¿Ken techpaleuia Jehová matitlaxikokan ijkuak itlaj tikixnamikij?

1. ¿Tleka moneki matitlaxikokan uan akin uelis techpaleuis? (1 Pedro 5:10).

TIKATEJ itlamian tonalmej ikinon tinochtin tikixnamikij miak tlamantli. Sekimej tokniuan sapanoua mokokouaj, sekimej moyolkokouaj porque oixpoliuik akin okitlasojtlayaj, oksekimej kinmixnamikij infamiliares noso tekiuajkej (Mat. 10:​18, 36, 37). Ikinon moneki matitlaxikokan uan matikneltokakan Jehová techpaleuis ijkon matikchiuakan (xiktlajtolti 1 Pedro 5:10).

2. ¿Akin techpaleuia matitlaxikokan?

² Titlaxikoskej kijtosneki amo matikkauakan Jehová uan matipakikan tiktekichiuiliskej maski titlajyouiskej. Noijki kijtosneki matitlaxikokan ijkuak techtlajyouiltiaj uan ijkuak itlaj techyoltilana. Tejuan san toselti amo uelis titlaxikoskej. San Jehová uelis techpaleuis ika ichikaualis “tlen amikaj uelis kipias” (2 Cor. 4:7). Axkan tikitaskej naui tlamantli tlen kinejneki Jehová para techpaleuis matitlaxikokan uan tikitaskej ken uelis ika timopaleuiskej.

MATIKTLATLAUJTIKAN TOTAJTSIN DIOS

3. ¿Tleka tikijtouaj se milagro ueli tiktlatlaujtiaj toTajtsin Dios?

³ Jehová techkauilia matiktlatlaujtikan para matikiluikan matechpaleui. Techkauilia iuan matimotlapouikan maski titlajtlakolejkej (Heb. 4:16). Tejuan uelis tiktlatlaujtiskej Jehová maski san tlen hora tiknekiskej, maski san tlen tlamantli tikiluiskej, maski san tlen tlajtoli titlajtouaj, maski san kanin tiyetoskej, maski techtsakuaskej noso maski toselti tiyetoskej (Jon. 2:​1, 2; Hech. 16:​25, 26). Ye techajsikamati ijkuak amo tikmatij tlen tikiluiskej ijkuak sapanoua timotekipachouaj (Rom. 8:​26, 27). Melauak se milagro ueli tiktlatlaujtiaj toTajtsin Dios.

4. ¿Ken tikmatij Jehová uelis techpaleuis matitlaxikokan?

⁴ ITlajtol toTajtsin Dios kijtoua ye “techkaki maski san tlen tlamantli tiktlajtlaniliskej tla ijkon ken ye kineki” (1 Juan 5:14). Nin techititia uelis tikiluiskej Jehová matechpaleui matitlaxikokan porque mouika iuan itlanekilis. ¿Ken tikmatij techpaleuis? Porque Biblia kijtoua Jehová uelis kinankilis akin kipinauia tla titlaxikouaj (Prov. 27:11). Noijki kijtoua kineki “kinpaleuis akinmej ixpan kipiaj ajsitok inyolo” (2 Crón. 16:9). Matikneltokakan Jehová uelis techpaleuis porque kipia chikaualistli uan ika nochi iyolo kineki ijkon kichiuas (Is. 30:18; 41:10; Luc. 11:13).

5. ¿Ken timoyolseuiaj ijkuak tiktlatlaujtiaj toTajtsin Dios? (Isaías 26:3).

⁵ Biblia kijtoua matikiluikan Jehová tlen techtekipachoua uan ijkon iyolseuilis ‘tlen amikaj kajsikamati kimaluis toyolo uan totlayejyekol’ (Filip. 4:7). Sapanoua tiktlasojkamatiliaj toTajtsin Dios techpaleuia matitlaxikokan. Ijkuak itlaj kixnamikij akinmej amo kitekichiuiliaj Jehová, kitemouaj miak tlamantli para moyolseuiskej. Pero okachi techpaleuia iyolseuilis toTajtsin Dios ijkuak tikiluiaj matechpaleui. Tejuan tikneltokaj Jehová kimaluis totlalnamikilis uan toyolo porque ye nochipa techyolseuia (xiktlajtolti Isaías 26:3). Ye techinmilnamiktia textos tlen techititiaj techtlasojtla uan kineki techpaleuis ika nochi iyolo (Sal. 62:​1, 2).

6. ¿Tlen uelis tikiluiskej toTajtsin Dios ijkuak tiktlatlaujtiskej? (Noijki xikita foto).

⁶ ¿Ken techpaleuis? Ijkuak tiktlatlaujtiaj Jehová imak matikkauakan totlamamal uan noijki matikiluikan matechyolseui (Sal. 55:22). Matikiluikan matechmaka ixtlamatilistli para tikmatiskej tlen tikchiuaskej (Prov. 2:​10, 11). Noijki matiktlasojkamatilikan ijkuak tiktlatlaujtiaj matechpaleui matitlaxikokan (Filip. 4:6). Matikitakan ken techpaleuia ijkuak itlaj tikixnamikij uan matiktlasojkamatilikan porque techpaleuia. Noijki matikitakan ken techteochiua uan amo san matikitakan tlen tlamantli tikixnamikij (Sal. 16:​5, 6).

TOTAJTSIN DIOS OTECHMAKAK ITLAJTOL

7. ¿Ken techpaleuia iTlajtol toTajtsin Dios matitlaxikokan?

⁷ Jehová otechmakak iTlajtol ika matimopaleuikan. Ompa ijkuilitok miak tlamantli tlen techititia Jehová techpaleuia. Matikitakan tleka ijkon tikijtouaj. Mateo 6:8 kijtoua: “ToTajtsin Dios yikimati tlen namechpoloua maski ayamo nankitlajtlaniliaj”. Jesús okinmijto ninmej tlajtolmej porque ye okachi kuali kixmati Jehová. Ikinon matikneltokakan Jehová techpaleuis ijkuak titlajyouiskej. Biblia techiluia miak tlamantli kualtsin tlen kichiuas toTajtsin Dios uan non techpaleuia matitlaxikokan (Sal. 94:19).

8. (1) Xikijto se principio bíblico tlen techpaleuia matitlaxikokan uan xikyekijto tleka. (2) ¿Tlen techpaleuis matikinmilnamikikan principios bíblicos ijkuak itlaj tikixnamikiskej?

⁸ ITlajtol toTajtsin Dios kinpia miakej principios tlen techpaleuiaj matitlaxikokan. Nonmej principios sapanoua miak inpati porque techpaleuiaj kuali matikpejpenakan tlen tiknekij tikchiuaskej (Prov. 2:​6, 7). ITlajtol toTajtsin Dios kijtoua matechtekipacho tlen panoua sejse tonal uan amo matechtekipachojto tlen satepan panos (Mat. 6:34). Nochipa matiktlajtoltikan Biblia uan matimokuayejyekokan tlen kijtoua porque non techpaleuis matikinmilnamikikan principios ijkuak itlaj tikixnamikiskej.

9. ¿Ken techpaleuis tla timokuayejyekoskej tlen okichijkej akinmej yiuejkika okitekichiuilijkej Jehová?

⁹ Biblia kijtoua Jehová okinpaleui akinmej okineltokakej kinpaleuiskia uan ye ijkon okichi (Heb. 11:​32-34; Sant. 5:17). Ijkuak timokuayejyekouaj tlen okichijkej akinmej okitekichiuilijkej Jehová, okachi tikneltokaj ye “techpaleuia uan techyolchikaua, san niman techpaleuia ijkuak tikpiaj ouijkayotl” (Sal. 46:1). Tejuan noijki tikchiuaskej ijkon ken akinmej yiuejkika okatkaj tla timokuayejyekouaj ken otlaneltokakej uan ken otlaxikojkej (Sant. 5:​10, 11).

10. ¿Ken uelis okachi techpaleuis iTlajtol toTajtsin Dios?

¹⁰ ¿Ken techpaleuis? Nochipa matiktlajtoltikan iTlajtol toTajtsin Dios uan matikinmijkuilokan textos tlen techpaleuiskej ijkuak monekis. Miakej tokniuan mojmostla kitlajtoltiaj amatlajkuilol Nochipa matimomachtikan iTlajtol toTajtsin Dios porque sapanoua kinyolchikaua texto tlen motlajtoltia non tonal. Ijkon okijto se tokni itoka Marie.a Tepajti okilui ipapanuan okipiayaj cáncer. Ye okinmalui ome metstli uan oixpolikej. Marie okijto tlen okipaleui matlaxiko. Ye okijto: “Mojmostla oniktlajtoltiaya amatlajkuilol Nochipa matimomachtikan iTlajtol toTajtsin Dios uan onimokuayejyekouaya ken nechpaleuiskia. Non onechpaleuiaya manikita tlen kichiuas Jehová uan amo san manikita tlen onechpanotoka” (Sal. 61:2).

TOKNIUAN TECHPALEUIAJ

11. ¿Ken timoyolchikauaj ijkuak tikmatij tokniuan noijki kixnamikij miak tlamantli?

¹¹ Ipan nochi tlaltikpak tikinpiaj tokniuan tlen techpaleuiaj matitlaxikokan. Timoyolchikauaj ijkuak tikmatij “nochtin tokniuan ipan tlaltikpak noijki ijkon tlajyouijtokej” (1 Ped. 5:9). ¿Tleka? Porque yejuan noijki kixnamikij miak tlamantli ijkon ken tejuan. Yejuan tlaxikouaj maski san tlen tlamantli kixnamikiskej uan tejuan noijki uelis ijkon tikchiuaskej (Hech. 14:22).

12. ¿Ken uelis timosepanyolchikauaskej? (2 Corintios 1:​3, 4).

¹² Tokniuan sapanoua techyolchikauaj. Apóstol Pablo ijkon okijto ijkuak otsaktoka ikalijtik. Miakej tokniuan okipaleuijkej uan itech cartas tlen okinmijkuilo okintlali intoka uan okintlasojkamatili porque okiyolchikajkej (Filip. 2:​25, 29, 30; Col. 4:​10, 11). Axkan tokniuan noijki techpaleuiaj matitlaxikokan ijkuak titlajyouiaj uan tejuan noijki uelis tikinpaleuiskej ijkuak monekis (xiktlajtolti 2 Corintios 1:​3, 4).

13. ¿Tlen okipaleui Maya matlaxiko?

¹³ Matikitakan ken okipaleuijkej tokniuan se tokni itoka Maya tlen ichan Rusia. 2020 sekimej policías uan tekiuajkej okalakitoj ikalijtik uan okitlatemolijkej. Satepan okiuikakej ixpan tribunal para makijto tlen kineltoka. ¿Ken okipaleuijkej tokniuan? Ye okijto: “Se tonal ijkuak onikmachili ayakmo nitlaxikoskia, tokniuan onechnotskej, onechtlajkuililijkej uan onechiluijkej sapanoua nechtlasojtlaj”. Noijki okijto: “Nochipa onikmatiaya nikpia se nofamilia sapanoua ueyi uan nechtlasojtlaj pero desde 2020 ne noneuian onikitak melauak nechtlasojtlaj”.

14. ¿Tlen moneki tikchiuaskej tla tiknekij matechpaleuikan tokniuan? (Noijki xikita foto).

¹⁴ ¿Ken techpaleuis? Matiyetokan inuan tokniuan ijkuak titlajyouiskej. Amo matikilkauakan uelis tikinmiluiskej tlayekankej matechpaleuikan porque yejuan katej “ken itlaj kanin ikaj motlatis ijkuak ejeka uan kanin ikaj motlatis ijkuak chikauak ejekakiaui” (Is. 32:2). Matikilnamiktokan tokniuan noijki kixnamikij miak tlamantli. Ikinon matikinpaleuikan ijkuak moneki. Non techpaleuis amo san matikitakan tlen techpanotok uan matitlaxikokan maski titlajyouiaj (Hech. 20:35).

TIKCHIAJ TIKSELISKEJ TLEN YOKIJTO KICHIUAS TOTAJTSIN DIOS

15. ¿Tlen okipaleui Jesús matlaxiko uan ken uelis noijki techpaleuis? (Hebreos 12:2).

¹⁵ Jehová techiluia tlen kichiuas satepan uan non techpaleuia matitlaxikokan ijkuak titlajyouiaj (Rom. 15:13). Matikilnamiktokan Jesús otlaxiko ijkuak okatka nikan tlaltikpak porque okilnamiktoka tlen kiseliskia (xiktlajtolti Hebreos 12:2). Ye okilnamiktoka tlapaleuiskia mamochipaua itoka iTajtsin tla amo keman kikauaskia. Noijki okinekiaya mokopas iluikak iuan iTajtsin uan noijki okinekiaya maajsi tonal ijkuak peuas tlanauatis iuan ikniuan tlapejpenalmej. Tejuan noijki techpaleuis matitlaxikokan tla tikilnamiktokej toTajtsin Dios kineki matichantikan itech xochitlali. Non techpaleuis maski tikixnamikiskej miak tlamantli itech nin tlaltikpak tlen Satanás kinauatia.

16. ¿Tlen okipaleui se tokni matlaxiko uan ken techpaleuia tlen okijto?

¹⁶ Se tokni itoka Alla tlen chanti Rusia okijto okipaleui matlaxiko ijkuak omokuayejyeko tlen kichiuas toTajtsin Dios. Inamik okinotsatoj ikalijtik uan okitsakuatoj ijkuak ayamo okixkomakayaj. Ye okijto: “Nechyolchikaua nimotlatlaujtis uan nimokuayejyekoua tlen toTajtsin Dios yokijto tikseliskej. Ne nikmati amo nochipa titlajyouiskej. Jehová tlatlanis uan tejuan noijki titlatlaniskej”.

17. ¿Ken uelis tikteititiskej tikpatioitaj tlen kichiuas toTajtsin Dios? (Noijki xikita foto).

¹⁷ ¿Ken techpaleuis? Matimajxilikan timokuayejyekoskej tlen yokijto kichiuas toTajtsin Dios. Matimokuayejyekokan yitikatej itech xochitlali uan yitikpiaj nochi tlateochiualistli tlen yokijto toTajtsin Dios techmakas. Non techpaleuis matikilnamiktokan ‘tlen tikijyouiaj amo uejkauas uan amitlaj ipati’ (2 Cor. 4:17). Noijki matikintlapouikan oksekimej tlen tikneltokaj. Matimokuayejyekokan ken momachiliaj akinmej amo kitekichiuiliaj toTajtsin Dios. Yejuan noijki kixnamikij miak tlamantli pero yejuan amo kimatij tlen kichiuas Jehová. Ikinon matikintlapouikan tlen kichiuas maski amo tikinmiluiskej miak tlamantli.

18. ¿Tleka uelis tikneltokaskej tlen kichiuas toTajtsin Dios?

¹⁸ Job otlaxiko ijkuak otlajyoui uan okijto: “Axkan yinikmati te nochi ueli tikchiua uan ueli tikchiua nochi tlen timokuayejyekoua” (Job 42:2). Job okajsikamatki amikaj uelis kiluis Jehová amo makichiua tlen ye kineki. Non techpaleuia matitlaxikokan ijkuak titlajyouiaj. Matimokuayejyekokan se siuatl sapanoua mokokoua. Ye moyolkokoua porque yokinmitato miakej tepajtijkej uan amikaj ueli kipaleuia. Pero se tonal okitato se tepajti tlen uelis kipaleuiskia. Non tepajti okitak tlen kokolistli kipia uan okilui tlen kipaleuiskia amo okachi mamokoko. Omoyolseui porque tepajti okilui uelis pajtis. Tejuan noijki matitlaxikokan porque tikneltokaj tichantiskej itech xochitlali ijkon ken yokijto toTajtsin Dios.

19. ¿Tlen techpaleuis matitlaxikokan?

¹⁹ Axkan otikitakej naui tlamantli tlen Jehová kinejneki para techpaleuis matitlaxikokan. Techkauilia matiktlatlaujtikan, otechmakak iTlajtol, techpaleuiaj tokniuan uan tikchiaj tikseliskej tlen yokijto kichiuas. Matimochijchikauakan matiknejnekikan nochi nin tlamantli tlen Jehová techmaka. Ijkon ye techpaleuis matitlaxikokan hasta ijkuak kipojpolos nochi tlen kiyekana Satanás uan ijkuakon ayakmo itlaj tikixnamikiskej (Filip. 4:13).