Okintlalijkej ome tokniuan mapouikan itech Cuerpo Gobernante
5 DE OCTUBRE 2024 itech toueyi nechikol tlen mochiua sejse xiuitl, otechiluijkej tokniuan Jody Jedele uan Jacob Rumph okintlalijkej mapouikan itech Cuerpo Gobernante tlen kipiaj iTlaixpantijkauan Jehová. Ninmej tokniuan yiuejkika kitekichiuiliaj Jehová.
Jody Jedele kajki iuan Dámaris.
Tokni Jody Jedele oneski ompa Misuri tlen poui Estados Unidos. Ipapanuan okimachtijkej makitekichiuili Jehová. Yejuan ochantiayaj kanin amo okatkaj miakej iTlaixpantijkauan Jehová. Ikinon, okinmixmatki miakej tokniuan tlen ochantiayaj itech nochi altepetl Estados Unidos porque ompa oyayaj tetlapouitiuij. Sapanoua okipaleui okitak ken mouikaj uan motlasojtlaj tokniuan. Tokni Jody omoapolakti 15 de octubre 1983 uan okipaktiaya tetlapouis. Ikinon ijkuak otlanki omomachti omochi precursor regular septiembre 1989.
Tokni Jody uan ikni nochipa oyayaj Betel porque inpapanuan okinuikayaj. Non okipaleui tokni Jody uan ikni makinekikan ompa tlapaleuiskej. Septiembre 1990 tokni Jody opejki tlapaleuia Betel tlen kajki Wallkill. Achto otlapaleui kanin tlachipauaj uan satepan otlapaleui kanin tlapajtiaj.
Ijkuakon ik ompa okatkaj tlanechikolmej ika español uan tokniuan omomiaktilijtokaj ikinon omonekiaya ompa matlapaleuikan telpochmej. Tokni Jody opejki tlapaleuia itech se tlanechikol ika español uan opejki momachtia non tlajtoli. Satepan okixmatki se precursora itoka Dámaris tlen otlapaleuiaya itech icircuito uan satepan iuan omonamikti. Noijki san sekan opejki tlapaleuiaj Betel.
2005 okiskej Betel porque omonekiaya kinmaluiskej inpapanuan. Pero yejuan ok otlapaleuijkej ken precursores regulares. Tokni Jody miak uelta otlamachti itech tlamachtil tlen kiseliaj precursores, okinpaleui tokniuan tlen motlapouiaj inuan akinmej tlapajtiaj uan noijki okinpaleui tokniuan tlen kijtouaj ken kinchijchiuaskej kalmej kanin timonechikouaj.
2013 oksepa okinyolejkej Betel pero okinmiluijkej tlapaleuiskiaj kanin okichijtokaj Betel tlen kajki Warwick. Noijki otlapaleuijkej Patterson uan Wallkill. Tokni Jody yotlapaleui itech LDC uan noijki iuan tokniuan tlen kitemouaj kanin mopajtiskej. Marzo 2023 opejki tlapaleuia kanin kiyekanaj tetlapouilistli. Ye okijto ken momachilia ijkuak kilnamiki ken yotlapaleui. Okijto: “Ualeua timotekipachouaj ijkuak techmakaj se yankuik tekitl pero miak ipati matikneltokakan Jehová techpaleuia porque ye uelis kichiuas san tlen ye kinekis”.
Jacob Rumph kajki iuan Inga
Tokni Jacob Rumph oneski California ompa Estados Unidos. Ijkuak okatka tsikitsin imama ayakmo otetlapouiaya pero omochijchika kimachtis tlen kijtoua Biblia. Sejse xiuitl oyaya kitlajpaloti iabuelita. Ye kuali okitekichiuiliaya Jehová uan non okipaleui tokni Jacob mamomachti Biblia. Ikinon ijkuak okipiaya 13 xiuitl okinmilui makimachtikan. Ye omoapolakti 27 de septiembre 1992 ijkuak ok okatka telpochtli. Satepan imama noijki opejki tetlapouia uan nochi ifamilia opejki kuali momachtiaj uan omoapolaktijkej.
Ijkuak tokni Jacob okatka telpochtli okinmitaya opakiayaj precursores regulares. Ikinon ijkuak otlanki omomachti opejki tlapaleuia ken precursor regular septiembre 1995. Satepan itech xiuitl 2000 oyajki otlapaleuito se altepetl tlen mokaua ik Ecuador kanin okachi omonekiaya mamotetlapoui. Ompa okixmatki se precursora tlen itoka Inga uan ichan Canadá. Satepan omonamiktijkej uan san sekan otlapaleuijkej itech se altepetsintli ompa Ecuador kanin amo otetlapouiayaj miakej tokniuan. Axkan itech non altepetsintli yikajki se tlanechikol.
Satepan okinyolejkej matlapaleuikan ken precursores especiales uan satepan opejki tlapaleuiaj itech circuito. 2011 okinmiluijkej makiselitij tlamachtil 132 tlen mochiua Galaad. Ijkuak otlanki omomachtijkej okintitlankej matlapaleuitij itech miakej altepemej. Yejuan otlapaleuijkej Betel, otlapaleuijkej ken misioneros uan otlapaleuijkej itech circuito. Tokni Jacob noijki otlamachtiaya itech Tlamachtil para matetlapouikan Tekiuajkayotl.
Ijkuak opejki kokolistli COVID-19 omokopkej Estados Unidos. Yejuan okinyolejkej matlapaleuikan Betel tlen kajki Wallkill. Ompa tokni Jacob okimachtijkej para matlapaleui kanin moyekana tetlapouilistli. Satepan okintitlankej Betel tlen kajki Ecuador uan ompa otlapaleui inuan akinmej tlayekanaj Betel. 2023 okintitlankej Betel tlen kajki Warwick uan enero 2024 tokni Jacob okiluijkej tlapaleuiskia iuan akinmej kiyekanaj tetlapouilistli. Tokni Jacob otlapaleui itech miakej altepemej ikinon ye okijto: “Tejuan tipakij tiktekichiuiliaj Jehová inuan tokniuan maski san kanin tiyetoskej”.
Sapanoua tikpatioitaj tekitl tlen kichiuaj ninmej tokniuan (Filip. 2:29).