Matikinpaleuikan akinmej kinekij momachtiskej

1. ¿Tlen peua kichiuaj sekimej ijkuak tikintlapouiaj? (Hech. 13:​47, 48; 16:​14, 15).

ACHTO siglo miakej opejki momachtiaj ijkuak okintlapouijkej tlen kijtoua iTlajtol toTajtsin Dios (xiktlajtolti Hechos 13:​47, 48; 16:​14, 15). Axkan noijki miakej peua momachtiaj ijkuak tikinmatiltiaj kuali tlajtoli. Miakej amo techkakij pero satepan peua momachtiaj porque kinekij okachi kixmatiskej toTajtsin Dios. ¿Tlen tikchiuaskej tla tikinmajsiskej akinmej kinekij momachtiskej?

2. ¿Tleka ijkuak titetlapouiaj yetoskia ken ijkuak itlaj tikmotokiaj?

² Ijkuak titetlapouiaj yetoskia ken ijkuak itlaj tikmotokiaj. San niman tiktekij tlakilotl tlen yochikauak pero ok tikmaluiaj tlakilotl tlen ayamo chikaua. Noijki ijkon panoua ijkuak titetlapouiaj. San niman matikinpaleuikan akinmej kinekij okachi kimatiskej tlen tlamachtia iTlajtol toTajtsin Dios (Juan 4:​35, 36). Tla tiixtlamatkej san niman tikitaskej akinmej okachi moneki tikinpaleuiskej. Ikinon axkan tikitaskej tlen tikchiuaskej ijkuak timotlapouiskej inuan akinmej kinekij okachi kimatiskej tlen tlamachtia iTlajtol toTajtsin Dios. Noijki tikitaskej ken uelis tikinpaleuiskej mamouikakan iuan Jehová uan makiueyichiuakan.

AKINMEJ KINEKIJ OKACHI KIMATISKEJ TLEN TLAMACHTIA ITLAJTOL TOTAJTSIN DIOS

3. ¿Tlen tikchiuaskej tla tikinmajsij akinmej kinekij okachi kimatiskej tlen tlamachtia iTlajtol toTajtsin Dios? (1 Corintios 9:26).

³ San niman matikinpaleuikan akinmej kinekij okachi kimatiskej tlen tlamachtia iTlajtol toTajtsin Dios. Matikinmiluikan kox kinekij matikinmachtikan uan matikinmiluikan touan mamonechikotij (xiktlajtolti 1 Corintios 9:26).

4. Xikyekijto tlen okichi se ichpochtli.

⁴ Matikinmiluikan kox kinekij matikinmachtikan. Sekimej san niman kinekij momachtiskej ijkuak tikintlapouiaj. Matikitakan tlen opanok ompa Canadá. Se jueves se ichpochtli omotoki itech carrito uan okonanki amatlajkuilol Tiyoltos uan tiyolpakis. Tokni tlen ompa okatka okiyekilui uelis kimachtiskia uan amitlaj kitlaxtlauaskia. Ichpochtli okijto okachi okinekiaya kimatis uan okimopanoltilijkej innúmero. Non tonal ichpochtli okitlajkuilili tokni kox kimachtiskia. Tokni okilui uelis kimachtiskia itlamian semana. Pero ichpochtli okilui kox uelis kimachtiskia mostlatika. Mostlatika opejki momachtiaj uan itlamian semana ichpochtli omonechikoto. Noijki opejki okachi mouika iuan Jehová.

5. ¿Tlen moneki tikilnamiktoskej ijkuak tikinmiluiaj oksekimej kox kinekij matikinmachtikan? (Noijki xikinmita fotos).

⁵ Amo nochtin techkakij ijkon ken ichpochtli tlen opejki momachtia. Matikilnamiktokan ualeua moneki achto tikintlapouiskej tlen yejuan kintekipachoua uan satepan xamo kinekiskej kikakiskej iTlajtol toTajtsin Dios. Xamo satepan kinekiskej matikinmachtikan tla tikteititiaj techtekipachoua tlen kinpanoua. ¿Tlen uelis tikinmiluiskej para makinekikan matikinmachtikan? Matikitakan tlen okijtojkej sekimej tokniuan tlen kuali tlamachtiaj.

6. ¿Tlen uelis tikinmiluiskej akinmej tikintlapouiaj tla tiknekij oksepa tikintlajpalotiuij?

⁶ Sekimej tokniuan uan sekimej precursores okiyekijtojkej itech seki altepemej amo matikinmiluikan tiknekij tikinmachtiskej. Okachi kuali matikinmiluikan tiknekij inuan timotlapouiskej noso uelis okachi kimatiskej tlen kijtoua iTlajtol toTajtsin Dios. Tla tiknekij oksepa inuan timotlapouiskej, matikinmiluikan iTlajtol toTajtsin Dios technankilia tlen timotlajtlaniaj noso uelis tikinmiluiskej amo san techiluia ken moneki tikueyichiuaskej toTajtsin Dios. Noijki techiluia tlen techpaleuis kuali matiyetokan. Noijki matikinmiluikan akinmej tikintlapouiaj uelis kimatiskej miak tlamantli san ipan kanaj majtlaktli noso quince minutos. Amo matikinmiluikan chichikometika tiaskej tikintlajpalotiuij. Ijkon amo tikinsotlauaskej uan amo techiluiskej amo kinekij momachtiskej.

7. ¿Keman peua okachi mouikaj personas iuan Jehová? (1 Corintios 14:​23-25).

⁷ Matikinmiluikan touan mamonechikokan. Ijkuak okatka apóstol Pablo miakej okimatiayaj tlen melauak tlamachtiaj iTlajtol toTajtsin Dios ijkuak omonechikouayaj (xiktlajtolti 1 Corintios 14:​23-25). Axkan miakej noijki ijkon kinpanoua. Personas okachi peua mouikaj iuan Jehová ijkuak monechikouaj. ¿Keman moneki tikinmiluiskej touan mamonechikotij akinmej otikintlapouijkej? Libro Tiyoltos uan tiyolpakis tlamachtil majtlaktli kijtoua tleka moneki matikinmiluikan touan mamonechikotij akinmej tikintlapouiaj. Pero amo matikchiakan tikinmiluiskej hasta ijkuak timomachtiskej non tlamachtil. Uelis tikinmiluiskej touan mamonechikokan itlamian non semana. Matikinmiluikan tlen tlamachtil kitemakaskej non tonal uan tlen timomachtiskej itech revista Akin Tetlapouijtok.

8. ¿Tlen uelis tikinyekiluiskej akinmej tikinmiluiaj touan mamonechikokan? (Isaías 54:13).

⁸ Ijkuak tikinmiluiskej oksekimej touan mamonechikokan, matikinyekiluikan tejuan amo tikchiuaj ijkon ken okseki religiones tlen kinmixmatij. Se tonal se siuatl omonechikoto ijkuak timomachtiaj revista Akin Tetlapouijtok. Satepan non siuatl okitlajtlani tokni tlen okimachtiaya kox akin kiyekana tlamachtil kimati nochtin ken motokayotiaj. Tokni okiyekilui tokniuan yetoskiaj ken tofamilia ikinon timochijchikauaj tikmatiskej ken intoka. Non siuatl okilui tokni kanin ye omonechikouaya amikaj kimati ken motokayotiaj akinmej ompa monechikouaj. Miakej amo kimatij tleka timonechikouaj ikinon moneki tikinyekiluiskej (xiktlajtolti Isaías 54:13). Matikinmiluikan timonechikouaj porque tiknekij tikueyichiuaskej Jehová, tiknekij okachi tikixmatiskej uan tiknekij timosepanyolchikauaskej (Heb. 2:12; 10:​24, 25). Tejuan timonechikouaj para timomachtiskej uan amo para tikchiuaskej okseki tlamantli (1 Cor. 14:40). Timomachtiaj kanin timonechikouaj ikinon kualtsin tlaxotlatok uan amo tlayoua. Noijki amo titlajtouaj itech política porque amo ompa timokajkalakiaj nion tikpaleuiaj se partido. Amo timokualaniaj kanin timonechikouaj nion timotsatsajtsiliaj. Uelis tikinmititiskej video ¿Ken tikchiuaj tonechikoluan? para okachi makajsikamatikan tlen tikchiuaj ijkuak timonechikouaj.

9, 10. ¿Ken uelis tikinpaleuiskej kuali mamomachilikan akinmej otikinmiluijkej touan mamonechikokan? (Noijki xikita foto).

⁹ Miakej amo kinekij touan monechikoskej porque momojtiaj makinmiluikan mamochiuakan iTlaixpantijkauan Jehová. Ikinon matikinmiluikan amikaj kinmiluis mamochiuakan iTlaixpantijkauan Jehová ijkuak kikakitiuij tlen timomachtiaj nion ikaj kinmiluis matlanankilikan. Kanin timonechikouaj san sekan timomachtiaj uan amo oksekan kintlaliaj konemej ikinon san sekan motlaliaj familias. Ijkon tetajmej kimatij kanin katej inkoneuan uan tlen momachtijtokej (Deut. 31:12). Amo tiktlajtlanij tomin porque Jesús okijto: “Amo onankitlaxtlajkej tlen onankiselijkej ikinon noijki ijkon xiktemakakan” (Mat. 10:8). Noijki matikinmiluikan amo moneki kimotlaliliskej tlakemitl tlen okachi patio porque toTajtsin Dios kita tlen onka toyolipan uan amo san kitok ken timotaj (1 Sam. 16:7).

¹⁰ Kuali matikinselikan akinmej touan monechikotiuij para kuali mamomachilikan. Matikinpaleuikan makinmixmatikan tlayekankej uan oksekimej tokniuan. Ijkon xamo oksepa touan monechikoskej. Tla amo kipiaj inBiblia, matikinmititikan textos itech toBiblia para makitakan tlen timomachtijtokej.

IJKUAK PEUA TIKINMACHTIAJ AKINMEJ TIKINTLAPOUIAJ

11. ¿Tlen techpaleuis matikilnamiktokan amo nochipa majxiliaj akinmej tikinmachtiaj?

¹¹ ¿Tlen moneki tikilnamiktoskej ijkuak peuas tikinmachtiskej oksekimej? Matikilnamiktokan amo nochipa majxiliaj. Ikinon tla yotimokajkej tlen hora tikinmachtitiuij, non hora matiajsitij maski amo ijkon kichiuaj kanin tichantij. Amo matiuejkauakan ijkuak peuas tikinmachtiskej. Sekimej tokniuan tlen kuali tlamachtiaj okijtojkej san matikinmachtikan ijkon ken otimokajkej maski kinekiskej okachi matikinmachtikan. Noijki amo san tejuan matitlajtokan ijkuak tikinmachtiaj (Prov. 10:19).

12. ¿Tlen moneki tikchiuaskej ijkuak peuas tikinmachtiskej oksekimej?

¹² Ijkuak peuas tikinmachtiskej oksekimej, matikinpaleuikan makinmixmatikan Jehová uan Jesús uan noijki makintlasojtlakan. Matikinmachtikan tlen kijtoua iTlajtol toTajtsin Dios uan amo san matikinmiluikan tlen tejuan timokuayejyekouaj (Hech. 10:​25, 26). Apóstol Pablo otlamachtiaya akin Jesucristo tlen Jehová okiualtitlanki para matechpaleui okachi matikixmatikan uan matiktlasojtlakan (1 Cor. 2:​1, 2). Pablo noijki okiteititi miak ipati matikinpaleuikan akinmej peua tikinmachtiaj makipiakan kuali inyelis tlen yetoskia ken oro, plata uan temej kuajkualtsitsintin (1 Cor. 3:​11-15). Matikinpaleuikan matlaneltokakan, mayetokan ixtlamatkej, makimatikan tlen kuali uan tlen amo kuali uan makimauilikan Jehová (Sal. 19:​9, 10; Prov. 3:13-15; 1 Ped. 1:7). Noijki matikinpaleuikan akinmej tikinmachtiaj makipiakan chikauak intlaneltokilis uan kuali mamouikakan iuan toTajtsin Dios (2 Cor. 1:24).

13. ¿Ken uelis tikteititiskej amo san niman timosotlauaj uan tikinmajsikamatij akinmej tikinmachtiaj? (2 Corintios 10:​4, 5). (Noijki xikita foto).

¹³ Matitlamachtikan ijkon ken Jesús otlamachti. Ye kuali otlamachti porque okimatiaya mochias uan oteajsikamatiaya. Ijkuak tikinmachtiskej amo matikintlajtlanikan tlen amo moneki tikmatiskej. Tla itlaj amo kajsikamatij, amo ompa matikojpauijtoka porque satepan uelis oksepa timomachtiskej non tlamachtil. Tla kitaj oui kineltokaskej tlen tikinmachtijtokej, amo matikinmiluikan moneki kineltokaskej tlen tejuan tikneltokaj. Okachi kuali matimochiakan maajsi inyolipan uan satepan xamo tlaneltokaskej (Juan 16:12; Col. 2:​6, 7). Biblia kijtoua tlen amo melauak tlamachtiaj oksekimej yetoskia ken se chikauak tepamitl tlen moneki tikxixiniskej (xiktlajtolti 2 Corintios 10:​4, 5). Pero moneki achto tikinpaleuiskej makineltokakan Jehová uan ijkon kikauaskej tlen achto okineltokayaj (Sal. 91:9).

AKINMEJ YIKIN PEUA TOUAN MONECHIKOUAJ

14. ¿Ken moneki tikinseliskej akinmej yikin peua touan monechikouaj?

¹⁴ Jehová kineki matikintlasojtlakan akinmej yikin peua touan monechikouaj uan amo matikinchikoitakan porque okse tlamantli motaj, amo matechtekipacho kox kipiaj tomin nion matikitakan kanin uitsej (Sant. 2:​1-4, 9). Matikitakan ken uelis tikteititiskej tikintlasojtlaj.

15, 16. ¿Tlen tikchiuaskej para kuali mamomachilikan akinmej yikin peua monechikouaj?

¹⁵ Sekimej yauij touan monechikotiuij porque kinekij kimatiskej tlen tikchiuaj noso ikaj okinmilui mayakan. Ikinon matikintlajpalokan uan kuali matikinselikan. Matikinselikan ken moneki uan amo matikijtokan itlaj tlen uelis kichiuas amo kuali mamomachilikan. Matikinmiluikan touan mamotlalikan. Matikinmakakan se Biblia uan amatlajkuilol tlen timomachtijtokej noso matikintlanetikan tlen tejuan toaxka. Matimokuayejyekokan ken uelis tikinpaleuiskej kuali mamomachilikan. Matikitakan tlen okipanok se tlakatl. Ye oyajki kanin timonechikouaj uan okijto omotekipachouaya porque amo omotlakenti ken omonekiaya. Tokni tlen okiseli okilui amo mamotekipacho porque tiiTlaixpantijkauan Jehová noijki tikatej ijkon ken oksekimej. Satepan non tlakatl omoapolakti uan amo keman okilka tlen tokni okilui. Moneki kuali tikinseliskej akinmej yauij touan monechikotiuij pero amo matikintlajtlanikan tlen amo moneki tikmatiskej (1 Ped. 4:15).

¹⁶ ¿Tlen okseki tlamantli moneki tikchiuaskej para kuali tikinseliskej akinmej yikin peua monechikouaj? Matiktlakaitakan tlen kineltokaj akinmej amo kitekichiuiliaj toTajtsin Dios. Ikinon amo matikinteneuakan ijkuak timotlapouiaj inuan oksekimej, ijkuak titlanankiliaj noso ijkuak tikpanoltiaj se tlamachtil. Amo matikijtokan tlen uelis kinyolkokos uan ayakmo oksepa touan monechikoskej (Tito 2:8; 3:2). Amo matikijtokan amitlaj ipati tlen kineltokaj oksekimej (2 Cor. 6:3). Tokniuan tlen nochipa tlamachtiaj itlamian semana moneki momaluiskej para amo kijtoskej amitlaj ipati tlen oksekimej kineltokaj. Yejuan moneki kiyekijtoskej tlen yitikmatij uan ijkon kiteititiskej kinekij makajsikamatikan akinmej yikin peua monechikouaj.

17. ¿Tlen tikchiuaskej tla tikinmajsij akinmej mochijchikauaj “kiseliskej yolilistli tlen amo keman tlamis”?

¹⁷ Axkan okachi moneki matitetlapouikan porque ok tikinmajsij akinmej mochijchikauaj “kiseliskej yolilistli tlen amo keman tlamis” (Hech. 13:48). Ikinon tla tikitaj kinekij momachtiskej akinmej tikintlapouiaj, matikinmiluikan kox kinekij matikinmachtikan uan matikinmiluikan touan mamonechikokan. Ijkon tikinpaleuiskej manemikan “itech ojtli” tlen kinpaleuis satepan ‘nochipa mayoltokan’ (Mat. 7:14).