Matipakikan maski san tlen tlamantli tikixnamikiskej

1. Xikyekijto tlen kijtosneki matipakikan san ika tlen tikpiaj pero tlen uelis tikchiuaskej.

TEJUAN tipakij uan timoyolseuiaj porque tikitaj tlen kuali tikpiaj uan amo san timoyolkokojtokej noso tikualantokej porque timokuayejyekojtokej tlen amo tikpiaj. Pero non amo kijtosneki amitlaj tikchiuaskej. Ikinon moneki matikitakan ken uelis okachi tiktekichiuiliskej Jehová (Rom. 12:1; 1 Tim. 3:1). Non techpaleuia matipakikan maski amo techmakaj tekitl tlen techpaktiskia tikchiuaskej itech tlanechikol.

2. ¿Tlen techpanos tla tikixnekij tikpiaskej miak tlamantli?

² Tikchiuaskej tlen amo kuali tla san tikixnekiskej tikpiaskej miak tlamantli. Matikitakan tleka ijkon tikijtouaj. Sekimej sapanoua tekipanouaj porque kinekij kimokouiskej miak tlamantli maski amo kinpoloua. Techtekipachoua miak porque sekimej tokniuan yokichtekej tomin uan okseki tlamantli tlen okinekiayaj kipiaskej. Xamo omokuayejyekojkej uan okijtojkej: “Moneki nikpias nin tlamantli”, “Moneki yinikpias nin tlamantli porque yiuejkika nimochixtok” noso “Uelis nikuikas nin tomin uan satepan nikkopas”. Pero Jehová amo kipaktia matitlachtekikan porque kisokiotia itoka (Prov. 30:9). Oksekimej yomoyolkokojkej porque amo kinmakaj se tekitl itech tlanechikol ikinon ayakmo kitekichiuiliaj Jehová (Gál. 6:9). ¿Tleka ijkon kichiuaj tla yomotemakakej ixpan Jehová? Xamo ijkon okinpanok porque opejki kixnekij kipiaskej okseki tlamantli.

3. ¿Tlen techmachtia Filipenses 4:​11, 12?

³ Tinochtin uelis tipakiskej san ika tlen tikpiaj. Apóstol Pablo okijto: “Ne yinikmati nipakis maski san ken niyetos” (xiktlajtolti Filipenses 4:​11, 12). Pablo otsaktoka ijkuak okijkuilo nin tlamantli pero ye opakiaya. Tla tikitaj oui tipakiskej san ika tlen tikpiaj techpaleuis tlen okijto Pablo uan tlen ye okipanok. ¿Ken uelis tipakiskej maski san tlen tlamantli techpanos? Axkan tikitaskej eyi tlamantli tlen sapanoua techpaleuis.

MATIMOTLASOJKAMATIKAN

4. ¿Tleka tipakij ijkuak timotlasojkamatij? (1 Tesalonicenses 5:18).

⁴ Okachi tipakiskej tla tiktlasojkamatij tlen tikpiaj (xiktlajtolti 1 Tesalonicenses 5:18). Amo tikixnekiskej tikpiaskej okseki tlamantli tla tiktlasojkamatij tlen tikpiaj. Okachi kuali tiktekichiuiliskej Jehová tla tipakij kanin axkan tiktekichiuiliaj. Non techpaleuis amo san matimokuayejyekojtokan matechmakakan se tekitl tlen techpaktiskia tikpiaskej itech ialtepe Jehová. Ikinon Biblia techiluia matiktlasojkamatilikan Jehová ijkuak tiktlatlaujtiaj. Ijkuak timotlasojkamatij techpaleuia matikselikan iyolseuilis toTajtsin Dios tlen amikaj kajsikamati (Filip. 4:​6, 7).

5. ¿Tleka israelitas omonekiaya motlasojkamatiskej? (Noijki xikita dibujo).

⁵ Matikitakan tlen okinpanok israelitas. Yejuan miak uelta okixnamikej Jehová porque ayakmo okikuayaj tlakuali tlen okipiayaj Egipto (Núm. 11:​4-6). Okatka oui yetoskej kanin tlauaki porque okinpanouaya miak tlamantli. Okachi pakiskiaj tla kipatioitaskiaj ken okinpaleui Jehová. Omonekiaya kilnamikiskej ijkuak okatkaj tlakeualmej ompa Egipto uan okintlajyouiltiayaj miak. Pero Jehová okintitlanki majtlaktli chauistli para kinmakixtis. Ijkuak okiskej “okintlajtlanilijkej egipcios tlamantli de plata, oro uan tlakemitl” (Éx. 12:​35, 36). Noijki Jehová okinejneki ichikaualis para kitlajkoxelos mar Rojo uan ik ompa opanokej israelitas para amo makinmajsitij isoldados faraón. Ye nochipa okinmakak maná ijkuak okatkaj kanin tlauaki. ¿Pero tleka amo opakiayaj tla Jehová okinpaleuiaya? Yejuan amo okitlasojkamatiliayaj tlen okinmakaya.

6. ¿Tlen techpaleuis matimotlasojkamatikan?

⁶ ¿Tlen techpaleuis matimotlasojkamatikan? Mojmostla matimokuayejyekokan tlen techpaleuia matiyolpakikan. Uelis tikijkuiloskej kanaj ome tlamantli noso eyi tlamantli tlen tiknekij tiktlasojkamatiliskej toTajtsin Dios (Lam. 3:​22, 23). Noijki mojmostla matikintlasojkamatilikan oksekimej porque techpaleuiaj uan noijki matiktlasojkamatilikan Jehová porque kichiua miak tlamantli para techpaleuis (Sal. 75:1). Saiktlami, matimouikakan inuan akinmej motlasojkamatij uan amo matimouikakan inuan akinmej amo motlasojkamatij (Deut. 1:​26-28; 2 Tim. 3:​1, 2, 5). Nochipa matimotlasojkamatikan porque non techpaleuis amo matiyolchichiakan tla amo tikpiaj seki tlamantli.

7. ¿Tlen okipaleui Anisa oksepa mapaki?

⁷ Matikitakan tlen okipanok se tokni itoka Anisaa tlen chanti Indonesia. Ye okijto: “Ijkuak opanotoka COVID-19 opejki nikita kox onikchijtoka ijkon ken oksekimej tokniuan okichiuayaj uan ayakmo onipakiaya” (Gál. 6:4). ¿Tlen okipaleui oksepa mapaki? Ye okijto: “Opejki nimokuayejyekoua tlen tlateochiualistli mojmostla onikseliaya uan noijki tlen tlamantli onikpiaya porque nika itech ialtepe toTajtsin Dios. Non onechpaleui maniktlasojkamatili Jehová uan opejki nipaki”. Tla tikchiuaskej tlen okichi tokni, techpaleuis matipakikan maski tikixnamikij miak tlamantli.

MATIYETOKAN TIYOLYAMANKEJ

8. ¿Tlen okipanok Baruc?

⁸ Baruc okatka isecretario profeta Jeremías. Ye ayakmo oyolpakiaya maski okipaleuiaya Jeremías. Ye uan Jeremías okinmatiltiayaj israelitas tlen kinpanoskia porque amo okitlakamatkej Jehová uan non tekitl okatka sapanoua oui. Pero ye okachi omokuayejyekouaya tlen okinekiaya kichiuas uan ayakmo okipatioitaya tlen Jehová okinekiaya makichiua. Ikinon Jehová okinauati profeta Jeremías makilui: “Te tiktemoua tlamantli tlen tikpatioita. Ayakmo xiktemo non tlamantli” (Jer. 45:​3-5). Yetoskia ken okilui: “Xipaki san ika tlen tikpia”. Baruc okichi tlen okilui profeta uan ijkon ok okiyolpakti Jehová.

9. ¿Tlen techmachtia 1 Corintios 4:​6, 7? (Noijki xikinmita fotos).

⁹ Ualeua sekimej tokniuan mokuayejyekouaj kinnamiki makinmakakan se tekitl itech tlanechikol. Xamo kimatij kichiuaskej miak tlamantli, tekipanouaj miak, yimiak xiuitl kitekichiuilijtokej Jehová noso kichiuaj nochi nin eyi tlamantli tlen yotikijtojkej. Pero xamo kitaj oksekimej kinmakaj tekitl tlen yejuan okinekiayaj kichiuaskej. ¿Tlen kinpaleuis amo mayolchichiakan? Kinpaleuis tla mokuayejyekoskej tlen okijkuilo apóstol Pablo itech 1 Corintios 4:​6, 7 (xiktlajtolti). Tejuan amo tikmotlaniliaj matechmakakan seki tekitl itech ialtepe Jehová. Pero ye techkauilia matitlapaleuikan itech ialtepe maski amo technamiki (Rom. 12:​3, 6; Efes. 2:​8, 9).

10. ¿Tlen techpaleuis matiyetokan tiyolyamankej?

¹⁰ Tiyetoskej tiyolyamankej tla timokuayejyekouaj tlen okichi Jesús. Matikilnamiktokan Jesús iKone toTajtsin Dios uan tlanauatia pero ye okinmikxipajpaki iapóstoles. Apóstol Juan okijkuilo: “Jesús okimatiaya iTajtsin nochi okimaktili. Noijki okimatiaya toTajtsin Dios okiualtitlanki uan oksepa inauak mokopaskia [pero ye] okinmikxipajpakak discípulos” (Juan 13:​3-5). Jesús uelis kijtoskia yejuan idiscípulos omonekiaya kikxipajpakaskej. Pero amo keman okijto omonekiaya kipias se kualtsin ikalijtik, omonekiaya kipias miak tomin uan kualtsin yetoskia porque ye iKone toTajtsin Dios (Luc. 9:58). Ye opakiaya san ika tlen okipiaya porque okatka yolyamanki. Melauak techpaleuia tlen okichi Jesús (Juan 13:15).

11. ¿Tlen kipaleuia Dennis mapaki?

¹¹ Se tokni itoka Dennis tlen chanti Países Bajos okijto ye mochijchikaua yetos yolyamanki ijkon ken Jesús pero ualeua kita oui. Ye okijto: “Nikita ualeua nikualani uan nimoueyineki ijkuak nikita se tokni kimakaj se tekitl itech tlanechikol tlen ne oniknekiaya nikchiuas. San niman nimomachtia ken moneki niyetos niyolyamanki ijkuak ijkon nechpanoua. Itech JW Library^® onikintlalili etiquetas seki textos uan ijkon san niman nikinmajsi uan nikintlajtoltia. Nonmej textos kijtouaj tleka moneki tiyetoskej tiyolyamankej. Noijki nikinpia seki tlamachtilmej itech nocelular tlen kijtouaj tleka moneki tiyetoskej tiyolyamankej uan miak uelta nikinkaki.b Axkan yonikajsikamatki nochi matikchiuakan para tikueyichiuaskej Jehová uan amo para matechueyitlalikan. Ye iaxka nochi tlen mochiua itech ialtepe uan tejuan san tepitsin titlapaleuiaj”. Matimochijchikauakan matiyetokan tiyolyamankej tla techpanoua ijkon ken tokni kipanoua tlen yotimotlapouijkej. Ijkon okachi timouikaskej iuan Jehová uan tipakiskej (Sant. 4:​6, 8).

MATIMOKUAYEJYEKOKAN TLEN TOTAJTSIN DIOS YOKIJTO KICHIUAS

12. ¿Tlen techpaleuis matipakikan maski axkan itlaj techpanoua? (Isaías 65:​21-25).

¹² Ijkuak timokuayejyekoskej tlen kichiuas toTajtsin Dios techpaleuis matipakikan maski axkan itlaj techpanotok. Jehová kimati axkan amo kuali tikatej pero noijki techiluia satepan kipojpolos tlen tikixnamikij (xiktlajtolti Isaías 65:​21-25). Ijkuak tiyetoskej itech xochitlali kualtsin tikchijchiuaskej tokalijtik, techpaktis tekitl tlen tikchiuaskej uan uelik titlakuaskej. Ayakmo timotekipachoskej itlaj techpanos noso itlaj kinpanos tokoneuan (Is. 32:​17, 18; Ezeq. 34:25). Kualtsin tiyetoskej porque Jehová yokijto ijkon kichiuas.

13. ¿Tleka miak ipati nochipa matimokuayejyekokan tlen kichiuas toTajtsin Dios?

¹³ ¿Tleka miak ipati nochipa matimokuayejyekokan tlen kichiuas toTajtsin Dios? Porque tikatej “itlamian tonalmej” uan tinochtin tikixnamikij miak tlamantli (2 Tim. 3:1). Jehová nochipa techpaleuia matitlaxikokan, ye techyekana, techmaka chikaualistli uan techpaleuia ijkuak moneki (Sal. 145:14). Tla tikilnamiktokej tlen kichiuas toTajtsin Dios uelis techyolchikauas ijkuak sapanoua titlajyouiskej. Xamo moneki sapanoua titekipanoskej para tikmotlaniliskej tlen ikaj timopanoltiskej. Pero tikmatij amo nochipa ijkon tiyetoskej porque Jehová techmakas nochi tlen monekis ijkuak tiyetoskej itech xochitlali (Sal. 9:18; 72:​12-14). Xamo axkan tikpiaj se kokolistli uan amo onka pajtli tlen ika timopajtiskej, kanaj techkokoua noso timoyolkokouaj. Pero non amo kijtosneki nochipa ijkon tiyetoskej porque toTajtsin Dios yokijto itech xochitlali amikaj mokokos nion ikaj ixpoliuis (Apoc. 21:​3, 4). Techyolchikaua nochi tlen yokijto kichiuas toTajtsin Dios uan techpaleuia amo matiyolchichiakan maski amo kuali tikatej. Uelis tipakiskej maski techtoktiskej tlen amo kuali noso timokokoskej. Noijki uelis tipakiskej maski ixpoliuis akin tiktlasojtlaj noso techpanos okseki tlamantli. ¿Tleka? Porque tikmatij amo uejkauas tlen tikijyouiaj uan itech xochitlali ayakmo ikaj tlajyouis (2 Cor. 4:​17, 18).

14. ¿Tlen techpaleuis okachi matimokuayejyekokan tlen kichiuas toTajtsin Dios?

¹⁴ ¿Tlen techpaleuis matikilnamiktokan tlen kichiuas toTajtsin Dios uan ijkon matipakikan san ika tlen tikpiaj? Tlen kichiuas toTajtsin Dios yetoskia ken tikalakiskej kalijtik kanin tlayoua uan moneki titlaxotlaltiskej para tikitaskej nochi tlen ompa kajki. Tejuan noijki moneki matimokuayejyekokan ken tiyetoskej itech xochitlali. Matimokuayejyekokan ken tiyetoskej itech xochitlali tla amo tikpiaj tomin. Ijkuakon ayakmo tiknejnekiskej tomin, ayakmo itlaj tikteuikiliskej uan tikpiaskej nochi tlen axkan amo tikpiaj. Tla timoyolkokouaj porque amo techmakaj se tekitl itech tlanechikol, matimokuayejyekokan non tekitl ayakmo techtekipachos ijkuak tiyetoskej itech xochitlali. Ijkuakon ayakmo tiyetoskej titlajtlakolejkej uan miak xiuitl tiktekichiuiliskej Jehová (1 Tim. 6:19). Xamo tikitaj oui timokuayejyekoskej tlen kichiuas toTajtsin Dios porque axkan tikixnamikij miak tlamantli. Nochipa matimokuayejyekokan nin tlamantli uan satepan ayakmo tikitaskej oui ijkon tikchiuaskej.

15. ¿Tlen techmachtia tlen kichiua Crista?

¹⁵ Matikitakan tlen techmachtia tlen kipanotok se tokni itoka Crista tlen inamik itoka Dennis tlen otimotlapouijkej itech párrafo 11. Ye okijto: “Nikpia se kokolistli tlen amo nechkauilia manimolini. Ikinon niknejneki silla de ruedas porque amo ueli ninejnemi. Nochipa niuetok uan nechkokoua nocuerpo. Amo yiuejkika onechilui tepajti ayakmo nipajtis. Ne san niman onikijto ye amo kimati tlen panos satepan. Ne kuali nimomachilia porque nikilnamiktok tlen kichiuas toTajtsin Dios. Axkan moneki nitlaxikos pero sapanoua nipakis ijkuak niyetos itech xochitlali”.

“AMITLAJ KINPOLOUA AKINMEJ KIMAUILIAJ” JEHOVÁ

16. ¿Tleka David okijto “amitlaj kinpoloua akinmej kimauiliaj” Jehová?

¹⁶ Tejuan tipakij pero non amo kijtosneki amitlaj tikixnamikiskej. Matikitakan tlen okipanok tekiua David. Oixpolikej kanaj eyi ikoneuan, okitlajtlakoltijkej okichi itlaj tlen amo kuali, okikajkayajkej uan noijki miak xiuitl omotlatijtinemiaya porque okinekiayaj kimiktiskej. Pero ye okijto Jehová okipaleui mapaki maski otlajyoui miak. Okijto: “Amitlaj kinpoloua akinmej kimauiliaj” (Sal. 34:​9, 10). ¿Tleka ijkon okijto? Porque ye okimatiaya Jehová nochipa techmaka tlen moneki maski kitekauilia matitlajyouikan (Sal. 145:16). Tejuan tipakij ijkon ken David opakik porque tikmatij Jehová techpaleuis maski san tlen tlamantli tikixnamikiskej.

17. ¿Tleka tiknekij tipakiskej maski san tlen tlamantli tikixnamikiskej?

¹⁷ Jehová kineki matipakikan maski san tlen tlamantli tikixnamikiskej (Sal. 131:​1, 2). Axkan yotikitakej tlen techpaleuis matipakikan. Ikinon matimotlasojkamatikan, matiyetokan tiyolyamankej uan matimokuayejyekokan tlen kichiuas toTajtsin Dios. Ijkon tisejse uelis tikijtoskej: “Yinikmati nipakis maski san ken niyetos” (Filip. 4:11).