saúl okitemojtinemiaya. David otlajyoui miak xiuitl pero Jehová okimakak tlen okipolouaya uan noijki akinmej okipaleuiayaj. David okilnamik nochi tlen okipanok ikinon okijkuilo: “Ne onikatka nitelpochtli, uan yoniueuejtik, pero amo onikitak makikauakan akin yolmelauak, nion ikoneuan makitemokan pan” (Sal. 37:25). Tejuan xamo noijki yotikitakej ken yotechpaleui Jehová uan noijki ken yokinpaleui tokniuan.

9. ¿Ken kinpaleuia Jehová tokniuan ijkuak tlaxixini? (Noijki xikinmita fotos).

⁹ Jehová kinmaka tlen kinpoloua akinmej kitekichiuiliaj ijkuak kanaj tlaxixini. Matikitakan ken okinpaleuijkej tokniuan tlen okatkaj achto siglo. Ompa Jerusalén otlaapistik ikinon miakej tokniuan okintitlanilijkej tlen okinpolouaya tokniuan tlen ompa ochantiayaj (Hech. 11:​27-30; Rom. 15:​25, 26). Axkan noijki tokniuan kitemakaj tlen kipiaj. Ijkuak kanaj tlaxixini, Jehová kinyolinia tokniuan makintitlanilikan tlen kinpoloua akinmej ompa chantij. Kititlanij tlakuali, atl, tlakemitl uan pajtli. Noijki tokniuan kinyektlaliaj inkalijtik tokniuan uan noijki kanin timonechikouaj. Tokniuan san niman moyektlaliaj para kinyolchikauaskej tokniuan tlen oixpoliuik akin okitlasojtlayaj uan tlen okipolojkej inkalijtik.c

10, 11. ¿Tlen techmachtia tlen okipanok Román?

¹⁰ Jehová kipaktia kitemakas tlen kipia ikinon kinmaka tlen kinpoloua akinmej ayamo kitekichiuiliaj. Tejuan noijki tikchiuaj ijkon ken Jehová kichiua ijkuak tikinpaleuiaj akinmej amo tlaneltokaj (Gál. 6:10). Non techpaleuia matikintlapouikan akin toTajtsin Dios. Matikitakan tlen okipanok Román.d Ye kiyekana se escuela ompa Ucrania. Ye amo kitekichiuilia toTajtsin Dios pero okintlakaitaya konemej tlen iTlaixpantijkauan Jehová. Itech non altepetl opejki guerra ikinon ye oksekan ochantito kanin kuali yetoskia uan tokniuan okipaleuijkej. Satepan touan omonechiko ijkuak otikilnamikej imikilis Cristo. Ye okijto: “Sapanoua nikintlasojkamatilia iTlaixpantijkauan Jehová porque onechpaleuijkej”.

¹¹ Tinochtin uelis tikinpaleuiskej oksekimej ijkon ken toTajtsin Dios kinpaleuia maski yejuan amo kitekichiuiliaj (Luc. 6:​31, 36). Tejuan tikteititiaj tikintlasojtlaj ikinon tikneltokaj non kinpaleuis mamotokikan inauak Jehová uan touan makitekichiuilikan (1 Ped. 2:12). Tipakij ijkon tikchiuaj maski yejuan amo kinekij kitekichiuiliskej Jehová (Hech. 20:35).

JEHOVÁ TECHMALUIA

12. ¿Ken yokijto Jehová techpaleuis? (Salmo 91:​1, 2, 14).

¹² (Xiktlajtolti Salmo 91:​1, 2, 14). Jehová yokijto nochipa techpaleuis iuan matimouikakan uan amo kitekauilis ikaj matechijtlako. Jehová amo kikauilis Satanás makijtlako ken tikueyichiuaj (Juan 17:15). Tikmatij Jehová techmaluis ijkuak peuas “ueyi tlajyouilistli” uan techpaleuis iuan matimouikakan (Apoc. 7:​9, 14).

13. ¿Ken techmaluia Jehová?

¹³ ¿Ken techmaluia Jehová? Jehová otechmakak iTlajtol para matikmatikan tlen kuali uan tlen amo kuali (Heb. 5:14). Ijkuak timoyekanaj ika principios bíblicos okachi kuali timouikaj iuan Jehová uan noijki kuali tikatej (Sal. 91:4). Noijki Jehová otechtlali matipouikan itech se tlanechikol uan ompa techmaluia (Is. 32:​1, 2). Sapanoua techyolchikaua timouikaj inuan tokniuan tlen kitlasojtlaj uan kitlakamatij Jehová uan noijki techpaleuiaj amo matikchiuakan tlen amo kuali (Prov. 13:20).

14. (1) ¿Tleka Jehová ualeua kitekauilia matechtlajyouiltikan? (2) ¿Tlen techilnamiktia Salmo 9:10? (Noijki xikita nota).

¹⁴ Jehová ualeua okinmalui itekipanojkauan tlen yiuejkika okatkaj amitlaj makinpano. Pero Biblia kijtoua ualeua “uelis itlaj amo kuali techpanotikisa” (Ecl. 9:11). Ualeua Jehová kitekauilia matechtlajyouiltikan uan matechmiktikan ijkon ken yiuejkika opanouaya. ¿Tleka kitekauilia ijkon matechpano? Ijkon kichiua porque kineki kiteititis Satanás san tlakajkayaua (Job 2:​4-6; Mat. 23:34). Jehová amo keman techkauas toselti maski ualeua titlajyouiskej (Sal. 9:10).e

JEHOVÁ TECHYOLCHIKAUA

15. ¿Ken techyolchikaua Jehová ijkuak tiktlatlaujtiaj, ijkuak tiktlajtoltiaj iTlajtol uan ijkuak kinyolinia tokniuan matechyolchikauakan? (2 Corintios 1:​3, 4).

¹⁵ (Xiktlajtolti 2 Corintios 1:​3, 4). Xamo se tonal itlaj yotechtekipacho noso yotechyolkoko. Xamo axkan itlaj techtekipachoua noso timomachiliaj toselti. Pero Jehová kajsikamati tlen techpanotok maski oksekimej amo kajsikamatij. Noijki “techyolseuia ijkuak titlajyouiaj”. ¿Ken techyolchikaua? Techyolchikaua ijkuak tiktlatlaujtiaj, ijkuak tiktlajtoltiaj iTlajtol uan ijkuak kinyolinia tokniuan matechyolchikauakan. Ye technankilia ijkuak tiktlatlaujtiaj uan techmaka “iyolseuilis [...] tlen amikaj kajsikamati” (Filip. 4:​6, 7). Ijkuak tiktlajtoltiaj iTlajtol tikitaj ye sapanoua techtlasojtla, techixtlamachtia uan techiluia tlen kichiuas satepan. Noijki tokniuan techtlasojtlaj ijkuak inuan timonechikouaj uan techyolchikauaj ika iTlajtol toTajtsin Dios.

16. ¿Tlen techmachtia tlen okinpanok Nathan uan Priscilla?

¹⁶ ToTajtsin Dios techyolchikaua ika iTlajtol. Matikitakan tlen okinpanok Nathan uan Priscilla tlen chantij Estados Unidos. Yikipia seki xiuitl yejuan okijtojkej yaskiaj oksekan tetlapouitiuij. Nathan okijto: “Tejuan otikneltokayaj Jehová techteochiuaskia”. Ijkuak yejuan oajsitoj kanin tetlapouiskiaj, opejki mokokouaj uan amo okipiayaj tlen ika mopanoltiskej. Ikinon omokopkej inmialtepe pero ompa noijki amo okipiayaj tomin. Nathan noijki okijto: “Onimotlajtlaniaya tleka toTajtsin Dios amo otechteochi ijkon ken otikchiayaj. Opejki nimokuayejyekoua kox onitlajtlakolchi”. Pero Nathan uan Priscilla okajsikamatkej toTajtsin Dios amo keman okinka inselti. Ye okijto: “Tlen kijtoua Biblia otechpaleui matikixnamikikan tlen otechpanotoka. Yetoskia ken okatka se toyolikni tlen otechyolchikauaya uan otechiluiaya tlen omonekiaya tikchiuaskej. Non otechpaleui matikajsikamatikan Jehová otechpaleuijtoka matitlaxikokan uan amo san matimokuayejyekojtokan tlen otechpanotoka. Non tlamantli noijki otechpaleui matikmatikan tlen tikchiuaskej ijkuak tikixnamikiskej okseki tlamantli”.

17. ¿Ken okiyolchikajkej tokni Laura? (Noijki xikinmita fotos).

¹⁷ Tokniuan techyolchikauaj ijkuak moneki. Matikitakan tlen okipanok Laura tlen chanti Hungría. Miak xiuitl omoyolkokouaya porque okimachiliaya amikaj okitlasojtlaya. Pero axkan kilnamiki Jehová okinyolini tokniuan makiyolchikauakan. Ye okijkuilo: “Jehová onechpaleui ijkuak ayakmo onitlaxikouaya porque omonekiaya nitekipanos, omonekiaya nikmaluis nokone tlen omokokouaya uan okseki tlamantli tlen onikixnamikiaya. Axkan yopanok 30 xiuitl uan nikita Jehová yonechyolchika ijkon ken okijto kichiuas uan amo keman nechkaua noselti. Tokniuan kuali nechseliaj uan nechtlasojtlaj porque Jehová kinyolinia ijkon makichiuakan. Nechyolchikaua ijkuak tokniuan nechintitlaniliaj mensajes noso nechijkuililiaj se amatsintli ijkuak amo kuali nimomachilia”.

18. ¿Ken uelis titeyolchikauaskej?

¹⁸ Tejuan uelis tikinyolchikauaskej oksekimej ijkon ken toTajtsin Dios kichiua. ¿Ken uelis tikinyolchikauaskej? Kuali matikinkakikan, matikinyolchikauakan uan matikinpaleuikan (Prov. 3:27). Matimochijchikauakan matikinyolchikauakan akinmej tlajyouiaj uan noijki akinmej ayamo kitekichiuiliaj toTajtsin Dios. Matikintlajpalotij ijkuak mokokouaj noso kinpanotok miak tlamantli. Noijki kuali matikinkakikan ijkuak techiluiaj tlen kintekipachoua uan matikinyolchikauakan ika tlen kijtoua Biblia. Tikinpaleuiaj tokniuan ijkuak tikinyolchikauaj ijkon ken Jehová kichiua. Non tlamantli noijki uelis kinyolinis oksekimej makixmatikan Jehová (Mat. 5:16).

JEHOVÁ AMO KEMAN TECHKAUAS TOSELTI

19. ¿Ken uelis tikchiuaskej ijkon ken Jehová kichiua?

¹⁹ Jehová amo keman techkauas toselti ijkuak titlajyouiskej porque ye kitekipachoua tlen kinpanoua akinmej kitlasojtlaj. Ye techtlasojtla uan techmaluia ijkon ken se teta kimaluia ikone. Jehová techyekana, techmaka tlen techpoloua, techmaluia uan techyolchikaua. Tejuan noijki uelis tikinpaleuiskej uan tikinyolchikauaskej akinmej itlaj kinpanotok. Matikneltokakan Jehová nochipa touan yetos maski san tlen tlamantli tikixnamikiskej porque ye yokijto: “Amo ximomojti, ne mouan nika” (Is. 41:10). Kuali timomachiliaj porque Jehová techiluia nochipa touan yetos.